Ang Iya Nagagiya nga Kamot sa Matag-adlaw

Ang isa sa labing pinakapalangga nga gamit sang Langitnon nga Amay agud giyahan ang mga anak Niya amo ang matarong nga mga lolo kag lola. Ang iloy sang akon amay amo sina nga babayi. Sa isa ka okasyon nga natabo sang ako bata pa gid agud madumdoman, ang amay ko nagdisiplina sa akon. Sa iya paglantaw sining pagdisiplina, ang lola ko nagsiling, “Monte, nagapati ako nga ikaw nagatadlong sa iya sing mas sobra.”

Ang amay ko nagsabat, “Nay, pagatadlongon ko ang akon mga anak sa luyag ko.”

Ang maalam ko nga lola mahinay nga nagsiling, “Kag ako amo man.”

Sigurado ako nga ang amay ko nakabati sa maalam nga paggiya sang iya iloy sina nga adlaw.

Sa pagbinagbinag parte sa paggiya, sarang naton pinsaron ang isa ka himno nga nabal-an kag naluyagan naton tanan “Ako Anak sang Dios.” Sa koro masapwan naton ang mga tinaga “Tuytoyi ako, giyahi ako, updi ako, buligi ako nga makit-an ang dalan.”¹

Tubtob bag-o lang, nahangpan ko inang koro bilang diosnon nga direksyon sa mga ginikanan. Samtang ginabinagbinag ko ining mga tinaga, natalupangdan ko nga samtang ang mga ini naglakip sinang direksyon, may ara pa sing mas dakung kahulogan ini. Kada isa sa aton, nagapangabay kada adlaw nga ang Langitnon nga Amay magagiya sa aton, magatuytoy sa aton, kag magaupod sa aton.

Si Presidente Dieter F. Uchtdorf nagpaathag: “Ang aton Amay sa Langit mas maayo nga nakabalo sangsa bisan kay sin-o parte sa mga kinahanglanon sang Iya mga anak. Ini buluhaton Niya kag himaya ang magbulig sa aton sa kada tion, nagahatag sa aton sang matahum nga mga butang, angay dutan-on kag espirituhanon, agud buligan kita sa aton banas sa pagpauli sa Iya.”²

Pamatii yadtong mga tinaga: Ang Langitnon nga Amay mas maayo nga nakabalo sangsa bisan kay sin-o parte sa mga kinahanglanon naton. Bangud sini, Sia naghimo sang pinutos para sa pangkaugalingon nga paghanda nga angay gid sa kada isa sa aton. Ini may madamo nga mga bahin. Ini nagalakip sa Iya Anak kag sa Iya Pagpasag-uli, sa Balaan nga Espiritu, mga kasuguan, balaan nga mga kasulatan, pangamuyo, mga propeta, mga apostoles, mga ginikanan, mga lolo kag lola, mga lider sang Simbahan sa aton lugar, kag madamo pa nga iban—ang tanan makabulig sa aton nga magbalik upod sa Iya sa pila ka adlaw.

Pwede bala ako magpaambit sang pila lamang ka mga bahin sinang pinutos nga nagpatalupangod sa akon nga ang isa ka mapinalanggaon nga Amay nagatuytoy, nagagiya, kag nagaupod sa akon luyo kag sa akon pamilya? Pangamuyo ko nga ang kada isa sa inyo makatalupangod sang inyo mga inagihan nga ang Langitnon nga Amay nagatuytoy, nagagiya, kag nagaupod sa inyo luyo kag, upod sa sinang ihibalo, kamo magpadayon nga may kumpiyansa, nakabalo nga kamo wala gid nagaisahanon.

