2010–2019
Pulum Paoa blong Jisas Kraes Insaed long Laef blong Yumi
Epril 2017

Pulum Paoa blong Jisas Kraes Insaed long Laef blong Yumi

I Kam long Presiden Russell M. Nelson

Presiden blong Kworom blong Olgeta Twelef Aposol

Gospel blong Jisas Kraes i fulap wetem paoa blong Hem, we i stap blong evri boe o gel blong God we i wantem kasem.

Ol dia brata mo sista blong mi. Yumi stap laef long wan dispensesen we i had tru. Ol jalenj, ol raorao, ol defren kaen samting oli raonraon raon long yumi. Ol trabol taem ia, Sevya i bin luk finis. Hem i bin givim woning long yumi se long taem blong yumi, bae enemi bae i tantanem hat blong man i kros mo lidim olgeta longwe. 1 Be yet, Papa long Heven i no wantem se bae yumi fesem tumas problem blong yumiwan mo blong sosaeti.

God i lavem wol tumas nao i sendem Wan Stret Pikinini Ia Nomo blong Hem2 blong helpem yumi.3 Mo Pikinini blong Hem, Jisas Kraes, i givim laef blong Hem from yumi. Evri samting ia blong yumi save kasem paoa olsem hemia blong wan god—wan paoa we i inaf blong lukluk wetem ol hevi samting, ol samting we i blokem rod, mo ol temtesen blong tedei.4 Tedei, mi wantem tokbaot olsem wanem yumi save pulum, insaed long laef blong yumi, paoa blong Lod mo Masta Jisas Kraes.

Yumi stat blong lan abaot Hem.5 I no posibol blong Lod i sevem man we i no save samting.6 Moa yumi save abaot seves mo misin blong Sevya,7 moa bae yumi andastanem doktrin8 blong Hem mo wanem Hem i bin mekem long yumi—moa yumi save se Hem i save givim paoa we yumi nidim long laef blong yumi.

Eli long yia ia, mi bin askem ol yang adalt blong Jos blong givim wan smol taem blong olgeta evri wik blong stadi long evri samting we Jisas i bin talem mo mekem olsem we oli stap long ol standet tabu buk.9 Mi bin invaetem olgeta blong letem ol skripja toktok abaot Jisas Kraes long Topik Gaed i kam stadi kurikulum blong olgeta.10

Mi givim jalenj ia from se mi bin akseptem miwan. Mi ridim mo makem evri ves we oli tokbaot Jisas Kraes, olsem we i stap andanit long 57 smol taetol long Topik gaed. 11 Taem mi finisim gudfala eksasaes ia, waef blong mi askem wanem nao i mekem long mi. Mi talem hem: “!Mi wan defren man!”

Mi bin filim wan niu paoa blong putum tingting blong mi long Hem taem mi stap ridim bakegen insaed long Buk blong Momon, toktok blong Sevya abaot misin blong Hem long wol ia. Hem i se:

“Mi kam long wol blong mekem wanem we Papa blong mi i wantem, from Papa blong mi i bin sendem mi.”

“Mo papa blong mi i bin sendem mi blong oli save leftemap mi long kros.”12

Olsem wan Lata-dei Sent, yumi lukluk long misin blong Hem olsem Atonmen blong Jisas Kraes, we i mekem laef bakegen long ded i ril long yumi evriwan mo i mekem laef we i no save finis i stap long olgeta we oli sakem sin mo kasem mo holemtaet ol stamba odinens mo kavenan.

Hem i no stret long doktrin blong tokbaot sakrifaes blong Lod we i pem praes wetem ol sotkat toktok olsem “Atonmen,” o “Paoa blong Atonmen we i save mekem samting,” o “blong yusum Atonmen,” o “blong kam strong tru long Atonmen.” Ol toktok ia oli wan denja blong tok fet long rog wei mo lukluk se wanem i hapen nao i laef mo i gat paoa mo yumi nomo lukluk long Papa long Heven mo Pikinini blong Hem, Jisas Kraes.

