Nws Zoo Kawg Nkaus!

Tsis ntev tas los kuv pom ib zaj lus uas ua rau kuv xav ntsoov. Zaj lus ntawd zoo li no hais tias: “Qhia ib tug neeg hais tias muaj ib phav phav pua lub hnub qub nyob saum ntuj, thiab nws yuav ntseeg koj. Qhia nws hais tias muaj cov xim ntub nyob ntawm phab ntsa, thiab nws yuav kov kom paub tseeb seb koj hais puas yog.”

Peb sawv daws zoo li no me ntsis puas yog? Tom qab kuv phais mob tsis ntev tas los, kuv cov kws kho mob piav hais tias kuv yuav tsum ua dab tsi kom zoo mob. Tiam sis kuv xub yuav tsum rov qab kawm ib yam dab tsi txog kuv tus kheej uas tsim nyog kuv kawm tau ntev los lawm: kuv yog ib tug neeg mob uas tsis muaj siab ntev.

Yog li ntawd kuv txiav txim siab hais tias kuv yuav kho kuv tus mob sai dua yog kuv nrhiav hauv Internet. Kuv xav hais tias kuv yuav nrhiav tau qhov tseeb uas kuv cov kws kho mob tsis tau paub los sis tsis xav qhia kuv.

Kuv siv sij hawm ntxiv ua ntej kuv paub hais tias kuv xav tsis yog. Kev tshawb nrhiav tej yam ntawm peb tus kheej los yeej yog tswv yim zoo. Tiam sis kuv twb muab qhov tseeb uas tsim nyog cia siab rau tso tseg thiab kuv xav nrhiav tej lus qhia ntawm Internet uas feem ntau txawv txawv heev.

Tej lub sij hawm, qhov tseeb yooj yim thiab meej dhau peb thiaj tsis saib qhov tseeb rau nqi npaum li cas. Yog li ntawd peb tso tej yam uas peb twb kawm thiab paub lawm tseg kom nrhiav tau tej yam uas neeg tsis tau paub thiab tej yam nyuaj dua. Kuv cia siab tias peb yuav kawm hais tias thaum peb raws cov duab ntxoov ntxoo, peb nrhiav tej yam uas tsis tshua muaj nqi.

Thaum hais txog qhov tseeb ntawm sab ntsuj plig, peb yuav ua li cas thiaj paub tias peb taug txoj kev yog?

Ib qho yog kev nug tej lus zoo—tej lus nug uas pab peb xav txog peb txoj kev mus thiab ntsuam xyuas seb peb lub neej zoo li cas. Tej lus nug zoo li:

“Kuv lub neej puas muaj nqi?”

“Kuv puas ntseeg Vajtswv?”

“Kuv puas ntseeg tias Vajtswv paub kuv thiab hlub kuv?”

“Kuv puas ntseeg tias Vajtswv hnov thiab teb kuv tej lus thov?”

“Kuv puas zoo siab tiag tiag?”

“Kuv tej hauj lwm puas ua raws li kuv lub hom phiaj ntawm sab ntsuj plig thiab tej yam uas muaj nqi nyob hauv kuv lub neej?”

Tej lus nug tseem ceeb txog lub ntsiab ntawm lub neej no tau ua rau ntau tus neeg thiab tsev neeg nyob thoob plaws lub ntiaj teb no xav nrhiav qhov tseeb. Ntau zaus lawv nrhiav tau Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab txoj moo zoo uas raug txum tim rov qab los.

Kuv xav tias peb cov mej zeej ntawm lub Koom Txoos tej zaum yuav tau zoo yog peb nug peb tus kheej: “Kuv lub neej nyob hauv lub Koom Txoos puas zoo rau kuv? Lub Koom Txoos puas coj kuv nyob ze Yexus Khetos? Txoj moo zoo uas foom koob hmoov rau kuv thiab kuv tsev neeg puas muab kev kaj siab lug thiab kev xyiv fab?”

Amas tau nug cov mej zeej ntawm lub koom txoos nyob hauv Xalahelas li no thaum nws nug hais tias: “Nej puas tau raug txoj kev hloov siab loj no nyob hauv nej tej siab? … [Thiab nej] puas xav li ntawd nim no?”¹ Tej kev xav li no tej zaum yuav pab peb rov qab ua tej hauj lwm txhua hnub raws li txoj kev cawm seej.

