“Mi Livim Pis blong Mi I Stap wetem Yufala”

Ol dia sista blong mi. Spirit blong God i blesem yumi tedei. Ol mesej blong insperesen we oli kam long ol strong sista lida mo miusik oli mekem fet blong yumi i kam strong mo i leftemap tingting blong wantem kipim ol tabu kavenan we yumi bin mekem wetem Papa long Heven. Yumi filim moa lav long Lod Jisas Kraes, mo tangkyu from bigfala presen blong Hem we i sakrifaes we i pem praes from sin.

Mesej blong mi tedei i wan simpol wan. Yumi filim pis tedei. Yumi evriwan bae i wantem filim kaen pis olsem insaed long yumiwan, insaed long ol famli blong yumi, mo wetem ol pipol raon long yumi. Lod i promesem pis long ol disaepol blong Hem taem Hem i rere blong aot long olgeta. Hem i mekem ol semfala promes ia long yumi. Be Hem i talem se bae Hem i givim pis long wei blong Hem, i no olsem wol i givim. Hem i tokbaot wei blong Hem blong sendem pis:

“Mo Spirit ia blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ia bakegen we mi mi stap talem long yufala.

“Mi putum pis blong mi i stap wetem yufala. Mo pis ia we mi givim i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.” (Jon 14:26–27).

Ol boe blong Mosaea oli nidim presen we i pis ia taem oli statem misin blong olgeta i go long Ol Man Leman. Tingting blong olgeta i trabol moa taem oli luk se wok blong olgeta i bigwan, nao oli prea blong gat pis. Mo “Mo i bin hapen se, Lod i visitim olgeta wetem Spirit blong hem, mo i talem long olgeta: “Leftemap tingting blong yufala.” Mo oli leftemap tingting blong olgeta” (Alma 17:10; luk tu long Alma 26:27).

Samtaem, bae yu wantem pis taem yu fesem samting we yu no save gud, mo wanem we yu luk se oli ol jalenj we bae oli kam. Ol boe blong Mosaea oli bin lanem lesen we Lod i tijim Moronae long hem. Hem i save gaedem yumi evriwan : “Mo sapos ol man i kam long mi, bae mi soem long olgeta, [ol wiknes blong olgeta]. Mi givim long ol man [ol wiknes] blong mekem se oli save putum tingting blong olgeta i stap daon; mo gladhat blong mi, i naf blong evri man we i putum tingting blong olgeta i stap daon long fored blong mi; from sapos oli putum tingting blong olgeta i stap daon long fored blong mi, mo gat fet long mi, nao [bae mi mekem oli nomo wik long ol samting ia], bae mi mekem olgeta oli kam strong long olgeta. (Ita 12:27).

Moronae i bin talem se taem oli “harem ol toktok ia,” hem i “leftemap tingting blong hem” (Ita 12:29). Hemia tu i save leftemap tingting blong yumi evriwan. Olgeta we oli no luk wiknes blong olgeta oli no stap progres. Taem yu save wanem yu wik long hem, i wan blesing from i helpem yu blong gohed blong gat tingting i stap daon, mo i gohed blong tanem yu i go long Sevya. Spirit bae i givhan long yu, be tu, i rod ia we Atonmen i wok tru long hem blong jenisim stret fasin blong yu. Nao ol samting we yu wik long hem, bae yu winim olgeta.

Samtaem bae Setan i jalenjem fet blong yu; i hapen olsem long ol disaepol blong Jisas Kraes. Blong difendem yu agensem ol atak ia i blong kipim Tabu Spirit olsem kompanion blong yu. Spirit bae i putum pis long sol blong yu. Bae i pusum yu blong muv fored wetem fet. Mo bae Hem i mekem yu rimemba ol taem ia we yu bin filim laet mo lav blong Jisas Kraes.

Blong tingbaot, i wan long ol moa gudfala presen we Spirit i save givim long yu. Bae Hem i mekem “yu tingbaot olgeta samting ia bakegen we [Lod] i stap talem long yu” (Jon 14:26). Maet bae yu tingbaot wan taem we yu kasem ansa long prea, o taem yu kasem wan prishud odinens, o wan konfemesen long testemoni blong yu, o blong wan taem we yu luk han blong God i lidim yu long laef blong yu. Maet long wan fiuja taem bae yu nidim paoa, mo Spirit bae i mekem yu tingbaot ol filing we yu bin gat long miting tedei. Mi prea se bae i olsem.

