Kowos Suk Liki Puk Wowo Emet

Sa in lututacng ke ah, nga liyacack caterpillar masrinsracl ac arlac upac in liyac ke sie sahk rohs. Ke liyacack luhn mwet nuh kwewa ke wacngihn srah ke sahk srihsrihk inge, lah caterpillar se inge mongo ke srah muhnahs ke inwacluh fokoko lal. Ke mwe sramsram srihpac, nga tiac kuh in nuhnkuh liki ma oasr mwet oacna caterpillar se inge; ac ma inge kuh in konwacack ke facluh nohfohn an, ac kuhtuh elos arlac upac in liye kuht lwelah elos ke moul lasr, ac met liki kuht kahlwem, elos mongo yohk ke okahkah nguhn lasr ac mempucr ke sucu ac kawuck lasr an.

Kuht moul ke lwen ke ma in etuh kikiacp ke luhlahlfongi lasr oasr in yohk. Ke pacl oacna inge, karihngihnyuck suhfal ac fokokoi okahn nguhn pa suli se nuh selos in mongo ke elos suc suk in kuhnaoslah luhlahlfongi lasr ke Kraist ac luhlahlfongi lasr ke Alu fohlohkyak Lal. Ke pacl luhn Puk luhn Mormon, el pa Zeezrom suc sukyac in kuhnaoslah luhlahlfongi luhn mwet luhlahlfongi ah.

Oruh ac kahs lal pa “mwe sruhf luhn mwet lokoalok, ma el … likiyac in sruokyac mwet [ingacn], tuh elan kuh in [eiseloslac] in muhta ye kohkoh lal, tuh elan kuh in [raunweloslac] ke sein in kapihr lal” (Alma 12:6). Kuhtuh mwe sruhf inge oasr mihsenge, ac finne kuht fokoko ke nguhn ac muhsahyak pwelucng fokoko ke Mwet Molwelah lasr (liye Helaman 5:12), kuht kuh in konwacack kuht sifacna kapsreni ke sein in kapihr lal Satan ac kolyuck ke inkacnek koluk ma sramsram ke Puk luhn Mormon (liye 1 Nephi 8:28).

Mwet Sap Paul el sensen ke lwen lal ma se srackna yohk srihpac mihsenge: “Nga etu lah, … mwet na in u lowos an ac fah fahk kahs kikiap in kolla mwet lulalfongi uh in fahsr tokolos” (Orekma 20:29–30).

Sensenkihn lal ac ma luhn mwet pahluh ac mwet sap lasr ahkacsmakihnye kuht lah kuht enenuh in oruh ma kunacsr in ahkfokokoye nguhn lasr sifacna liki kahs in lain ac kikiacp. Ke nga ohsun yurin ward ac stek luhn Alu uh, ac wowoyak ke ma nga liye, lohng, ac puhla ke Mwet Luhlahlfongi an top ke engan ac luhlahlfongi nuh ke mwe luti lal Mwet Lahngo ac mwet kuhlwacnsap Lal.

Yohkwelihk in karihngihn lwen Sahpuht pa srihkasrak se ke mempucr ahkfokokoye nguhn lalos sifacna ke elos loang nuh ke suli luhn mwet pahluh. Sie mwe loh in fokokoi pac pa yohkwelihk in orekma luhn tempuhl ac sramsram mahtuh ke sucu ke sucu oracni mwet mahtuh ke akwuck luhn tempuhl. Okahn nguhn lasr kapwack ke pruhe sifacna ac ke pruhe luhn sucu pa mwe kahsruh luhn luhlahlfongi lasr, ke kuht auliyak ke lwen nuh kwewa, sohkwack kuhpahsr yurin Nguhn Muhtahl, etwaclah ke Mwet Lahngo lasr ac ke ohiyacl Lal ac suk in ekihn oacna El (liye 3 Nephi 27:27).

