Prishud we I Mekem Yu Rere

Mi glad blong kam tugeta wetem prishud blong God, we i stap raon long wol. Mi glad long fet, seves mo prea blong yufala.

Mesej blong mi tedei, i abaot Aronik Prishud. I wok blong yumi evriwan blong help blong mekem ol promes blong Lod oli kamtru long olgeta we oli kasem, wanem we oli tokbaot long skripja, prishud ia we i moa daon.¹ Oli singaotem tu prishud blong mekem man i rere. I bigfala fasin blong rere ia we bae mi tokbaot tedei.

Plan blong Lod from wok blong Hem i fulap long fasin blong rere. Hem i bin mekem wol ia i rere blong yumi gotru long ol tes mo kasem ol janis blong wol ia. Taem yumi stap ia, yumi stap long wanem ol skripja oli singaotem “wan ples blong tes.”²

Profet Alma i tokbaot se i impoten tumas blong rere from laef we i no save finis, we bae yumi laef long hem blong oltaem olsem ol famle wetem God Papa mo Jisas Kraes.

Hem i eksplenem se i nid blong rere long wei ia: “Mo yumi luk se ded i kam long evri man, yes, ded ia we Amulek i bin tokbaot, we hem i ded blong bodi; be oli letem wan taem long man blong i save sakem sin; taswe laef ia i bin kam wan ples blong tes; wan taem blong mekem rere blong mitim God, wan taem blong mekem rere blong ples ia we i no gat en, we mitufala i bin tokbaot, we i kam afta long laef bakegen blong ol ded.”³

Semmak olsem taem we oli givim long yumi blong laef long wol ia i blong rere blong mitim God, taem we yumi gat blong mekem wok long Aronik Prishud i wan janis blong mekem yumi rere blong lanem olsem wanem blong givim impoten help long ol narawan. Semmak olsem we Lod i givim help we yumi nidim blong pasem ol tes blong laef blong wol ia, Hem i sendem help long yumi blong rere from prishud.

Mesej blong mi i go long olgeta we Lod i sendem blong helpem ol man blong rere blong kasem Aronik Prishud, mo tu, long olgeta we oli kasem Aronik Prishud finis. Mi toktok long ol papa. Mi toktok long ol bisop. Mo mi toktok long olgeta blong Melkesedek Prishud we oli trastem olgeta blong stap olsem kompanion mo tija blong ol yang man we oli stap rere from prishud.

Mi toktok blong presem mo talem tangkyu long plante long yufala raon long wol, mo yufala we i stap tru long ol yia we oli pas kasem tedei.

Bae i luk se mi no kea sapos mi no tokbaot wan branj presiden mo wan bisop blong yang taem blong mi. Mi kam wan dikon taem mi gat 12 yia long wan smol branj long Is pat blong Yunaeted Stet. Branj i smol tumas mekem se bigfala brata blong mi mo mi nomo, mitufala i ol Aronik Prishud kasem taem papa blong mi, we i branj presiden, i invaetem wan medelman blong joenem Jos.

Niu konvet ia i kasem Aronik Prishud, mo wetem hemia, wan koling blong lukaotem Aronik Prishud. Mi tingbaot yet olsem se, i yestedei. Mi save tingbaot ol naes braon lif taem niu konvet ia i kam wetem brata blong mi mo mi, mifala i go mekem wan samting blong wan wido. Mi nomo tingbaot se wanem projek, be mi tingbaot filing ia se prishud paoa i joen, blong mekem, wanem we mi lanem afta, wanem we Lod i talem wanem we yumi evriwan i mas mekem blong Hem i fogivim ol sin blong yumi, mo rere blong luk Hem.

Taem mi luk i gobak, mi gat filing blong tangkyu from wan branj presiden we i singaotem wan niu konvet blong helpem Lod blong mekem tufala boe i rere, we wan dei, oli kam ol bisop we oli gat wok blong kea long olgeta we oli pua mo olgeta we oli stap long nid, mo tu, blong prisaed ova long prishud blong mekem man i rere.