Wan memori we Spirit i mekem mi tingbaot oltaem, i wan naet sakramen miting we oli holem plante yia i pas insaed long wan aean haos long Insbrek, long Ostria, plante yia i pas. Haos i stap andanit long rod blong tren. I gat samples twelef pipol nomo i stap, oli sidaon long ol wud jea. Plante long olgeta oli ol woman, sam yangfala, sam olfala. Mi luk krae blong tangkyu taem oli pasem sakramen long smol kongregesen ia. Mi filim lav we Sevya i gat long olgeta Sent ia, mo olgeta tu. Be merikel we mi tingbaot klia i laet ia we i stap fulumap aean haos ia, mo filing blong pis we i kam wetem. I naet taem mo i no gat windo, be yet, rum ia i laet gud semmak olsem sansaen blong medeldei.

Laet blong Tabu Spirit i bin stap ia long naet ia i saen gud mo i bigwan. Mo ol windo we oli letem laet i kam insaed oli hat we i stap daon blong olgeta Sent ia, we oli bin kam long fored blong Lod blong askem fogivnes from sin blong olgeta mo blong oli komitim olgeta blong tingbaot Hem oltaem. I no bin had blong tingbaot Hem long tetaem ia, mo memori blong mi blong tabu eksperiens ia i mekem i isi moa blong mi tingbaot Hem mo Atonmen blong Hem long ol yia afta. Long dei ia, promes long prea blong sakramen we i Spirit bae i stap wetem yumi i bin kamtru, mekem se i tekem ol filing blong laet mo pis i kam.

Semmak olsem yufala, mi bin talem tangkyu long plante wei we Lod i bin visitim mi wetem Spirit blong Givhan taem mi bin nidim pis. Be yet, Papa we i stap long Heven i wari, i no blong yumi stap gud nomo, be blong yumi progres i kam antap. “Blong Givhan” i wan wei we oli tokbaot Tabu Spirit long ol skripja. Hemia wan narawan: “Mo nao, i tru, i tru, mi talem long yu, putum tras blong yu long Spirit ia we i lidim man blong mekem gud” (luk long D&C 11:12). Plante taem, gud ia bae i lidim yu blong helpem wan narawan blong kasem givhan long God.

Long waes tingting blong Hem, Lod i tekem yufala i kam tugeta long ol oganaesesen, mo ol klas insaed long Jos blong Hem. Hem i bin mekem olsem blong yufala i kam antap long paoa blong mekem gud. Insaed long ol oganaesesen ia, yu gat ol spesel wok blong givim seves long ol narawan long bihaf blong Hem. Eksampol. Sapos yu wan yang woman, bae bisop o Yang Woman lida blong yu i save askem yu blong go luk wan Lorel we i kam, wanem yumi singaotem “lesaktiv.” Maet yu nao yu save hem i bitim bisop o Yang Woman lida ia. Bae yu save se hem i trabol i stap long hom o long skul, mo tugeta. Ol lida blong yu bae oli no save, be bae oli filim blong askem yu blong go long hem, be Lod nao i stap go, mo Hem i stap lidim wok ia tru long insperesen blong Spirit blong Hem.

Sakses long ol wok blong yu bae i nidim wan merikel blong jenisim, tugeta, hat blong yu, mo hat blong gel ia we oli sendem yu blong go sevem—mo hemia i nidim Tabu Spirit olsem kompanion. Spirit i save letem yu luk lesaktiv Lorel olsem we Lod i stap luk hem. Lod i save hat blong hem mo hat blong yu, mo Hem i save ol janis blong hat i save jenis. Hem i save visitim yutufala tugeta wetem Spirit blong Hem blong putum tingting blong yu i stap daon, blong yu gat fogivnes mo gat lav.

Spirit ia i save givim ol toktok, ol wok mo longfala tingting we yu nidim blong invaetem wan sipsip i kambak long yad. Mo Hem i save tajem hat blong olgeta long grup long Lorel klas blong lavem mo welkamem sipsip ia we i bin lus, blong mekem se taem hem i kambak, hem i filim se hem i kambak hom.

Paoa blong yu blong mekem gud olsem wan grup blong ol gel blong God bae i dipen, bigwan, long hamas yufala i wan mo lavlavem yufala bakegen. Hemia i wan nara presen we i kam tru long Tabu Spirit.

Alma i bin andastanem hemia. Taswe, hem i bin prea wetem ol pipol blong hem “blong oli no mas gat rao wan wetem narawan, be oli mas lukluk i go long fored wetem wan ae, mo gat wan fet, mo wan baptaes, mo hat blong olgeta oli joen tugeta blong kam wan long lav, lav we wan i gat long narawan” (Mosaea 18:21).

