Kev Thov rau Kuv cov Muam
Los ntawm Thawj Tswj Hwm Russell M. Nelson
Thawj Tswj Hwm ntawm Pawg Kaum Ob tug Thwj Tim
Peb xav tau nej lub zog, nej txoj kev hloov siab los ntseeg, nej txoj kev rau siab, nej txoj kev txawj coj lwm tus, nej lub tswv yim, thiab nej tej kev xav.
Txwj Laug Rasband, Stevenson, thiab Renlund, peb, uas yog nej cov Kwv Tij, tos txais nej rau Pawg Kaum Ob tug Thwj Tim. Peb ua Vajtswv tsaug rau tej kev tshwm sim uas Nws muab rau Nws tus yaj saub, Thawj Tswj Hwm Thomas S. Monson.
Cov kwv tij thiab cov muam, thaum peb tau sib ntsib nyob hauv lub tuam rooj sab laj rau lub hlis tas los, peb tsis tau paub yuav muaj tej kev hloov uas ua rau tag nrho cov Ntseeg lub siab mob heev. Txwj Laug L. Tom Perry tau hais ib zaj lus uas muaj hwj chim heev txog lub luag hauj lwm ntawm kev sib yuav thiab tsev neeg nyob hauv tus Tswv txoj hau kev. Peb xav tsis thoob thaum ob peb hnub tom qab ntawd, peb tau kawm txog tus mob cancer uas yuav ua rau nws tas sim neej.
Txawm Thawj Tswj Hwm Boyd K. Packer mob zuj zus tuaj, nws pheej “thawb mus tom ntej” ua tus Tswv txoj hauj lwm. Thaum lub Plaub Hlis Ntuj tas los, nws qaug zog heev, tiam sis nws xav ua tim khawv mus txog ntua hnub uas nws tsis ua pa lawm. Ces, 34 hnub tom qab Txwj Laug Perry tas sim neej, Thawj Tswj Hwm Packer kuj hla daim ntaub thaiv mus rau sab tod.
Peb nco Txwj Laug Richard G. Scott nyob hauv lub tuam rooj sab laj tas los, tiam sis peb twb xav txog nws zaj lus tim khawv txog tus Cawm Seej uas nws tau hais ntau zaus nyob hauv tej rooj sab laj tas los. Thiab 12 hnub tas los, Vajtswv tau hu Txwj Laug Scott rov qab los tsev koom nrog nws tus hlub Jeanene.
Kuv twb muaj cib fim nrog peb tug Tij Laug nyob, thiab koom nrog Thawj Tswj Hwm Packer thiab Txwj Laug Scott tsev neeg ua ntej lawv tas sim neej. Nyuaj rau kuv ntseeg hais tias kuv peb tug phooj ywg zoo no, tus Tswv cov tub qhe zoo kawg nkaus, lawv peb leeg twb mus lawm. Kuv nco lawv tshaj kuv hais tau.
Thaum kuv tau xav txog tej xwm txheej no, kuv tau txais kev tshoov siab uas kav ntev thaum kuv saib ob tug poj niam uas tseem muaj txoj sia nyob no. Kuv xav ntsoov txog Muam Donna Smith Packer thiab Muam Barbara Dayton Perry uas nyob ntawm nkawd ob tug txiv ib sab, ob tug poj niam uas muaj kev hlub, kev tseeb, thiab kev ntseeg dawb huv.
Thaum Muam Packer zaum ntawm nws tus txiv ib sab ua ntej nws tas sim neej, nws muaj kev kaj siab lug tshaj li peb sawv daws to taub.1 Txawm nws paub hais tias nws tus khub uas nws hlub tau 70 xyoo tsis ntev yuav tas sim neej, nws muaj kev kaj siab lug ntawm ib tug poj niam uas muaj kev ntseeg puv npo. Nws zoo li ib tug tim tswv, ib yam li nyob hauv daim duab no nyob ntawm kev muab lub Tuam Tsev Brigham City Utah fij tseg.
Kuv tau pom txoj kev hlub thiab kev ntseeg zoo li no los ntawm Muam Perry. Ua rau kuv pom nws txoj kev hlub nws tus txiv thiab tus Tswv, thiab nws tshoov kuv lub siab heev.
