Nyob Twj Ywm hauv Koj Txoj Hau Kev

Thaum lub Peb Hlis Ntuj hnub tim 11, 2011, kuv sawv ntawm qhov chaw tos lub tsheb ciav hlau hauv Tokyo Shinagawa yuav mus xyuas Qhov Chaw Tshaj Tawm Txoj Moo Zoo Japan Kobe. Ze li 2:46 teev tav su, txawm muaj av qeeg hnyav npaum li 9. Kuv los sawv tsis tau vim lub ntiaj teb tau tshee hnyo, ces kuv tau tuav rawv tus pas hlau ntawm tus ntaiv. Cov teeb ib ncig saum ru tsev pib poob los rau hauv av. Tag nrho lub nroog Tokyo ntshai heev.

Kuv muaj hmoov vim kuv tsis tau raug mob, es plaub teev tom qab ntawd, kuv kawm paub tias tag nrho kuv tsev neeg tseem nyob zoo tsis rau xwm txheej dab tsi.

Nyob hauv TV lawv pheej qhauj tawm cov duab txaus ntshai thiab ua rau yus xav tsis thoob. Txawm muaj ib nthwv dej loj loj hauv qhov chaw tshaj tawm txoj moo zoo tim Sendai—nthwv dej ntawd tsoo txhua yam uas nyob tom kev: cov tsheb, cov tsev, tej tsev hauj lwm thiab tej thaj teb. Kuv xav tsis thoob kiag li thaum kuv pom cov duab ntawd, kuv kua muag poob los. Kuv tau mob siab thov kom peb Leej Txiv Saum Ntuj Ceeb Tsheej yuav pov hwm thiab pab cov neeg uas nyob hauv thaj tsam no vim kuv hlub lawv heev.

Yav tom qab ntawd, peb kawm paub tias tag nrho cov tub txib thiab lub Koom Txoos cov mej zeej yeej nyob zoo. Tiam sis, coob tug mej zeej yeej raug xwm txheej, lawv xiam cov neeg hauv lawv tsev neeg, tej tsev, thej tej khoom qub txeeg qub teg. Ze li 20,000 txhiab tus neeg tau tuag mus, tej koog zej zog raug puas tsuaj mus, thiab coob leej tau khiav ntawm lawv tej tsev mus vim muaj teeb meem ntawm qhov chaw ua fai fab nuclear.

Tej kev puas tsuaj zoo li no niaj hnub nim no ua rau ntau qhov chaw hauv ntiaj teb no puas tsuaj puas ntsoog, ua rau neeg coob tuag mus. Peb raug ceeb toom hais tias pheej yuav muaj kev puas tsuaj, kev tsov kev rog, thiab ntau yam teeb meem hauv ntiaj teb no.

Thaum peb raug tej kev txom nyem li no, tej zaum peb yuav nug hais tias, “Ua cas kuv thiaj raug tej kev xwm txheej no?” los sis “Vim li cas kuv thiaj yuav tau raug kev txom nyem?”

Tau ntev ntev tom qab kuv hloov siab los ntseeg txoj moo zoo no, kuv tsis paub teb lo lus nug no “Vim li cas kuv thiaj muaj tej kev cov nyom?” Kuv to taub hais tias ib qho ntawm txoj kev cawm seej yog qhov uas peb yuav raug txoj kev sim siab. Tiam sis tiag tiag mas, thaum hais txog lo lus nug no, kuv tsis paub tseeb kuv puas muaj cuab kav teb tau lo lus nug no. Tab sis mas txawm muaj ib lub sij hawm hauv kuv lub neej uas kuv kuj raug ib txoj kev cov nyom loj heev.

Thaum kuv muaj 30 xyoo, kuv tab tom mus xyuas qhov chaw tshaj tawm txoj moo zoo hauv thaj tsam Nagoya ua ib qho ntawm kuv txoj hauj lwm. Tom qab txoj kev sib ntsib, tus thawj tswj hwm rau qhov chaw tshaj tawm txoj moo zoo tau txib ob tug tub txib kom xa kuv mus rau tshav dav hlau. Tiam sis, thaum peb nres tom ib txoj kev sib tshuam nyob nram qab ib lub toj siab siab, txawm muaj ib lub tsheb thauj khoom loj loj uas raws peb qab ceev ceev. Nws los tsoo peb pob tw tsheb thiab thawb peb lub tsheb tom ntej deb tshaj 70 fiv (20 m). Qhov uas txaus ntshai tshaj plaws yog qhov uas yeej tsis muaj ib tug neeg tsav lub tsheb thauj khoom ntawd. Peb lub pob tw tsheb mluas ntau heev txog ib nrab lub tsheb. Muaj hmoov, vim ob tug tub txib thiab kuv tseem ciaj.

