Josefa Simici

Ena imatai ni nona veisiko ki na Parofita o Josefa Simici ni se qai yabaki 17, a kacivi Josefa ena yacana e dua na agilosi ka tukuna vua ni o koya, o Moronai, e sa dua na italai ka talai mai na itikotiko ni Kalou ka sa tiko vua na Kalou e dua na cakacaka me na cakava okoya. Raitayaloyalotaka na cava ena rairai vakasamataka o Josefa ena gauna a qai tukuna kina vua na agilosi ni yacana “ni na rogo na yacaqu vei ira na veimatanitu, veimataqali kei na duivosavosa.”¹ De dua na kidroa ena irairai kei Josefa a vakavuna me tokaruataka tale o Moronai ni na vosa vinakataki ka vosa cataki okoya mai vei ira na tamata kecega.²

Na vosa vinakataki i Josefa Simici a yaco mai vakamalua; na vosacataki a yaco kusarawa. A vola o Josefa, “Sa ka duatani sara me dua na gone tagane … mera qai kauwaitaka … ka vakauqeta sara vakabibi… mera sa sevaki au ka vorati au.”³

Ni tubu voli na taleitaki nei Josefa, sa vaka talega kina na vakacaca. Ena yabaki 38, e a labati mai na dua na ilawalawa ni 150 na turaga ka boro tu na matadra.⁴ Ni mai tini botoilevu tu na bula ni Parofita, na vosavinakataki kei na vosacataki i Josefa a se qai tekivu tiko.

E dodonu li meda kurabui ena nona vosa vakacacataki? A vakatokai na iApositolo o Paula me lialia ka veilecayaki.⁵ Na noda iVakabula Daulomani, na Luve ni Kalou, a vakatokai me tamata daukana, e dua na daumateni, ka curumi tevoro.⁶

Na Turaga a tukuna vei Josefa na nona iyacoyaco:

“Raica era na taroga na yacamu mai na iyalayala kei vuravura, ia era na vakalialiai iko ko ira na lialia, ka ra vorati iko na luvei eli;

“Ia ko ira na yalosavasava, … ira sa vuku, … kei ira sa itovo vakaturaga, era na vakabauta … na ivakaro era na vakalougatataki kina”⁷

Cava na vuna e vakatara kina na Turaga na vosa vakacaca me cemuria na vinaka? Dua na vuna oya na veisaqasaqa vata kei na veika ni Kalou e vakauti ira na dauvakasaqara na dina ki na durudra me baleta na isaunitaro eso.⁸

O Josefa Simici na Parofita ni Veivakalesui Mai. Na nona cakacaka vakayalo a tekivutaki ena rairai mai ni Tamada kei na Luvena, ka salamuria e vica vata tale na veisiko vakalomalagi. E a iyaya ni cakacaka okoya ena liga ni Kalou ena vakauti mai ni ivolanikalou tabu, ivunau sa yali, kei na vakalesui mai ni matabete. Na bibi ni cakacaka nei Josefa e gadreva e levu tale mai na navunavuci vakakilaka; e gadrevi kina meda, vakataki Josefa, “kerea vua na Kalou.”⁹ Na veitaro vakayalo e ganita na veisaunitaro vakayalo mai vua na Kalou.

Vuqa vei ira na vakatanitaka na cakacaka ni Veivakalesui Mai era sega ni vakabauta vakarawarawa ni ra vosa na tamata mai lomalagi kivei ira na tamata e vuravura. E sega ni rawa, era kaya, ni peleti koula a mai solia e dua na agilosi ka vakadewataki mai na kaukauwa ni Kalou. Mai na tawa vakabauta oya, era sega ni vakadonuya totolo sara na ivakadinadina i Josefa, ka ni rarawa ni so era saga mera vakatanitaka ka vakamaduataka na bula ni Parofita ka vakacacana na kena ituvaki.

