Sa Tiko na iTuvatuva ni Turaga Baleti Keda!
Mai vei Elder Carlos A. Godoy
Ena Vitusagavulu
Kevaka eda na tomana tiko noda bula vakaoqo, ena yaco beka na veivakalougatataki e yalataki tu?
Sa dua na ka dokai meda mai tiki ni itukutuku ni veigauna mera vosa ena koniferedi raraba o ira eso ena nodra vosa ni vanua. Na iotioti ni gauna au a vosa ena itutu-ni-vunau oqo, au a lomaleqataka na irogorogo ni noqu vosa Vakavalagi. Oqo, au sa leqataka na totolo ni noqu vosa Vakapotukali. Au sega ni via vosa totolo cake mai na kena ivakadewa.
Eda sa sotava taucoko se da na sotava na veigauna ni vakatulewa cecere ena noda bula. Meu cakacaka vagumatua eke se na kena o ya? Meu laki kaulotu beka? Sai koya beka oqo e donu meu na vakamautaka?
Oqo na veika duidui ena noda ituvaki ni bula ka rawa ni yaco e dua na veisau lailai ni ilakolako me vakayaco-ka ni mataka. Mai na vosa nei Peresitedi Dieter F. Uchtdorf: “Ena loma ni veiyabaki ni veiqaravi ena vukuna na Turaga …, au sa vulica kina na duidui ni marau kei na rarawa ena bula ni tamata yadua, ena vakawati, kei na matavuvale e dau yaco ena dua na cala lailai sara ka vica walega na diqiri” (“E Dua na Ka ka Vica Walega na Diqiri,” Liaona, Me 2008, 58).
Meda na levea vakacava mai na ca lalai sa dikevi rawa?
Au na vakayagataka na ka au sotava meu vakamacalataka noqu itukutuku.
Ena mua ni yabaki 1980, a lewe ni noqu matavuvale lailai o watiqu, o Mônica, rua vei iratou na va na luvei keirau kei au. Keitou vakaitikotiko mai São Paulo, e Brazil, au cakacaka ena dua na kabani vinaka, kau a vakacavara na noqu vuli e univesiti, kau se qai vagalalataki mai na bisopi ni tabanalevu ni neitou itikotiko. A totoka na bula, ka taladrodro na veika ena kena dodonu—me yacova na siga a veisiko yani e dua na itokani vei keitou.
Ni sa oti nona veisiko, a kaya mai e dua na ka a vakayavalata na noqu vakasama. A kaya, “Carlos, sa vaka e vinaka na veika kece baleti iko, nomu matavuvale, nomu cakacaka, kei na nomu veiqaravi ena Lotu, ia—” a qai taroga mai, “kevaka mo na tomana tiko na nomu bula vakaoqo, ena yaco beka na veivakalougatataki a yalataki tu ena nomu veivakalougatataki vakapeteriaki?”
Au se bera mada ni vakasamataka vakaoqo na noqu veivakalougatataki vakapeteriaki. Au dau wilika ka wilika tale ia e sega ni inaki meu raica na veivakalougatataki e yalataki tu ki na veisiga ni mataka ka dikeva na noqu ilakolako ena gauna oqo.
Ni oti na nona veisiko, au raica na noqu veivakalougatataki vakapeteriaki, ka vakataroga, “Kevaka eda na tomana tiko na noda bula me vakaoqo, ena yaco beka na veivakalougatataki sa yalataki tu?” Ni oti noqu vakasamataka, au vakila ni sa dodonu me yaco eso na veisau, vakabibi ki na noqu vuli kei na cakacaka.
E sega ni vatulewa baleta na ka e dodonu se cala ia e baleta na ka e vinaka kei na ka e vinaka cake, me vaka e vakavulica o Elder Dallin H. Oaks ni a kaya: “Ena noda raica vata kece tiko, sa dodonu meda nanuma ni sega sara ni rauta me vinaka ga e dua na ka. Ka ni tu talega na kena e vinaka cake, ka vakakina eso era vinaka sara” (“Vinaka, Vinaka Cake, Vinaka Sara,” Liaona, Nove. 2007, 104–5).
Meda sa qai vakadeitaka vakacava ni da sa vakatulewa vinaka cake?