Anda long bigfala plan we i no save finis blong Papa, Sevya nao i bin safa. Sevya nao i bin brekem ol rop blong ded. Sevya nao i pem praes from ol sin mo ol fasin blong yumi blong brekem loa, mo i karemaot olgeta sapos yumi sakem sin. Sevya nao i mekem yumi kam fri long ded long bodi mo spirit.

I no gat wan man we oli singaotem “Atonmen” we yumi save singaot long hem blong givhan, hiling, fogivnes, o paoa. Jisas Kraes i stamba. Ol tabu toktok olsem Atonmen, mo Laef bakegen long Ded, oli tokbaot wanem Sevya i bin mekem, folem plan blong Papa, blong yumi save laef wetem hop long laef ia, mo kasem laef we i no save finis long wol we i stap kam. Sakrifaes blong Sevya blong pem praes—stamba wok blong histri blong man—oli andastanem mo talem tangkyu moa from taem yumi joen long Hem klia wan.

Hamas misin blong Sevya i impoten, Profet Josef Smit i bin tokbaot bigwan mo hem i talem se “ol stamba prinsipol blong relijin blong yumi oli testemoni blong Ol Aposol mo Ol Profet, long saed blong Jisas Kraes, se Hem i bin ded, oli berem Hem, mo Hem i girap bakegen long nambatri dei, mo i go antap long heven; mo evri nara samting long saed blong relijin blong yumi, oli hang long testemoni ia.”13

Stret toktok ia nao blong Profet i mekem se ol nara 15 profet, sia mo reveleta oli givim mo saenem testemoni blong olgeta blong selebretem namba 2,000 betdei blong taem Lod i bon. Histri testemoni ia, oli singaotem “Kraes we I Stap Laef.”14 Plante memba oli lanem baehat ol trutok blong hem. Ol narawan oli no save nomo se i gat i stap. Taem yufala i stap lanem moa abaot Jisas Kraes, mi askem strong long yufala blong stadi long Kraes we I Stap Laef.

Taem yumi stap putum taem blong lanem abaot Sevya mo sakrifaes blong Hem we i pem praes, yumi mas gat wan nara ki samting blong save kasem paoa blong Hem: yumi jusum blong gat fet long Hem mo blong folem Hem.

Ol tru disaepol blong Jisas Kraes oli wantem blong kamaot, toktok, mo stap defren long ol pipol blong wol. Oli no fraet, oli givim ful taem, mo gat paoa long tingting. Mi bin lan aot long ol kaen disaepol olsem long wan wok we mi go mekem long Meksiko, we mi mit wetem ol man blong gavman, mo tu, ol lida blong ol narafala jos. Wanwan i talem tangkyu from ol hadwok blong ol memba blong yumi blong protektem mo holemtaet strong ol mared mo ol famli insaed long kantri blong olgeta.

I no gat wan samting we i isi o i kam nomo olsem blong kam ol strong disaepol. Lukluk blong mifala i mas stap nomo long Sevya mo gospel blong Hem. I had long tingting blong stap lukluk nomo long Hem long evri tingting.15 Be taem yumi mekem, ol tu tingting mo ol fraet oli ronwe.16

I no longtaem i pas, mi lan aot long wan yang Lorel we i no fraet. Oli invaetem hem blong tekpat long wan provins level kompetisen blong hae skul blong hem, be long sem naet, hem i komitim hem blong tekpat long wan stek Rilif Sosaeti miting. Taem hem i luksave se bae i no stret mo eksplenem long olgeta we oli lukaot long kompetisen se bae hem i mas aot long kompetisen eli blong go long wan impoten miting, oli talem long hem se bae hem i diskwalifae sapos hem i aot.

?Yang Lorel ia i mekem wanem? Hem i kipim komitmen blong hem blong tekpat long Rilif Sosaeti miting. Olsem we oli talem, hem i diskwalifae long provins level kompetisen ia. Taem oli askem hem abaot desisen blong hem, hem i ansa simpol nomo: “?Be Jos i moa impoten, no?

Fet long Jisas Kraes i pusum yumi blong mekem ol samting we bambae yumi no save mekem. Fet i pusum yumi blong tekem aksen blong yumi gat moa rod blong kasem paoa blong Hem.