Mwet Lahngo lasr, Jisus Kraist, El pa Kahlwem luhn Facluh, ac El kwacfe kuht in Ukwacl. Kuht enenuh in ngwetlah nuh Sel ke pacl nuh kwewa ac enenuh yohk finne oasr fong in lohsr ac pahkah ke mwe sruhf luhn tiac luhlahlfongi kuh nihkihn, oacna fog an, sikyak. Finne kufun paho srihsrngi “ke lacfahl se ke infacl in fok uh, [ke] sie lohm luhlahp ac mwesahs [tuya]” (1 Nephi 8:26) oacna nuh ke kom ke ohiyac luhn kasrkuhsrak, ahkkolukye, ac suli, nga siyuck lah kowos sa in forlah liki kom in tiac puhtatlac ke mwe sruhf ma in ahkloesye kom sifacna liki ma pwacye ac mwe insewowo lal.

Tuhsruhk, ma inge sefanna tiacna ma fal ke lwen se inge ke ma koluk sruhmuhnyuck, sihmlac, ac ahkkahlwemyeyuck. Elder Robert D. Hales el luti kuht lah “finne kom oruh fal in moulkihn wosasuc se–moul ke insiyom, kuh, nuhnak ac fokoko lohm – kom tiac kuh in orwaclah kahlwem luhn nguhn fal in forlah ma lohsr” (“Out of Darkness into His Marvelous Light,” Liahona, Julahe 2002, 78). Pwacyena, kena lasr in Ukwacl Jisus Kraist, suc pa Kahlwem luhn Facluh (liye John 8:12), kalmac pa kuht enenuh in oruh mwe luti Lal. Kuht in fokoko, ahkkweye, ac karihngihnyuck ke nguhn ke kuht oruh kahs luhn God.

Kahlwem yohk na ke moul lasr, na suhpuhs luli an. Tuhsruhk, pwacyena in oasr kahlwem yohk, oasr mwet ac ma sramsram yohrohsr ma tiac suwohs nuh ke luhlahlfongi lasr ac srihke luhlahlfongi lasr. Mwet Sap James el suhmuhslah “ke acl se lulalfongi lowos kutangla fin mwe srihke inge, saflaiya muteng lowos uh yokelik” (James 1:3). Ke kahlwem se inge, Elder Neal A. Maxwell luti lah “mwet tuhma lutlut muhtweng … fah tiac lut kuh muhlat ke Alu uh tiacna ahkuhtweyucki wo” (“Patience” [Brigham Young University devotional, Nohfuhmpuh  27, 1979], speeches.byu.edu).

Kihsensiyuck ke sramsram mahtuh ke Alu ac luhlahlfongi lasr sikyak. Piyac kuh forlah in konwacack topuk pwacye enenuh karihngihnyuck yohk. Wacngihn ma in eis ke sukyuck ma nuhnak ac ohiyac luhn mwet tiac kahlwem kuh mwet forlah liki Alu uh. Kahs in kahsruh we emet tuhkuh sel Mwet Sap James: “Tusruktu kutena suwos fin enenu in akyokye lalmwetmet lal, enenu elan pre nu sin God” (James 1:5)

Lutlut wo enenuh sikyak met liki siyuck sin God, oasr mwe luti luhn ma suhmuhslah kuht enenuh in orek in suk liki puk wo emet kahs in lahlmwetmwet; suk etwaclah, finne ke lutlut ac oacyacpac ke luhlahlfongi (liye D&C 88:118). Oasr ma pucspucs yohk puk se inge, sihmlac sin mwet kol luhn Alu uh kolyuck inkuhsrao mac, ac sramsram mahtuh ke Alu ma kahlwem kac, ac kuh in luhlahlfongi kac ac mwet lutlut luhn wosasuc. Ke fahk inge, wacngihn ma wolacna liki kahs ma fwackyuck sin God sihmlac ke ma suhmuhslah. Ke srah srihsrihk fihliyac ke mwe luti yohk luhn nguhn, kuht etwaclah ma pwacye sel Nguhn Muhtahl ac yohkwelihk ke kahlwem.

Prestuhn Thomas S. Monson, kwacfe “kuht in lutlut pruhe ac motko ke Puk luhn Mormon kais sie lwen” (“The Power of the Book of Mormon,” Liahona, Mei 2017, 87).

