Cov uas Ua Raws Li Vajtswv cov Lus Txib Yuav Tau Koob Hmoov thiab Kev Zoo Siab

Ob peb xyoos tas los lawm thaum mus xyuas Australia teb, kuv tau mus xyuas qhov chaw hu ua horseshoe uas ntoo moo rau kev caij txiag saum cov nplaim dej. Thaum kuv taug kev ntawm ntug dej hiav txwv, kuv xav tsis thoob txog cov nplaim dej loj loj hauv hiav txwv thiab cov nplaim dej me me uas phwj los rau ntawm ntug dej.

Thaum kev tseem taug kev ntawd, kuv pom ib co neeg caij txiag uas tuaj tim Amelikas teb tuaj. Lawv yeej npau taws me ntsis, sib tham zom zaws thiab taw tes rau hiav txwv. Thaum kuv nug lawv seb muaj xwm dab tsi, lawv tsuas taw tes rau tej nplaim dej loj loj hauv hiav txwv.

Ib tug hais chim heev hais tias “Saib yav nrad. “Koj puas pom qhov tiv thaiv?” Ces kuv tau ua tib zoo saib, ces kuv txawm pom dab tsi tiv thaiv ib ncig qhov chaw ntawd, nyob ze ze cov nplaim dej loj loj. Qhov tiv thaiv muaj ntsis zoo li ib daim yas tuab tuab es muaj dab tsi pab kom nws ntab saum tej nplaim dej. Tam li cov neeg caij txiag ntawd hais mas, daim yas ntawd mus tiv nkaus hauv av hauv qab thu dej ntawd.

Tus neeg Amelikas uas caij txiag hais ntxiv tias, “Yog tib lub sij hawm hauv lub neej no uas peb tuaj caij txiag saum tej npaim dej ntawd. Peb yeej caij tau tej nplaim dej me me hauv no, tiam sis qhov tiv thaiv ntawd ua rau peb caij tsis tau saum cov loj loj. Peb tsis paub yog vim li cas muaj qhov tiv thaiv ntawd. Peb tsuas paub hais tias qhov no ua rau peb tsis muaj kev lom zem li.”

Thaum cov neeg Amelikas uas caij txiag ntawd haj yam npau taws, kuv txawm pom lwm tus neeg uas caij txiag nyob ntawd—ib tug neeg laus zog uas nyob hauv lub zos ntawd. Nws ib nyuag chim siab thaum nws hnov lawv yws yws txog qhov tiv thaiv ntawd.

Thaum kawg nws sawv tsees thiab mus ntsib pawg neeg no. Nws tsis tau hais ib lo lus, tiam sis txawm tshem lub iav tsom kev deb ntawm nws lub hnab thiab muab rau ib tug neeg caij txiag, ces tau taw tes rau qhov tiv thaiv ntawd. Txhua tus neeg caij txiag tau siv lub iav tsom kev deb saib. Thaum txog kuv thib, vim muaj kev pab tsom kev deb, kuv thiaj pom ib yam uas thaum ntej kuv pom tsis tau: tej tis ntses loj loj—cov ntses loj loj uas tab tom noj tej tsiaj txhu hauv hiav txwv sab tom ub qhov tiv thaiv ntawd.

Lawv sawv daws pib nyob tswm me ntsis. Tus neeg laus laus uas caij txiag tau nqa nws lub iav tsom kev deb thiab tau pib taug kev mus. Thaum nws ua li ntawd, nws hais ib co lus uas kuv yeej yuav nco qab hais tias: “Tsis txhob thuam qhov tiv thaiv. Nws yog tib qhov uas tiv thaiv tsis pub cov ntses muab nej noj.”

Thaum peb sawv ntawm ntug dej hiav txwv ntawd, peb txoj kev pom ub no txawm hloov hlo. Qhov tiv thaiv uas peb tau xav tias yeej tawv tawv thiab txwv peb xwb—qhov uas yuav txwv peb txoj kev lom zem thiab kev ua si thaum xav caij cov nplaim dej loj loj—txawm peem los ua ib yam dab tsi tshiab. Thaum peb to taub hais tias muaj xwm txheej ceev hauv qab thu dej lawm, peb paub hais tias qhov tiv thaiv yeej pov hwm, muab kev puaj phais thiab kev nyab xeeb rau peb.

