Nyob Haud Yus Nrhiav Tau Qhov uas Los ntawm Vajtswv Los
Los ntawm Rosemary M. Wixom
Lub Koom Haum Me Nyuam Yaus tus Tuam Thawj Tswj Hwm
Peb los rau hauv lub ntiaj teb no kom tu cov noob ntawm tej cwj pwm los saum ntuj los uas nyob hauv peb.
Cov viv ncaus, peb hlub nej! Kuv ua tim khawv hais tias lub neej no yog ib lub txiaj ntsim. Vajtswv muaj ib txoj hau kev rau peb txhua tus, thiab peb lub hom phiaj twb pib ntev lawm ua ntej peb tau los rau hauv lub ntiaj teb no.
Tsis ntev tas los no kuv tau kawm tias qhov txuj ci tseem ceeb uas ib tug me nyuam mos liab yug los rau hauv lub ntiaj teb no yog ib feem ntawm tus Tswv txoj hau kev. Peb txhua tus loj zuj zus tuaj nyob hauv peb niam lub plab thiab siv nws lub cev tau ntau lub hlis kom txhawb nqa peb tus kheej. Tiam sis thaum kawg, tus txheej txheem yug me nyuam—uas nyuaj rau tus poj niam thiab tus me nyuam puav leej—cais tau peb.
Thaum ib tug me nyuam mos liab yug los rau ntawm qhov kaj thiab huab cua txias ua rau tus me nyuam mos liab ceeb plaws thiab tau ua pa thawj zaug. Muaj pa puv nws ob lub ntsws me me, lub ntsws pib ua hauj lwm, thiab tus me nyuam mos liab pib ua pa. Thaum txiav nws txoj hlab ntaws, qhov txuas ntawm niam thiab me nyuam raug txiav lawm, thiab tus me nyuam mos liab pib ua neej nyob hauv lub ntiaj teb.
Yauj hais tias, “Vajtswv tus ntsuj plig tsim kuv thiab pub txoj sia rau kuv.”1
Thaum peb yug los “cov huab uas yog yeeb koob raws peb qab.”2 “Tsev Neeg: Ib Zaj Lus Tshaj Tawm rau lub Ntiaj Teb” qhia hais tias txhua txhia tus “yog nkawm niam txiv saum ntuj ceeb tsheej ib tug tub ntsuj plig los yog ib tug ntxhais ntsuj plig uas nkawd hlub,” thiab “txhua txhia tus muaj ib tug cwj pwm thiab txoj hmoov los saum ntuj los.”3 Leej Txiv Saum Ntuj Ceeb Tsheej muaj siab dawb pub ib feem ntawm Nws tus kheej rau peb. Tej cwj pwm uas los saum ntuj los yog ib lub txiaj ntsim uas Nws pub rau peb nrog kev hlub zoo li muaj los ntawm yus niam yus txiv xwb.
Peb los rau hauv lub ntiaj teb no kom tu cov noob ntawm tej cwj pwm los saum ntuj los uas nyob hauv peb.
Peb Paub Vim Li Cas
Elaine Cannon, ib tug Koom Haum Ntxhais Hluas tus tuam thawj tswj hwm dhau los, hais tias, “Muaj ob hnub tseem ceeb nyob hauv ib tug poj niam lub neej: Hnub uas nws yug los thiab hnub uas nws kawm hais tias yog vim li cas.”4
Peb paub vim li cas. Peb tau los pab txhim tsa Nws lub nceeg vaj thiab npaj rau Nws Leej Tub, Yexus Khetos, txoj Kev Los Zaum Ob. Txhua zaus peb ua pa, peb rau siab ua raws li Nws hais. Qhov uas peb rau siab nyob ze peb Leej Txiv thiab Nws Leej Tub ua rau peb tus cwj pwm uas los saum ntuj los nyob hauv peb txhua tus loj zuj zus tuaj.
Peb tus cwj pwm los saum ntuj los tsis nyob ntawm tej yam uas peb tau ua peb tus kheej xwb, peb lub luag hauj lwm, txawm peb sib tw khiav npaum li cas, los sis peb muaj koob muaj npe loj npaum li cas. Peb tus cwj pwm twb yog los ntawm Vajtswv los. Yog ib qho uas muaj ua ntej peb yug los thiab yuav muaj nyob mus ib txhis.