Txij thaum lub sij hawm nkawd ob tug txiv yuav tas sim neej los txog hnub no, ob tug poj niam khov kho no qhia hais tias nkawd muaj zog thiab ua siab loj zoo ib yam li cov poj niam uas ua raws li lawv tej kev khi lus.2 Cov poj niam uas yog cov niam tsev, pog, niam tais; cov viv ncaus thiab cov phauj; cov xib hwb thiab cov thawj coj, thiab qhov tseem ceeb cov uas coj yam ntxwv thiab tiv thaiv kev ntseeg mas cov poj niam zoo li no muaj hwj huam npaum li cas los peb yeej tsis muaj peev xwm ntsuas tau, tsis yog rau lawv tsev neeg xwb, tiam sis rau tus Tswv lub Koom Txoos thiab.3
Qhov no muaj tseeb nyob hauv txhua lub caij nyoog ntawm txoj moo zoo txij thaum Adas thiab Evas nyob los. Tiam sis cov poj niam ntawm lub caij nyoog no yeej tsis zoo ib yam li cov poj niam ntawm lwm lub caij nyoog vim lub caij nyoog no yeej txawv ntawm txhua lub caij nyoog dhau los.4 Qhov no ua rau peb muaj cib fim zoo kawg thiab kev lav ris.
Peb caug rau xyoo tas los, thaum xyoo 1979, Thawj Tswj Hwm Spencer W. Kimball qhia tej uas yuav muaj los yav tom ntej txog qhov uas cov poj niam uas ua raws li lawv tej kev lus yuav pab tus Tswv lub Koom Txoos li cas. Nws hais tias: “Lub Koom Txoos yuav loj tuaj hauv hnub nyoog kawg vim ntau tus poj niam zoo nyob hauv lub ntiaj teb … yuav xav koom lub Koom Txoos. Yuav muaj li no yog tias cov poj niam hauv lub Koom Txoos coj ncaj ncees thiab coj zoo hauv lawv lub neej thiab yog tib neeg pom tias cov poj niam hauv lub Koom Txoos yog neeg txawv ntawm cov poj niam ntawm lub ntiaj teb.”5
Kuv cov muam, nej cov uas koom tes ua hauj lwm nrog peb nyob hauv lub caij nyoog kawg no, hnub uas Thawj Tswj Hwm Kimball pom yeej yog hnub no. Nej yog cov poj niam uas nws tau pom! Nej txoj kev tsim txiaj, txoj kev kaj, kev hlub, kev txawj ntse, kev ua siab loj, tus xeeb ceem, kev ntseeg, thiab kev ua neej ncaj ncees yuav ua rau cov poj niam zoo ntawm lub ntiaj teb, nrog rau lawv tsev neeg, xav koom lub Koom Txoos kom suav tsis txheeb!6
Peb, uas yog nej cov nus, xav tau nej lub zog, nej txoj kev hloov siab los ntseeg, nej txoj kev rau siab, nej txoj kev txawj coj lwm tus, nej lub tswv yim, thiab nej tej kev xav. Vajtswv lub nceeg vaj yeej yuav tsum muaj cov poj niam uas ua kev khi lus dawb ceev thiab ua raws li tej kev khi lus ntawd, cov poj niam uas hais lus nrog Vajtswv lub hwj chim thiab txoj cai!7
Thawj Tswj Hwm Packer hais tias:
“Peb xav tau cov poj niam uas lawv txawj npaj kho txheej txheem thiab txawj npaj kho tej yam. Peb xav tau cov poj niam uas txawj npaj thiab coj thiab tswj hwm; cov poj niam uas txawj qhia, cov poj niam uas muaj peev xwm hais tau. …
“Peb xav tau cov poj niam uas muaj lub txiaj ntsim paub qhov zoo qhov phem uas pom tau tej uas neeg ntiaj teb feem coob nyiam thiab paub tej yam twg tsis muaj nqi los sis txaus ntshai, txawm tib neeg nyiam tej ntawd npaum li cas los.”8
Hnub no, cia kuv hais tias peb xav tau cov poj niam uas paub siv lawv txoj kev ntseeg kom ua tej yam tseem ceeb thiab cov poj niam uas ua siab loj tiv thaiv kev coj ncaj ncees thiab tsev neeg nyob hauv ib lub ntiaj teb uas nyiam ua txhaum. Peb xav tau cov poj niam uas rau siab coj Vajtswv cov me nyuam kom ua raws li lawv tej kev khi lus mus rau kev tsa nto; cov poj niam uas paub txais kev tshwm sim, cov uas to taub lub vaj txiaj ntsim hauv lub tuam tsev muaj hwj chim thiab kev kaj siab lug; cov poj niam uas thov kom muaj ntuj ceeb tsheej lub hwj chim kom pov hwm thiab txhawb cov me nyuam thiab tsev lub zog; cov poj niam uas tsis ntshai qhia lwm tus.
