God I Singaotem Yu long Wok

Evri yia, ol ten blong ol taosen yang man mo yang woman, mo plante senia kapol, oli stap wet blong kasem wan spesel leta we i kam long Sol Lek Siti. Wanem i stap insaed long leta ia, i tajem laef blong man o woman ia foreva, mo tu, i tajem ol memba blong famli, mo plante narafala pipol. Taem leta ia i kam, sam oli openem gud envlop ia, mo sam oli terem kwik. Blong ridim leta ia i wan eksperiens we bae oli neva fogetem.

Leta ia, Presiden blong Jos blong Jisas Kraes blong Ol Lata-dei Sent nao i saenem, mo tufala fas sentens i go olsem: “God i singaotem yu blong givim seves olsem wan misinari blong Jos blong Jisas Kraes blong Ol Lata-dei Sent. Oli putum yu blong wok long ______ Misin.”

Plis luk se fas sentens i wan singaot blong givim seves olsem wan fultaem misinari insaed long Jos we i kambak blong Lod. Seken sentens i soem we oli putum yu long wok long wan ples mo misin. I impoten blong luksave tufala defren toktok insaed long sentens ia; i nid blong yumi evriwan i andastanem.

Long kalja blong Jos, plante taem yumi tokbaot se oli singaotem yumi i go givim seves long wan kantri olsem Ajentina, Polan, Koria, o Amerika. Be God i no singaotem wan misinari i go long wan ples; be i singaotem hem blong givim seves. Olsem we Lod i talem long Profet Josef Smit long 1829 “ Sapos yu wantem blong givim seves long God, bae Hem i singaotem yu long wok.”²

Evri misin koling mo wok, o taem oli jenisim wok afta, i from revelesen ia kam tru long ol wokman blong Lod. Wan singaot blong wok i kam long God tru long Presiden blong Jos. Wok blong mekem we oli givim long wan long ova 400 misin we oli open raon long wol, i kam long God tru long wan memba blong ol Kworom blong Olgeta Twelef Aposol, we oli wok wetem raet blong profet blong Lod we i stap laef. Ol presen blong spirit, blong profesi mo revelesen, i go wetem evri misin koling mo wok.

Seksen 80 blong Doktrin mo Ol Kavenan i wan histri blong misin koling blong Stifen Benet we Profet Josef Smit i givim long hem long 1832. Taem yumi stadi long koling ia we i go long Brata Benet, i save helpem yumi blong (1) andastanem klia moa wanem i defren bitwin “singaot i go long wok” olsem wan misinari mo “putum yu i go long wok” long wan ples, mo (2) i helpem yu blong glad moa long wanwan responsabiliti we oli jusum yumi blong mekem blong prijim gospel.

Ves  1 long seksen ia i wan singaot blong givim seves: “I tru, olsem ia nao Lod i talem long yu, wokman blong mi, Stifen Benet: Yu go, yu go long wol mo prijim gospel long evri man we i kasem saon blong voes blong yu.”³

I gud tumas blong luk se ves  2 i talemaot long Brata Benet abaot misinari kompanion blong hem: “Mo from se yu wantem wan kompanion, bae mi givim yu wokman blong mi, Iden Smit.”⁴

Ves 3 i talemaot weaples bae tufala misinari ia bae oli go wok long hem: “From hemia, yutufala i go mo prijim gospel blong mi, nomata we hem i long Not o long Saot, long Is o long Wes, i nomata, from we yutufala i no save mekem mistek.”⁵

Mi no ting se toktok ia “i nomata”, olsem Lod i yusum long skripja ia i minim se Hem i no kea weaples ol wokman blong Hem oli go wok long hem. Be, Hem i kea bigwan. Be from se wok blong prijim gospel i wok blong Lod, Hem i givim insperesen, i lidim mo daerektem ol wokman we Hem i givim raet long olgeta. Taem ol misinari oli traehad blong stap klin inaf mo save kam ol tul long ol han blong Hem mo mekem bes blong oli mekemgud diuti blong olgeta, nao wetem help blong Hem, oli “no save mekem mistek” long eni ples we oli givim seves long hem Ating wan long ol lesen we Sevya i stap tijim yumi long revelesen ia i we, wan wok we oli givim blong wok long wan spesel ples i wan nid, mo i impoten, be i no impoten olsem singaot ia blong givim seves.

