Ang Mangin Isa Ka Disipulo Sang Aton Ginuong JesuCristo

Ano ang buot silingon sang mangin isa ka sumulunod sang aton Ginuong si JesuCristo? And isa ka sumulunod amo ang tawo nga nabunyagan kag luyag mag-ako sa iya kaugalingon sang ngalan sang Manluluwas kag magsunod sa Iya. Ang isa ka sumulunod nagatinguha nga mangin kasubong Niya paagi sa pagtuman sang mga sugo diri sa mortalidad, halos subong sa isa ka kabulig nga luyag nga mangin kasubong sa iya agalon.

Madamo nga tawo ang nakabati sa tinaga nga disipulo kag naghunahuna nga ini nagakahulogan lamang “sumulunod.” Apang ang tunay nga pagkadisipulo amo ang sahi sang pagkatawo. Ini nagapanugyan sang kapin sa pagtuon kag paggamit sang isa ka listahan sang mga kinaiya sang isa ka tawo. Ang mga disipulo nagapangabuhi agud nga ang mga kinaiya ni Cristo mangin kabahin sang ila pagkatawo.

Pamatii ang pangagda ni Apostol Peter nga mangin isa ka disipulo sang Manluluwas:

“Nagahatag sang tanan nga kaukod, idugang sa inyo pagtuo ang birtud; kag sa birtud ihibalo;

“Kag sa ihibalo pagdumala sa kaugalingon; kag sa pagdumala sa kaugalingon pasensya; kag sa pasensya pagka-diosnon;

“Kag sa pagka-diosnon bilang-utod nga kabuot; kag sa bilang-utod nga kabuot gugma ni Cristo.”¹

Makit-an ninyo nga ang mangin tunay nga disipulo ni Cristo nagakinahanglan sang indi lamang isa ka kinaiya. Sa panahon sang Manluluwas, madamo sang naghambal nga sila matarung sa isa ukon iba nga bahin sang ila mga kabuhi. Sila nagtuman sang ginatawag ko nga nagapili nga pagtuman. Halimbawa, sila nagtuman sang Adlaw nga Inugpahuway paagi sa indi pagtrabaho apang nagbatikos sa Manluluwas bangud Sia nagpaayo sa sinang balaan nga adlaw.² Sila naghatag sang limos sa imol apang ginhalad lamang ang ila sobra—ang indi nila ginahanglan.³ Sila nagpuasa nga masubo ang mga itsura.⁴ Sila nangamuyo apang agud makit-an lamang sang mga tawo.⁵ Si Jesus nagsiling, “Sila nagapalapit sa akon paagi lamang sa mga bibig, apang ang ila mga tagipusuon malayo sa akon.”⁶ Ang amo nga mga lalaki kag mga babayi siguro nagatumod sa pagkabatid sa isa ka kinaiya ukon buhat apang wala nangin kasubong ni Cristo sa ila mga tagipusuon.

Parte sa mga ini, si Jesus nagpahayag:

“Madamo ang magasiling sa akon sa sinang adlaw, Ginuo, Ginuo, wala bala kami nagpanagna sa imo ngalan? kag sa imo ngalan nagtabog paggwa sa mga yawa? kag sa imo ngalan nakahimo sang madamo nga maayong buhat?

“Kag dayon ako magatuad sa ila, Ako wala makakilala sa inyo: maghalalin kamo, mga manugbuhat sang kalautan.”⁷

Ang mga kinaiya sang Manluluwas, subong sa paghangop naton, indi isa ka sinulat nga sulundon ukon listahan nga markahan kon natapos. Ang mga ini mga kinaiya nga nagaululupod, ang isa gindugang sa isa, nga nagalambo sa aton sa mga paagi nga nagaugyonanay. Sa iban nga pulong, indi naton maangkon ang isa ka Cristohanon nga kinaiya nga indi kaupod kag maimpluwensya ang iban. Samtang ang isa ka kinaiya nangin mabakod, ang madamo nagabakod man.

