Vajtswv txoj Lus Zoo

Peb feem coob uas sib koom hauv lub rooj sab laj no tau tuaj “mloog Vajtswv txoj lus zoo, muaj tseeb tiag, txoj lus uas kho tau tej ntsuj plig raug mob kom zoo” (Yakhauj 2:8). Peb nrhiav tau txoj lus ntawd hauv cov vaj lug kub thiab hauv tej lus qhia los ntawm peb cov thawj coj, es txoj lus ntawd coj kev cia siab thiab kev nplij siab los rau peb uas nyob hauv qhov tsaus ntawm kev txom nyem.

Los ntawm tej yam uas muaj los rau peb hauv peb lub neej no, peb kawm hais tias peb tsis muaj kev xyiv fab puv npo, tiam sis nyob hauv Yexus Khetos peb txoj kev xyiv fab puv npo tiag (saib D&C 101:36). Tus Tswv ntxiv dag zog rau peb kom peb thiaj yuav tsis tas nyiaj ib yam kev txom nyem dab tsi, tsuas yog muaj kev xyiv fab ntawm Khetos xwb (saib Amas 31:38).

Peb tej siab puv nkaus muaj kev ntxhov siab thaum peb pom ib tug neeg uas peb hlub nyiaj tej kev mob ntawm ib tug kab mob loj.

Qhov uas ib tug neeg uas peb hlub tso peb tseg kuj tseg tau ib lub qhov hauv peb sab ntsuj plig.

Thaum peb ib txhia me nyuam ua loj leeb tawm ntawm txoj moo zoo txoj hau kev, tej zaum peb xav hais tias peb muaj txim txhaum thiab peb tsis paub yuav muaj li cas thaum kawg hais txog lawv lub neej nyob mus ib txhis.

Qhov kev cia siab rau ib txoj kev ua txij ua nkawm xilethi-aus thiab muaj tub muaj ki hauv lub neej no ploj zuj zus mus ib xyoos dhau ib xyoos.

Thaum cov neeg uas tsim nyog yuav hlub peb tsim txom peb, ces li no ua tau rau peb sab ntsuj plig muaj mob heev thiab.

Qhov uas ib tug txiv los yog ib tug poj niam deev luag yog ib yam uas ua tau rau ib khub niam txiv txoj kev ua txij ua nkawm mus ib txhis li raug puas tsuaj mus.

Tej yam no thiab lwm yam teeb meem uas muaj los hauv lub neej no kuj ua tau rau peb xav nug peb tus kheej ib yam li tus Yaj Saub Yauxej Xamiv nug hais tias: “Au Vajtswv, koj nyob qhov twg?” (Q&K 121:1).

Thaum tej lub sij hawm nyuaj ntawd, Vajtswv txoj lus zoo kho sab ntsuj plig uas raug mob thiab coj txoj lus zoo no rau peb lub siab lub ntsws hais tias:

Kev kaj siab los rau koj; koj tej kev nyuaj siab thiab koj tej kev txom nyem yuav muaj nyob ib nyuag ntus xwb;

Thiab tom qab ntawd, yog koj ua tib zoo nyiaj, Vajtswv yuav tsa koj mus nto ntuj (saib D&C 121:7–8).

Vajtswv txoj lus zoo ua rau peb muaj kev cia siab, vim peb paub hais tias lawv cov uas rau siab ntseeg yuav txais tus nqi zog loj saum ntuj ceeb tsheej lub nceeg vaj thiab hais tias tom qab raug kev tsim txom tej koob hmoov los rau peb (saib D&C 58:3–4).

Vajtswv txoj lus zoo, raws li hais dhau ntawm cov yaj saub, pab peb tso siab hais tias peb txoj kev sib txis nyob mus ib txhis, uas raug txhawb nqa los ntawm peb txoj kev rau siab ntseeg tej kev cog lus los saum ntuj los, yuav foom koob hmoov rau peb thiab peb tej xeeb leej xeeb ntxwv (saib Orson F. Whitney, nyob hauv Conference Report, Kaum Hli Ntuj 1929, 110).

Vajtswv txoj lus zoo kuj pab peb tso siab hais tias, tom qab uas peb tau ua neej muaj siab ntseeg tiag, peb yuav tsis xiam ib txoj koob hmoov twg vim peb tsis tau ua dab tsi yog tias peb tsis tau muaj lub cib fim ua tej yam ntawd. Yog tias peb tau ua neej nyob raws li kev ntseeg mus txog thaum lub sij hawm peb tas sim neej, peb “yuav muaj tag nrho tej koob hmoov, kev tsa nto, thiab yeeb koob uas ib tug txiv neej los yog ib tug poj niam twg [uas tau muaj lub cib fim kom tau] yuav muaj.” (Saib The Teachings of Lorenzo Snow, tus kho ntawv yog Clyde J. Williams [1984], 138.)