Nekis ves i talemaot gud ol impoten kwalifikesen blong evri misinari: “From hemia, talemaot ol samting we yutufala i bin harem, mo yutufala i biliv tru, mo save se oli tru.”⁶

Las ves i rimaenem Brata Benet mo yumi evriwan se singaot ia blong givim seves i kam long hu: “Luk, hemia tingting blong hem we i bin singaotem yutufala, we i Ridima blong yutufala, we i Jisas Kraes. Amen.”⁷

Sam long yufala i save askem yufalawan bakegen se from wanem mi jusum blong tokbaot, long wan prishud sesen blong jeneral konfrens, wanem i klia long wanem i defren bitwin we taem oli singaotem yumi long wok, mo taem we oli putum yumi long wok. Ansa blong kwestin blong yufala i stret nomo: eksperiens blong mi i tijim mi se, ol prinsipol ia, plante memba blong Jos oli no andastanem gud.

Wan bigfala risen blong tokbaot poen ia i wanem mi bin lanem ova wan longfala taem, abaot tingting, wari, mo rong filing we plante misinari oli gat, from se from ol defren risen, oli putum olgeta long wok long ol defren ples blong wok long taem blong seves blong olgeta. Taem oli jenisim ples blong wok, samtaem i nid, from sam samting we oli tekem ples, sam situesen olsem ol aksiden, mo ol kil, mo from rod blong tekem visa i tektaem, from politik, from oli krietem mo mas putum man long wok long ol niu misin, o from ol jenis long nid we i hapen oltaem raon long wol insaed long wok blong prijim gospel.⁸

Taem oli jenisim ples blong wok blong wan misinari, rod i semmak nomo olsem long fastaem. Ol memba blong Kworom blong Olgeta Twelef Aposol oli askem insperesen taem oli jenisim ples blong wok.

I no longtaem i pas, mi bin storian wetem wan fetful man we i bin serem dip filing blong hat blong hem. Long wan miting, mi jes eksplenem wanem i defren bitwin taem we God i singaotem man long wok mo taem we Hem i putum man long wok. Gudfala brata ia i sekhan long mi mo wetem wota long ae i se: “ol samting yu helpem mi blong lanem tedei i karemaot wan hevi samting long solda blong mi we mi bin stap tekem blong ova 30 yia. Taem mi wan yang misinari, fas ples blong wok blong mi i long Saot Amerika. Be mi no save kasem wan visa, mekem se oli putum mi long wok long Yunaeted Stet. Long ol yia we oli pas, mi bin askem miwan se from wanem mi no save givim seves long ples we oli bin singaotem mi long hem fastaem. Naoia mi save se God i bin singaotem mi long wok be i no long wan ples. Mi wantem talem long yu se wanem mi andastanem, i helpem mi bigwan.”

Hat blong mi i soa from man ia. Taem mi bin stap tijim ol besik prinsipol ia raon long wol, plante oli kam luk mi long praevet mo talem sem filing olsem man ia we mi jes tokbaot. Mi tokbaot hemia tedei from se i no mas gat wan memba blong Jos ia we i mas karem wan hevi samting from hem i no andastanem gud, from i no sua, o i wari o filim rong abaot wan wok we oli putum long hem.

“From hemia, [yufala] i go mo prijim gospel blong mi, nomata we hem i long Not o long Saot, long Is o long Wes, i nomata, from we [yufala] i no save mekem mistek.”⁹ Taem yufala i tingting hevi long ol toktok blong skripja ia mo openem hat blong yumi, mi hop mo prea se bae yufala i invaetem Tabu Spirit blong tekem dip insaed long sol blong yufala, andastaning ia, hiling ia, mo bae yufala i kam oraet bakegen.

Wan moa risen we mi filim strong blong tokbaot topik ia, i eksperiens blong miwan blong putum ol misinari long wok ova long plante yia. Long Olgeta Twelef, i no gat wan samting we i konfemem se lata-dei revelesen i stap gohed i moa strong bitim blong lukaotem tingting blong Lod taem mifala i stap mekem responsabiliti ia blong putum ol misinari long wok long ol stret ples blong olgeta. Mi witnesem se Sevya i save, mo i savegud wanwan long yumi, “wan bae wan” mo nem bae nem.

Naoia, mi wantem tokbaot smol wan stamba poen, we yumi no stap lukluk tumas, blong mekem rere wan blong oli singaotem hem long wok.

Trifala toktok we oli joen i makem rod blong ol boe blong God oli stap rere mo stap progres: prishud, tempol, misin. Samtaem, olsem ol papa mo mama, ol fren, mo ol memba blong Jos, yumi stap lukluk nomo blong mekem ol yang man oli rere blong go long misin, mekem se yumi no tingting, long sam wei, blong nara impoten step long kavenan rod ia, we oli mas mekem bifo wan i statem wan fultaem misinari seves. Blong wok olsem wan misinari, i wan, be i no impoten bilding brikis ia nomo long fasin blong krietem wan strong fandesen blong save gro mo givim seves long saed blong spirit. Blong kasem prishud mo ol blesing blong tempol, tugeta i kam bifo wan i kasem ples blong wok, mo tufala i nid blong mekem yumi kam strong long saed blong spirit long ful laef blong yumi.

