Magtindog sa Sulod kag Lubos nga Magbuylog

Sang pila ka tuig nga nagligad ang amon batang apo nga babayi nagdalagan palapit sa akon kag malipayon nga naghambal, “Lolo, Lolo, naka-score ako sang tatlo ka mga goal sa akon soccer game karon nga adlaw!”

Malipayon ako nagsabat, “Maayo gid ina, Sarah!”

Ang iya iloy dayon nagtulok sa akon nga may pagkaham-ut kag nagsiling, “Ang score amo ang duha sa isa.”

Wala na ako mamangkot kon sin-o ang nagdaug!

Ang konperensya isa ka panahon sang pagpainoino, bugna, kag kon kaisa pagbag-o sang direksyon.

May isa ka car rental company nga may isa ka sistema sang GPS nga gintawag NeverLost. Kon magsayup ka sa pagliko kon nabutang mo na ang luyag mo nga padulongan, ang nagagiya nga boses wala nagasiling, “Hoy gago!” Sa luyo sini, sa mabuot gid nga boses, nagasiling, “Nagakalkulo liwat sa rota—kon posible, maghimo sang legal nga U-turn.”

Sa Ezekiel mabasa naton ining matahum nga promisa:

“Kon ang malaut magaulikid halin sa tanan niya nga mga sala nga nahimo, kag magtuman sang tanan ko nga pagsulundan, kag maghimo sinang suno sa layi kag husto, pat-ud gid nga sia mabuhi, indi sia mapatay.

“Ang tanan niya nga kalapasan nga iya nahimo, ang mga ini indi na pag-ipabutyag sa iya.”¹

Daw ano katahum ini nga promisa, apang ini nagakinahanglan sang duha ka tanan agud mabaton ang promisa sang ikatatlo. Mag-ulikid halin sa tanan; magtuman sa tanan; dayon ang tanan patawaron. Ini nagakinahanglan nga mangin “lubos nga nagabuylog.”

Indi kita dapat nga mangin kasubong sang tawo nga, subong sa gin-report sang Wall Street Journal nagpadala sang isa ka sobre nga napuno sang kwarta upod ang isa ka sulat nga wala sang pirma sa Internal Revenue Service nga nagsiling, “Dear IRS: Nakasobre masapwan ang akon kwarta nga utang ko sa mga nagligad nga mga buhis. P.S. Kon pagkatapos sini ang akon konsiyensya sa gihapon nagatublag sa akon, ipadala ko sa inyo ang nabilin .”²

Indi sa amo sina kita nagabuhat! Wala kita nagapabilin agud lantawon kon ano ang pinakadiutay nga makapatigayon sa aton. Ang Ginuo nagapangayo sang tagipusuon kag isa ka maluyagon nga kaisipan.³ Ang aton bug-os nga tagipusuon! Sang kita nabunyagan, kita lubos nga gintusmaw bilang simbolo sang aton promisa nga magsunod sing lubos sa Manluluwas, indi tunga-sa- tagipusuon. Kon kita lubos nga nagapanaad kag “lubos nga nagabuylog”, ang langit nagauyog para sa aton kaayohan.⁴ Kon kita alabaab ukon kabahin lamang nga nagpanaad, indi naton mabaton ang pila sa pinakalabing pinili nga mga bugay sang langit.⁵

Sang madamo na nga tuig ang nagligad, gindala ko ang mga Scout sa isa ka campout sa desierto. Ang mga batang lalaki nagtulog malapit sa kalayo nga ila ginhimo, kag subong sa tanan nga maayong lider sang Scout, ako nagtulog sa likod sang akon truck. Sang pagbugtaw ko sang aga kag naglantaw sa campsite, nakita ko ang isa ka Scout, nga tawgon ko sa ngalan nga Paul, nakit-an ko nga daw medyo wala makatulog sang maayo. Ginpamangkot kon kamusta ang iya pagtulog, kag sia nagsabat, “Indi gid maayo.”

Sang ako nagpamangkot kon ngaa, sia nagsiling, “Gintugnawan ako; napatay ang kalayo.”

Nagsabat ako, “Ti, ang kalayo amo gid sina. Indi bala mainit ang imo sleeping bag?”

Wala sang sabat.

Dayon ang isa ka Scout nagsinggit, “Wala sia maggamit sang iya sleeping bag.”

Daw sa indi ako magpati nga nagpamangkot, “Ngaa wala, Paul?”

Kalinong—dayon sang ulihi may kahuya nga nagsabat: “Ti, abi ko anay kon indi ko paghumlaron ang akon sleeping bag, indi kinahanglan nga lukuton ko ini liwat.”

