2010–2019
Raws Li Vajtswv Saib
October 2015

Raws Li Vajtswv Saib

Los ntawm Txwj Laug Dale G. Renlund

Los ntawm Pawg Kaum Ob tug Thwj Tim

Daim Duab

Yog peb xav pab lwm tus, peb yuav tsum saib lawv raws li lawv niam lawv txiv saib lawv, raws li Leej Txiv Saum Ntuj Ceeb Tsheej saib lawv.

Kuv cov kwv tij thiab cov muam, ua tsaug vim nej txhawb nqa pom zoo rau kuv ua ib tug mej zeej nyob hauv Pawg Kaum Ob tug Thwj Tim. Nyuaj qhia nej hais tias qhov ntawd muaj nqi npaum li cas rau kuv. Kuv yeej zoo siab vim ob tug poj niam zoo kawg nkaus hauv kuv lub neej txhawb nqa pom zoo rau kuv: kuv tus poj niam, Ruth, thiab wb tus ntxhais, Ashley, uas wb hlub heev.

Kuv txoj kev hu yeej ua pov thawj txog tus Tswv tej lus thaum nyuam qhuav pib lub caij nyoog no uas hais tias xwv kom cov neeg qaug zog thiab cov neeg dog dig yuav plov meej txhij txhua ntawm Nws txoj moo zoo mus kom thoob ntiaj teb.1 Kuv yog ib tug uas qaug zog thiab dog dig li ntawd. Ntau xyoo tas los, thaum kuv raug hu ua ib tug npisov ntawm ib pawg ntseeg nyob Teb Chaws Amelikas sab hnub tuaj, kuv tus tij laug, uas hlob kuv me ntsis thiab muaj tswv yim ntau dua li kuv, nws hu xov tooj tuaj rau kuv. Nws hais tias, “Koj yuav tsum paub tias tus Tswv tsis tau hu koj vim koj tau ua ib yam dab tsi tseem ceeb. Hais txog koj mas, nyaj Nws hu koj txawm koj tau ua li cas los. Tus Tswv tau hu koj kom Nws ua tau Nws tej hauj lwm dhau los ntawm koj, thiab yuav muaj li ntawd tsuas yog koj ua raws li Nws lub siab nyiam xwb.” Kuv paub tias lub tswv yim uas kuv tus tij laug hais rau kuv haj yam muaj nqi hnub no.

Yog ib qho zoo kawg nkaus thaum ib tug tub txib to taub tias nws txoj hauj lwm tsis yog ua rau nws; tiam sis, nws txoj hauj lwm yog ua rau tus Tswv, kom pab Leej Txiv Saum Ntuj Ceeb Tsheej cov me nyuam. Kuv xav tias qhov no muaj tseeb rau ib tug Thwj Tim thiab. Txoj hauj lwm no tsis yog rau kuv. Txoj hauj lwm no yog rau tus Tswv kom pab Leej Txiv Saum Ntuj Ceeb Tsheej cov me nyuam. Txawm peb ua hauj lwm dab tsi nyob hauv lub Koom Txoos, yog peb xav ua hauj lwm zoo, peb yuav tsum paub tias txhua tus peb pab “yog nkawm niam txiv saum ntuj ceeb tsheej ib tug tub ntsuj plig los yog ib tug ntxhais ntsuj plig, thiab, xws li txhua tus yog li ntawd, … muaj ib tug cwj pwm thiab txoj hmoov los saum ntuj los.”2

Yav tas los, kuv yog ib tug kws kho plawv uas paub ntau txog lub plawv kev dhia tsis zoo thiab kev hloov lub plawv, es muaj ntau tus uas kuv saib xyuas uas mob heev. Kuv tus poj niam tso dag hais tias yog kuv yog leej twg tus kws kho mob, lawv yuav tsum ntshai. Nws tso dag xwb, tiam sis kuv twb tau pom ntau tus neeg mob tuag, ua rau kuv pheej sim tsis tshua xav txog tib neeg lub siab xav thaum tej yam mus tsis zoo. Li ntawd, kuv thiaj li tsis nyuaj siab thiab poob siab ntau heev.