Eda sa rarawa vakabibi ni dua na ka a dau dokai Josefa taumada me vakanadaku mai na nona veivakadeitaki ka qai vakalolovirataka na Parofita.¹⁰

“Na vulici ni Lotu … mai na matadra na kena dausorosorowale,” a tukuna ena dua na gauna o Elder Neal A. Maxwell, e sa “vakataka na vakatarogi tiko i Jiutasa me kilai Jisu vakamatata. Era dau tukuni ira vakalevu cake na dausorosorowale kivei keda me baleti ira mai na veika era a lako tani mai kina.”¹¹

A tukuna o Jisu, “Vosavinaka vei ira sa rukaki kemudou, … ka masulaki ira sa vakalialiai kemudou, ka vakacacani kemudou.”¹² Meda sa yalovinaka kivei ira na vakalewai Josefa Simici, ni da kila e lomada ni okoya a parofita ni Kalou ka yalovakacegu ni ka kece oqo a tukuna taumada o Moronai ena dua na gauna balavu sa oti.

Meda na sausaumi vakacava ki na dua na dauvakatataro maqusa ka sa kauwai me baleta na itukutuku veivakacacani e a rogoca se wilika me baleta na Parofita o Josefa Simici? Keimami ciqoma, ena veigauna kece na taro dina kei na yalovinaka.

Me tarogi na ituvaki ni bula i Josefa, eda sa rawa ni wasea na vosa ni udolu ka ra kilai koya vakatamata ka ra a solia na nodra bula me baleta na cakacaka a vukea okoya me tauyavutaka. O John Taylor, ka a lauvana vaka va mai na ilawalawa a vakamatei Josefa, a cauraka malua: “Au vakadinadinataka ena mata ni Kalou, agilosi, kei na tamata, ni o [Josefa] a dua na tamata vinaka, dokai, [ka] ivalavala dodonu— … [ka] sa sega ni vakalewai rawa na nona ituvaki ni bula raraba kei na bula vakaitaukei—ka ni a bula okoya ka mate me vaka e dua na tamata ni Kalou.”¹³

Sa rawa ni da vakananuma na dauvakatataro maqusa ni itukutuku ni Initaneti e sega ni tiko kina e dua na filita ni “ka dina”. Eso na itukutuku, se vakacava sara na kena veirawai, e sega saraga ni dina.

Ena vica na yabaki sa oti au a wilika ena mekasini na Time na itukutuku ka ripotetaka na kunei ni dua na ivola, ka kila kasamitaki ni a vola o Martin Harris, ka veicalati vata na itukutuku nei Josefa Simici me baleta na kunei ni peleti ni iVola i Momani.¹⁴

Eso na lewenilotu era biuta na Lotu baleta na ivola oya.¹⁵

E kani rarawa, ni ra a biubiu vakusakusa. Vica na vula emuri era a kunea na kenadau (ka tusanaka na daulawaki) ni ivola a veivakacalai vakaoti.¹⁶ Ko na rairai vakataroga na kila vakamatata ni ka o rogoca ena itukutuku eso, ia e sega ni dodonu mo vakatitiqataka na nodra ivakadinadina na parofita ni Kalou.

Sa rawa ni da vakananuma na dauvakatataro ni so na itukutuku baleti Josefa, ni ra dina, ena rairai vakatakilai vakatani taucoko ki na nona gauna vakaikoya kei na ituvaki.

A vakamacalataka na poidi oqo o Elder Russell M. Nelson. A kaya: “Au a veiqaravi voli vakadauveivosaki ki na matanitu o Amerika ena kena National Center for Disease Control e Atlanta, Georgia. Dua na gauna ni’u waraka voli na tekisi me kauti au ki na rara ni waqavuka ni sa cava na neimami bose, au a vakadre malua tu ena veico me’u vakila na katakata ni matanisiga ni bera ni’u lesu tale ki na draki batabata e Utah. … Au a ciqoma malua e dua na itaba ena meli ka a taura e dua na dauveitaba vata kei na daunirairai e vakavolekataka na ka e yawa sara, ka toboka rawa na noqu gauna ni tiko malua voli ena veico. E rukuna a koto kina e dua na vosa, ‘Dauniveivosaki ni Matanitu ena National Center.’ A dina na itaba, a dina na vosa, ia na dina a vakayagataki me vakalevulevuya e dua na ivakaraitaki cala.”¹⁷ Eda sega ni biuta laivi e dua na ka e dina me baleta e dua na ka eda se sega mada ni kila vakamatata.