Matuod nga natabo: sia gintugnawan sa mga inoras bangud nagtinguha sa paglikaw sa lima ka minutos nga obra. Sarang naton hunahunaon, “Daw ano ka gago! Sin-o gid ang maghimo sina?” Ti, ini ginahimo naton permi sa mga sahi nga mas tuman ka makatalagam. Kasubong, kita nagalikaw sa paghumlad sang aton espirituhanon nga mga sleeping bag kon kita wala nagahatag sang panahon agud sinsero nga magpangamuyo, magtuon, kag hugot sa tagipusuon nga magtuman sa ebanghelyo kada adlaw; indi lamang nga ang kalayo mapatay, apang kita madulaan sang pag-amlig kag espirituahanon nga matugnawan.

Kon kita di-seryoso sa aton mga kasugtanan, kita kabahin sang mga bunga sini. Ang Ginuo naglaygay sa aton nga “mag-andam parte sa inyo mga kaugalingon, agud maghatag sang maukod nga pagtuman sa mga pulong sang kabuhing walay katapusan.”⁶ Kag Sia dugang nga nagpahayag, “Ang akon dugo indi makatinlo sa ila kon sila indi magpamati sa akon.”⁷

Sa katunayan, mas madali ang mangin ‘lubos nga nagabuylog” sangsa kabahin lamang nga ara. Kon kita kabahin nga nagabuylog ukon wala nagabuylog, may ara, sa Star Wars nga paghambal, “pagtublag sa pwersa.” Wala kita nagaupod sa pagbuot sang Dios kag gani wala kita nagaupod sa kinaiya sang kalipay.⁸ Si Isaiah nagsiling:

“Ang malaut kasubong sa mabalud nga dagat, nga ini wala nagakanay, nga ang mga tubig sini nagadala sang lapok kag higko.

“Walay kalinong, siling sang akon Dios, sa mga malaut.”⁹

Sa maayo nga swerte, bisan diin man kita ukon diin man kita nagkadto, indi kita kapin sa malab-ut sang Manluluwas, nga nagsiling: “Busa, ang sin-o man nga maghinulsol kag magkari sa akon subong sa isa ka bata, sia pagabatunon ko, kay ang amo nga tawo nasakop sang ginharian sang Dios. Yari karon, kay sa amo nga tawo ginhalad ko ang akon kabuhi, kag ginkuha ko ini liwat.”¹⁰

Samtang padayon kita nga maghinulsol kag magsalig sa Ginuo, makaangkon kita sang kabakod paagi sa lubos nga pag-angkon sang pagpakubos kag pagtuo sang isa ka diutay nga bata,¹¹ ginhatagan sang kaalam halin sa inagihan sang kabuhi. Si Job nagproklamar, “Ang matarung man magapabilin sa iya alagyan, kag sia nga may matinlo nga mga kamot mangin mas makusog kag mas makusog.”¹² Si Tennyson ato ang nagsulat, “Ang akon kusog kasubong sa kusog sang napulo, bangud ang akon tagipusuon putli.”¹³ Ang Ginuo naglaygay, “Magpabilin kamo sa balaan nga mga duog, kag indi maghalin.”¹⁴

Ang amon anak nga lalaki si Justin nagtaliwan sang sia 19 anyos pagkatapos sang pagbato sa balatian sa bilog niya nga kabuhi. Sa isa ka pamulong nga ginhatag Niya sa sacrament meeting wala madugay antes sia nagtaliwan, nagpaambit sia sang istorya nga may kahulogan sa iya parte sa isa ka amay kag sa iya batan-on nga batang lalaki nga nagkadto sa tiendahan sang mga hampanganan kon diin may isa ka lobo nga punching bag nga ang korte tawo. Ang bata nagsumbag sa lobo nga tawo, nga naghilay ini kag sa gilayon nagbalik sa pagtindog. Ang amay nagpamangkot sa iya anak kon ngaa ang tawo nagapadayon sa pagtindog liwat kada sumbag. Nagpaminsar ang bata kag dayon nagsiling, “Wala ko kabalo. Siguro ini bangud sia nagatindog sa sulod.” Agud nga “lubos nga nagabuylog,” kinahanglan naton ang “magtindog sa sulod,” “bisan ano ang matabo.”¹⁵

Nagatindog kita sa sulod kon kita pasensyoso nga nagalaum nga ang Ginuo magkuha ukon maghatag sa aton sang kabakod nga mag-antus sang aton mga tunok sa unod.¹⁶ Ang amo nga mga tunok sarang nga balatian, pagkabalda, balatian sa kaisipan, pagtaliwan sang isa ka pinalangga, kag iban pa gid nga mga isyu.

