Ang Mahimayaon nga Plano sang Aton Amay

Sa naunang paghanas ko bilang isa ka doktor, may pribilihiyo ako sa pagbulig sa isa ka batan-on nga iloy sa pagbun-ag sang iya subang nga bata. Kalmante sia, nakapokus, kag malipayon. Sang nabun-ag ang lapsag, gindaho ko sa iya ang bilidhon nga bag-ong nabun-ag. May luha sang kalipay nga nagaagay sa iya nawong, ginkugos niya ang lapsag kag gin-usisa halin sa ulo tubtob sa tudlo sang tiil. Ginhakus niya kag ginpalangga ang lalaki nga lapsag nga ang iloy lamang ang makahimo. Pribilihiyo gid ang makaupod sia sa sinang kwarto.

Ina amo ang sinugoran sang kabuhi para sa kada isa sa aton. Apang ang aton pagkabun-ag amo gid bala ang sinugoran? Ang kalibutan nagalantaw sa pagkabun-ag kag kamatayon bilang sinugoran kag katapusan. Apang bangud sa balaan nga plano sang Dios, nabal-an naton nga ang pagkabun-ag kag kamatayon sa matuod mga palatandaan lamang sang aton pagpanglakaton padulong sa kabuhing walay katapusan upod sa aton Langitnon nga Amay.¹ Ang mga ini kinahanglanon nga mga bahin sang plano sang aton Amay—sagradong mga higayon kon diin ang mortalidad kag ang langit nagsugat-anay. Karon nga adlaw, sa pagbinagbinag sa akon natun-an halin sa pag-obserba sa pagkabun-ag kag kamatayon sa mga tinuig bilang doktor kag pag-alagad sa Simbahan, luyag ko nga magsaksi parte sa mahimayaon nga plano sang aton Amay.

“Antes kita ginbun-ag, nangabuhi kita upod sa Dios, ang Amay sang aton mga espiritu. Ang tanan sa aton diri sa duta matuod nga mag-ululutod” sa Iya pamilya,² kag ang kada isa sa aton bilidhon sa Iya. Nangabuhi kita upod sa Iya sa di-matungkad nga kalawigon sang panahon antes kita ginbun-ag diri sa duta—nagtuon, nagpili, kag naghanda.

Bangud palangga kita sang Langitnon nga Amay, luyag Niya kita nga mag-angkon sang pinakadakung dulot nga sarang Niya ihatag, ang dulot sang kabuhing walay katapusan.³ Indi Niya simple nga mahatag ang dulot; dapat naton batunon ini paagi sa pagpili sa Iya kag sa Iya mga paagi. Nagakinahanglan ini nga maghalin kita sa Iya atubang kag magsugod sa isa ka matahum kag mabudlay nga pagpanglakaton sang pagtuo, paglambo, kag pagmangin. Ang pagpanglakaton nga ginhanda sang aton Amay para sa aton amo ang ginatawag nga plano sang kaluwasan ukon plano sang kalipayan.⁴

Sa isa ka dakung konseho antes sang mortalidad, ang aton Amay nagpahibalo sa aton parte sa Iya plano.⁵ Sang nahangpan naton ini, malipayon gid kita nga kita naghugyaw sa kalipay, kag “ang mga bituon sang kaagahon ululupod nga nag-amba.”⁶

Ina nga plano gintukod sa tatlo ka dalagku nga mga haligi: ang mga haligi sang walay katubtoban.⁷

Ang unang haligi amo ang Pagtuga sang kalibutan, ang lugar sang aton mortal nga pagpanglakaton.⁸

Ang ika-duhang haligi amo ang Pagkapukan sang aton unang dutan-on nga mga ginikanan, si Adan kag si Eba. Bangud sang Pagkapukan, may pila ka matahum nga mga butang nga ginhatag sa aton. Sarang kita mabun-ag kag magbaton sang isa ka lawas nga unod kag tul-an.⁹ Padayon gid ako nga nagapasalamat sa akon iloy sa pagbun-ag sa akon utod nga mga lalaki kag sa akon diri sa kalibutan kag sa pagtudlo sa amon parte sa Dios.

