I Go long Ol Fren mo Ol Investigeta blong Jos
Sapos yu wok had blong kasem revelesen, putum tingting blong yu i stap daon, rid, prea, mo sakem sin, bae heven i open mo bae yu save se Jisas hem i Kraes.
Long wan Fraedei aftenun, 16 Septemba 1988, long Vicente López Wod mitinghaos long Buenos Aires, Argentina, mi bin kasem baptaes i kam olsem memba blong Jos blong Jisas Kraes blong Ol Lata-dei Sent. Wan gud fren, Alin Spannaus i bin baptaesem mi long dei ia, mi bin hapi, kam moa laet, mo wantem blong lanem moa.
Tedei mi wantem blong serem sam lesen we mi bin lanem long rod blong mi i go blong kasem baptaes—ol lesen we mi hop se bae i save helpem yufala we yufala i stap lisin we i no memba blong Jos yet. Mi prea se bae Tabu Spirit i tajem hat blong yufala semmak olsem mi.
Faswan, Mitim ol Misinari
?From wanem bae wan man we i no gat ol jalenj long laef, ol nid, o kwestin bae i intres blong wantem mitim ol misinari mo lisin long ol lesen? Olsem long situesen blong mi hem i lav—lav from wan gel, gel ia nem blong hem Renee. Mi lavem hem, mo wantem maredem hem. Hem defren mo gat ol standet we i defren long plante yang woman we mi save. !Be mi lavem hem mo askem hem blong maredem mi—mo hem i talem se no!
Mi konfius. !Mi ting se mi naes tumas! Mi naes, mi gat 24 yia, mo mi finisim hae skul mo gat wan gudfala wok. Hemi tokbaot ol gol blong hem—blong maredem nomo wan man we bae i save tekem hem i go long tempol, blong gat wan famli we i no save finis—mo hem i no akseptem tingting blong mi. Mi wantem blong gohed blong fren wetem hem mekem se mi agri blong lisin long ol misinari. ?Hemia i wan gudfala risen ia blong save mitim ol misinari? Be long mi, hem i wan gud risen.
Long fasfala taem we mi mitim ol misinari, mi no andastanem tumas wanem oli talem, mo blong talem trutok long yufala, mi no stap lisin gud long olgeta. Mi sarem hat blong mi long wan niufala Jos. Mi wantem nomo blong pruvum se tufala i rong mo blong pulum taem blong mekem se Renee i save maredem mi.
Tedei ol pikinini blong mi i kambak finis mo sam i stap yet long misin, mo mi andastanem ol sakrifaes we ol yangfala man mo woman ia oli stap mekem blong tijim gospel blong Jisas Kraes. Mi tingtingbak se sapos nomo mi bin lisin gud long Elda Richardson, Elda Farrell, mo Elda Hyland, ol gudfala misinari ia we oli bin tijim mi.
Long fas lesen blong mi, mi wantem talem long yufala ol fren mo investigeta blong Jos: taem yu mit wetem ol Misinari, plis tingting hevi long olgeta; olgeta i stap givim ol impoten yia blong laef blong olgeta from yu nomo.
Namba Tu, Go long Jos
Fas taem we mi go long wan miting blong Jos, mi harem plante toktok we i no gat mining long mi. ?Huia ol Bihaev? ?Wanem ia Aronik Prishud? ?Rilif Sosaeti?
Sapos hemia i fas taem we yu go long wan miting blong Jos mo yu filim se yu konfius long ol samting we yu no andastanem, !yu no wari! Mi tu mi no bin save wan samting. Be mi save tingbaot yet ol filing, ol filing blong pis mo glad had we mi bin eksperiensem. Mi no bin save, be Tabu Spirit i toktok kwaet long sora mo long hat blong mi se, “Hemia i raet.”
Bae mi putum lesen ia long wan laen nomo: sapos yu konfius, no wari—tingbaot se ol filing we yu stap filim ia i kam long God.
Namba Tri, Ridim Buk bong Momon
Afta we mi bin stap mit wetem ol misinari blong sam taem, be mi no mekem plante progres. Mi filim olsem mi no bin kasem eni ansa se gospel ia i tru.
Wan dei, Renee i askem mi, “?Yu stap Ridim Buk blong Momon?
Mi ansa, “No.” Mi stap lisin finis long ol misinari—?hemia i no inaf?
Wetem wota i fulap long ae, Renee i talem long mi se hem i save se Buk blong Momon i tru mo eksplenem se, sapos mi wantem save se i tru, wan wei nomo i—yu save—!blong ridim! !Mo afta askem!
Ridim, tingting hevi long hat blong yu, mo “askem God, Papa we i no save Finis, long Nem blong Kraes….wetem wan tru hat, wetem tingting we i tru blong wantem save, wetem fet long Kraes” (Moronae 10:4) sapos Buk blong Momon i tru, sapos hemia hem i tru Jos.
