Olgeta we Oli Hae Moa long Medel blong Yufala
Bigfala praes blong God i go long olgeta we oli givim seves mo oli no wet long wan praes.
Ol dia brata, ol dia fren. Mi glad tumas se mi stap wetem yufala long tabu wol prishud miting ia. Presiden Monson, tangkyu from mesej mo blesing blong yu. Oltaem bae yumi tekem long hat blong mifala, ol daereksen, kaonsel mo waes tingting blong yu. Mifala i lavem mo sastenem yu mo oltaem prea from yu. I tru, yu profet blong Lod. Yu yu presiden blong mifala. Mifala i sastenem yu, mifala i lavem yu.
Kolosap 20 yia i pas, oli dediketem Madrid Spen Tempol, mo i open olsem wan tabu haos long Lod. Hariet mo mi i tingbaot gud taem ia from mi bin stap givim seves long Yurop Eria Presidensi long tetaem ia. Wetem plante moa, mifala i spendem plante aoa blong gotru long ol ditel blong mekem plan mo oganaesem ol samting we bae i go kasem dedikesen.
Taem deit blong dedikesen i kam, mi luk se mi no kasem yet wan invitesen. Hemia i defren smol. Yes, responsabiliti blong mi i Eria Presiden, mi bin wok plante long tempol projek ia mo filim se wok ia i blong mi smol.
Mi bin askem Hariet sapos hem i luk invitesen i kam. Hem i no luk.
Ol dei oli pas mo wari blong mi i kam bigwan. Mi stap askem miwan sapos invitesen blong mitufala i go lus—ating i foldaon bitwin ol matres blong jea. Ating i miks wetem ol nogud leta mo oli sakem. Ol neiba oli gat wan puskat we i pusum nus olbaot, mo mi stap tingting nogud long puskat ia tu.
Nao, mi mas kam blong akseptem: oli no invaetem mi.
?Be olsem wanem nao i posibol? ?Mi mekem wan rong samting? ?Ating wan i ting se mi stap longwe tumas blong mi travel? ?Oli fogetem mi nomo?
Long en, mi luksave se kaen tingting ia i stap lidim mi i go long wan ples we mi no wantem stap long hem.
Hariet mo mi i talem long mitufalawan se tempol dedikesen, i no abaot mitufala. I no abaot se hu nao oli mas invaetem o nogat. Mo i no abaot ol filing blong mitufala, o tingting ia se mifala i mas gat raet long hemia.
Hem i blong dediketem wan tabu bilding, wan tempol i go long God we I Hae Olgeta. I wan dei blong stap glad blong ol memba blong Jos long Spen.
Sapos oli bin invaetem mifala blong kam, bae mi go wetem glad. Be sapos oli no invaetem mi, glad blong mi bae i semmak nomo. Hariet mo mi bae i glad blong stap wetem ol fren, ol brata mo sista, mo lukluk i go. Bae mitufala i presem God wetem gudfala blesing ia semmak olsem se sapos mitufala i stap long hom long Frankfet o long Madrid.
Ol Boe blong Tanda
Long medel blong Olgeta Twelef we Jisas i bin singaotem olgeta mo odenem, i gat tufala brata, Jemes mo Jon. ?Yu tingbaot smol nem we Hem i givim long tufala?
Ol Boe blong Tanda (Boanerges).1
Yu no stap kasem wan smol nem olsem sapos yu no gat wan defren bakgraon. Ol skripja oli no talem tumas from wanem nem ia. Be, yumi save luk smol long fasin blong Jemes mo Jon. Tufala ia, i semfala brata we tufala i talem se bae oli singaotem faea i kamdaon long heven i go long vilej blong Sameria from oli no invaetem tufala i go long taon.2
Jemes mo Jon, tufala i man blong pulum fis—fasin blong tufala i raf smol—be mi ting se tufala i save plante abaot paoa blong kriesen. Yes, tufala i man blong aksen.