Ang Dios naghatag man sa aton sang husto nga pagbuot—ang abilidad kag pribilihiyo nga magpili kag maghulag para sa aton mga kaugalingon.¹⁰ Agud buligan kita nga magpili sing maayo, ang Langitnon nga Amay naghatag sa aton sang mga sugo. Kada adlaw, samtang kita nagatuman sang Iya mga sugo, ginapakita naton sa Dios nga palangga naton Sia kag Sia nagabugay sa aton mga kabuhi.¹¹

Nakabalo nga kita indi dalayon nga magpili sing maayo—ukon sa iban nga pulong, makasala—ang Amay naghatag sa aton sang ika-tatlo nga haligi: ang Manluluwas nga si JesuCristo kag ang Iya Pagpasag-uli. Paagi sa Iya pag-antus, si Cristo nagbayad sang presyo angay sa lawasnon nga kamatayon kag sa sala.¹² Sia nagtudlo: “Kay ang Dios nagpalangga gid sa kalibutan, nga sia naghatag sang iya bugtong nga Anak, nga kon sin-o man ang magatuo sa iya indi malaglag, apang makaangkon sang kabuhing walay katapusan.”¹⁴

Si JesuCristo nangabuhi nga perpekto, dalayon nga nagatuman sang mga sugo sang Iya Amay. “Naglakat Sia sa mga karsada sang Palestine,” nagatudlo sang mga kamatuoran sang walay katubtoban, “nagapaayo sang balatianon, nagahimo sa bulag nga makakita, kag nagabuhi sa patay.”¹⁴ Sia “naglibot sa paghimo sang maayo”¹⁵ kag “nagpangabay sa tanan nga magsunod sa Iya halimbawa.”¹⁶

Sa katapusan sang Iya mortal nga kabuhi, nagluhod Sia kag nagpangamuyo, nagasiling:

“Amay, kon luyag mo, ilikaw ining pag-antus nga nagaabot sa akon. Pero indi ang akon pagbuot ang dapat matuman, kondi ang imo. …

“Tungod sang daku nga kasakit nga iya ginabatyag, nagpangamuyo pa gid sia sing hugot sa tagipusuon: kag ang iya balhas daw sa dugo nga nagatulo sa duta.”¹⁷

Si Cristo nagpahangop sa aton sing mas maayo parte sa kadakuon sang Iya pag-antus sang Sia naghambal kay Propetang si Joseph Smith:

“Ako, ang Dios, nag-antus sining mga butang para sa tanan, agud nga sila indi mag-antus kon sila maghinulsol;

“Apang kon sila indi maghinulsol dapat nga sila mag-antus man kasubong ko;

“Nga among pag-antus naghimo sa akon, nga bisan Dios, ang pinakagamhanan sa tanan, nga magpalangurog bangud sang hapdi, kag magbalhas sing dugo, kag mag-antus angay sa lawas kag espiritu.”¹⁸

Didto sa Hardin sang Gethsemane, nagsugod Sia sa pagtubos sang aton mga sala, mga balatian, sang aton mga kasakit kag mga kahuyangan.¹⁹ Bangud ginhimo Niya, indi gid kita mangin nagaisahanon sa yadtong mga kahuyangan kon pilion naton nga mag-upod sa Iya. “Sia gin-aresto kag ginkondenar sa mga sala nga ginbutangbutang lamang, ginhusgahan agud palipayon ang katawhan, kag ginsentensyahan nga ilansang sa krus sa Kalbaryo.” Sa krus “ginhalad Niya ang Iya kabuhi agud magpasag-uli para sa mga sala sang tanan nga katawhan [sa] dakung dulot nga nagasakdag sa tanan gid nga mabuhi diri sa duta.”²⁰

Sia nagpahayag:

“Lantawa ninyo, Ako si JesuCristo, nga ang mga propeta nagsaksi nga magaabot sa kalibutan.

“Kag yari karon, ako ang kapawa kag ang kabuhi sang kalibutan; kag gin-inom ko ang mapait nga kopa nga ginhatag sang Amay ko sa akon, kag ginpakahimaya ang Amay paagi sa pag-ako sang mga sala sang kalibutan.”²¹

Dayon, sa unang adlaw sang simana,²² Sia nagbangon sa lulubngan nga may perpektong nabanhaw nga lawas, indi na gid mapatay liwat. Bangud ginhimo Niya ini, kita mabanhaw man.

Nagasaksi ako nga si Cristo matuod nga nabanhaw. Apang agud magbangon halin sa lulubngan, dapat anay nga magtaliwan Sia. Kag kita mapatay man.

Ang isa pa sa dakung mga bugay sang akon kabuhi amo ang makabatyag sang pagkamalapit sang langit sa mga higayon nga ako ara sa tupad sang katre sang mga tawo nga nagataliwan. Kaagahon sang pila ka mga tuig nga nagligad, nagbisita ako sa hospital sa kwarto sang himpit nga LDS, isa ka balo nga babayi nga may kanser. Upod niya ang duha niya ka batang mga babayi. Sang nagpalapit ako sa kilid sang iya katre, madasig ko nga natalupangdan nga sia wala na nagaantus, bangud bag-o lang gid sia nagtaliwan.