Yumi kam antap tu long paoa blong Sevya insaed long laef blong yumi taem yumi mekem ol tabu kavenan mo kipim kavenan ia long fasin we i stret evriwan. Ol kavenan blong yumi oli joenem yumi long Hem mo i givim paoa olsem hemia blong wan god. Olsem ol fetful disaepol, yumi sakem sin mo stap folem Hem long ol wota blong baptaes. Yumi wokbaot folem rod blong kavenan blong kasem ol nara stamba odinens.17 Mo tangkyu tumas, plan blong God i givim ol blesing blong pasem long ol bubu blong yumi we oli bin ded be oli no bin gat janis blong kasem ol odinens ia long laef blong olgeta long wol.18

Ol man mo woman we oli kipim kavenan, oli lukaotem ol wei blong mekem se oli no gat mak blong wol ia, blong i no gat eni samting i blokem olgeta blong kasem paoa blong Sevya. Wan fetful waef mo mama i raetem hemia i no longtaem: “Hemia ol taem blong trabol mo denja. Mi gat blesing blong gat save blong plan blong fasin blong sevem man, mo gudfala kaonsel blong ol profet, aposol mo lida we oli stap helpem yumi blong sel sef long ol strong solwota ia. Mifala i stopem fasin blong onem redio long moning. Be naoia, mifala i stap lisin long wan jeneral konfrens toktok long ol mobaelfon evri moning taem mifala i stap rere from wan nara dei.”

Wan nara samting blong pulum paoa blong Sevya insaed long laef blong yumi i blong go long Hem wetem fet. Hemia i nidim blong yumi wok strong wetem strong tingting, mo lukluk nomo long Hem.

Pikja
Woman we i tajem en blong klos blong Sevya

Yufala i tingbaot Baebol stori blong woman ia we i safa blong 12 yia wetem problem blong blad? 19 Hem i praktisim bigfala fet long Sevya mo talem: “Sapos mi save tajem klos nomo blong hem, bambae sik blong mi i finis ia.”20

Fetful woman ia we tingting blong hem i stret nomo i nidim blong stretem han blong hem i longwe olsem we hem i save mekem blong kasem paoa blong Sevya. Taem i stretem han blong hem ia i saen blong spirit blong hem we hem i stretem i go.

Plante long yumi i krae dip insaed long hat blong yumi mo talem sam semfala toktok olsem woman ia: “Sapos mi save stretem mi moa blong pulum paoa blong Sevya long laef blong mi, bae mi save hao blong handelem situesen we i tantanem hat blong mi. Bae mi save wanem blong mekem. Mo bae mi gat paoa blong mekem.”

Taem yu stap go from paoa blong Lod blong i kam insaed long laef blong yu wetem semfala paoa we wan we i draon i gat taem hem i traem blong kam antap mo pulum win, paoa ia we i kam long Jisas Kraes bae i blong yu. Taem Sevya i save se yu tru yu wantem kasem Hem—taem Hem i save filim dip tingting blong hat blong yu i blong pulum paoa blong Hem long laef blong yu—bae Tabu Spirit i lidim yu blong save stret wanem yu nid blong mekem. 21

Taem yu stretem yu long saed blong spirit i go bitim eni samting we yu eva mekem bifo, nao paoa blong Hem bae i kam nomo insaed long yu. 22 Mo afta, bae yu andastanem dip mining blong ol toktok we yumi singsing insaed long hym “Spirit blong God:”

Lod i mekem save blong ol Sent i kam bigwan. …

Ol save mo paoa blong God oli kam bakegen

Naoia rod i open blong Trutok i kam long wol.23

Gospel blong Jisas Kraes i fulap wetem paoa blong Hem, we i stap blong evri boe o gel blong God we i wantem kasem. Hem i testemoni blong mi se taem yumi pulum paoa blong Hem i kam insaed long laef blong yumi, tugeta, Hem mo yumi bae i stap glad tumas.24

Olsem wan long ol spesel witnes blong Hem, mi talemaot se !God i stap laef! !Jisas Hem i Kraes! !Jos blong Hem i kambak long wol! Profet blong God long wol tedei, i Presiden Thomas S. Monson, we mi sastenem wetem ful hat blong mi. Mi testifae olsem, wetem ful lav mo blesing i go long wanwan long yufala, long tabu nem blong Jisas Kraes, amen.