Long wan taem, taem we Sevya i stap kam kolosap long las wokbaot blong Hem long Jerusalem, Jemes mo Jon i kam kolosap long hem wetem wan spesel rikwes—wan we i stret long smol nem blong tufala.
“I gat wan samting mitufala i wantem yu mekem blong mitufala,” tufala i askem.
Mi pikjarem se Jisas i mas smael long tufala, mo i ansa: “Yufala i wantem … wanem?”
“Mitufala i wantem se … bambae yu letem blong mitufala i sidaon, wan long raet saed blong yu, mo wan long lef saed blong yu.”
Sevya i talem long tufala blong tingting smol moa long wanem tufala i stap askem, mo afta, i talem se: “blong wan i sidaon long raet saed blong mi, mo narawan long lef saed blong mi, hem i no blong mi blong givim. Samting ya God i makemaot ol man blong hem longtaem finis, nao i stap rere long olgeta.”3
Long nara toktok, yu no save kasem ona insaed long kingdom blong heven taem yu stap kampen from. Mo yu no save “yusum paoa blong yu blong fos” blong kasem glori we i no save finis.
Taem ol nara ten Aposol oli harem samting we Ol Boe blong Tanda oli askem, oli no hapi nating. Jisas i bin save se taem blong Hem i sot, mo taem Hem i luk rao bitwin olgeta we bae oli holem wok blong Hem, i mekem tingting blong Hem i trabol.
Hem i toktok long Olgeta Twelef long saed blong paoa mo olsem wanem i jenisim olgeta we oli stap lukaotem mo holem paoa ia. Hem i talem se: “Ol pipol we oli lidim ol tingting long wol ia, oli yusum atoriti posisen blong olgeta blong yusum paoa ova long ol narawan.”
Mi save luk Sevya, we i lukluk wetem bigbigfala lav, fes blong ol fetful disaepol we oli bilif. Mi save harem voes blong Hem we i toktok: “Sapos wan long yufala i wantem kam haeman blong yufala, hem i mas kam olsem man blong wok blong yufala. Mo sapos wan long yufala i wantem kam bos blong yufala, hem i mas kam olsem slef nomo blong yufala evriwan.”4
Long kingdom blong God, gud fasin mo lidasip i minim blong luk ol narafala man wetem tru fasin blong olgeta—olsem we God i stap luk olgeta—mo go aot mo tijim olgeta. Hem i minim blong stap glad wetem olgeta we oli hapi, blong krae wetem olgeta we oli stap krae, leftemap tingting blong olgeta we oli gat hadtaem, mo lavem ol neiba blong yumi semmak olsem Kraes i lavem yumi. Sevya i lavem evriwan long ol pikinini blong God, i nomata long hamas mane oli gat, situesen, o kala blong skin, lanwis o politik tingting blong olgeta, o sitisensip blong olgeta. !I mas semmak wetem yumi!
Bigfala praes blong God i go long olgeta we oli givim seves mo oli no wet long wan praes. Hem i go long olgeta we oli givim seves kwaet nomo; olgeta we oli kwaet blong lukaotem sam wei blong helpem ol nara man; olgeta ia we oli givhan long ol narawan from nomo oli lavem God mo ol pikinini blong God.5
Yu No Ting se Hemia Nao
I no longtaem afta we oli singaotem mi olsem wan niufala Jeneral Atoriti, mi gat spesel janis blong go wetem Presiden James E. Faust blong oganaesem bakegen wan sek. Taem mi stap draev long trak i go long ples we oli putum mitufala long wok long hem, long Naes Saot Yuta, Presiden Faost i kaen blong yusum taem ia blong givim instraksen mo tijim mi. Wan lesen bae mi neva save fogetem. Hem i se: “Ol memba blong Jos oli kaen long ol Jeneral Atoriti. Bae oli mekemgud mo oli talem ol naes samting abaot yu.” Afta hem i stop smol, i talem: “Dieter, oltaem talem tangkyu from hemia, be yu no ting se hemia nao.”