Mi wan dikon yet taem famle blong mifala i muv i go long wan bigfala wod long Yuta. I fas taem we mi filim paoa blong wan ful kworom blong Aronik Prishud. Be hemia i fas taem we mi luk wan. Mo afta, i fas taem we mi filim paoa mo blesing blong gat wan bisop i prisaed long wan pris kworom.

Bisop i singaotem mi blong mi fas asisten blong hem long pris kworom. Mi tingbaot se hemwan nomo i tijim kworom—nomata hem i bisi wetem ol nara gud man we hem i save singaotem blong tijim mifala. Hem i putum ol jea long klasrum oli stap long sekol. Hem i mekem mi sidaon long jea long saed blong hem, long raet saed.

Mi save luk ova long solda blong hem taem hem i stap tij. Hem i lukdaon wanwan taem long ol not we hem i bin taepem we i stap long leda folda long wan ni, mo long ol skripja we i kam olfala mo i makem gud we i open long narafala ni. Mi save tingbaot glad taem hem i stap storian long ol stori we i kamaot long buk blong Daniel mo testemoni blong hem long saed blong Sevya, Lod Jisas Kraes.

Oltaem bae mi tingbaot olsem wanem Lod i singaotem ol kompanion we Hem i jusum gud, blong stap wetem olgeta we oli kasem prishud we oli stap rere.

Bisop blong mi i gat ol strong kaonsela, mo from sam risen we mi no andastanem, moa long wan taem i ringim mi long telefon long haos mo talem: “Hal, mi nidim yu blong kam wetem mi olsem kompanion blong mekem sam visit.” Wan taem, i blong tekem mi wetem hem i go long haos blong wan wido we i stap hemwan mo i no gat kaekae insaed long haos. Taem mitufala i gobak hom, hem i stopem trak blong hem, i openem ol buk blong skripja, mo i talem long mi from wanem hem i lukluk long wido ia olsem we hem i gat paoa blong no lukaot long hemwan nomo, be tu, sam taem long fiuja, bae i helpem ol narawan.

Wan nara visit i go long wan man we i no kam long Jos longtaem. Bisop blong mi i invaetem hem blong kambak blong stap wetem Ol Sent. Mi filim lav we bisop blong mi i gat long wan man, we long mi, i wan enemi we i no nid blong lavem.

Long wan nara taem, mitufala i visitim wan hom we papa mo mama we i dring oltaem, i sendem tu smol gel blong luk mitufala long doa. Tru long skrin doa, tufala gel i talem se mama mo papa blong tufala i slip. Bisop i gohed blong toktok long tufala, i smael mo presem gud fasin mo strong paoa long tingting blong tufala, we long mi, mi luk se i 10 minit o moa. Taem mi wokbaot long saed blong hem i go, kwaet nomo, hem i talem: “Hemia i wan naes visit. Tufala smol gel ia, bae tufala i neva fogetem we yumitu go.”

Tu long ol blesing we wan senia kompanion i save givim, oli tras mo wan eksampol blong fasin blong kea. Mi bin luk hemia taem boe blong mi i kasem wan hom tijing kompanion we i bin gat moa prishud eksperiens bitim hem. Senia kompanion blong hem i bin wan misin presiden tu taem, mo i bin wok long ol nara lidasip posisen.

Bifo oli go visitim wan long ol famle we oli givim long tufala, senia prishud lida ia i askem blong visitim boe blong mitufala long haos blong mitufala. Oli letem mi blong lisin. Senia kompanion i openem taem wetem prea, i askem help. Afta hem i talem wan samting olsem long boe blong mi: “Mi ting se yumi mas tijim wan lesen we bae famle ia i harem se God i singaotem olgeta blong sakem sin. Mi ting se bae oli lisin gud sapos mesej i kam long mi. Mi ting se bae oli kasem gud mesej ia sapos i kam long yu?Wanem filing blong yu long hemia?”

Mi tingbaot bigfala ae blong fraet blong boe blong mi. Mi save filim hapines yet blong taem ia, taem boe blong mi i akseptem tras ia.