Thaum kuv thiab nej sawv daws taug tej kev hauv lub neej no thiab sim ua raws li peb ua npau suav pom, ces tej thaum nyuaj rau peb to taub Vajtswv cov lus txib thiab tej kev cai—uas zoo ib yam li qhov tiv thaiv ntawd. Zoo nkaus li tej ntawd tawv thiab nyaum heev xwb, tsuas thaiv tej kev ua si thiab kev lom zem uas coob leej tab tom taug. Zoo li tus Thwj Tim Povlauj piav hais tias, “Peb pom, zoo li tus duab plooj plooj uas nyob hauv daim tsom iav xwb,”¹  pom tej qhov xwb, uas ua rau peb to taub tsis tau tej kev xwm txheej ceev uas raug zais cia hauv qab thu dej.

Tiam sis Nws tus uas “to taub txhua nrho”² paub tseeb hais tias tej kev xwm txheej ceev nyob qhov twg. Nws qhia peb kev, dhau ntawm Nws cov lus qhia thiab kev cob qhia, xwv kom peb yuav nyob nrug deb ntawm tej kev xwm txheej—xwv kom peb lub neej yuav dim cov yeeb ncuab rau peb tus ntsuj plig thiab tej kev txog kev txog kev txhaum.³

Peb qhia peb txoj kev hlub rau Vajtswv—peb txoj kev tso siab ntseeg Nws—thaum peb niaj hnub xyaum taug txoj kev uas Nws puas rau peb lawm thiab thaum peb ua raws li Nws cov lus txib. Peb kuj qhia txog peb txoj kev ntseeg thiab kev hlub thaum uas peb tsis to taub tag nrho yog vim li cas Vajtswv muaj cov lus txib ntawd los sis Nws xav kom peb taug ib txoj kev twg. Nws kuj yooj yim rau peb taug ib txoj kev sab hauv qhov tiv thaiv thaum peb paub tias muaj tej tsiaj uas xav noj neeg nyob sab tom ub xwb. Yuav haj yam nyuaj rau peb taug kev sab hauv qhov tiv thaiv thaum peb tsuas pom kev lom zem thiab tej nplaim dej zoo nkauj uas nyob sab nraud. Tiam sis twb yog tej lub sij hawm ntawd—tej lub caij uas peb txiav txim ua raws li peb txoj kev ntseeg, tso siab plhuav rau Vajtswv, thiab qhia peb txoj kev hlub rau Nws—uas pab tau peb loj hlob ntau tshaj plaws.

Nyob hauv Phau Tshiab, Ananias yeej tsis to taub tus Tswv cov lus txib uas hais kom mus nrhiav thiab foom koob hmoov rau Xaulus—uas yog ib tug txiv neej uas muaj cai muab cov neeg ntseeg Yexus kaw hauv lub qhov taub. Tab sis mas vim nws ua raws li Vajtswv lo lus txib, Ananias thiaj pab tus Thwj Tim Pov Lauj yug dua tshiab ntawm nws sab ntsuj plig.⁴

Thaum peb tso siab rau tus Tswv, siv peb txoj kev ntseeg, ua raws li Nws cov lus txib, thiab taug txoj kev uas Nws puas tseg rau peb, peb yuav haj yam rais los mus ua tus neeg uas tus Tswv xav kom peb ua. No yog txoj “kev rais los mus ua”—txoj kev hloov siab no—uas tseem ceeb heev. Raws li Txwj Laug Dallin H. Oaks qhia peb hais tias: “Nws tsis txaus yog tias yus lam ua tej yam zoo xwb tsis muaj lub siab xav ua qhov zoo. Cov lus txib, tej kab ke, thiab tej kev khi lus hauv txoj moo zoo tsis yog tej yam yus lam ua kom thiaj tau khab nias saum ntuj ceeb tsheej xwb. Yexus Khetos txoj moo zoo yog txoj hau kev uas qhia peb tias peb yuav tsum ua li cas thiaj li rais los mus ua neeg uas peb Leej Txiv Saum Ntuj Ceeb Tsheej xav kom peb ua.”⁵

Yog li ntawd, txoj kev mloog lus tiag tiag yog muab tag nrho peb siab ntsws rau Nws thiab cia Nws qhia peb kev nyob hauv tej dej uas tu tu thiab tej uas muaj kev kub ntxhov, thaum peb to taub hais tias Nws pab tau peb ua neeg zoo tshaj peb ua tau peb tus kheej xwb.