Mo, nambatri lesen, long wan laen: taem yu kasem olgeta samting ia—Buk blong Momon—mo oli askem strong long yu blong Ridim mo askem God sapos ol samting ia oli tru, !plis yu mekem!
Laswan, Sakem Sin
Lasfala eksperiens we mi wantem serem i fasin blong sakem sin. Afta we mi finisim ol lesen we ol misinari oli stap givim, mi gat strong tingting ia se mi no nid blong jenisim eni samting long laef blong mi. Hem i Elda Cutler, wan yang, smat misinari wetem smol save long Spanis lanwis, we wan dei hem i talem, “Joaquin, bae yumitu rid tugeta long Alma 42, mo mi wantem yu putum nem blong yu insaed taem yumi rid.”
Mi bin ting se i krangke, be taem mi mekem olsem we Elda Cutler i askem mi blong mekem mo ridim ves 1: “Mo nao, boe blong mi [Joaquin], mi luksave se i gat sam samting moa we i mekem tingting blong yu i wari, we yu no save andastanem.” !O! Buk ia i stap toktok long mi.
Mo taem mi rid long ves 2: “Nao luk boe blong mi [Joaquin], bae mi eksplenem ol samting ia long yu,” afta i tokbaot Kriesen mo Foldaon blong Adam.
Mo long ves 4: “Mo Olsem ia nao yumi luk, we God i givim wan taem long [Joaquin] blong sakem sin.”
Mifala i gohed blong rid sloslo, ves afta ves, kasem ol las tri ves. Afta mi bin kasem wan strong filing. Buk ia i stap toktok stret long mi, mo mi stat blong krae taem mi stap ridim, “Mo nao, [Joaquin], boe blong mi, mi wantem se bae yu nomo wari from ol samting ia, mo yu wari from ol sin blong yu nomo, wetem wari ia we bae i tekem yu … blong sakem sin.” (vas 29).
Mi save naoia se mi bin stap wantem blong kasem wan revelesen be mi no hadwok from. Kasem taem ia mi neva bin stap toktok tru wetem God, mo long mi, blong toktok wetem wan we yu no save luk i wan krangke samting. Mi mas putum tingting i go daon mo mekem wanem oli askem mi blong mekem, iven sapos long maen blong mi we i fulap long ol samting blong wol, hemia olsem ol krangke samting nomo.
!Long dei ia mi openem hat blong mi long Tabu Spirit, mi wantem sakem sin, mo wantem blong kasem baptaes! Bifo hemia mi bin stap tingting se fasin blong sakem sin i wan nogud samting, hem i blong sin nomo mo ol rong samting, be afta mi luk hemia long wan defren laet—i olsem wan samting we i gud blong save mekem rere rod blong gro mo stap hapi.
Elda Cutler i stap ia tedei, mo mi wantem talem tangkyu long hem blong save openem ol ae blong mi. Evri joes long laef blong mi i bin gud from taem ia nomo we mi bin putum tingting i go daon, prea from fogivnes, mo Atonmen blong Jisas Kraes from mi i kam pat long laef blong mi.
Long las lesen ia, long wan laen: eksperiensem fasin blong sakem sin; i no gat wan samting i save tekem yu kolosap moa long Lod Jisas Kraes be nomo wetem wan fasin blong wantem jenis.
Dia investigeta blong mi, fren blong Jos, sapos yu stap lisin tedei, yu yu stap kolosap finis blong kasem bigfala glad ia. ! Yu stap kolosap!
Mi invaetem yu, wetem evri paoa blong hat blong mi, mo dip daon long sol blong mi: !go mo kasem baptaes! Hem i wan gud samting we bae yu mas mekem. Bae i no jenisim laef blong yu nomo be laef blong ol pikinini mo ol apupikinini blong yu.
Lod i bin blesem famli blong mi. Mi bin maredem Renee, mo mitufala i gat fo naesfala pikinini. Mo from we mi bin kasem baptaes, mi save, olsem Profet Lihae, invaetem olgeta blong kam mo tekempat long ol frut blong tri blong laef ia, we i Lav blong God (luk long 1 Nifae 8:15; 11:25). Mi save helpem olgeta i kam long Kraes.
Plis tingbaot eksperiens blong mi , mo (1) tingting hevi long ol misinari, (2) go long Jos mo tingbaot ol naesfala filing we i kam long saed bong spirit, (3) ridim Buk blong Momon mo askem Lod sapos i tru, mo (4) eksperiensem fasin blong sakem sin mo kasem baptaes.
Mi testifae long yu se sapos yu wok had blong kasem revelesen, putum tingting i stap daon, prea, Sakem sin, heven bae i open mo bae yu save, olsem we mi mi save, se Jisas hem i Kraes, Hem i Sevya blong mi mo yu. Long nem blong Jisas Kraes, amen.