Nagatindog kita sa sulod kon kita nagabayaw sang mga kamot nga nagaluyloy. Kon kita nagapangapin sa kamatuoran batok sa malaut kag walay Dios nga kalibutan nga nagadugang ang di-pagkasulhay sa kasanag, nagatawag sa malain nga maayo kag sa maayo nga malain¹⁷ kag “nagakondenar sa matarung bangud sang ila pagkamatarung.”¹⁸

Ang nagatindog sa sulod walay sapayan sang mga kabudlay posible bangud sang isa ka malinong nga konsiyensya, ang nagapabakod kag nagapasulhay nga pagpasalig sang Balaan nga Espiritu, kag ang walay katapusan nga panan-aw nga kapin sangsa mortal nga paghangop.¹⁹ Sa aton kabuhi antes diri naghugyaw kita sa kalipay bangud sang oportunidad nga makakadto sa mortalidad.²⁰ Kita tanan “nagbuylog sang lubos” samtang nagpili kita nga mangin isganan nga mga manugpangapin sang plano sang Langitnon nga Amay. Ini tion nga magtindog kag magpangapin sang Iya plano liwat!

Ang 97 anyos ko nga amay bag-o lang nagtaliwan. Kon sin-o man ang mangamusta sa iya, ang permi niya nga sabat amo sini “Sa talaksan sang isa tubtob napulo, ara ako halos sa mga baynte singko!” Bisan ining palangga nga tawo indi na makatindog ukon makalingkod kag labi nga nabudlayan sa paghambal, ang iya sabat amo man sa gihapon. Dalayon sia nga nagatindog sa sulod.

Sang ang akon amay 90, ara kami sa airport kag ginpamangkot ko sia kon bala kuhaan ko sia sang wheelchair. Siling nia, “Indi, Gary—siguro kon ako magtigulang na.” Kag dayon dugang niya, “Ti, kon kapoyon ako sa paglakat, sarang permi ako nga magdalagan.” Kon kita wala makasarang nga “lubos nga nagabuylog” sa paagi nga kita nagalakat karon, siguro kinahanglan naton nga magdalagan; siguro kinahanglan naton nga kalkulahon liwat ang aton rota. Basi pa gani kinahanglan naton ang mag-U-turn. Basi kinahanglan naton ang magtuon sang mas maayo, magpangamuyo sing mas hugot, ukon magbuyi sa iban nga mga butang agud mapabilin naton yadtong mas importante. Siguro kinahanglan naton ang magbuyi sa kalibutan agud makakapyut kita sa eternidad. Nahangpan ini sang akon amay.

Sang ara sia sa navy sang World War II, may ara yadtong ara sa daku kag malapad nga bilding²¹ nga nagyaguta sang iya mga prinsipyo, apang duha sa iya mga kaupod, sanday Dale Maddox kag Don Davidson, nagtalupangod kag wala maghimo sini. Sila nagpamangkot, “Sabin, ngaa nga tuhay ka sa tanan? Mataas ang imo mga talaksan kag wala ka nagainom, sigarilyo, ukon nagapamuyayaw, apang daw sa kalmante ka kag malipayon.”

Ang ila maayo nga inagihan parte sa akon amay wala magsinanto sa gintudlo sa ila parte sa mga Mormons, kag ang amay ko nagtudlo kag nagbunyag angay sa ila nga duha. Ang mga ginikanan ni Dale tuman nga naakig nga ginpaandaman sia nga kon magbuylog sia sa Simbahan madulaan sia sang nobya nga si Mary Olive, apang sia nagbaton man sa mga misyonero sa pangabay ni Dale kag nabunyagan man.

Malapit sa katapusan sang giyera, si Presidente Heber J. Grant nagtawag sang mga misyonero kalakip ang pila nga may asawa. Sang 1946, si Dale kag ang iya asawa, si Maryolive, nagpamat-ud nga si Dale dapat mag-alagad bisan nga sila nagahulat sa ila subang nga ibun-ag. Nakaangkon sila sang ulihi sang siyam ka mga anak—tatlo ka lalaki kag anum ka babayi. Ang tanan nag-alagad sa mission, nga ginsundan nanday Dale kag Mary Olive, nga nag-alagad sa tatlo ka mga mission. Mga dosena sa ila mga apo ang nag-alagad man. Duha sa ila mga anak nga lalaki, sanday John kag Matthew Maddox, mga miyembro karon sang Tabernacle Choir, subong man sa umagad nga lalaki ni Matthew. Ang pamilya Maddox karon may kabilogan nga 144 kag maayo nga mga halimbawa sang “lubos nga nagabuylog.”