Sa 2 Peter kag sa Doctrine and Covenants section 4, natun-an naton nga pagtuo kay Ginuong JesuCristo amo ang pundasyon. Ginatakus naton ang aton pagtuo paagi sa kon ano ang ini nagapahimo sa aton—paagi sa aton pagtuman. “Kon kamo magaangkon sang pagtuo sa akon,” ang Ginuo nagpromisa, “kamo makaangkon sang gahum nga magbuhat sang ano man nga butang nga kinahanglan sa akon.”⁸ Ang pagtuo amo ang nagapahanabo. Kon wala ang mga binuhatan, ang may birtud nga pagpangabuhi, ang aton pagtuo wala sing gahum agud magpahulag sang aton pagkadisipulo. Sa katunayan, ang pagtuo wala sang kabuhi.⁹

Gani, si Peter nagpaathag, “idugang sa inyo pagtuo ang birtud.” Ining birtud kapin sa pagkaputli nga sekswal. Ini pagkaputli kag pagkabalaan sa kaisipan kag lawas. Samtang himpit naton nga ginatuman ang ebanghelyo, makaangkon kita sang gahum nga mangin may birtud sa kada hunahuna, balatyagon, kag buhat. Ang aton kaisipan mangin mas dugang nga bukas sa mga pagpabatyag sang Balaan nga Espiritu kag sang Kapawa ni Cristo.¹⁰ Ginapakita naton si Cristo indi lamang sa pulong kag buhat apang sa aton man nga pagkatawo.

Si Peter nagpadayon, “Idugang sa [inyo] birtud, ang ihibalo.” Samtang nagapangabuhi kita nga may birtud, makilal-an naton ang aton Langitnon nga Amay kag ang Iya Anak sa isa ka pinasahing paagi. “Kon bisan sin-o nga tawo ang magatuman sang pagbuot [sang Amay], mabal-an niya ang doktrina.”¹¹ Ining ihibalo isa ka pagpamatuod nga personal, naghalin sa personal nga inagihan. Ang ihibalo ang nagapabag-o sa aton, agud nga ang aton “kapawa nagapangapyut sa [Iya] kapawa kag ang aton “birtud naluyag sa [Iya} birtud.”¹² Sa pagpangabuhi nga may birtud, kita nagapanglakaton halin sa “Ako nagatuo” padulong sa mahimayaon nga padulongan sang “Ako nakabalo.”

Si Peter nagalaygay sa aton nga idugang “sa ihibalo ang pagdumala sa kaugalingon; kag sa pagdumala pasensya.” Bilang mga disipulo nga may pagdumala sa kaugalingon, kita nagatuman sa ebanghelyo sa isa ka balanse kag tayuyon nga paagi. Wala kita “nagadalagan nga mas kapin sangsa [ginaangkon naton] nga kusog.”¹³ Kada adlaw nagahulag kita pasulong, wala ginapugngan sang makapaputli nga mga pagtilaw sang mortalidad.

May pagdumala sa sining paagi, mapalambo naton ang pasensya kag pagsalig sa Ginuo. Masarangan naton ang magsalig sa Iya plano para sa aton mga kabuhi, bisan wala ini makita sang aton kinaandan nga mga mata.¹⁴ Gani, sarang kita nga “mangin malinong kag hibaloi nga [Sia amo] ang Dios.”¹⁵ Kon nagaatubang sa mga bagyo sang kapipit-an, kita nagapamangkot, “Ano ang luyag mo nga matun-an ko sa sining inagihan?” Upod ang Iya plano kag mga katuyoan nga ara sa aton mga tagipusuon, nagapasulong kita indi lamang sa pag-antus sang tanan nga butang apang sa pag-antus man nga may pasensya kag maayo.¹⁶

Ining pasensya, ginatudlo ni Peter, nagatuytoy sa aton padulong sa pagka-diosnon. Subong sa Amay nga pasensyoso sa aton, nga mga Anak Niya, kita mangin pasensyoso man sa kada isa kag sa aton mga kaugalingon. Nalipay kita sa pagbuot sang iban kag sa oportunidad nga ginahatag sini sa ila nga maglambo “dinalan sa dinalan,”¹⁷ “mas masanag kag mas masanag tubtob sa adlaw nga perpekto.”¹⁸