Yac pucspucs somlah, ke kuhlwacnsap luhk ke prestuhn luhn Misin ke Fiji Suva, kuhtuh mwet misineri puhlakihn ma se in fokokoi kuh luhn Puk luhn Mormon in eklac mwet. Ke lwen se fol ac isrisr, misineri luo sun nuh ke lohm ke acn srihsrihk ke Labasa.

Tongtong ke sie sruhngucl el topukyuck sin sie mukul mahtuh suc lohng ke misineri fahkwelihk ke ma pwacye luhn Puk luhn Mormon. Elos sang nuh sel sie puk ac solwacl in riti ac pruhe in etuh, oacna elos, lah el pa kahs luhn God. Top lal pa fototo: “Lutu nga fohlohk in pahtuhr. Nga fah riti ke nga oasr in meoa, ac ke nga fohlohk, kom kuh in sulpac muhtwacta yuruk.”

Ke el wacngihn ah, transfers sikyak, ac kuhtuh wik tok, ac mwet asruoki sasuc luhn tamuhlwel fohlohk in muhtwacta yurin mwet pahtuhr se. Ke pacl se inge el riti nohfohn Puk luhn Mormon, ac eis loh nuh ke ma pwacye kac ac kena in sa etuh kuhtuh pac ma puhs sahyac.

Mukul se inge eklac ke Nguhn Muhtahl, suc sang mwe loh ke pwacyeiyacn kahs sacohk ke srah nuh kwewa luhn ma sikyak ac wosasuc luti yac loeslac somlah ac karihngihnyuck nuh ke lwen lasr ke Puk luhn Mormon. Mwe insewowo se inge kuh in oasr nuh sin kais sie sesr.

Lohm an pa acn wo emet ke sucu in lutlut ac akacsruhi mwe luti sacohk sin ma suhmuhslah, kahs luhn mwet pahluh, ac in suk mwe luti luhn Alu uh ke LDS.org. Oyac kom kuh in konwacack mwe etuh pucspucs ke ipin wosasuc oacna Aruhrruhma Se. Ke kuht lutlut ke puk wo emet, kuht karihngihn kuht sifacna liki inwacluh fokoko ma suk in mongo ke okahn luhn nguhn lasr.

Ke pruhe, lutlut, ac motko nohfohn lasr, na srackna oasr kuhtuh kihsensiyuck ma srackna enenuh top se, tuhsruhk kuht enenuh tiac lwelah ma inge in tulokihn e luhn luhlahlfongi ma oasr ke insiyacsr. Kihsensiyuck inge pa mwe suli in ahkyohkye luhlahlfongi lasr ac tiac ahkkweye pacl fototo an nuh ke suhlahlahlfongi an. Ma inge pa yohk nuh ke Alu nuh kwewa in lah soenna oasr top nuh ke kihsensiyuck nuh kwewa, ma inge pa srihpen luhlahlfongi. Ke nuhnak se, Elder Jeffery R. Holland el luti kuht lah “ke pacl inge tuhkuh ac ma upac ahkkahlwemye, top se tiacna sa in tuhkuh, sruokyac fokoko nuh ke ma kom etuh tari ac tu kuh nuh ke kuhtuh etuh tuhkuh an” (“Lord, I Believe,” Liahona, Mei 2013, 94).

Kuht liyacack inmahsrlosr engan sin mwet puhs suc tu kuh ke elos karihngihn okahn luhn nguhn lalos. Luhlahlfongi ac ahkos lalos pa fal in sang nuh selos finsrak yohk ke Mwet Lahngo lalos, ac ke ma inge tuhkuh engan yohk. Elos tiac fahk lah elos etuh ma nuh kwewa, tuhsruhk elos moli in etuh ma fal in puhla mihs ac in moulkihn mongfihsrwacsr ke elos suk in etuh ma liki. Ip nuh ke ip, luhlahlfongi lalos fokokoi ke Kraist, ac elos tu kuh oacna sie Mwet Luhlahlfongi.

Lwelah kuht kais sie in moul lah inwacluh fokoko ac camouflaged caterpillars tiac kuh in konwacack acn se, tiac ingacna kuh fahsruh, ke moul lasr kuht in muh kuh in muhtana “fokoko ke luhlahlfongi ke Kraist, finne nuh ke sahflah” (Alma 27:27). Ke inen Jisus Kraist, amen.