Cov mej zeej coob teb hais tias qhov uas lawv yog mej zeej ntawm lub Koom Txoos yeej yog ib qho zoo rau lawv. Lawv yuav ua tim khawv hais tias txawm pluag los muaj, txawm raug zoo los sis raug mob, lawv lub neej muaj nqi, muaj kev kaj siab lug, thiab kev xyiv fab vim lawv cog lus rau tus Tswv thiab ua hauj lwm pab lwm tus nyob hauv lub Koom Txoos. Txhua hnub kuv ntsib cov mej zeej hauv lub Koom Txoos uas muaj kev xyiv fab thiab los ntawm tej yam lawv ua thiab lawv qhia tias lawv lub neej tau zoo vim muaj Yexus Khetos txoj moo zoo.

Tiam sis kuv kuj paub tias muaj ib txhia uas xav tias lawv txoj kev ua mej zeej nyob hauv lub Koom Txoos yeej tsis zoo npaum li lawv xav.

Qhov no ua rau kuv nyuaj siab vim kuv paub ntawm kuv tus kheej hais tias txoj moo zoo no muab dag zog rau ib tug sab ntsuj plig npaum li cas—ua rau peb muaj kev cia siab thiab kev kaj siab. Kuv paub ntawm kuv tus kheej hais tias cov txiv ntawm Yexus Khetos txoj moo zoo muaj peev xwm muab tau tib neeg lub neej uas nyuaj siab txhawj xeeb hloov los ua neej zoo kawg nkaus thiab kaj siab lug.

Tiam sis vim li cas zoo li tsuas zoo dua rau ib txhia xwb? Cov uas lub Koom Txoos ua rau lawv xav hu nkauj txog txoj kev hlub uas txhiv dim² txawv li cas ntawm cov uas xav tias tshuav ib yam dab tsi uas lawv tsis tau txais?

Thaum kuv xav txog tej lus no, ua rau kuv xav txog ntau yam. Hnub no, kuv xav qhia ob qho rau nej.

Qhov ib, hais txog kev ua raws li tus Tswv hais mas peb puas ua kom nyuaj dhau?

Txoj moo zoo yeej yooj yim heev; ib tug me nyuam txawj to taub, tiam sis txoj moo zoo yeej muaj ntau yam yus kawm tau ntshe yuav tsum siv tas yus lub neej—twb yuav siv tas sij hawm mus ib txhis—kom kawm thiab paub tag nrho.

Tiam sis tej lub sij hawm peb muab tib neeg tej lub tswv yim zoo, tej hom phiaj, thiab tej kev xav npog Vajtswv txoj kev tseeb uas zoo li ib lub paj zoo nkauj uas yus muab kub npog txheej saud. Txhua yam, yog nyias nyob nyias, tej zaum pab tau thiab tsim nyog rau ib lub sij hawm thiab pab tau ib qho, tiam sis thaum yus muab tej yam ntawd tso ua ke, ntshe zoo li tej ntawd yog cov av nyeem uas npog lub paj muaj nqi uas peb hlub heev.

Yog li ntawd, peb cov thawj coj yuav tsum ua tib zoo tiv thaiv qhov yooj yim thiab qhov dawb huv ntawm lub Koom Txoos thiab txoj moo zoo thiab tsis txhob muab nra hnyav rau peb cov mej zeej ris.

Thiab peb txhua tus, uas yog cov mej zeej ntawm lub Koom Txoos, peb yuav tsum ua tib zoo siv zog thiab siv sij hawm rau tej yam uas muaj nqi tiag tiag, thaum peb txhawb nqa cov neeg zej zog thiab tsa Vajtswv lub nceeg vaj.

Muaj ib tug muam, ib tug uas qhia hauv lub Koom Haum Niam Tsev, uas txawj npaj tej zaj lus qhia zoo heev. Muaj ib zaug nws txiav txim siab nws yuav xaws ib daim pam uas yuav nyob tom qab kom qhia lub ntsiab rau nws zaj lus qhia. Tiam sis nws muaj ntau yam ua—nws yuav tsum tos cov me nyuam tom tsev kawm ntawv, ib tug neeg zej zog xav tau kev pab tsiv tsev, nws tus txiv ua npaws, thiab ib tug phooj ywg kho siab heev. Yuav luag txog hnub uas nws yuav qhia, thiab nws tsis tau xaws nws daim pam kom tag. Ces, hmo ua ntej nws yuav qhia, nws tsis tau tsaug zog ntau vim nws siv ib hmo xaws daim pam ntawd.