Oqo eso na ivakavuvuli au sa vulica mai.
iVakavuvuli Naba Dua: E Dodonu Meda Raica na Noda Digidigi kei na Kena iCavacava
Na vakatulewa e rawa ni yavalata noda bula kei ira eda lomana ka sega kina na rai baleta na kena revurevu ena rawa me kauta mai na leqa. Ia, kevaka meda tuvanaka na isau ni vakatulewa oqori ki na veisiga ni mataka, ena matata sara na noda raica na salatu vinaka sara meda muria tiko nikua.
Na noda kilai keda vakavinaka tiko, na vuna eda tiko kina oqo, kei na veika sa namaka tu vei keda na Turaga ena bula oqo ena vukea meda rawata na rai rabailevu eda gadreva.
Eda rawa ni raica na ivakaraitaki ena ivolanikalou baleta na rai rabailevu ni salatu meda na muria.
A veivosaki o Mosese kei na Kalou e matanavotu, vulica na veika ni ituvatuva ni veivakabulai, ka kila vinaka mai kina na nona ilesilesi vakaparofita ni nodra vakasokomuni na Isireli.
“A sa vosa na Kalou vei Mosese, ka kaya: Raica sai au na Turaga na Kalou Kaukauwa … .
“… Raica au na vakaraitaka vei iko na cakacaka ni ligaqu. … .
“Ia i Mosese na luvequ; au sa solia vei iko e dua na ilesilesi” (Mosese 1:3–4, 6).
Ena kila oqo, a vorata rawa kina o Mosese na vuqa na yabaki ni veivakatovolei ena vanua dravuisiga ka kauti ira lesu na Isireli ki nodra vanua.
O Liai, na parofita qaqa mai na iVola i Momani, a tadra e dua na tadra, ka raica kina o koya na nona ilesilesi me liutaki iratou nona matavuvale ki na vanua yalataki.
“A sa vakaroti tamaqu e na tadra na Turaga me kauta na nona matavuvale ka lako yani ki na lekutu.
“… A sa biuta tu mai na nona vale, na vanua e taukena, na nona koula, na nona siliva kei na nona iyau talei” (1 Nifai 2:2, 4).
A dina tikoga o Liai ki na nona tadra se vakacava sara na dredre ni ilakolako o ya ka sa biuta tu mai na bula vinaka mai Jerusalemi.
E dua tale na ivakaraitaki cecere na Parofita o Josefa Simici. Mai na vuqa na ivakatakila, vakatekivu ena iMatai ni Raivotu, a rawa vua me vakacavara na nona ilesilesi ni kena vakalesuimai na veika kece (raica na Josefa Simici—Ai Tukutuku 1:1–26).
Vakacava o keda? Na cava beka sa namaka tiko na Turaga vei keda yadua?
E sega ni gadrevi meda raica e dua na agilosi meda qai kila vakavinaka kina. Sa tu vei keda na ivolanikalou, valetabu, parofita bula, veivakalougatataki vakapeteriaki, iliuliu veivakauqeti, ka vakabibi ga, na dodonu meda ciqoma na ivakatakila vei keda yadua me dusimaka na noda vakatulewa.
iVakavuvuli Naba Rua: E Gadrevi Meda Vakavakarau ki na Bolebole Era na Yaco Mai
Na salatu vinaka duadua ni bula oqo e sega sara ni dau rawarawa. Sa dau yaco, me kena veibasai sara ga. Sa rawa meda raica nodra ivakaraitaki na parofita au se qai cavuta oti ga.
O Mosese, Liai, kei Josefa Simici a sega ni rawarawa na nodratou ilakolako veitalia ga ni a dodonu vinaka na nodratou vakatulewa.
Eda sa lomasoli beka meda volia na isau ni noda vakatulewa? Eda sa vakarau beka meda biuta na noda tiko vinaka meda yacova e dua na vanua vinaka cake?
Meu lesu ki na veika baleta na noqu veivakalougatataki vakapeteriaki, au sa lewa ena gauna o ya meu sa na tosoya na noqu vuli ka kere sikolasivi mai na dua na Univesiti e Amerika. Kevaka au sa digitaki, au sa na biuta na noqu cakacaka, volitaka na neitou veika kece, ka mai vakaitikotiko e Amerika meu gonevuli vakasikolasivi me rua na yabaki.
Na veitarogi me vakataka na TOEFL kei na GMAT e rau sa imatai ni bolebole me rawati. A taura e tolu vinaka na yabaki ni vakavakarau, vuqa na “sega,” kei na so na “rairai beka” ni bera meu tauri ena univesiti. Au se nanuma tikoga na qiri au a taura ena mua ni ikatolu ni yabaki mai vei koya e lewa tiko na sikolasivi.