I no blong nating we bisop i putum tufala i kompanion. I tru long fasin blong rere gud we senia kompanion i bin lanem abaot ol filing blong famle ia we bae tufala i tijim. I tru long insperesen we hem i filim se bae hem i stap biaen, mo i trastem wan yut we i no gat eksperiens blong askem ol pikinini blong God we oli olfala moa bitim hem, blong sakem sin mo kambak long sef ples.

Mi no save risal blong visit blong tufala; be mi save se wan bisop, wan we i kasem Melkesedek Prishud, wetem Lod, tufala i stap mekem wan boe i rere blong kam wan prishud man, mo wan dei, i kam bisop.

Nao. Ol kaen sakses stori olsem long fasin blong rere from prishud, yufala i save gud long olgeta long wanem yufala i bin luk, mo wanem yufala i gat eksperiens long hem long laef blong yufala. Yufala i bin save, mo yufala i bin stap olsem ol bisop, ol kompanion, mo ol papa we i olsem. Yufala i bin luk han blong Lod long taem we yufala i rere from ol prishud diuti we Hem i save se oli stap long fored blong yufala.

Yumi evriwan long prishud i gat wan wok blong mekem blong helpem Lod blong rere long ol narawan. I gat samfala samting we yumi save mekem we oli impoten moa. Iven, wanem we i gat moa paoa bitim ol toktok long tijing blong yumi long saed blong doktrin, hem i ol eksampol blong yumi blong laef folem doktrin ia.

Wanem i impoten moa long prishud seves blong yumi, i blong invaetem ol pipol blong kam long Kraes tru long fet, fasin blong sakem sin, baptaes, mo kasem Tabu Spirit. Presiden Tomas S. Monson, olsem wan eksampol, i givim ol toktok we i leftemap hat long saed blong ol doktrin ia. Be wanem mi save we hem i mekem wetem ol pipol mo misinari mo fren blong Jos taem hem i prisaed long misin long Toronto, i pusum mi blong mekem wok.

Long taem blong rere long prishud, “soem long mi” i moa impoten bitim “talem long mi.”

Hemia nao from wanem ol skripja oli impoten tumas blong mekem yumi rere long prishud. Oli fulap long ol eksampol. Mi filim olsem we mi save luk Alma i folem oda blong enjel, mo afta, i hariap i gobak blong tijim ol nogud pipol long Amonaeha we oli bin sakemaot hem.⁴ Mi save filim kolkol ia insaed long kalabus taem God i talem long Profet Josef blong gat strong paoa long tingting mo se Hem i stap lukaotgud long Josef.⁵ Wetem pikja blong skripja ia long maen, yumi save rere blong stanap strong long seves blong yumi taem yumi luk se i had.

Wan papa o wan bisop, o wan senia hom tijing kompanion we i soem se hem i trastem wan yang man we i kasem prishud, i save jenisim laef blong hem. Wan taem, wan memba blong Kworom blong Olgeta Twelef i askem papa blong mi blong raetem wan smol samting long saed blong saens mo relijin. Papa blong mi i wan man blong saens, mo wan fetful man blong prishud. Be mi tingbaot yet taem hem i givim pepa ia long mi, mo talem: “Bifo mi sendem hemia i go long Olgeta Twelef, mi wantem yu blong ridim. Bae yu save sapos hem i stret.” Hem i gat 32 yia i bitim mi, mo i gat moa waes mo save bitim mi.

Tedei yet, tras ia we i kam long wan gudfala papa mo prishud man ia i mekem mi strong. Mi bin save se hem i no trastem mi, be i trastem se God bae i talem long mi wanem i tru. Yufala, ol senia kompanion, i save blesem wan yang prishud man blong mekem hem i rere, taem yufala i soem kaen tras ia. Bae i helpem yangfala ia blong, hemwan, i trastem kwaet filing blong insperesen taem we, wan dei, bae hem i putum han blong hem blong silim blesing ia blong hilim wan pikinini we dokta i talem se bae i ded. Tras ia i bin helpem mi moa bitim wan taem.