Nim no, tseem ceeb heev to taub hais tias qee qhov kev txom nyem kuj los tau rau hauv peb lub neej yog tias peb tsis hloov siab lees txim tiag tiag. Thawj Tswj Hwm Marion G. Romney tau qhia hais tias: “Tej kev txom nyem thiab kev nyuaj siab uas tib neeg ntiaj teb nyiaj niaj hnub nim no yog vim lawv tsis hloov siab lees txim tiag tiag. … Ib yam li kev txom nyem thiab kev nyuaj siab los vim yog kev txhaum, ib yam li ntawd kev zoo siab thiab kev xyiv fab kuj los vim yog kev hloov siab lees txim” (hauv Conference Report, Plaub Hlis Ntuj 1959, 11).

Yog vim li cas qhov uas tsis hloov siab lees txim thiaj muaj kev txom nyem thiab kev mob siab?

Ib lo lus teb yog qhov uas hais tias “muaj ib txoj kev rau txim uas [tau] npaj tseg lawm, thiab tau muab ib txoj kev cai ncaj ncees, uas ua rau tib neeg paub qhov txhaum” (Amas 42:18; kuj saib nqe 16). Tus Yaj Saub Yauxej Xamiv tau qhia tias peb yog cov uas rau txim rau peb tus kheej thiab hais tias twb yog qhov uas peb tu siab rau peb tus kheej uas tsim txom peb ib yam li ib lub pas dej hluav taws thiab leej faj (saib Teachings of Presidents of the Church: Joseph Smith [2007], 224).

Yog tias peb sim zam peb qhov paub ncaj thiab txhaum thaum peb keb [peb tus kheej] txawm me me vim yog [peb] tej kev txhaum (Amas 42:30) los yog thaum peb sim muab peb tej kev txhaum zais, peb tsuas yuav tub qaug tus Ntsuj Plig xwb (saib D&C 121:37) thiab tuav theem peb txoj kev hloov siab lees txim. Qhov kev dag peb tus kheej li no, txawm hais tias yog ib yam uas kav tsis ntev, thaum kawg yuav haj yam coj kev mob thiab kev tu siab rau hauv peb lub neej thiab yuav ua rau peb tsis muaj cib fim ntau txais kev zam txim rau peb tej kev txhaum.

Rau txoj kev txom nyem li no, Vajtswv txoj lus kuj coj kev nplij siab thiab kev cia siab; Vajtswv txoj lus qhia peb tias muaj kev daws tej kev mob siab uas los ntawm txoj kev ua txhaum. Qhov kev daws siab no los ntawm txoj kev theej txhoj ntawm Yexus Khetos thiab muaj los yog tias peb yuav muaj siab ntseeg rau ntawm Nws, hloov siab lees txim, thiab ua raws li Nws tej lus txib.

Tseem ceeb heev uas peb pom tau tias ib yam li qhov txais kev zam txim rau tej kev txhaum, kev hloov siab lees txim yog ib txoj kev coj ua txhua hnub thiab tsis yog ib yam uas txawm muaj rau tib lub sij hawm xwb. Peb yuav tsum ua tib zoo ua raws li txhua kauj ruam tiag.

Piv txwv hais tias, thaum peb noj lub cim nco txog, peb qhia rau tus Tswv hais tias peb yuav nco qab ntsoov txog Nws txhua lub sij hawm thiab ceev Nws tej lus txib. Ua li ntawd qhia tus Tswv hais tias peb lub siab xav tau qhov zoo.

Lub sij hawm uas peb pib nco qab ntsoov Nws thiab ceev Nws tej lus txib txhua hnub—thiab tsis yog thaum Hnub Caiv nkaus xwb—yog lub sij hawm thaum peb pib txais kev zam txim rau peb tej kev txhaum thiab Nws pib tso Nws tus Ntsuj Plig nrog peb nyob nraim raws li Nws cog tseg lawm.

Yog tias peb tsis ua tib zoo mloog lus ua ke nrog peb tej kev xav ua qhov zoo, ces tsis ntev qhov zoo los ntawm kev txais kev zam txim yuav ploj mus thiab tus Ntsuj Plig pib tawm ntawm peb mus. Thaum peb ua li no peb tej daim di ncauj hawm Nws tiam sis peb tej siab nyob deb ntawm Nws (saib 2 Nifais 27:25).

Txuas ntxiv rau qhov nplij siab, Vajtswv txoj lus zoo ceeb toom peb hais tias txoj kev coj ua ntawm qhov uas txais kev zam txim rau peb tej kev txhaum yuav daig tau yog tias peb mag tej yam uas tsis muaj nuj nqis hauv ntiaj teb no, thiab peb rov qab pib tau txoj kev coj ua no tsuas yog thaum peb hloov siab lees txim thiab txo hwj chim tiag tiag xwb (saib D&C 20:5–6).

Tej yam uas tab kaum peb kom peb thiaj txais tsis tau kev zam txim rau peb tej kev txhaum thiab uas hais txog qhov uas ceev Hnub Caiv kom dawb huv yog dab tsi?