A kaya, “Carlos, e tiko oqo na itukutuku vinaka kei na itukutuku ca. Na itukutuku e rogo vinaka ni ko dua vei iratou na iotioti ni tolu ena yabaki oqo.” E dua walega me curu ena gauna o ya. “Na irogo ca ni dua rau na digitaki o ya e dua e luvena e dua na tamata rogolevu, ka dua e luvena e dua tale na tamata rogo, sa qai o iko yani.”
Au a sauma vakatotolo “Ia oi au … au luve ni Kalou.”
E ka ni marau, na itubutubu vakavuravura a sega ni digitaki, kau a digitaki ena yabaki o ya, ena 1992.
Eda sa luvena na Kalou sa Cecere. O Koya na Tamada, e lomani keda, ka sa tiko Nona ituvatuva baleti keda. Eda sega ni mai bula tiko oqo meda mai vakaoti gauna, yacova na qase, ka mate. E gadreva na Kalou meda tubu ka rawata noda inaki.
Mai na vosa nei Peresitedi Thomas S. Monson: “Oi kemuni yadua, dawai se vakamau, yabaki ni bula cava ga, sa tiko na madigi mo vuli ka tubu. Vakarabailevutaka na nomu kila, ena ka vakavuli kei na ka vakayalo ki na taucoko ni ivakatagedegede ni nomu rawa-ka vakalou” (“The Mighty Strength of the Relief Society,” Ensign, Nove. 1997, 95).
iVakavuvuli Naba Tolu: E Dodonu Meda Wasea na Rai Oqo Vei Ira Eda Lomana
A saga vakavica o Liai me vukei rau o Leimani kei Lemueli me rau kila na bibi ni veisau e ratou sa cakava tiko. Ena vuku ni nodrau sega ni duavata ki na raivotu nei tamadrau a vakavuna me rau kudruvaka tiko na ilakolako o ya. Ena yasana ka dua, a kerea o Nifai vua na Turaga me raica na veika a raica o tamana.
“Ia niu sa rogoca na raivotu i tamaqu kei na veika sa tukuna, … au … sa gadreva talega me vakatakilai vei au na veika oqo ena kaukauwa ni Yalo Tabu” (1 Nifai 10:17).
Ena raivotu oqo, a rawata o Nifai sega walega me vorata na bolebole ia me liutaka talega na nona matavuvale ni sa gadrevi vakakina.
Sa na yaco ga ni da sa lewa meda muria e dua na sala, era na tarai na tamata eda lomana, ka so era na wasei ena isau ni noda digidigi. Vakakina, e dodonu me rawa ni ra raica na veika eda sa raica ka wasei ena noda dina oqo. E sega ni dau rawa oqo ena veigauna, ia ni yaco mai, ena rawarawa cake na ilakolako.
Ena noqu bula au sa mai vakayagataka e dua na ivakaraitaki, niu a gadreva dina na veitokoni nei watiqu. E ratou se gone sara na luvei keirau ka sega na ka me ratou tukuna, ia a ka bibi na veitokoni nei watiqu. Au nanuma kina, ena ivakatekivu, keirau a gadreva kei Mônica me veivosakitaki vakavinaka na veisau ni ituvatuva me yacova ni sa lomavinaka kina o koya ka dina kina. Na rai lomavata oqo a vakavuna me sega walega ni tokona na veisau oqo o koya ia a yaco talega me tiki bibi ni kena rawati.
Au kila ni sa tiko na ituvatuva ni Turaga baleti keda ena bula oqo. E kilai keda. E kila o Koya na ka vinaka duadua me noda. Ena vuku ga ni sa toso vinaka na bula e sega ni kena ibalebale meda kakua sara ni nanuma ena veigauna eso ni sega na veika e vinaka cake. Kevaka eda na tomana tiko noda bula vakaoqo, ena yaco beka na veivakalougatataki e yalataki tu?
E bula tiko na Kalou. O Koya na Tamada. E bula tiko na iVakabula o Jisu Karisito, kau kila ni Nona solibula veisorovaki eda na vakaukauwataki kina meda vorata rawa na noda bolebole ni veisiga. Ena yaca i Jisu Karisito, emeni.