Sa rawa ni da vakananuma na dauvakatataro ni o Josefa a sega ni tiko duadua ena nodra veisiko na agilosi.

Eratou vola na vakadinadinataka na iVola i Momani, “Keitou sa tukuna vakaidina sara, ni a lako sobu mai lomalagi e dua na agilosi ni Kalou, ka … vakotora na peleti e matai keitou me keitou raica.”¹⁸ Sa rawa ni da vakayagataka talega na nodra vosa e vuqa tale.¹⁹

Sa rawa ni raica e dua na dauvakatataro maqusa na vakatetei ni kosipeli vakalesui mai me vatuka ni cakacaka ni Turaga vua na Parofita.

Sa tu oqo e sivia ni 29,000 na ivavakoso ka 88,000 na daukaulotu era vakatavulica tiko na kosipeli e vuravura taucoko. Sa ra vakasaqara tiko e milioni na Yalododonu Edaidai mera muri Jisu Karisito, bulataka na bula rakorako eso, kauwaitaki ira na dravudravua, ka solia na nodra gauna kei na taledi ena nodra vukei eso tale.

A kaya o Jisu:

“E sega na kau vinaka me vuataka rawa na vua ca, se na kau ca me vuataka rawa na vua e vinaka. …

… Dou na kilai ira ena vuadra.”²⁰

Era veivakadrukai na ivakamacala eso oqo, ia me kakua ni vakanuinui taucoko kina na dauvakatataro maqusa me vakaceguya na nona vakasaqaqara me baleta na dina.

Sa gadreva na dauvakabauta yadua e dua na veivakadeitaki vakayalo me baleta na ilesilesi vakalou kei na ituvaki ni bula ni Parofita o Josefa Simici. Oqo e dina me baleta na kawatamata kecega. Na veitaro vakayalo e ganita na veisaunitaro vakayalo mai vua na Kalou.

Ena dua na gauna wale tikoga oqo ni’u a tiko mai na Baravi ni Tokalau kei Amerika, a vosa vei au e dua na daukaulotu oti me baleta e dua na itokani ka sa mai veilecayaki tu ena itukutuku a ciqoma me baleta na Parofita o Josefa Simici. Rau a veivosaki ena vica na gauna, ka sa vaka me tiko talega na vakatitiqa vua na daukaulotu lesu mai ena macala ni veivosaki.

Dina ga au a vakanuinui tu me na vakayaloqaqataki nona itokani okoya, au a kauwai sara ena nona ivakadinadina. Kemuni na taciqu kei na ganequ, me’u vakasalataki kemuni mada: ena sega ni rawa ni o vukei ira tale eso kevaka e sega taumada ni vakadeitaki na nomu vakabauta.

Vica na macawa sa oti au a vodoka e dua na waqavuka ki na Ceva kei Amerika. A muataka na neimami malele na dauveiqaravi e loma ki na dua na vidio ni tataqomaki. “E sega ni na rawa ni yaco,” keimami a vakasalataki, “ia kevaka me na veisau na kaukauwa ni cagi ena loma ni waqavuka, na kato ena ulu ni nomu idabedabe ena tadola, ka vakatakila mai na icegucegu. Ke yaco oqo, yatova cake ka dreta e dua na icegucegu kivei iko. Biuta na icegucegu ki na ucumu kei na gusumu. Dreta na ivesu wadrega ki na ulumu ka veimoiyaka na icegucegu ke ganita.” Sa qai ivakasala oqo: “Nanuma matua mo veimoiyaka na nomu icegucegu ni bera ni o vukei ira tale eso.”