Sa sinang higayon sang kamatayon, malinong ang kwarto. Ang mga anak niya kalmante nga masubo, apang sila napuno sang pagtuo. Nabal-an nila nga ang ila iloy wala madula apang nagpauli. .²³ Bisan sa mga higayon sang aton pinakamadalum nga kasulub-on, sa mga higayon nga ang tion daw sa nag-untat kag ang kabuhi daw sa di-makatarungan, makasapo kita sang kasulhayan sa aton Manluluwas bangud Sia nag-antus man.²⁴ Pribilihiyo para sa akon ang mangin ara sa sinang kwarto.

Kon magtaliwan kita, ang aton mga espiritu nagahalin sa aton mga lawas kag kita nagakadto sa masunod nga andana sang aton pagpanglakaton, ang kalibutan sang mga espiritu. Ini lugar sang pagtuon, paghinulsol, pagpatawad, kag pag-uswag²⁵kon diin kita nagahulat sang Pagkabanhaw.²⁶

Sa palaaboton nga dakung adlaw, ang tanan nga nabun-ag mabanhaw halin sa lulubngan. Ang aton mga espiritu kag dutan-on nga lawas magabalikay sa perpektong porma sang mga ini. Ang tanan mabanhaw, “angay tigulang ukon bata,” … angay lalaki kag babayi, angay ang malaut kag ang matarong,” kag “ang tanan nga butang igapanumbalik sa perpekto sini nga lawas. .”²⁷

Pagkatapos sang Pagkabanhaw makaangkon kita sang pinakalabing maayong bugay nga hukman sang aton Manluluwas, nga nagsiling:

“Ganyaton ko ang tanan nga katawhan palapit sa akon, agud nga sila pagahukman suno sa ila mga binuhatan.

“Kag ini matabo, nga kon sin-o ang maghinulsol kag ginbunyagan sa akon ngalan pagabusgon; kag kon sia magpadayon tubtob sa katapusan, yari karon, sia himuon ko nga wala sing salabton sa atubang sang akon Amay sa adlaw sang akon paghukom sa kalibutan.”²⁸

Kag dayon, paagi sa kay Cristo kag sa Iya Pagpasag-uli, ang tanan nga magpili nga magsunod sa Iya paagi sa pagtuo, paghinulsol, bunyag, kag pagbaton sang Balaan nga Espiritu, kag magpadayon tubtob sa katapusan,²⁹ makasapo nga “ang katapusan sang ila pagpanglakaton amo ang magbaton sang ila diosnon nga padulongan bilang mga manunubli sang kabuhing walay katapusan.”³⁰ Sila magapauli sa presensya sang ila Amay agud mangabuhi nga kaupod Sia sa walay katubtoban. Kabay nga magpili kita sing maayo.

May tuman pa ka mas madamo sa aton kabuhi sangsa mga nagkalatabo lamang sa tunga sang pagkabun-ag kag kamatayon. Ginaagda ko kamo nga magkari kag magsunod kay Cristo.³¹

Ginaagda ko ang tanan nga mga miyembro sang Simbahan ni JesuCristo sang Mga Santos sa Ulihing Mga Adlaw nga, sa kada adlaw, “magkari kay Cristo, kag mangin perpekto sa iya, kag dumilian ang inyo mga kaugalingon sang tanan nga sala,...[nga] paagi sa pagpaagay sang dugo ni Cristo,...kamo [sarang] mangin balaan, nga walay musing.”³²

Ginaagda ko yadtong di-pa mga miyembro sang Simbahan nga magkari kag magbasa sa Libro ni Mormon kag magpamati sa mga misyonero. Magkari kag magtuo kag maghinulsol sang inyo mga sala. Magkari kag magpabunyag kag magbaton sa Balaan nga Espiritu. Magkari kag mangabuhi sing malipayon, kag sentro kay Cristo nga kabuhi. Samtang kamo magkari sa Iya kag magtuman sang Iya mga sugo, ginapromisa ko nga kamo makasapo sang paghidaet kag katuyoan sa sining masami magamo nga pangabuhing mortal kag sang “kabuhing walay katapusan sa palaaboton nga kalibutan.”³³

Sa mga yadtong nakaambit sining mga kamatuoran kag sa ano man nga rason nagpalayo, ginaagda ko kamo nga magbalik. Magbalik karon nga adlaw. Ang aton Amay kag ang Manluluwas nagapalangga sa inyo. Nagasaksi ako nga si Cristo may gahum nga magsabat sang inyo mga pamangkot, magpaayo sang inyo mga kasakit kag mga kasubo, kag magpatawad sang inyo mga sala. Nabal-an ko ini nga matuod. Nabal-an ko ining tanan nga mga butang matuod. Si Cristo nagakabuhi! Ini amo ang Iya Simbahan. Sa ngalan ni JesuCristo, amen.