Thaum peb kam ua raws li Nws lub siab nyiam, peb haj yam muaj kev nyab xeeb thiab kev zoo siab. Vaj Ntxwv Npeyamis qhia tias cov uas ua raws li Vajtswv cov lus txib yuav “tau koob hmoov thiab muaj kev zoo siab … hauv txhua txhia yam, tsis hais sab cev nqaij daim tawv los sis sab ntsuj plig.”⁶ Vajtswv xav kom peb yuav muaj kev zoo siab. Nws xav kom peb yuav muaj kev thaj yeeb nyab xeeb. Nws xav kom peb yuav vam meej. Nws xav kom peb yuav nyob zoo thiab tau kev pov hwm ntawm tej kev phem hauv ntiaj teb uas nyob ntawm peb ib ncig.

Ua lwm yam lus hais, tus Tswv cov lus txib tsis yog tej kev tiv thaiv uas peb yuav tsum nyiaj mus dhau hauv lub neej no xwv kom peb yuav tau kev tsa nto hauv lub neej tom ntej. Tiam sis, tej qhov kev tiv thaiv uas tus Tswv tsim tseg ua rau peb muaj chaw zoo khiav nkaum ntawm tej kev phem thiab tej kev puas tsuaj uas yuav ua rau peb poob siab hauv tej kev phem. Tus Tswv muab cov lus txib vim nws hlub peb; tej ntawd yuav pab kom peb muaj kev zoo siab hauv lub neej no⁷ ib yam nkaus li tej ntawd ua rau peb muaj kev zoo siab thiab kev tsa nto hauv lub neej tom ntej. Tej ntawd ua tej cim qhia peb kev—thiab qhov uas tseem ceeb dua yog qhov uas tej ntawd qhia peb seb peb yuav tsum rais los mus ua neeg zoo li cas.

Ib yam li txhua yam uas zoo thiab tseeb, Yexus Khetos yog tus yam ntxwv zoo tshaj plaws. Txoj kev mloog lus zoo tshaj plaws hauv tib neeg zaj liv xwm yog thaum Leej Tub kam ua raws li Leej Txiv lub siab nyiam. Nws txo hwj chim thov kom tshem lub khob tawm—xwv kom nws taug tau lwm txoj kev es txhob taug txoj uas twb teem tseg rau Nws—Yexus txo hwj chim vim Nws kam ua raws li Nws Txiv xav kom Nws yuav ua. Yeej yog txoj kev uas mus dhau lub Vaj Khexemanes thiab lub Roob Khauj Khaum Taub Hau, ces nyob ntawd Nws tau raug kev mob thiab kev txom nyem thiab Leej Txiv tus Ntsuj Plig raug tshem tawm ntawm Nws mus es Nws tau nyob Nws ib leeg xwb. Tiam sis tib txoj kev ntawd tau mus rau lub ntxa uas tsis muaj leej twg nyob hauv tom qab peb hnub, es luag qw nrov nrov hais tias “Nws twb sawv rov los lawm!”⁸ uas ua rau sawv daws uas hlub Nws muaj kev zoo siab heev. Txawm muaj kev zoo siab thiab kev nplij siab uas los ntawm Nws txoj Kev Theej Txhoj rau tag nrho Vajtswv cov me nyuam hauv txhua lub caij nyoog. Vim Nws kam ua raws li Leej Txiv lub siab nyiam, Yexus thiaj cia peb muaj cuab kav txais tau kev thaj yeeb nyab xeeb, kev zoo siab uas kav mus ib txhis, thiab txoj sia nyob mus ib txhis.

Kuv hais lus tim khawv tias peb yog Vajtswv cov me nyuam thiab tias Nws hlub peb. Kuv hais lus pov thawj tias Nws xav kom peb yuav zoo siab thiab tau kev puaj phais thiab tau koob hmoov. Yog vim li ntawd, Nws thiaj tau puas ib txoj kev rau peb taug uas yuav coj peb rov qab mus nrog Nws nyob dua, thiab Nws tau tsim tej kev tiv thaiv uas yuav pov hwm peb thaum peb taug kev mus. Thaum peb sim taug txoj kev ntawd zoo npaum li peb ua tau, peb thiaj yuav tau kev puaj phais, kev zoo siab, thiab kev nyab xeeb tiag tiag. Thaum peb ua raws li Nws lub siab nyiam, peb thiaj rais los mus ua cov neeg uas Nws xav kom peb ua. Los ntawm Yexus Khetos lub npe, amees.