Impoten lesen ia abaot Seves long Jos i go long evri prishud lida long evri kworom blong Jos. Hem i go tu long yumi evriwan insaed long Jos ia.
Taem Presiden J. Reuben Clark Junia i givim kaonsel long olgeta we oli singaotem long posisen blong atoriti insaed long Jos, bae hem i talem olgeta blong no fogetem rul namba sikis.
Bae wan i mas askem: ?Wanem i rul namba sikis?
“Yu no tingting tumas long wanem man i tingting abaot yu,” bae hem i talem.
Yes i tru; hemia i lidim nara kwestin: “?Wanem nao ol nara faef rul?”
Bae i sarem wan ae, nao Presiden Klak bae i talem: “ I no gat.” 6
Blong stap wan gud lida blong Jos, yumi mas lanem impoten lesen ia: lidasip insaed long Jos i no blong lidim ol narawan be i moa abaot tingting blong yumi blong wantem se God i lidim yumi.
Ol Koling Oli Ol Janis blong Givim Seves
Olsem ol Sent blong God we i Hae Olgeta, yumi mas “tingbaot, long saed blong evri samting, olgeta we oli pua, olgeta we oli stap long nid, mo olgeta we oli sik, mo olgeta we oli harem nogud, from man we i no mekem olgeta samting ia, hem i no man blong mi.”7 Ol janis blong go mekem gud mo givim seves long ol narawan oli plante tumas. Yumi save faenem olgeta long ol komuniti blong yumi, long ol wod mo ol branj blong yumi, mo insaed long hom blong yumi.
Antap long hemia, evri memba blong Jos i gat ol ofisol janis blong givim seves. Yumi singaotem ol janis ia ol koling—wan toktok we i mas mekem yumi tingbaot huia nao i singaotem yumi long seves. Sapos yumi luk koling blong yumi olsem wan janis blong givim seves long God mo helpem ol narawan wetem fet mo tingting i stap daon, evri aksen blong seves bae i wan step long rod blong stap disaepol. Long wei ia, God i no stap bildimap Jos blong Hem nomo, be ol wokman blong Hem tu. Jos i stap blong helpem yumi kam ol tru mo fetful disaepol blong Kraes, ol gudfala mo hae boe mo gel blong God. Hemia i hapen taem yumi stap go long ol miting mo lisin long ol toktok, be tu, taem yumi go aotsaed mo givim seves. Wei ia nao i rod blong kam “haeman” insaed long kingdom blong God.
Yumi akseptem ol koling wetem gladhat, tingting i stap daon, mo tangkyu. Taem oli rilisim yumi long ol koling ia, yumi akseptem jenis ia wetem semfala gladhat, tingting i stap daon, mo tangkyu.
Long ae blong God, i no gat wan koling insaed long kingdom we i moa impoten bitim ol narawan. Seves blong yumi—bigwan o smolwan—i mekem spirit blong yumi i kam gud moa, i openem ol windo blong heven, mo i mekem ol blesing blong God oli kam long olgeta we yumi wok blong olgeta, be tu, long yumi. Mo taem yumi stap go aot long ol narawan, yumi save wetem tras se God i luksave seves blong yumi, i agri mo akseptem. Hem i stap smael long yumi taem yumi givim ol seves blong lav mo sore wetem hat blong yumi, speseli ol seves we man i no luk.8
Evri taem we yumi givim yumiwan long ol narawan, yumi tekem wan step i kam kolosap moa blong kam gud moa mo kam tru disaepol blong Wan ia we i givim Hem fulwan from yumi.
Stat blong Prisaed mo Go Finis Insaed long Maj
Long taem blong namba 150 aniveseri blong taem we ol paeonia oli kasem Sol Lek Vali, Brata Maeron Richins i bin stap olsem wan stek presiden long Henefa, Yuta. Selebresen ia i gat wan drama blong taem ol paeonia oli wokbaot tru long taon blong hem.