Hnub tom qab ntawd nws nkees kawg thiab tsis tshua muaj peev xwm tawm tswv yim lawm, tiam sis nws cia li sawv thiab qhia nws zaj lus.

Thiab daim pam ntawd twb zoo nkauj tiag—cov xov los nws xaws ncaj qha, cov xim zoo nkauj, thiab daim qauv uas nws siv los yeej zoo nkauj thiab. Thiab nyob nruab nrab nws tau xaws ib lo lus uas qhia lub ntsiab ntawm nws zaj lus qhia: “Ua Kom Yooj Yim.”

Cov kwv tij thiab cov muam, kev ua neej raws li txoj moo zoo tsis tas nyuaj.

Yog ib qho yooj yim to taub. Tej zaum kuv piav tau li no:

• Kev mloog Vajtswv txoj lus yam li xav ua tiag yuav pab peb ntseeg Vajtswv thiab tso siab rau Nws tej lus cog tseg.³

• Thaum peb yim tso siab rau Vajtswv, peb tej siab yim hlub Nws thiab hlub lwm tus.

• Vim peb hlub Vajtswv, peb xav ua raws li Nws hais peb thiaj ua raws li Nws txoj lus.

• Vim peb hlub Vajtswv, peb xav ua hauj lwm pab Nws thiab peb xav foom koob hmoov rau lwm tus lub neej thiab pab cov neeg pluag thiab cov txom nyem.

• Thaum peb yim taug txoj kev ua thwj tim li no, peb yim xav kawm Vajtswv txoj lus.

Ua li ntawd mas, txhua qhov peb ua coj peb mus rau qhov tom qab thiab ua rau peb muaj kev ntseeg, kev cia siab, thiab lub siab hlub.

Yog ib qho yooj yim, thiab ib qho zoo nkauj.

Cov kwv tij thiab cov muam, yog tias nej xav tias txoj moo zoo tsis tshua zoo rau nej, kuv caw nej cia li nres ib pliag, saib nej lub neej, thiab ua kom yooj yim me ntsis. Tsom ntsoov rau tej lus qhuab qhia, ntsiab cai thiab kev siv txoj moo zoo uas tseem ceeb. Kuv cog lus tias Vajtswv yuav coj nej thiab foom koob hmoov kom nej muaj lub neej zoo, thiab txoj moo zoo yuav pab nej zoo dua.

Qhov thib ob yog: pib qhov ntawm nej nyob.

Tej lub sij hawm peb poob siab vim peb tsis zoo txaus—tsis muaj zog ntawm sab ntsuj plig, tsis txawj ntse, tsis noj qab nyob zoo, tsis muaj nyiaj, tsis muaj phooj ywg, los sis tsis muaj txuj ci txaus. Yeej tsis ua txhaum yog yus xav ua zoo dua. Vajtswv tau tsim peb kom peb yuav tau kev vam meej. Thiab cia li nco ntsoov tias, peb tej kev qaug zog yuav tsum pab peb txo hwj chim thiab los cuag Khetos, tus uas yuav pab “ua kom tej uas tsis muaj zog rais los mus muaj zog.”⁴ Tiam sis Dab Ntxwg Nyoog siv peb tej kev qaug zog kom peb poob siab tsis xav sim ua ntxiv.

Kuv tau kawm hais tias peb tsis tas ua neeg zoo txaus ua ib yam dab tsi ua ntej peb yuav pib rais los ua tus neeg uas Vajtswv xav kom peb ua.

Vajtswv yuav txais nej tam sim no thiab pib pab nej. Nej yuav tsum muaj ib lub siab uas xav hloov, xav ntseeg, thiab tso siab rau tus Tswv xwb.

Nkide-oos xav tias nws yog ib tug neeg ua liaj teb pluag xwb, tus tsis tseem ceeb tshaj plaws nyob hauv nws tsev neeg. Tiam sis Vajtswv pom hais tias nws yog ib tug uas muaj zog.⁵

Thaum Xamuyees xaiv Xa-ules ua tus vaj ntxwv, Xa-ules sim hais kom nws hloov siab. Xa-ules yog los ntawm ib xeem neeg me tshaj nyob hauv cov neeg Ixayees. Nws yuav ua li cas ho ua tus vaj ntxwv tau?⁶ Tiam sis Vajtswv pom hais tias nws “muaj zog khov kho.”⁷

Muaj ib zaug uas tus yaj saub Mauxes poob siab heev ua rau nws xav tsum thiab xav kom Vajtswv muab nws tua tuag.⁸ Tiam sis Vajtswv tsis tau tso Mauxes tseg.