Tiam sis, hnub tom qab ntawd, kuv pib hnov mob ntawm kuv caj dab thiab ob sab xwb pwg thiab pib mob taub hau heev. Txij hnub ntawd los kuv tsaug zog tsis tau, txhua txhua hnub hauv kuv lub neej kuv txawm muaj mob ntawm sab cev nqaij daim tawv thiab sab paj hlwb tib si. Kuv tau thov Vajtswv kom kho kuv tej kev mob, tiam sis tej kev mob no kav mus li 10 xyoo.

Lub sij hawm no, kuv lub paj hlwb pib tsis muaj kev ntseeg, thiab kuv tau xav li no, ”Ua li cas kuv thiaj yuav tau raug mob ntau npaum li no?” Tiam sis, txawm kuv tsis tau kev kho mob li kuv lub siab xav tau los, kuv tau sim rau siab ntseeg thiab ua raws li Vajtswv cov lus txib. Kuv tau pheej thov Vajtswv kom kuv yuav muaj cuab kav teb tau cov lus nug uas kuv muaj txog kuv tej kev cov nyom no.

Tau muaj ib lub caij uas kuv pom hais tias kuv muaj ib yam teeb meem tshiab hauv kuv lub neej, thiab kuv muaj ntsis nyuaj siab vim kuv tsis to taub tias kuv yuav ua li cas thiaj nyiaj mus dhau qhov teeb meem tshiab no. Kuv tau thov Vajtswv teb kuv. Tiam sis kuv tsis tau lus teb tam sim ntawd. Ces kuv tau mus nrog ib tug thawj coj hauv lub Koom Txoos uas kuv tso siab rau tham.

Thaum wb tseem sib tham, kuv hnov txoj kev hlub hauv nws lub suab thaum nws hais tias, “Tij Laug Aoyagi, lub ntsiab rau lub neej hauv ntiaj teb no puas yog kom koj yuav raug qhov teeb meem no? Puas yog kom peb kam txais yuav tej teeb meem hauv lub neej no ua ib qho teeb meem xwb thiab cia tseg rau tus Tswv xwb? Koj puas xav tias qhov teeb meem no puas yuav ploj mus thaum peb sawv rov qab los?”

Thaum kuv hnov cov lus no, kuv tau hnov tus Tswv tus Ntsuj Plig muaj hwj chim zis. Kuv twb hnov cov lus qhuab qhia li no ntau zaus lawm, tiam sis kuv tsis tau qhib qhov muag to taub meej npaum li lub sij hawm no. Kuv to taub tias nov yog lo lus teb uas kuv tau nrhiav los ntawm tus Tswv thaum kuv tau thov Vajtswv. Kuv txawm muaj cuab kav to taub Leej Txiv Saum Ntuj Ceeb Tsheej txoj kev cawm seej thiab to taub ntxiv txog txoj ntsiab cai tseem ceeb no.

Nyob hauv Anplaham, tus Tswv Vajtswv tshaj tawm hais tias, “Thiab peb yuav sim lawv seb, lawv puas kam ua txhua yam uas tus Tswv lawv tus Vajtswv txib lawv ua.”¹

Yeej yog vim tus Vajtswv uas tau tsim ntuj tsim teb raug paub tag nrho tej txheej txheem rau lub ntiaj teb no, tias Nws yeej coj kav txhua yam tsav saum ntuj ceeb tsheej thiab hauv ntiaj teb, thiab yog tias yuav muaj tau txoj kev cawm seej, Nws cia peb raug ntau yam xwm—los yog hais tias, tej kev cov nyom—thaum peb ua neej nyob hauv ntiaj teb no.