Nyob rau xyoo 1986 ib tug tub hluas hu ua Chad lub plawv dhia tsis zoo thiab peb tau muab ib lub plawv tshiab rau nws. Nws ua neej nyob kwv yees li 15 xyoos ntxiv. Chad ua txhua yam nws ua tau kom noj qab nyob zoo thiab ua neej li lwm tus. Nws mus ua tub txib, ua hauj lwm, thiab yog ib tug tub zoo rau nws niam nws txiv. Tiam sis ob peb xyoos kawg ntawm nws lub neej yeej nyuaj heev, thiab nws pheej los nyob hauv lub tsev kho mob.

Muaj ib hmo, lawv coj nws los rau hauv chav kho mob kam ceev ntawm lub tsev kho mob vim nws lub plawv tsis dhia hlo li. Cov uas sib koom tes ua hauj lwm nrog kuv thiab kuv tau siv sij hawm ntev kom nws cov ntshav rov qab khiav tau. Thaum kawg, kuv paub meej tias peb pab tsis tau Chad ciaj sia rov qab los. Peb tsum tsis ua hauj lwm ntxiv, thiab kuv hais tias nws twb tau tas sim neej. Txawm kuv tu siab thiab poob siab, kuv sim coj cwj pwm zoo li ib tug kws ua hauj lwm. Kuv xav rau kuv tus kheej hais tias, “Chad twb txais txoj kev pab zoo. Ua rau nws muaj sij hawm ntev ua neej uas ntshe nws yuav tsis muaj.” Tiam sis thaum nws niam nws txiv tuaj rau hauv chav kho mob kam ceev thiab pom nkawd tus tub uas tas sim neej lawm pw saum ib lub txaj nqa neeg mob, kuv txawm hloov siab. Thaum ntawd, kuv twb saib Chad raws li nws niam nws txiv saib nws. Kuv pom tias nkawd tej kev npaj siab thiab kev cia siab uas nkawd xav txog nws, kuv pom nkawd tej kev xav kom nws ua neej ntev me ntsis ntxiv thiab kawm me ntsis ntxiv. Vim kuv to taub qhov no, kuv pib quaj. Ces zoo li nkawd thiab kuv tes hauj lwm sib pauv thiab yog ib qho kev ua siab zoo uas kuv yeej yuav nco ntsoov, Chad niam thiab txiv twb tau hais lus nplij kuv lub siab.

Kuv to taub hais tias nyob hauv lub Koom Txoos, yog peb xav pab lwm tus peb yuav tsum saib lawv raws li lawv niam lawv txiv saib lawv, raws li Leej Txiv Saum Ntuj Ceeb Tsheej saib lawv. Tsuas yog ua li ntawd xwb peb thiaj yuav to taub tias ib tug neeg muaj nqi npaum li cas. Tsuas yog ua li ntawd xwb peb thiaj yuav paub Leej Txiv Saum Ntuj Ceeb Tsheej txoj kev hlub rau tag nrho Nws cov me nyuam. Tsuas yog ua li ntawd xwb peb thiaj yuav paub txog tus Cawm Seej txoj kev tsom kwm saib xyuas lawv. Peb yeej ua tsis tau raws li peb txoj kev khi lus kom nyuaj siab nrog cov uas nyuaj siab thiab nplij cov uas xav tau txoj kev nplij siab tsuas yog peb saib lawv zoo li Vajtswv saib lawv xwb.3 Qhov kev xav li no yuav qhib peb lub siab kom to taub lwm tus tej kev poob siab, tej kev ntshai, thiab kev nyuaj siab. Tiam sis Leej Txiv Saum Ntuj Ceeb Tsheej yuav pab thiab nplij peb lub siab, ib yam li Chad niam thiab txiv nplij kuv lub siab ntau xyoo tas los. Peb yuav tsum muaj qhov muag uas pom tau, pob ntseg uas txawj hnov, thiab tej siab uas paub zoo thiab txawj xav yog peb yuav pab cawm cov neeg dim raws li Thawj Tswj Hwm Thomas S. Monson qhia.4

Tsuas yog thaum peb saib lwm tus raws li Leej Txiv Saum Ntuj Ceeb Tsheej saib lawv xwb peb thiaj yuav muaj “Khetos txoj kev hlub dawb paug” puv npo.5 Peb yuav tsum thov Vajtswv txhua hnub kom muaj txoj kev hlub zoo li no. Maumoos qhuab qhia hais tias, “Yog li ntawd, kuv cov kwv tij uas kuv hlub es, cia li thov Leej Txiv tag nrho lub zog ntawm lub siab, xwv kom nej yuav muaj txoj kev hlub no puv npo, txoj uas nws tau muab rau tag nrho cov uas raws qab tiag ntawm nws Leej Tub, Yexus Khetos.”6