Kuv cov kwv tij thiab cov muam, yog peb saib peb tus kheej tsis dhau ntawm tej qhov muag ntawm sab cev nqaij daim tawv, tej zaum peb yuav xav tias peb zoo tsis txaus. Tiam sis peb Leej Txiv Saum Ntuj Ceeb Tsheej pom peb li peb yog tiag tiag thiab peb yuav rais los ua neeg zoo li cas. Nws saib peb zoo li peb yog Nws cov tub thiab ntxhais, cov neeg ntawm txoj kev kaj uas nyob mus ib txhis uas muaj feem ua zoo thiab txoj hmoov uas los saum ntuj los.⁹

Tus Cawm Seej txoj kev txi tau qhib kev rau txoj kev cawm seej kom peb rov qab mus cuag Vajtswv. Nws “txoj kev hlub tshua yeej muaj txaus rau tag nrho txhua tus tib neeg uas txo lawv tej hwj chim rau [Vajtswv].”¹⁰ Nws txoj kev tshav ntuj yog lub hwj chim uas cia peb mus rau hauv Vajtswv tej lub nceeg vaj cawm seej. Vim muaj Nws txoj kev tshav ntuj, peb txhua tus yuav sawv rov los thiab tau kev dim nyob hauv ib lub nceeg vaj muaj yeeb koob.

Txawm yog lub nceeg vaj muaj yeeb koob qis tshaj, lub nceeg vaj thileti-aus tshaj txhua txoj kev to taub,¹¹ thiab neeg coob yuav txais txoj kev cawm seej no ua lawv tug.¹²

Tiam sis tus Cawm Seej txoj kev tshav ntuj ua tau ntau yam ntxiv rau peb. Vim peb yog cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb xav tau ib qho uas zoo tshaj. Yog kev tsa nto nyob hauv lub nceeg vaj xilethi-aus. Yog txoj sia nyob mus ib txhis nrog peb Leej Txiv Saum Ntuj Ceeb Tsheej. Yog Vajtswv lub txiaj ntsim zoo tshaj plaws.¹³ Nyob hauv lub nceeg vaj xilethi-aus, peb txais tau “tag nrho Nws muaj thiab tag nrho nws lub yeeb koob.”¹⁴ Muaj tseeb tiag, txhua yam uas Leej Txiv muaj los Nws yuav muab rau peb.¹⁵

Kev tsa nto yog peb lub hom phiaj; kev ua Nws cov thwj tim yog peb txoj kev.

Thaum nej muab siab rau ntseeg me ntsis thiab pib taug kev muaj kev kaj siab lug ua raws li peb tus Tswv Yexus Khetos, nej tej siab yuav hloov.¹⁶ Tag nrho nej lub cev yuav pom kev kaj nrig.¹⁷

Vajtswv yuav pab nej rais los ua neeg zoo tshaj qhov nej xav. Thiab nej yuav kawm hais tias Yexus Khetos txoj moo zoo yeej yog ib qho zoo nyob hauv nej lub neej. Nws zoo.

Cov kwv tij thiab cov muam, cov phooj ywg zoo, kuv thov kom peb yuav tsom ntsoov rau “kev yooj yim uas los ntawm Khetos”¹⁸ thiab cia Nws txoj kev tshav ntuj txhawb nqa peb thiab coj peb mus thaum peb taug txoj kev txij ntawm qhov chaw peb nyob tam sim no mus rau peb txoj hmoov zoo kawg nyob ntawm peb Leej Txiv lub xub ntiag.

Thaum peb ua li ntawd, thiab ib tug neeg nug tias, “Kev ua ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg puas zoo rau koj?” ces peb yuav teb yam li zoo siab heev, thiab nrog kev txo hwj chim thiab kev xyiv fab, hais tias, “Nws yeej zoo kawg! Ua tsaug koj nug kuv! Koj puas xav paub ntxiv?”

Nov yog kuv txoj kev cia siab, kuv txoj kev thov Vajtswv, kuv zaj lus tim khawv, thiab kuv txoj kev foom koob hmoov los ntawm Yexus Khetos lub npe, amees.