Ang mga kasuguan sang Langitnon nga Amay isa ka yabi nga bahin sang pinutos para sa pangkaugalingon nga paghanda. Si Alma nagpahayag, “Ang kalautan wala pa gid nangin kalipayan.”³ Ang pagpasunod sa di-husto nga ugali nga wala sing mapinalanggaon nga pagtadlong di-matuod nga kalooy kag nagapabakod liwat sa naandan nga ideya nga ang pagkamalaut basi sa pagkamatuod mangin kalipayan. Si Samuel, ang Lamanite maathag nga nagpamatok sa sining ideya: “Naghangad kamo sang kalipayan sa paghimo sang kalautan, nga ang amo nga butang batok sa kinaiya sinang pagkamatarong nga ara sa aton daku kag Walay Katapusan nga Pinuno.”⁴

Paagi sa Iya mga propeta, ang Langitnon nga Amay padayon nga nagapadumdom sa aton nga ang pagkamatarong amo ang kalipayan. Si Haring Benjamin, halimbawa, nagtudlo nga ang Langitnon nga Amay “nagapangayo nga kamo maghimo subong sa iya ginasugo sa inyo; nga kon himuon ninyo, sia sa gilayon nagabugay sa inyo.”⁵ Sa isa pa gid ka himno nagaabot ang amo man nga pahanumdom:

Sa mga ika-katorse ko nga kaadlawan, natun-an ko ang parte sa pila sining mga bugay. Namutikan ko ang tuhay nga ugali sa bahin sang akon mga ginikanan. Sa paghunahuna ko sang akon naobserbahan, namangkot ako, “Malakat bala kita sa isa ka mission?” Ang pagkakibot sa nawong sang akon iloy nagkumpirma sang akon suspetsa. Sang ulihi, sa isa ka panimalay nga konseho, ang mga utod ko kag ako nakabalo nga ang amon mga ginikanan gintawag agud magpangulo sa isa ka mission.

Nagpuyo kami sa isa ka matahum nga rantso sa Wyoming. Sa akon panan-awan, ang pangabuhi perpekto. Makapauli ako halin sa eskwelahan, magtuman sang akon mga hilikuton, kag maglakat agud mangayam, mamunit, ukon maglibot upod ang akon ido.

Sa wala madugay nga nabal-an ko ang pagtawag, nabal-an ko nga bayaan ko ang akon ido, si Blue. Ginpasikto ko ang akon amay, nagapamangkot kon ano ang himuon ko kay Blue. Luyag ko ipatalupangod ang di-pagkamatarong sang ginapangayo sang Dios. Indi ko gid malimtan ining sabat. Siling niya, “Indi ako sigurado. Siguro indi sia sarang mag-upod sa aton, gani mas maayo nga mamangkot ka sa Langitnon nga Amay.” Indi ina ang sabat nga akon ginlauman.

Nagsugod ako sa pagbasa sa Libro ni Mormon. Hugot ako nga nagpangamuyo agud mabal-an kon bala ihatag ko ang akon ido palayo. Ang sabat sa akon wala mag-abot sa gilayon; apang, isa ka tuhay nga hunahuna ang nagpadayon sa pagsulod sa akon kaisipan: “Indi ka magmangin palas-anon sang imo mga ginikanan. Indi ka magmangin palas-anon. Gintawag ko ang imo mga ginikanan.”

Nabal-an ko ang ginapangayo sang Langitnon nga Amay. Inang ihibalo wala nagbuhin sa kasakit sang paghatag ko palayo sang akon ido. Apang, paagi sa sinang diutay nga sakripisyo, ang tagipusuon ko naghumok kag nasapwan ko ang paghidaet sa pagpangita sa pagbuot sang Langitnon nga Amay.

Ginapasalamatan ko ang Langitnon nga Amay para sa mga bugay kag kalipayan nga akon nasapwan paagi sa balaan nga mga kasulatan, pangamuyo, Balaan nga Espiritu, kag sa isa ka takus nga amay sa duta nga nagbaton sang iya papel bilang unang manunudlo sang ebanghelyo sa iya mga anak. Ang mga ini nagatuytoy sa akon, nagagiya sa akon, kag bisan pa nagaupod sa akon luyo agud buligan ako nga makasapo sa dalan—labi na kon ako magbuhat sang isa ka butang nga mabudlay.

Dugang pa sa pag-angkon sang mga bahin halin sa pinutos para sa pangkaugalingon nga paghanda nga akon ginmitlang, ang kada isa sa aton ginbugayan sang isa ka pinuno sa priesthood nga magatuytoy kag magagiya sa aton.