Nyob tas kuv lub neej, cov poj niam zoo li no foom koob hmoov rau kuv. Kuv tus poj niam uas tas sim neej lawm, Dantzel, yog ib tug poj niam zoo li ntawd. Kuv yeej yuav ris nws txiaj vim nws tau pab kuv ua txhua yam nyob hauv kuv lub neej, tsis hais kuv txoj kev phais lub plawv.
Tsib caug yim xyoo tas los ib tug me nyuam ntxhais tsev neeg thov kuv muab nws phais, vim nws mob plawv txij thaum yug los. Nws tus nus hlob tau tas sim neej vim nws muaj mob zoo ib yam. Nws niam nws txiv thov kuv pab. Kuv tsis tshua xav tias qhov kawg yuav zoo tiam sis kuv cog lus tias kuv yuav ua txhua yam kuv ua tau kom cawm nws txoj sia. Txawm kuv ua li ntawd los, tus me nyuam twb tas sim neej. Tom qab ntawd, ob niam txiv ntawd coj ib tug ntxhais ntxiv tuaj rau kuv, nws tsuas muaj 16 lub hlis, nws kuj yug los muaj ib lub plawv uas mob. Raws li nkawd thov, kuv tau phais lub plawv. Tus me nyuam no kuj tas sim neej thiab. Qhov uas muaj peb leeg nyob hauv ib tsev neeg uas tas sim neej ua rau kuv nyuaj siab kawg nkaus.
Kuv tu siab kawg nkaus thaum kuv mus tsev. Kuv txhos caug ntawm chav nyob quaj tas ib hmo. Dantzel nyob ntawm kuv ib sab, thiab mloog kuv pheej hais tias kuv yuav tsis phais lub plawv ntxiv ib zaug li. Ces, thaum 5:00 sawv ntxov, Dantzel ntsia kuv thiab nug kuv hais tias, “Koj puas quaj tag lawm? Ces cia li hloov khaub ncaws. Rov qab mus rau lub tsev kuaj mob. Cia li ua hauj lwm! Koj yuav tsum kawm ntxiv. Yog koj tsum, ntshe lwm tus yuav tsum kawm qhov uas koj twb paub lawm.”
Kuv yeej xav tau kuv tus poj niam lub zeem muag, lub zog, thiab txoj kev hlub! Kuv tau rov qab mus ua hauj lwm thiab kawm ntxiv. Yog tias Dantzel tsis tau txais kev tshoov siab yaum kuv, ntshe kuv tsis tau kawm kev phais lub plawv ces kuv yuav tsis npaj phais lub plawv thaum xyoo 1972 uas tau cawm Thawj Tswj Hwm Spencer W. Kimball txoj sia.9
Cov muam, nej puas paub nej muaj hwj huam loj npaum li cas thaum nej hais tej yam uas nkag los rau hauv nej lub siab uas tus Ntsuj Plig qhia rau nej? Ib ceg txheem ntseeg tus thawj tswj hwm zoo qhia kuv txog ib txoj kev sib ntsib ntawm ceg txheem ntseeg pawg sab laj thaum lawv xav txog ib qho teeb meem nyuaj heev. Ces, nws nco qab tias ceg txheem ntseeg lub Koom Haum Me Nyuam Yaus tus thawj tswj hwm tsis tau hais lus, ces nws nug tus thawj tswj hwm seb puas tau muaj tej kev tshoov siab. Tus thawj tswj hwm hais tias “Kuv twb muaj,” ces nws pib qhia txog ib qho kev xav uas tau hloov kev sib ntsib tag nrho. Ceg txheem ntseeg tus thawj tswj hwm no hais tias, “Thaum nws hais lus, tus Ntsuj Plig ua tim khawv rau kuv tias nws tau hais kev tshwm sim uas peb pawg sab laj nrhiav.”