Na irogo tawamacala me baleta na Parofita o Josefa Simici ena toso cake ni da vavaca yani na iKarua ni Lesumai ni iVakabula. Na dina veimama eso kei na ilawaki matau eso ena sega ni lailai sobu. Ena tiko na lewe ni matavuvale kei na itokani ena gadreva na nomu veivuke. Oqo na gauna mo veimoiyaka kina na nomu icegucegu vakayalo me rawa ni o tuvakarau ni vukei ira tale eso era vakasaqara voli na dina.²¹

Sa rawa ni duidui na lako mai ni dua na ivakadinadina ni Parofita o Josefa Simici kivei keda yadua. Ena rairai lako mai ni o tekiduru ena masu, ka kerea voli na Kalou me vakadeitaka ni sa dua na parofita dina okoya. Ena rairai lako mai ni o wilika na itukutuku ni Parofita me baleta na iMatai ni Raivotu. Sa rawa ni sovaraki ki na yalomu e dua na ivakadinadina ni o wilika tale na iVola i Momani. Ena rairai lako mai ni o tukuna na nomu ivakadinadina me baleta na Parofita se na nomu duri tu ena valetabu ka vakila na kaukauwa tabu ni veivauci a vakalesui mai ki vuravura vei Josefa Simici.²² Ena vakabauta kei na sasaga vakaidina, na nomu ivakadinadina me baleta na Parofita o Josefa Simici ena vaqaqacotaki. Na toso cake tikoga ni tasoro mai ni baluni wai ena tutunisala ena rawa ni vakasuasuataki iko, ia e sega sega sara ni dodonu me na bokoca na caudre katakata ni nomu vakabauta.

Ki na itabagone ka vakarorogo tiko nikua, au solia vakatabakidua e dua na bolebole: Rawata e dua na ivakadinadina vakaiiko me baleta na Parofita o Josefa Simici. Me veivuke na domomu ena vakataucokotaki ni vosa yalayala nei Moronai ena vosavinakataki ni Parofita. Oqo e rua na vakasama: iMatai, vakaraica na ivolanikalou eso ena iVola i Momani o nanuma ka kila ni sa dina saraga. Qai wasea vei ira na matavuvale kei na itokani eso ena lotu vakamatavuvale, semineri, kei na nomuni kalasi ni Cauravou kei na Goneyalewa, ena vakatakilai ni o Josefa a dua na iyaya ni cakacaka ena liga ni Kalou. Tarava, wilika na ivakadinadina ni Parofita o Josefa Simici ena Mataniciva Talei se ena ivola lobi oqo, sa tu oqo ena 158 na vosa. Sa rawa ni o raica ena initaneti ena LDS.org se vei ira na daukaulotu. Oqo na nona ivakadinadina o Josefa ena ka a yaco vakaidina. Wilika vakawasoma. Navuca mo katona na ivakadinadina i Josefa Simici ena nomu vosa, ka vakarorogo kina vakavuqa, ka veiwaseitaka vei ira na itokani. Na rogoci ni ivakadinadina ni Parofita ena nomu vosa ena vukea na kau mai ni ivakadinadina o qara.

iVakatakilakila

Photos of Joseph Smith pamphlet for Elder Andersen's talk in Nov. 2014

Sa tiko na veisiga levu ka totoka eliu. Sa tukuna o Peresitedi Thomas S. Monson: “Na inaki cecere oqo … ena tete tikoga yani, ena veisautaka ka vakalougatataka na bula. … Sega ni dua na kaukauwa e vuravura e rawa ni tarova na cakacaka ni Kalou. Se cava ga ena yaco mai, ena toso ga ki liu na inaki cecere oqo.”²³

Au vakadinadinataka vei kemuni ni o Jisu na Karisito, na noda iVakabula ka Dauveivueti. A digitaka o Koya e dua na turaga vakatabui, dua na turaga yalododonu, me liutaka na kena Vakalesui mai na taucoko ni Nona kosipeli. A digitaki Josefa Simici o Koya.

Au vakadinadinataka ni a tamata yalodina ka ivalavala dodonu o Josefa Simici, a tisaipeli ni Turaga o Jisu Karisito. E a rairai kivua na Kalou na Tamada kei na Luvena, o Jisu Karisito. E a vakadewataka okoya na iVola i Momani ena isolisoli kei na kaukauwa ni Kalou.

Ena noda itikotiko ena daku ni ilati ni mate, eda na kila vakamatata na veikacivi tabu kei na ilesilesi vakalou ni Parofita o Josefa Simici. Ena siga sega- ni yawa- oya, o iko kei au kei na “milioni [tale eso] ena kilai ‘Baraca Josefa’ tale.”²⁴ Ena yaca i Jisu Karisito, emeni.