Ol Not

  1. Luk long 2 Nifae 28:19–30.

  2. Luk long Jon 3:16.

  3. Jisas nao i Hem we God i Jusum Hem—we Papa long Heven i jusum Hem blong i ripresentativ blong Hem long saed blong evri samting long saed blong fasin blong sevem evri kaen man. Jisas, God i jusum Hem blong i Sevya mo Ridima blong yumi. Bifo oli mekem wol, God i bin anaontem Jisas blong mekem se fasin blong nomo save ded i kam ril, mo laef we i no save finis i wan samting we evriwan long ol pikinini blong God oli save kasem (luk long Jon 17:24; 1 Pita 1:20). From hemia, Jisas i tekem tufala taetol we i spesel long Hem: Mesaea ia (Hibru) mo Kraes ia (Grik)—we wanwan toktok ia, i minim “we oli jusum.” (Luk long Bible Dictionary, “Anointed One.”)

  4. Yumi save protektem yumi taem yumi save mo stap laef folem toktok blong God (luk long Efesas 6:17–18; Doctrine and Covenants 27:18).

  5. Folem daereksen blong Papa blong Hem, Jisas i bin Krieta blong wol (luk long Jon 1:2–3) mo ol narafala wol we namba i no naf blong kaontem (luk long Moses 1:33). Longtaem bifo Hem i bon i kam long wol, Jisas i bin Hae Jehova—God blong OlTesteman. Jehova nao i bin toktok wetem Moses antap long Hil blong Sinae. Jehova nao i bin mekem wan kavenan wetem Ebraham se evri nesen blong wol bae i blesem laen blong Ebraham. Mo Jehova nao i bin mekem ol kavenan wetem ol famli blong haos blong Isrel. Jisas nao i Imanuel we God i promesem, olsem we Aesea i bin profesae long hem (luk long Aesea 7:14).

  6. Doctrine and Covenants 131:6.

  7. Luk long Doctrine and Covenants 76:40–41.

  8. Luk long 2 Nifae 31:2–21.

  9. Holy Bible, Book of Mormon, Doctrine and Covenants, mo Pearl of Great Price.

  10. Luk long Topical Guide, “Jesus Christ.” Antap long ol toktok anda long bigfala taetol ia, i gat 57 smol taetol abaot Hem. Long ol edisen blong skripja we oli no stap long Inglis, yusum Gaed long Ol Skripja.

  11. I gat long 2,200 lis we oli raetem long ol 18 pej blong Topik Gaed ia.

  12. 3 Nifae 27:13–14.

  13. Teachings of Presidents of the Church: Joseph Smith (2007), 49.

  14. Luk long “Kraes we I Stap Laef: Testemoni blong Olgeta Aposol,” Liahona, Epril 2000, 2–3.

  15. Luk long Hileman 8:15.

  16. Luk long Doctrine and Covenants 6:36.

  17. Jisas Kraes i tijim olsem wanem ol tabu odinens oli impoten, olsem baptaes (luk long Jon 3:5), sakramen (luk long Doctrine and Covenants 59:9), mo endaomen mo ol siling odinens blong tempol (luk long Doctrine and Covenants 124:39–42).

  18. Luk long Doctrine and Covenants 124:29–32.

  19. Luk long Luk 8:43–44.

  20. Mak 5:28.

  21. Luk long Doctrine and Covenants 88:63.

  22. Taem fetful woman ia i tajem klos blong Sevya, kwiktaem Hem i talem se, “No be wan man i tajem mi, from we mi mi haremsave se paoa [we i kam long Grik lanwis dunamis, we i mining “paoa”] blong mi i aot long mi i wokem wan samting” (Luk 8:46; oli ademap italik).

  23. “The Spirit of God,” Hymns, no. 2.

  24. Luk long 3 Nifae 17:20.