Kuv cov muam, txawm nej ua hauj lwm dab tsi, txawm nej muaj xwm txheej dab tsi los, peb xav tau nej tej kev xav thiab tej kev tshoov siab. Peb xav tau nej txoj kev hais lus nyob hauv pawg ntseeg thiab ceg txheem ntseeg pawg sab laj. Peb xav tau txhua tus muam uas yuav txiv lawm kom nej hais lus li “ib tug khub uas koom siabtag nrho ”10 thaum nej koom ua ke tswj hwm nej tsev neeg. Nej cov muam muaj tej txuj ci thiab tej kev tshoov siab tshwj xeeb uas yog tej txiaj ntsim nej tau txais los ntawm Vajtswv los, tsis hais nej yuav txiv los tsis tau yuav txiv los yog. Peb cov kwv tij yeej ua tsis taus li nej, thaum nej muaj hwj huam ua.
Peb paub tias qhov kawg ntawm tag nrho tej yam uas Vajtswv tau tsim yog Nws txoj kev tsim poj niam!11 Peb xav tau nej lub dag zog!
Tej kev tawm tsam lub Koom Txoos, cov lus qhuab qhia, thiab peb txoj kev ua neej yuav loj zuj zus. Yog li ntawd, peb xav tau cov poj niam uas to taub Khetos cov lus qhuab qhia tiag tiag thiab yuav siv txoj kev to taub ntawd kom qhia thiab pab tu ib tiam neeg uas tsis xav ua txhuam.12 Peb xav tau cov poj niam uas muaj peev xwm pom tau txhua yam kev ntxias. Peb xav tau cov poj niam uas paub siv Vajtswv lub hwj chim uas Nws muab rau cov uas ua raws li lawv tej kev khi lus thiab cov uas ua siab loj thiab muaj kev siab hlub qhia txog lawv txoj kev ntseeg. Peb xav tau cov poj niam uas ua siab loj thiab muaj lub zeem muag li peb Niam Evas.
Kuv cov muam, nej txoj kev hloov siab los ntseeg yog qhov tseem ceeb tshaj plaws kom nej txais tau txoj sia nyob mus ib txhis. Cov poj niam uas hloov siab los ntseeg thiab ua raws li lawv tej kev khi lus—cov poj niam zoo li kuv tus poj niam Wendy—lawv lub neej ncaj ncees yuav yooj yim rau tib neeg saib nyob hauv ib lub ntiaj teb uas ploj zuj zus mus yog li ntawd tib neeg yuav saib lawv txawv lwm tus vim lawv yog cov neeg zoo siab tshaj plaws.
Yog li ntawd hnub no kuv thov kuv cov muam ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg kom nej los pab! Cia li ua txoj hauj lwm uas nej muaj txoj cai ua nyob hauv nej lub tsev, nej lub zej zog, thiab nyob hauv Vajtswv lub nceeg vaj—siv zog tshaj nej tau ua dhau los. Kuv thov nej kom ua raws li Thawj Tswj Hwm Kimball txoj kev qhia tej uas yuav muaj los yav tom ntej. Thiab kuv cog lus rau nej los ntawm Yexus Khetos lub npe hais tias thaum ua li ntawd, tus Vaj Ntsuj Plig Dawb Huv yuav ua rau lub hwj huam muaj zog tshaj yav tas los!
Kuv ua tim khawv txog qhov uas tus Tswv Yexus Khetos muaj txoj sia nyob tiag tiag thiab txog Nws lub hwj chim uas txhiv peb dim, theej peb lub txhoj thiab ua kom peb dawb huv. Vim kuv yog Nws ib tug Thwj Tim, kuv ua nej tsaug, kuv cov muam uas kuv hlub, thiab foom koob hmoov rau nej kom nej sawv ntsug, kom nej ua raws li lub hom phiaj uas tau tsim nej, thaum peb koom tes pab ua txoj hauj lwm dawb ceev no. Nyob ua ke peb yuav pab npaj lub ntiaj teb kom txais tus Tswv txoj Kev Los Zaum Ob. Vim kuv yog nej tus nus, kuv ua tim khawv li no, los ntawm Yexus Khetos lub npe, amees.