Sa pag-usisa sang mga dokumento sang akon amay, nakit-an namon ang isa ka sulat halin kay Jennifer Richards, isa sa lima ka mga anak nga babayi sang isa pa niya ka kaupod, si Don Davidson. Sia nagsulat: “Ang imo pagkamatarung nagpabag-o sa amon mga kabuhi. Mabudlay mahangpan kon daw ano kasubong ang amon mga kabuhi kon wala ang Simbahan. Ang amay ko nagtaliwan nga nagapalangga sa ebanghelyo kag nagatinguha sa pagtuman sini tubtob sa katapusan.”²²

Mabudlay takson ang maayong impluwensya sang kada tawo nga nagatindog sa sulod. Ang akon amay kag ang iya duha ka kaupod wala magpamati sa yadtong ara sa daku kag malapad nga bilding nga nagatudlo sa pagyaguta.²³ Nabal-an nila nga mas labing maayo ang magsunod sa ila Manunuga sangsa kadam-an.

Ang Apostol nga si Paul siguro naglaragway sang aton panahon sang sia naghambal kay Timothy nga “ang iba nga nagliko, nawili sa mga walay pulos nga pagbinaisay.”²⁴ Madamo sang “walay pulos nga pagbinaisay” nga nagakatabo sa kalibutan karon nga adlaw. Ini ang mga paghinambalanay sang yadtong ara sa daku kag malapad nga bilding.²⁵ Masami ini nagapakita sa porma sang pagpangatarungan agud tugotan ang kalautan ukon nagapakita sang kaugalingon sini kon ang katawhan nagtalang sang alagyan kag nagpadasig pa. Kon kaisa ini makit-an sa yadtong wala magpamat-ud nga “lubos nga magbuylog” kag nagpili nga magsunod sa kinaiya nga tawo nga nagasupak sa propeta.

Nagapasalamat kita, kay nabal-an naton kon paano ini magatapos sa mga himpit. Kon kita “lubos nga nagabuylog,” ara sa aton ang kabilogan nga pagpasalig nga “ang tanan nga butang ululupod nga magbuhat para sa kaayohan nila nga nagapalangga sa Dios.”²⁶ Si Elder Neal A. Maxwell nagsiling, “Indi mahadlok, mangabuhi lamang sing husto.”²⁷

Ang ugangan ko nga lalaki nagtudlo sa BYU kag luyag gid ang BYU football apang nahadlok sia maglantaw sang ila hampang bangud ginanerbyos sia sang resulta. Dayon may maayo nga butang nga natabo—naimbento ang VCR, nga naghimo nga posible niya nga marecord ang mga hampang. Kon ang BYU magdaug, magalantaw sia nga lubos ang kumpiyansa, kag pat-ud nga nakabalo sang katapusan! Kon sila ginpinahan sang di-nagakadapat, nasamaran, ukon naulihi sa ikaapat nga bahin, wala sia nagaugtas bangud nabal-an niya nga sila madaug! Sarang ninyo mahambal nga sia nakaangkon sang “isa ka perpektong kasanag sang paglaum”!²⁸

Amo man ini sa aton. Samtang kita himpit, sarang kita makaangkon sang amo man nga kapat-uran nga ang mga butang magabuhat sing maayo para sa aton sa katapusan. Ang mga promisa sang Ginuo pat-ud. Ini wala nagakahulogan nga ining mortal nga unibersidad mangin mahapos ukon wala sang mga luha, apang subong sa ginsulat ni Paul, “Ang mata wala makakita, ukon ang dalunggan nakabati, ukon nahangpan sang tagipusuon sang tawo, ang mga butang nga ginhanda sang Dios para ila nga nagapalangga sa iya.”²⁹

Mga kautoran, wala sang nakasala sa buas. Kabay nga kita magkalkulo liwat sang aton rota kon ginakinahanglan kag magpadayon nga may dakung paglaum kag pagtuo. Kabay nga kita “magtindog sa sulod” paagi sa pagmangin isganan kag “lubos nga nagabuylog.” Kabay nga kita mangin putli kag maisug sa pagpangapin sa plano sang Langinon nga Amay kag sa misyon sang Iya Anak, ang aton Manluluwas. Nagapamatuod ako nga ang aton Amay nagakabuhi, nga si Jesus amo ang Cristo, kag sa katunayan sang dakung plano sang kaluwasan. Ginapangamuyo ko nga ang labing pinili nga mga bugay sang Ginuo mapa yara sa inyo, kag ginahimo ko ini sa ngalan ni JesuCristo, amen.