Ob peb qho piv txwv yog tuaj lig rau txoj kev sib ntsib noj lub cim nco txog es tsis muaj laj thawj zoo; los yog tuaj txog es tsis tau ntsuam xyuas peb tus kheej ua ntej saib peb puas yuav tsim nyog noj qhov mov mog thiab haus khob me nyuam dej (saib 1 Kauleethaus 11:28); thiab tuaj txog es tseem tsis tau thov txog Vajtswv thiab lees txim thiab thov txim ntawm Vajtswv thov kom Nws zam txim pub rau peb.

Lwm qhov piv txwv yog li no: tsis coj tswm seeb li thaum peb siv peb tej tshuab ntawm tes sib xa xov, tawm ntawm txoj kev sib ntsib mus tom qab noj lub cim nco txog, thiab ua tej yam hauv peb tej vaj tse uas tsis tsim nyog ua thaum hnub dawb ceev ntawd.

Yog tias peb paub tej no lawm, yog vim li cas feem ntau peb thiaj tsis hwm Hnub Caiv kom dawb huv?

Nyob hauv phau Yaxayas, peb nrhiav tau ib los lus teb uas txawm lo lus teb no hais txog Hnub Caiv, lo lus teb ntawd kuj ntxim nyeem hais txog lwm txoj lus txib peb yuav tsum ceev, nws hais tias: “Yog tias nej tig nej ko taw tawm ntawm hnub caiv, es tsis ua raws li koj lub siab nyiam nyob rau kuv hnub dawb huv” (Yaxayas 58:13).

Cov lus tseem ceeb yog “tsis ua … raws li koj lub siab nyiam,” los sis ua lwm yam lus hais, ua raws li Vajtswv lub siab nyiam. Feem ntau, qhov uas peb lub siab nyiam—uas yog los ntawm lub siab xav ntawm tib neeg ntiaj teb—tawm tsam qhov uas yog Vajtswv lub siab nyiam. Tus yaj saub Brigham Young tau qhia hais tias “thaum ib tug neeg twg tej kev xav tau xav yuav, tej kev ntswv siab, thiab tej kev xav hauv nruab siab nyoo rau Vajtswv thiab Vajtswv lub siab xav, ces tus neeg ntawd yuav yog neeg dawb huv.—Kuv txoj hauj lwm yog kom kuv lub siab xav haum Vajtswv lub siab xav, thiab ua li no yuav coj kuv mus rau qhov zoo, thiab kuv yuav txais tau lub neej nyob mus ib txhis li” (Deseret News, Cuaj Hlis Ntuj 7, 1854, 1).

Vajtswv txoj lus zoo caw peb los siv lub hwj chim ntawm txoj Kev Theej Txhoj thiab muab nruab rau hauv peb lub neej thiab ua haum Vajtswv lub siab xav—tsis yog ua haum ntxwg nyoog thiab lub cev nqaij daim tawv—kom peb, dhau ntawm tus Tswv txoj kev tshav ntuj, yuav raug cawm dim tau (saib 2 Nifais 10:24–25).

Vajtswv txoj lus zoo uas peb tshaj tawm hnub no qhia peb hais tias peb yuav tsum rau rau siab hloov siab txhua hnub kom peb thiaj txais tau tus Vaj Ntsuj Plig Dawb Huv tej kev tshoov siab.

Thaum peb muaj tus Ntsuj Plig roos peb, ces peb coj tau cwj pwm zoo dua. Nws “yuav muab kev kaj siab lug thiab kev xyiv fab rau [peb] tus ntsuj plig thiab, … nws yuav tshem kev chim siab, kev ntxub, kev khib, kev sib cav sib ceg, thiab txhua yam kev phem tawm ntawm [peb] tej siab; thiab tag nrho [peb] tej siab tej ntsws yuav xav ua qhov zoo, coj kev ncaj ncees los, thiab txhim tsa Vajtswv lub nceeg vaj” (see Teachings: Joseph Smith, 98).

Thaum muaj tus Vaj Ntsuj Plig Dawb Huv tshoov peb siab, peb yuav tsis tu siab, thiab peb yuav tsis tub qaug lwm tus neeg; peb yuav zoo siab thiab peb lub laj lim plab plaw yuav huv dua. Peb txoj kev hlub rau lwm tus neeg yuav loj hlob tuaj. Peb yuav muaj lub siab xav zam txim pub rau lwm tus neeg thiab pab lwm tus neeg kom lawv zoo siab.

Peb yuav zoo siab thaum peb pom lwm tus neeg loj hlob tuaj ntawm sab ntsuj plig, thiab peb yuav nrhiav kom tau qhov zoo hauv lwm tus neeg.

Kuv thov Vajtswv kom peb yuav muaj txoj kev xyiv fab uas los ntawm txoj kev coj ncaj ncees thiab kom peb hloov siab lees txim kom peb thiaj muaj tus Vaj Ntsuj Plig Dawb Huv nrog peb nyob nraim. Ua li ntawd, peb yuav rais los mus ua neeg zoo dua, thiab peb tej tsev neeg yuav tau koob hmoov. Kuv ua tim khawv txog tej ntsiab cai no los ntawm Yexus Khetos lub npe dawb ceev, amees.