Si Presidente Boyd K. Packer nagsiling: “Ang mga bishop may inspirasyon! Ang kada isa sa aton may pagbuot agud magbaton ukon magsikway sa laygay sang aton mga lider, apang indi gid magbaliwala sa laygay sang inyo bishop, bisan ini ginhatag sa pulpito ukon sa kada isa.”⁷

Ining mga lalaki nagatinguha sa pagrepresentar sa Ginuo. Bisan kita tigulang man ukon bata, kon si Satanas luyag nga kita maminsar nga wala na sang paglaum, ang mga bishop ara dira agud maggiya sa aton. Kon nagahambal ako sa mga bishop, masapwan ko ang kinaandan nga tema parte sa mga pagkonpesar sang mga paglapas ukon sang pag-antus sang inosente halin sa terible nga mga sayup. Ang mga bishop sa gilayon luyag magpautwas sang pagpalangga sang Langitnon nga Amay para sa kada tawo kag sang luyag nga mag-upod sa iya samtang sia nagapangita sa dalan pauli.

Basi ang pinakadaku nga unod sang pinutos amo ang ginlaragway sa sining mga tinaga: “Kay ang Dios nagpalangga sa kalibutan, nga sia naghatag sang iya bugtong nga Anak.”⁸

Agud tudloan kita sang tanan nga dapat naton buhaton, si JesuCristo nagpanguna sa banas paagi sa paghatag sang perpekto nga halimbawa nga dapat naton tinguhaon nga sundon. Nagapangabay Sia sa aton, bukas ang mga butkon agud magkari, magsunod sa Iya.⁹ Kag kon kita mapaslawan, nga nagakatabo sa aton tanan, Sia nagapahanumdom sa aton, “Kay ari karon, Ako, ang Dios, nag-antus sining mga butang para sa tanan, agud nga sila indi na dapat mag-antus kon sila maghinulsol.”¹⁰

Daw ano ka matahum nga dulot! Ang paghinulsol indi isa ka silot; ini isa ka pribilihiyo. Ini pribilihiyo nga nagatuytoy kag nagagiya sa aton. Gani ang mga kasulatan nagapahayag nga kita dapat wala sang itudlo luwas sa paghinulsol.¹¹

Ang Langitnon nga Amay madamo sang manggad, apang masami nga Sia nagagamit sang iban nga tawo agud magbulig sa Iya. Sa matag-adlaw Sia nagahatag sa aton sang mga oportunidad sa pagtuytoy, paggiya, kag pag-upod sa luyo sang isa nga nagakinahanglan. Dapat naton sundon ang halimbawa sang Manluluwas. Kita dapat man maghimo sang buluhaton sang Langitnon nga Amay.

Bilang Kabilogan nga Pangulohan sang Young Men, nabal-an namon nga ang batan-on ginbugayan kon sila may mga ginikanan kag mga lider nga nagabuhat para sa Langitnon nga Amay sa pagtuytoy, paggiya, kag pag-upod sa ila luyo. Ang tatlo ka mga prinsipyo¹² nga magabulig sa aton nga mangin bahin sang panghanda nga pinutos sang Langitnon nga Amay para sa iban amo ang:

Una, mag-upod sa mga batan-on. Si Presidente Henry B. Eyring nagpatalupangod sining punto: “May ara sang pila ka mga butang nga dapat naton mahimo nga mas labing importante. Mas labing gamhanan sangsa paggamit sang mga pulong sa aton pagtudlo sang doktrina amo ang aton mga halimbawa sang pagtuman sa doktrina.”¹³ Ang magpamuno sa batan-on nagapangayo sang pag-upod sa ila. Ang paghatag sang panahon amo ang pagpakita sang pagpalangga nga nagatugot sa aton sa pagtudlo paagi sa pulong kag halimbawa.

