Ni sa Kidavaki Mai ki na Koniferedi

Kemuni na taciqu kei na ganequ, sa ka ni marau vei au me’u kidavaki kemuni ki na koniferedi levu ni vuravura oqo. Eda sa sokomuni vata ena tikina eso wavolita na vuravura meda vakarorogo ka vuli mai vei ira na tacida kei na ganeda eda sa tokona ena Vakaitutu Raraba kei na vakailesilesi raraba ena Lotu. Era sa qara na veivuke mai lomalagi me baleta na itukutuku eso era na cauraka, ka ra sa vakila na veivakauqeti me baleta na veika ena tukuni.

Sa mai yacova na koniferedi oqo na ika 90 ni yabaki ni vakananumi ni kakaburaki ena retio ena koniferedi raraba. Donuya na koniferedi ni Okotova 1924, a kaburaki na soqoni ena imatai ni gauna ena retio mai na tabana taukeni ni Lotu na KSL. Na koniferedi oqo sa mai yacova talega na ika 65 ni vakananumi ni yabaki ni kakaburaki ena retio yaloyalo ena koniferedi. Ena koniferedi raraba a vakayacori ena Okotova 1949, e a vakau na soqoni ena imatai ni gauna ena retio yaloyalo ena yasayasa taucoko e Salt Lake mai na tabana ni retio yaloyalo na KSL.

Eda vakavinavinakataka na veivakalougatataki vou ni vakauitukutuku ni vakatara e milioni eso na lewe ni Lotu mera sarasara se vakarorogo ki na koniferedi raraba. Na veisoqoni ena mua ni macawa oqo sa na kaburaki tiko ena retio yaloyalo, retio, vakacurumi ena setilaiti, kei na Initaneti, oka kina na veigacagaca vakalivaliva tuberi.

Donuya na ono na vula sa oti ena noda a sota taumada, sa mai vakatabui e dua na valetabu vou ka dua e vakatabui tale. Ena Me, a vakatabuya kina o Peresitedi Dieter F. Uchtdorf na Valetabu e Fort Lauderdale Florida. E dua na veivakamarautaki totoka ni itabagone vakavanua a vakayacori ena siga ni bera na veivakatabui. Ena siga ka tarava, ena Sigatabu, ika 4 ni Me , a vakatabui na valetabu ena tolu na soqoni.

Ena rua ga na macawa sa oti e a noqu na madigi me’u vakatabuya tale kina na Valetabu e Ogden Utah, ka a vakatabui taumada ena 1972 mai vei Peresitedi Joseph Fielding Smith. E dua na veivakamarautaki vakavanua vakaiyanaqa a vakayacori ena siga ni bera na vakatabui tale, ena nodra vakaitavi e vuqa na itabagone ka wase rua kina na veivakalasai, ka duidui era matanataka ena kena vakayadua. Taucoko, e 16,000 na itabagone a vakaitavi. Na veiqaravi ni veivakatabui tale a vakayacori ena siga ka tarava, ka ra vakaitavi kina e vuqa na Veitacini tagane, vakakina o ira na iliuliu ni mataisoqosoqo kei na peresitedi ni valetabu, o rau nona daunivakasala, kei na dui watidra.

Sa tomani voli ena maqusa na tara ni noda valetabu. Ena vula ka tarava sa na vakatabui tiko na Valetabu vou e Phoenix Arizona, kei na yabaki vou, ena 2015, keitou vatavatairalago ni vakatabui se vakatabui tale e rauta ni lima na valetabu, ka levu tale ena rawa, ni vakatau tiko ena kena vakacavari.

Me vaka au a tukuna ena Epereli, ni ra sa tara oti taucoko na valetabu era a kacivaki eliu ka vakatabui, sa na tiko vei keda e 170 na valetabu vakayagataki robota na vuravura. Baleta ni da sa vakanamatataka tiko na noda sasaga ena vakacavari ni valetabu era a kacivaki eliu, ena gauna oqo keitou sa sega ni na kacivaka e dua tale na valetabu vou. Ia, mai liu, ni keitou vakatakila rawa na gagadre ka vakadeitaka na vanua eso, na kacivaki ni ikuri ni valetabu sa na caka.

Na Lotu sa tomana tiko na kena tubu. Eda sa sivia tu oqo vaqaqaco na 15 na milioni ka tosocake tikoga ena iwiliwili. Na noda sasaga ni kaulotu e sa sega ni tarovi rawa. Sa tiko vei keda e sivia na 88,000 na daukaulotu era veiqaravi voli, ka wasea tiko na itukutuku ni kosipeli ki vuravura raraba. Keitou vakadeitaka ni cakacaka vakaulotu e sa dua na itavi vakamatabete, ka keitou vakayaloqaqataki ira taucoko na cauravou bula kilikili ka rawata, mera veiqaravi. Keitou sa vakavinavinaka vakalevu kivei ira na goneyalewa ka ra veiqaravi talega. Na nodra cau sa ka vakasakiti, dina ga era sa sega ni okati ena lawa vata ga mera veiqaravi me vakataki ira na cauravou.

Au sa sureti kemuni oqo mo ni vakatudaliga kivei ira na turaga kei na marama ka ra na vakaitavi nikua vakakina ni mataka ena noda soqoni ni koniferedi. O ira kece na kerei mera vosa era vakila ni ra cakava tiko e dua na itavi levu. Ni da vakarorogo, me sa tarai na lomada ka tosoicake na noda vakabauta, sa noqu masu malumalumu ena yaca i Jisu Karisito, emeni.