Vajtswv Hlub Peb
Peb to taub peb tus cwj pwm uas los saum ntuj los thaum peb muaj peb Leej Txiv Saum Ntuj Ceeb Tsheej txoj kev hlub thiab hlub lwm tus. Peb muaj kev ywj siab xaiv saib xyuas thiab pab kom peb tus cwj pwm ntawd muaj kev vam meej. Petus hais tias peb tau txais “txoj koob hmoov zoo kawg nkaus” kom peb “lub neej [yuav] zoo ib yam li Vajtswv lub.”5 Thaum peb to taub peb yog leej twg—peb yog Vajtswv cov ntxhais—peb pib paub txog txoj koob hmoov zoo kawg nkaus ntawd.
Kev saib ntawm ib lub qhov rais, tsis yog kev saib tsom iav xwb, cia peb pom tias peb yog Nws li. Peb yuav xav thov Vajtswv, thiab peb yuav xav nyeem Nws tej lus thiab ua raws li Nws lub siab nyiam. Peb yuav paub hais tias peb muaj nqi los ntawm Nws, tsis yog los ntawm neeg ntiaj teb ib puag ncig los sis cov nyob hauv Facebook los sis Instagram.
Yog tias koj tsis paub tseeb koj puas los ntawm Vajtswv los, cia li txhos caug thiab thov Leej Txiv Saum Ntuj Ceeb Tsheej hais tias, “Kuv puas yog koj tus ntxhais tiag tiag, thiab koj puas hlub kuv?” Txwj Laug M. Russell Ballard hais tias, “Ib zaj zoo tshaj plaws uas tus Ntsuj Plig yuav qhia rau nej yog qhov uas tus Tswv xav li cas txog nej.”6
Peb yog Nws li. Povlauj hais tias, “Vajtswv tus Ntsuj Plig qhia rau peb lub siab hais tias peb yog Vajtswv cov me nyuam.”7 Thawj zaj nkauj nyob hauv lub Koom Haum Me Nyuam Yaus uas peb kawm yog “Kuv Yog Vajtswv tus Me Nyuam.”8 Twb txog lub sij hawm muab ib co lus ntxiv rau lo lus “Kuv yog Vajtswv tus me nyuam” thiab nug tias “Yog li ntawd, yuav ua dab tsi?” Tej zaum peb yuav xav nug tej yam xws li: “Kuv yuav ua dab tsi kom ua neej zoo li kuv yog Vajtswv tus me nyuam?” “Kuv yuav ua li cas kom txhawb nqa kuv tus cwj pwm uas los saum ntuj los?”
Thawj Tswj Hwm Dieter F. Uchtdorf hais tias, “Vajtswv txib nej los nyob no kom npaj rau ib lub sij hawm yav tom ntej uas yuav zoo tshaj plaws.”9 Yuav muaj lub sij hawm yav tom ntej zoo li ntawd yog nej ua nej lub neej kom raws li Vajtswv tau tsim nej thiab ua ntau li nej ua tau. Ua li no caw tus Tswv los hauv nej lub neej, nej tab tom muab Nws lub siab nyiam los ua nej li.
Peb Xav Kawm Vim Peb Los Saum Ntuj Los
Peb tus cwj pwm uas los saum ntuj los ua rau peb xav paub txog qhov tseeb uas nyob mus ib txhis ntawm peb tus kheej.
Tsis ntev tas los no, ib tug ntxhais hluas hu ua Amy qhia qhov no rau kuv thaum nws sau hais tias: “Nyuaj rau yus ua ib tug ntxhais hluas niaj hnub nim no. Txoj kev nqaim zuj zus tuaj. Dab Ntxwg Nyoog siv zog heev. Muaj qhov yog thiab qhov tsis yog; tsis muaj qhov nruab nrab.”
Nws sau ntxiv hais tias: “Nyuaj nrhiav cov phooj ywg zoo. Txawm yus xav tias yus muaj phooj ywg zoo uas yeej yuav tsis ncaim yus mus los, qhov ntawd hloov tau thaum twg los tau. Yog li ntawd kuv zoo siab kuv muaj ib tsev neeg, muaj Leej Txiv Saum Ntuj Ceeb Tsheej, Yexus Khetos, thiab tus Vaj Ntsuj Plig Dawb Huv uas yuav nrog nraim kuv nyob thaum cov phooj ywg khiav mus lawm.”
Amy hais ntxiv hais tias, “Muaj ib hmo kuv nyuaj siab. Kuv qhia kuv tus niam laus hais tias kuv tsis paub ua li cas.”
Hmo ntawd nws tus niam laus xa text thiab ntaus ntawv li Txwj Laug Jeffery R. Holland tau hais tias: “Tsis txhob tso tseg. … Tsis txhob tsum. Cia li mus kev tsis tu ncua. Cia li sim mus ntxiv. Muaj kev pab thiab kev zoo siab tom ntej. … Thaum kawg txhua yam yuav zoo. Cia li tso siab rau Vajtswv thiab ntseeg tias tej yam zoo yuav los rau koj.”10
Amy piav hais tias: “Kuv nco ntsoov kuv tau nyeem zaj lus ntawd thiab kuv thov Vajtswv kom kuv yuav hnov tau Nws txoj kev hlub yog tias Nws nyob ntawd tiag tiag.”