Ika-duha, agud matuod gid nga giyahan ang batan-on, dapat naton sila nga iangot sa langit. Ang tion dalayon nga magaabot nga ang kada isa dapat magtindog nga wala sing kaupod. Ang Langitnon nga Amay lamang ang sarang mag-upod kag maggiya sa tanan nga tion kag sa tanan nga mga lugar. Ang batan-on naton dapat makabalo kon paano magpangita sang paggiya sang Langitnon nga Amay.

Ika-tatlo, dapat tugotan naton ang batan-on nga magpamuno. Subong sang mapinalanggaon nga ginikanan nga nagakapot sa kamot sang isa ka bata nga nagatuon sa paglakat, kita dapat nga magbuyi agud ang batan-on mag-uswag. Ang magtugot sa batan-on nga magpamuno nagapangayo sang pasensya kag pagpalangga. Ini mas mabudlay kag nagakinahanglan sang mas madamo nga tion sangsa ini buhaton naton. Sila sarang makasandad sa banas, apang kita upod nila sa ila luyo.

Mga kautoran, may ara sang mga tion sa aton mga kabuhi nga ang mga bugay sang paggiya daw sa malayo ukon wala. Sa amo nga mga tion sang kabudlay, si Elder D. Todd Christofferson nagpromisa: “Tugoti ang inyo mga kasugtanan nga mangin una sa tanan kag ang inyo pagtuman husto. Dayon sarang kamo mangayo sa pagtuo, wala sang pagduhaduha, suno sa inyo pagkinahanglan, kag ang Dios magasabat. Susteneron Niya kamo samtang kamo nagaobra kag nagabantay. Sa Iya kaugalingon nga tion kag paagi Sia magadaho sang iya kamot sa inyo, nagasiling, ‘Ari ako.’”¹⁴

Sa isa ka amo nga tion, ginpangita ko ang laygay sang Langitnon nga Amay paagi sa dalayon kag hugot sa tagipusuon nga pangamuyo kapin sa isa ka tuig agud makasapo sang solusyon sa isa ka mabudlay nga sitwasyon. Nabal-an ko sa isip nga ang Langitnon nga Amay nagasabat sa tanan nga sinsero nga pangamuyo. Apang nalab-ot ko ang pagkawalay paglaum isa ka adlaw nga ako nagtambong sa templo nga may isa ka pamangkot: “Langitnon nga Amay, nagaulikid ka gid bala?”

Naglingkod ako malapit sa likod sang hulolatan nga hulot sang Logan Utah Temple sang, sa kakibot ko, nagasulod sa hulot sinang adlaw amo ang presidente sang templo, si Vaughn J. Featherstone, suod nga abyan sang pamilya. Nagtindog sia sa unahan sang kongregasyon kag nag-abi-abi sa amon tanan. Sang nakit-an niya ako sa tunga sang mga temple patron, nag-untat sia sa paghambal, gintulok ako sa mga mata, kag dayon nagsiling, “Brother Brough, maayo gid nga makita ikaw sa templo karon nga adlaw.”

Indi ko gid malipatan ang balatyagon sa sinang simple nga higayon. Yadto daw sa—sa sinang panamyaw—ang Langitnon nga Amay nagdaho sang Iya kamot kag nagasiling, “Ari ako.”

Ang Langitnon nga Amay matuod nga nagaulikid kag nagapamati kag nagasabat sa pangamuyo sang kada anak.¹⁵ Bilang isa sa Iya mga anak, nabal-an ko ang mga sabat sa akon mga pangamuyo nag-abot sa tion sang Ginuo. Kag paagi sa sinang inagihan, nahangpan ko sing mas kapin sangsa nagligad nga kita mga anak sang Dios kag nga Sia nagpadala sa aton diri agud nga kita makabatyag sang Iya presensya karon kag makabalik agud mangabuhi kaupod Sia sa pila ka adlaw.

Nagasaksi ako nga ang Langitnon nga Amay nagatuytoy sa aton, nagagiya sa aton, kag nagaupod sa aton luyo. Samtang nagasunod kita sa Iya Anak kag nagapamati sa Iya mga alagad, ang mga apostoles kag mga propeta, masapwan naton ang dalan padulong sa kabuhing walay katapusan. Sa ngalan ni JesuCristo, amen.