I nid blong yumi stap wan blong gat Spirit insaed long klas mo famli blong yumi. Be yu save, aot long eksperiens blong yumi, semmak olsem mi, se kaen yuniti ia i had blong holemtaet. I nid blong gat Tabu Spirit olsem kompanion blong openem ol ae blong yumi mo kontrolem ol filing blong yumi.

Mi tingbaot wan boe blong mitufala we i gat seven o eit yia, we i stap jiamjiam strong long bed blong hem, we mi ting se bae i foldaon. Kwiktaem kros i kasem mi, mo mi muv kwik blong putum oda long haos. Mi holem boe blong mi long solda blong hem mo leftemap hem kasem taem mi save luk ae blong hem.

Spirit i putum ol toktok ia long maen blong mi. I olsem wan kwaet voes be i stikim hat blong mi: “Yu sap holem wan gudfala man ia.” Kwaet nomo, mi putumbak hem antap long bed mo talem sore long hem.

Naoia, hem i kam bigfala man ia we Tabu Spirit i letem mi luk 40 yia i pas. Mi glad blong taem we i no save finis se Lod i bin sevem mi long ol nogud filing ia taem Hem i sendem Tabu Spirit i letem mi luk wan pikinini blong God olsem we Hem i bin luk hem.

Yuniti we yumi wantem insaed long ol famli blong yumi mo insaed long Jos bae i kam taem yumi letem Tabu Spirit i jenisim wanem yumi luk taem yumi stap lukluk wanwan long yumi, mo iven taem yumi tingting long wanwan long yumi. Spirit i stap luk samting wetem stret lav blong Kraes. Lisin long ol toktok we Momon i yusum blong tokbaot bigfala lav—stret lav blong Kraes. Tingting long ol taem we yu bin filim hemia:

“Mo bigfala lav i save wet longtaem, mo i kaen, mo i no jalus, mo i no kam bigwan, i no lukaotem samting blong hem nomo, i no save kros kwiktaem, i no tingting long eni nogud samting, mo i no glad long rabis fasin, be i glad long trutok, i stanap strong long evri samting, i bilivim evri samting, i gat hop long evri samting, i stap strong long evri samting.

“[Taswe,] ol brata blong mi we mi lavem tumas [ mo mi ademap ol sista], sapos yufala i no gat bigfala lav, yufala i nating, from bigfala lav bae i neva sot. From samting ia, holemtaet bigfala lav, we i moa hae bitim evri samting, from evri samting i mas sot—

“Be bigfala lav i stret lav blong Kraes, mo i stap strong oltaem; mo eni man we oli faenem se hem i gat samting ia long las dei, bae i gud long hem.

“[Taswe], ol brata [mo ol sista] blong mi we mi lavem tumas, prea long Papa wetem evri paoa blong hat, blong yufala i save fulap wetem lav ia, we hem i bin givim long olgeta we oli ol tru man blong folem Pikinini blong hem, Jisas Kraes; blong yufala i save kam ol boe blong God; blong taem we bae hem i kamaot, bae yumi stap olsem hem, from bae yumi luk hem olsem we hem i stap; blong yumi save gat hop ia; blong yumi save kam klin olsem we hem i klin” (Moronae 7:45–48).

Hemia i gol we Papa we i stap long Heven i gat long yufala, ol gudfala gel blong Hem. Ating yu luk se gol ia i longwe, be long lukluk blong Hem, yu no longwe nating. Mekem se Hem i stap visitim yu wetem Spirit blong Hem blong givhan blong yu, blong leftemap tingting blong yu, givim insperesen long yu blong yu gogohed.

Mi putum sua witnes blong mi i stap wetem yufala se Papa i save yufala, i save nid blong yufala, mo i save nem blong yufala, i lavem yufala, i harem ol prea blong yufala. Pikinini blong Hem we Hem i lavem yufala tumas i stap invaetem yufala blong kam long Hem. Mo Oli sendem Tabu Spirit i kam helpem yufala long ol hadwok blong yufala blong givim seves long ol narawan long bihaf blong Tufala.

From Atonmen blong Jisas Kraes, Tabu Spirit i kompanion oltaem, mo i save mekem spirit blong yu i kam tabu, i kam klin gud. Bae yu filim pis blong Sevya we Hem i promesem blong putum i stap wetem ol disaepol blong Hem. Wetem pis ia, bae yu gat wan klia hop mo filing blong laet mo lav we i kam long Papa mo Pikinini blong Hem we i lidim kingdom blong Hem long wol tru long revelesen long profet blong Hem we i stap laef. Mi testifae olsem long nem blong Jisas Kraes, amen.