Kuv xav ua raws li Yexus Khetos kawg siab kawg ntsws.7 Kuv hlub nws. Kuv qhuas Nws. Kuv ua tim khawv tias Nws muaj txoj siab nyob tiag tiag. Kuv ua tim khawv tias Nws yog tus uas Vajtswv tau tsa, tus Mexiyas. Kuv ua tim khawv txog Nws txoj kev siab hlub, kev khuv leej, thiab kev hlub. Kuv ntxiv kuv zaj lus tim khawv rau cov Thwj Tim uas hais thaum xyoo 2000, hais tias “Yexus yog tus Khetos uas muaj txoj sia nyob, Vajtswv Leej Tub uas tsis txawj tuag. … Nws yog qhov kaj, yog txoj sia, thiab kev cia siab rau lub ntiaj teb.”8

Kuv ua tim khawv tias muaj ib hnub thaum xyoo 1820 nyob hauv ib koog ntoo hauv New York, tus Tswv uas sawv rov los, nrog Vajtswv, peb Leej Txiv Saum Ntuj Ceeb Tsheej, tau tshwm sim rau tus Yaj Saub Yauxej Xamiv pom, ib yam li Yauxej Xamiv tau hais. Muaj cov yuam sij pov thawj hwj nyob hauv lub ntiaj teb hnub no kom peb ua tau kab ke uas cawm neeg txoj sia thiab muab neeg tsa nto. Kuv paub li ntawd. Los ntawm Yexus Khetos lub npe, amees.

Lus Cim

  1. Lus Qhuab Qhia thiab Kev Khi Lus 1:23.

  2. “Tsev Neeg: Ib zaj Lus Tshaj Tawm rau lub Ntiaj Teb,” Liahona, Kaum Ib Hlis Ntuj 2010, 129; Thawj Tswj Hwm Gordon B. Hinckley tau nyeem zaj lus tshaj tawm no ua ib feem ntawm nws zaj lus hais nyob ntawm Koom Haum Niam Tsev lub tuam rooj sib ntsib uas muaj lub Cuaj Hlis Ntuj 23, 1995, nyob hauv Salt Lake City, Utah.

  3. Saib Mauxiyas 18:8–10.

  4. Saib, ua piv txwv, Thomas S. Monson, “To the Rescue,” Liahona, Xya Hli Ntuj 2001, 57–60; “Our Responsibility to Rescue,” Liahona,  Kaum Hli Ntuj 2013, 4–5. Thawj Tswj Hwm Monson qhia tej lub ntsiab cai no nyob hauv nws zaj lus rau cov Tuam Thawj Coj thaum lub Cuaj Hlis Ntuj hnub tim 30, xyoo 2015, thaum nws hais kom cov uas sib sau ua ke nco ntsoov tias nws rov qab hais nws zaj lus uas nws hais rau cov Tuam Thawj Coj thiab cov Xya Caum Coj Cheeb Tsam nyob hauv kev sib ntsib cob qhia thaum lub Plaub Hlis Ntuj xyoo 2009 lub tuam rooj sab laj.

  5. Maulaunais 7:47.

  6. Maulaunais 7:48.

  7. Saib Lus Qhuab Qhia thiab Kev Khi Lus 18:27–28 :

    Thiab Kaum Ob tug Thwj Tim no yuav ua tus Tswv cov thwj tim, thiab lawv yuav ris Nws lub npe; thiab Kaum Ob tug Thwj Tim no yog cov uas xav ris Nws lub npe kawg siab kawg ntsws.

    Thiab yog hais tias lawv xav ris Nws lub npe kawg siab kawg ntsws, ces tus Tswv twb hu lawv kom mus rau tag nrho hauv lub ntiaj teb no mus tshaj tawm Nws txoj moo zoo rau txhua tus tib neeg.

  8. “Tus Khetos uas Muaj txoj Sia Nyob: Cov Thwj Tim tej Lus Tim Khawv,” Liahona, Plaub Hlis Ntuj, 2000, 3. Qhov uas kuv hais txog zaj no qhia hais tias zoo li kuv sau npe rau daim ntawv no, ua tim khawv zoo ib yam li cov Thwj Tim ntawd tau hais.