Ol yang man. Taem yufala i stap ona mo mekem ol diuti blong yufala long Aronik Prishud, o Prishud we i moa daon, yufala i stap rere blong kasem mo wok strong long strong promes mo kavenan blong Melkesedek Prishud, o hae prishud.¹⁰ Blong stap klin inaf i wan moa impoten poen blong kasem hae prishud. Wan laeftaem prishud seves i slip long fored blong yufala. Rere naoia taem yu givim wan seves we i gat mining. Plis, lanem blong lavem blong stap mo gohed blong stap klin inaf. Kam klin inaf. Stap klin inaf.

Afta we hem i kasem Melkesedek Prishud mo wan singaot blong givim seves, wan yang man i save kasem paoa¹¹ tru long ol kavenan mo ol odinens blong tabu tempol. Blong stap go long tempol mo gat spirit blong tempol blong gotru long yu, i kam fastaem long seves ia olsem wan fultaem misinari. Blong stap klin inaf i wan samting ia nomo we i impoten blong kasem ol blesing blong tempol, hemia blong yufala ol yang man mo evri memba blong Jos. Taem yufala i stap laef folem ol standet blong gospel, yufala i save go insaed long haos blong Lod mo tekpat long ol tabu odinens long yangfala taem blong yufala. Lav we yufala i gat mo save abaot ol odinens blong tempol bae i mekem yufala i kam strong moa, mo bae i blesem yufala long laef. Plis lanem blong stap mo gohed blong stap klin inaf. Kam klin inaf. Stap klin inaf.

Plante yang man mo yang woman oli gat finis wan limit-yus tempol rekomen we i laef i stap. Olsem ol man we i kasem Aronik Prishud, bae yufala i faenem ol famli nem mo mekem ol baptaes mo konfemesen blong ol memba blong famli long tempol. Taem yu holemtaet tempol rekomen blong yu, i soem se yu klin inaf, mo taem yu givim seves long ol narafala insaed long tempol i wan impoten pat blong stap rere from Melkesedek Prishud.

Ol yang man. Wanwan long yufala i wan misinari naoia. Raon long yufala, evri dei, i gat ol fren, mo ol neiba “we oli no save trutok from nomo oli no save weaples blong faenem.”¹² Olsem we Spirit i lidim yufala, yu save serem wan tingting, wan invitesen, wan teks, o twit we bae i soem long ol fren, ol trutok blong gospel we i kambak. Yu no nid blong wet long ofisol koling blong save wok strong long misinari wok.

Taem we ol blesing blong prishud, tempol mo misin oli kam wan tugeta long wan ples long Kraes,¹³ mo oli wok strong insaed long hat, maen, mo sol blong wan yang misinari, hem i save kwalifae from wok ia.¹⁴ Paoa blong hem i kam antap blong mekem responsabiliti blong ripresentem Lod Jisas Kraes. Strong paoa ia blong kombaenem prishud mo tempol kavenan, mo kasem “paoa olsem hemia blong God” ¹⁵ tru long ol prishud odinens,¹⁶ blong givim seves fulwan, mo blong talemaot gospel we i no gat en long ol pikinini blong God i mekem se wan yang man i kam “strong mo i no muvmuv long fet,” ¹⁷ mo “i tekem rus mo i bildimap hem long [Kraes}.”¹⁸

Insaed long ol hom mo long jos, yumi mas skelem olgeta trifala samting ia long paten blong Lod blong stap mekem ol fetful boe blong God oli rere mo progres: prishud, tempol, misin. Olgeta trifala poen ia i askem yumi blong lavem blong stap mo gohed blong stap klin inaf. Kam klin inaf. Stap klin inaf.

Ol brata we mi lavem yufala tumas. Mi promesem yufala se presen blong spirit blong kasem revelesen bae i kam long koling blong yufala long wok ia blong talemaot gospel, mo long wok we oli putum yu long hem long wan stret ples blong wok. Taem yu wok strong wetem strong tingting blong rere naoia tru long prishud mo tempol seves we i no selfis, bae yu kam strong moa blong luk se i tru we Lod i stap laef. Lav long Hem mo wok blong Hem bae i fulumap hat blong yu. Taem yu stap lanem blong stap klin inaf, bae yu kam wan strong tul long han blong Lod blong blesem mo givim seves long plante pipol.

Wetem glad, mi wan witnes se Papa long Heven mo Pikinini blong Hem we Hem i Lavem Tumas, Jisas Kraes, Tufala i stap laef. Blong kam joenem Tufala long seves i wan long ol blesing we i moa bigwan we yumi save kasem. Mi testifae olsem long tabu nem blong Jisas Kraes, amen.