Thiab tus Tswv hais li no rau Yauxej Xamiv hais kom nws paub hais tias:

Cia li paub hais tias tag nrho tej yam no yuav muab kev kawm rau nws, thiab yuav zoo rau nws. …

Yog li ntawd, nyob twj ywm hauv nws txoj hau kev …, vim Vajtswv yuav nrog nraim nws nyob mus ib txhis thiab ib txhis li.²

Tej kev cov nyom hauv lub ntiaj teb no—kuj hais txog kev mob kev nkees thiab kev tuag—yog ib qho ntawm txoj kev cawm seej thiab yog tej yam uas peb yeej yuav raug. Yog li ntawd thiaj tseem ceeb rau peb “nyob twj ywm hauv [peb] txoj hau kev” thiab muaj kev ntseeg txais yuav peb tej kev cov nyom.

Tiam sis, lub ntsiab rau peb lub neej tsis yog kom nyiaj mus dhau peb tej kev cov nyom xwb. Leej Txiv Saum Ntuj Ceeb Tsheej txib Nws Tib Leeg Tub, Yexus Khetos, los ua peb tus Cawm Seej thiab tus Txhiv Dim, xwv kom peb yuav muaj cuab kav kov yeej tej kev cov nyom uas peb raug hauv ntiaj teb no; ua lwm yam lus hais, Nws pab peb tej kev qaug zog yuav muaj zog,³ Nws tau theej peb lub txhoj thiab tej yam tsis zoo uas peb ua, thiab Nws pab tau peb txais txoj kev tsis txawj tuag thiab txoj sia nyob mus ib txhis.

Thawj Tswj Hwm Henry B. Eyring hais tias: “Txoj kev sim siab uas tus Vajtswv uas hlub peb tso ntawm peb txoj kev tsis yog sim saib seb peb nyiaj puas tau tej kev nyuaj siab. Nws yog sim saib seb peb nyiaj puas tau zoo. Peb xeem mus dhau kev sim siab thaum peb qhia tias peb tau nco ntsoov Nws thab cov lus txib uas Nws muab rau peb.”⁴

“Nyob twj ywm hauv koj txoj kev” yog ib txoj kev xaiv tseem ceeb thaum twg muaj ib txoj kev cov nyom. Tig koj lub siab rau Vatjswv, qhov no haj yam tseem ceeb thaum koj muaj kev cov nyom. Txo hwj chim los ua raws li Vajtswv cov lus txib. Muaj kev ntseeg kom koj lub siab yuav kam ua raws li Vajtswv lub siab nyiam.

Cia peb rov qab xav txog qhov kev sib tsoo tsheb hauv Nagoya. Kuv yeej tuag tau hauv kev sib tsoo ntawd. Txawm li ntawd los, vim muaj Vajtswv kev tshav ntuj, kuv tseem ciaj tsis tau tuag. Thiab nim no kuv paub tias kuv txoj kev raug txom nyemtau pab kuv kawm thiab loj hlob tuaj.⁵ Leej Txiv Saum Ntuj Ceeb Tsheej tau pab kom kuv muaj siab ntev, kawm muaj kev khuv leej, thiab nplij cov neeg uas raug txom nyem lub siab. Thaum kuv paub li no, kuv lub siab muaj kev ris txiaj ntau rau kuv Leej Txiv Saum Ntuj Ceeb Tsheej vim kuv tau muaj kev cov nyom no.

Tso Vajtswv uas qhov tseem ceeb tshaj plaws, tab txawm koj muaj tej teeb meem dab tsi los xij. Hlub Vajtswv. Ntseeg Yexus, thiab tso siab plhuav rau Nws hauv txhua yam tsav. Maulainais cog lus rau cov neeg zoo li no hais tias: “Yog nej yuav tswj nej tej siab tawm ntawm txhua yam uas tsis zoo, thiab hlub Vajtswv tag nej siab, nej ntsws thiab nej dag nej zog, ces Khetos txoj kev hlub tshua yeej muaj txaus rau nej, xwv kom los ntawm nws txoj kev hlub tshua nej yuav raug ua kom zoo tshaj plaws nyob hauv Khetos.”⁶

Kuv ua tim khawv tias Vajtswv Leej Txiv thiab Nws Tib Leeg Tub, Yexus Khetos, muaj sia nyob thiab tias Vajtswv cog lus rau cov uas “nyob twj ywm hauv [lawv] txoj kev” thiab hlub Nws yuav raug pov hwm tab txawm lawv tab tom raug tej teeb meem los, kuv hais li no los ntawm Yexus Khetos lub npe dawb ceev, amees.