Sakes blong yumi blong mekem ol narawan oli rere long prishud bae i kam folem hamas yumi lavem olgeta. Hemia i tru speseli taem yumi nidim blong stretem olgeta. Tingbaot taem ia we wan we i kasem Aronik Prishud, maet long sakramen tebol, i mekem wan mistek taem i mekem wan odinens. Hemia wan series samting. Samtaem, mistek i nidim blong oli stretem long pablik, mo maet bae yangfala i kros, i sem, o i filim se oli sakemaot hem.

Bae yu tingbaot kaonsel blong Lod we i talem se yu mas stap tok strong long stret taem wetem strong fasin, taem Tabu Spirit i lidim yu; mo afta, yu mas soemaot wan lav we i bigwan moa long hem we yu bin tok strong long hem, blong mekem se hem i no ting se yu wan enemi blong hem.⁶

Toktok ia, we i moa bigwan, i gat spesel mining blong mekem rere olgeta we oli kasem prishud taem oli nidim blong oli stretem olgeta. Toktok ia, i minim blong givim moa lav antap long hemia we i stap finis. Fasin blong soem lav ia, hemia nao, i moa bigwan. Yufala, we yufala i stap mekem olgeta we oli kasem prishud oli rere, bae yufala i luk olgeta oli mekem mistek. Bifo yu stretem olgeta, oli mas filim finis lav blong yu fastaem we i stap oltaem. Oli mas filim se yu bin presem olgeta wetem klin tingting bifo oli akseptem se yu stretem olgeta.

Lod Hemwan i lukluk long olgeta we oli gat prishud ia we i moa daon, wetem ona from wanem oli save kasem mo hamas oli impoten long Hem. Lisin long ol toktok ia we Jon Baptaes i talem taem oli putumbak Aronik Prishud. Hem i talem se antap long hed blong yutufala, ol wokman we yumi wok tugeta, long nem blong Mesaea, mi givim Prishud blong Eron, we i holem olgeta ki blong ol seves blong ol enjel, mo blong gospel blong fasin blong sakem sin, mo blong baptaes andanit long wota blong kam klin aot long ol sin; mo hemia bambae i neva save lus long wol bakegen, kasem taem ol boe blong Livae oli mekem wan ofring bakegen long Lod long stret mo gud fasin.⁷

Aronik Prishud i hang long prishud we i moa hae, we i Melkesedek Prishud.⁸ Olsem presiden blong evri prishud, Presiden blong Jos tu i prisaed ova long prishud blong mekem man i rere. Mesej blong hem long plante yia blong go sevem man i go stret wetem wok blong tekem gospel blong fasin blong sakem sin mo baptaes i go long laef blong ol narawan.

Ol kworom blong ol dikon, tija mo pris oli kaonsel evri taem blong tekem evri memba blong kworom i kam long Lod. Ol presidensi oli givim wok long ol memba blong go aot wetem fet mo lav. Ol dikon oli pasem sakramen wetem respek mo wetem fet se ol memba bae oli filim risal blong Atonmen mo bae oli mekem tingting blong obei ol komanmen taem oli tekem ol tabu saen ia.

Ol tija mo ol pris oli prea wetem kompanion blong olgeta blong mekem wok blong lukluk ova long Jos, wan man afta wan man. Mo ol kompanion ia oli prea tugeta taem oli lanem ol nid mo ol hop blong ol hed blong famle. Taem oli mekem olsem, oli stap rere from bigfala dei ia taem bae oli prisaed, olsem wan papa, wetem fet long famle blong olgetawan.

Mi testifae se evriwan we i wok tugeta long prishud, oli stap mekem wan pipol i rere from taem we Lod bae i kam long Jos blong Hem. God Papa i stap laef. Mi save—mi save— se Jisas i Kraes mo Hem i lavem yumi. Presiden Tomas S. Monson i profet we i stap laef blong Lod. Mi testifae olsem long tabu nem blong Jisas Kraes, amen.