Halin sa pagdumala sa kaugalingon padulong sa pasensya kag halin sa pasensya padulong sa pagka-diosnon, ang kinaiya naton nagabag-o. Maangkon naton ang pagkautod nga kabuot nga amo ang pinakatanda sang tanan nga tunay nga mga disipulo. Subong sa But-anan nga Samaritano, nagatabok kita sa karsada agud mag-alagad sa kon kay sin-o nga nagakinahanglan, bisan sila wala nasakpan sang sirkulo sang aton mga abyan.”¹⁹ Ginabugayan naton yadtong mga nagamulay sa aton. Nagahimo kita sang maayong buhat sa yadtong mga naga-abusar sa aton.²⁰ May iban pa bala nga kinaiya nga mas diosnon kag Cristohanon?

Nagasaksi ako nga ang aton mga pagtinguha nga mangin mga disipulo sang aton Manluluwas ginapalambo tubtob nga kita “ginlikupan” sang Iya gugma.²¹ Ining gugma amo ang nagapakilala nga kinaiya sang isa ka disipulo ni Cristo:

“Bisan ako nagapamulong sa mga hambal sang katawhan kag mga anghel, kag wala sang gugma ni Cristo, ako nangin isa ka nagahuni nga saway, ukon nagalagting nga kalatong.

“Kag bisan nagaangkon ako sa dulot sang panagna, kag nakahangop sang tanan nga misteryo, kag tanan nga ihibalo; kag bisan ako nagaangkon sang tanan nga pagtuo, agud nga mapahulag ko ang mga bukid, kag wala sang gugma ni Cristo, ako wala sing pulos.”²²

Ang pagtuo, paglaum, kag gugma ni Cristo ang nagahimo sa aton nga takus para sa buluhaton sang Dios.²³ “Kag karon nagapabilin ... ining tatlo; apang ang pinakagamhanan sa mga ini amo ang gugma ni Cristo.”²⁴

Mga kautoran, karon gid mas kapin sangsa nagligad, indi naton masarangan nga mangin isa ka “di-lubos panahon nga disipulo”! Indi naton masarangan ang mangin isa ka disipulo sa isa ka punto sang doktrina lamang. Ang mga kinaiya nga nagahalin sa pagtuo kay Cristo—kalakip sa mga ginhambalan naton karon nga adlaw—ang tanan ginakinahanglan agud magtindog nga mabakod sa sining ulihing mga adlaw.

Samtang hugot sa tagipuon nga nagatinguha kita nga mangin tunay nga disipulo ni JesuCristo, ining mga kinaiya magahiliugyon, madugangan, kag ululupod nga magpabakod sa aton. Ang aton kabuot alalangay para sa mga kaaway kag mga abyan. Mangin matampad kita kon wala sing nagabantay ukon may nagabantay man. Mangin deboto kita sa Dios sa publiko nga mga lugar kag sa aton pribadong kwarto.

Nagasaksi ako nga ang tanan sarang mangin isa ka disipulo sang Manluluwas. Ang pagkadisipulo wala ginalimitahan sang edad, babayi ukon lalaki, ginhalinan nga katawhan ukon katungdanan sa Simbahan. Paagi sa aton matag-isa nga pagkadisipulo, kita, mga LDS, makatukod sang kabilogan nga kabakod agud magbugay sa aton mga kautoran sa bug-os nga kalibutan. Karon amo ang tion nga kita tanan magpanaad liwat nga mangin disipulo Niya sa tanan nga kaukod.

Mga kautoran, gintawag kita nga mga disipulo sang aton Manluluwas. Tugoti nga ining konperensya mangin oportunidad ninyo nga “magsugod subong sa panahon sang dumaan, kag magkari sa [Iya] upod ang bug-os ninyo nga tagipusuon.”²⁵ Ini amo ang Iya Simbahan. Ginahatag ko ang pinasahing saksi ko nga Sia nagakabuhi. Kabay nga bugayan Niya kita sa aton walay katapusan nga handum nga mangin deboto kag maisog nga mga disipulo. Sa ngalan ni JesuCristo, amen.