Nws hais tias: “Thaum kuv nug thiab ntseeg tias Nws nyob ntawd tiag, tam sim ntawd kuv hnov ib qho kev zoo siab thiab kev sov so zoo kawg. Tsis muaj lus piav tau. Kuv paub tias Nws nyob thiab Nws hlub kuv.”
Vim nej yog Nws cov me nyuam, Nws paub tias nej muaj peev xwm rais los ua neeg zoo li cas. Nws paub nej tej kev ntshai thiab nej tej kev npau suav. Nws zoo siab heev vim Nws paub nej muaj nqi npaum li cas. Nws tos nej los cuag Nws thaum nej thov Vajtswv. Vim nej yog Nws cov me nyuam, nej xav tau Nws, tiam sis Nws kuj xav tau nej thiab. Cov uas zaum ib puag ncig nej tam sim no xav tau nej. Neeg ntiaj teb xav tau nej, thiab nej tus cwj pwm los saum ntuj los pab nej ua Nws cov thwj tim rau tag nrho Nws cov me nyuam. Thaum peb pom qhov uas los saum ntuj los nyob hauv peb tus kheej, ua rau peb pom tau nyob hauv lwm tus.
Peb Pab Lwm Tus Vim Peb Los Saum Ntuj Los
Peb tus cwj pwm uas los saum ntuj los ua rau peb xav pab lwm tus.
Tsis ntev tas los, Sharon Eubank, tus thawj coj ntawm Tej Kev Pab Neeg Txom Nyem thiab LDS tej lub Koom Haum Pab Tib Neeg qhia txog ib zaj uas Txwj Laug Glenn L. Pace hais txog. Ib nrab ntawm tej xyoo 1980 muaj kev tshaib kev nqhis loj heev thiab ntuj qhuav heev nyob rau hauv Ethiopia. Xwv kom pab neeg txom nyem, lawv tau txhim tsa tej qhov chaw faib mov thiab dej kom pub tau rau cov neeg noj thiab haus. Ib tug txiv neej laus uas tshaib plab heev tau taug kev mus ntev kom txog ib qhov chaw faib mov. Nws tau hla ib lub zos thiab hnov ib tug me nyuam quaj. Nws nrhiav mus txog thaum nws pom tus me nyuam mos liab uas zaum ib sab ntawm nws niam uas twb tau tas sim neej lawm. Tus txiv neej khawm tus me nyuam, thiab mus kev 25 mais (40 km) ntxiv mus rau qhov chaw faib mov. Thaum nws tuaj txog, nws tsis hais tias “Kuv tshaib plab” los sis “Pab kuv.” Nws hais tias “Yuav ua li cas pab tus me nyuam mos liab no?”11
Tus cwj pwm los saum ntuj los nyob hauv peb ua rau peb xav ncav tes pab lwm tus thiab tshoov peb lub siab kom peb rau siab ua. Leej Txiv Saum Ntuj Ceeb Tsheej thiab Yexus Khetos pab tau peb muaj dag zog txaus ua li ntawd. Zoo li tus Tswv nug peb hais tias, “Yuav ua li cas kom pab tau tus ntxhais no, tus nus no, leej txiv, los yog tus phooj ywg no?”
Tus Ntsuj Plig tej lus ua rau tus uas ua xyem xyav rov qab muaj kev kaj siab lug, zoo li tus uas ua tsis tau pa rov qab ua tau pa.
Thaum tus yaj saub hais lus, nws tej lus ua rau peb nco txog peb tus cwj pwm los saum ntuj los thiab ntxiv dag zog kom pab tau peb ua raws li ntawd.
Qhov uas peb txais lub cim nco txog txhua lub lim tiam ua rau peb cia siab rau peb tus cwj pwm thiab peb nco txog peb tus Cawm Seej, Yexus Khetos.
Kuv cog lus rau nej hais tias thaum nej kawm ntxiv txog nej tus cwj pwm uas los saum ntuj los, nej yuav pib ua rau nej lub txiaj ntsim no loj zuj zus tuaj. Cia qhov no coj nej rais los ua Nws cov ntxhais, taug txoj kev rov qab mus cuag Nws—mus rau qhov chaw uas peb yuav “txum tim rov rau tus Vajtswv tus uas tau muab pa rau [peb].”12 Los ntawm Yexus Khetos lub npe, amees.