Presiden Richins i mekem bigfala wok wetem ol plan blong selebresen ia, mo hem i go long plante miting wetem Ol Jeneral Atoriti mo ol narawan blong toktok raon long ol samting ia.
Jes bifo long selebresen, oli oganaesem stek blong Presiden Richins, mo oli bin rilisim hem olsem wan presiden. Long Sandei afta, hem i stap atendem wod prishud miting taem ol lida oli askem ol volontia blong help wetem selebresen. Presiden Richins, wetem sam narawan moa oli leftemap han, mo oli kasem instraksen blong oli dresap long klos blong wok mo bae i tekem trak mo savel blong hem.
Nao dei ia i kam, mo Presiden Rijin i kamkamaot long volontia wok blong hem.
Sam wik bifo nomo, hem i bin plei wan bigfala pat blong mekem plan mo lukaotem bigfala taem ia. Long dei ia, wok blong hem i blong folem ol hos long maj mo klinim ol doti blong olgeta.
Presiden Richins i bin glad blong mekem hemia.
Hem i bin andastanem se wan seves ia i no bitim wan narawan.
Hem i bin save mo i praktisim ol toktok blong Sevya: “Man we i haeman blong yufala hem i mas kam man blong wok blong yufala.”9
Mekem Wok blong Disaepol long Raet Wei
Samtaem, olsem Ol Boe blong Tanda, yumi wantem ol hae posisen. Yumi traehad blong man i luksave yumi. Yumi lukaotem blong lidim man mo mekem wok we man bae i tingbaot.
I no gat wan samting i rong blong wantem givim seves long Lod, be taem yumi stap lukaot blong kasem paoa insaed long Jos from nem blong yumi nomo—blong save kasem ol pres mo ona blong man—yumi kasem praes blong yumi ia nao. Taem yumi solemdaon ol pres blong ol narawan, pres ia bae i praes blong yumi.
?Wanem nao i moa impoten koling insaed long Jos? Hem i hemia we yu gat naoia. I nomata se i hae o i daon, koling we yu gat naoia i hemia nao we bae i letem yu leftemap ol narawan, be tu, bae i letem yu kam man ia blong God we Hem i krietem yu from.
Ol dia fren mo brata blong mi long prishud, !Leftemap man long ples we yu stanap long hem!
Pol i bin tijim ol man Filipae se: “I nogud wan long yufala i tok flas, no i mekem wan samting blong leftemap hem nomo. Yufala i mas mekem tingting blong yufala i stap daon, mo yufala i mas luk ol narafala man olsem we oli gud moa long yufala.” 10
Stap Givim Seves Wetem Ona
Blong lukaotem ona mo nem insaed long Jos tru long praes blong tru mo hambol seves long ol narawan, hemia i wok blong Iso.11 We Yumi save kasem praes long wol ia, be i praes blong hem tu i bigwan—yumi lusum glad blong heven.
Bae yumi folem eksampol blong Sevya blong yumi, we i no bin flas mo tingting i stap daon, we i no lukaotem ol pres blong ol man, be i wantem mekem wok tingting blong Papa blong Hem nomo. .12
Bae yumi givim seves wetem tingting i stap daon—wetem ful paoa, tangkyu, mo ona. Nomata ol aksen blong seves, yu luk se i daon, i smol, o i no bigwan, olgeta we yu stap go aot long olgeta wetem fasin we i kaen mo i gat lav mo sore long ol narawan, bae wan dei praes blong seves ia bae gladhat blong God we I Gat Olgeta Paoa i talemaot long hem.13
Ol dia brata, ol dia fren blong mi. Bae yumi stap tingting longtaem, mo andastanem mo laef folem bigfala lesen ia blong prishud lidasip ia: “Man we i haeman blong yufala hem i mas kam man blong wok blong yufala.” Hemia i prea mo blesing blong mi long nem blong Jisas Kraes, amen.