Insiyacn Katinmas Se

Nga eis mwe insewowo yohk in kuhlwacnsap yurin Mwet Luhlahlfongi ke acn Pacific inkaiyacn moul luhk ke nga mahtuh. Luhlahlfongi, luhngse, ac kihsac yohk ke Mwet Luhlahlfongi oaru inge nwekyuclac ke moklweyuck, tarilacna, ac engan. Sramsram lalos oacna ma lowos.

Nga nuhnkuh ke ohiyacn Mwet Luhlahlfongi inge oacna katinmas se suc Mwet Lahngo El liye ke El “muta apkuran nu ke nien eisani mani in Tempul, el tuni ke mwet uh ac filiya mani lalos uh. Mwet kahsruhp puhspuhs elos fihliyac mani na yohk.

“Na sie katinmas su sukasrup el tuku ac filiya luo ipin mani srisrik. …

“Na Jisus el pangonma mwet tumal lutlut ac fahk nu selos, "Pwayena nga fahk nu suwos, mwe sang ma katinmas sukasrup se inge el filiya in nien mani uh arulana yohk liki mwe sang lun mwet ngiac nukewa.

“Tuh elos …fihliyac ma elos srela liki ma puspis lalos, ac el, el nwe sukasrup, el sang ma lal nukewa, aok nufon ma oasr yorol.”¹

Finne ipin mani srihsrihk luo pa mwe sang lal uh, nuh sin Mwet Lahngo mwe sang lal ah pa ma yohk nuh pwacye, ke srihpen el sang ma nuh kwewa lal. Ke pacl sacn, Mwet Lahngo El etuh ke katinmas sac, ke mwe sang lal ah ahkkahlwemye nuh Sel insiyacl. Ohiyac pwacye ac loal lal ke luhngse ac luhlahlfongi pa oruh el sang ac el etuh lah “kena” lal fah tuhkuh.

Nga liye kain inse pwacye se inge sin Mwet Luhlahlfongi ke acn Pacific. Sikyak ingena ke mura srihk se fin sie tuhka inge, mukul mahtuh se ac muhtwacn kiyacl insese nuh ke solsol se luhn misineri in siyuck nuh pwacye nuh sin Leum fin lesin elos lutiyuck kac inge pwacye. Ke inkacnek se inge, elos motko ke ma ac fah sikyak ke olwelah elos ac enenuh in oruh fin top elos eis inge kohlohltahl elos in insese nuh ke wosasuc fohlohkihnyuckyak se inge. Elos lalo ac pruhe in etuh ma pwacye ke Alu ac ma pwacye ke Puk luhn Mormon. Top nuh ke pruhe lalos tuhkuh ke ohiyac emwem tuhsruhktuh ma kahlwem uh: “Ahok! Ma pwacye se!”

Ke srihpen elos eis mwe loh inge, elos sulwaclah in pacptaislac. Sulwaclah se inge tiac sikyak ke ma fihsrwacsr. Sulwaclah ac pacptais lalos enenuh in yohk molo. Orekma lalos tuhlac, elos kihsackuhnlah ohiyacn liyeyuck ke mwet uh, kawuck yohk somlah, ac ahkkweye, luhngse, ac suhnak luhn sucu somlah. Elos ingena fahsr nuh ke alu kais sie Sacnri, ac liye kawuck ac mwet tuhlan lalos fahsr nuh ke siena acn ke ngwetngwet koluk.

Ke ohiyac upac inge, siyuckyuck sin tamuhlwel wowo se inge lah fuhkah puhla lal ke sulwaclah lalos in wi Alu. Top fihsrwacsr ac tiac forlah lal pa “Ma pwacye an, pwacye? Sulwaclah lasr uh kahlwem.”

Mwet Luhlahlfongi eklac sasuc luo inge pwacyena oacna sie nuh ke insiyacn katinmas sac. Elos, oacna katinmas se, “sang ma nuh kwewa” elos kuh in sang, etuh in sang “kena” lalos. Ke ma tuhkuh ke srihpen insiyacn luhlahlfongi ke pacl upac se ingacn, ma upac lalos ahkmuhlahlahyeyucklac. Elos eis kahsruh ac kuhlasyuckyak ke kahsruh ac luti luhn mempucr luhn Alu, ac elos sifacna ahkkweyeyuck ke kuhlwacnsap lalos ke Alu uh.

Tukun elos sang “ma nohfohn” lalos, lwen se tuhkuh ke elos siliyucklac ke tempuhl ekihn sie sucu ma pahtpaht. Oacna mwet eklac suc ukwe kolyuck lal Alma, “Leum El ahkkweyelos tuh elos in akacsruhi tuh ma toasr lalos in fihsrwacsr, ac elos oruh ke engan ac ke muhtweng nuh ke luhngse nuhkwewa luhn Leum.”² Insiyacn katinmas se ahkkahlwemyeyuck sin siyacnyacn wolacna se inge.

Lwelah nga in sramsram ke sie ma sikyak sahyac ke insiyacn mwet katinmas se ahkkahlwemyeyuck. Fin acn Samoa, kuht orekma yurin un mwet ke mura in eis lwelah luhn misineri in luti wosasuc uh. Kuhtuh yac tari ah, nga sramsram yurin mwet kol se ke mura lah misineri tiac lwelah in som ke yac puhspuhs. Sramsram luhk sikyak tiac paht tukun mwet kol luhlahp sang lwelah luhn mura sac nuh ke Alu, tuh lwelah misineri in luti elos suc ke lotwelah ke wosasuc ac mwe luti kac.

Tukun yac puhspuhs, in oasr sikyak usrnguck se inge, nga tuh ke lotwelah lah ma inge sikyak fuhkah nuh sin mwet kol luhlahp in sulwaclah ma se inge. Nga siyuck sel ke ma inge, ac mwet kol se suc nga sramsram nuh se ah fahk, “Mukul se kuh in moul ke acn lohsr ke lusen pacl uh, tuhsruhktuh pacl se fah tuhkuh ke el ac kena tuhkuh nuh ke kahlwem.”

Mwet kol luhlahp sac, ke el ikacslah mura sac, ahkkahlwemye insiyacn katinmas sac—insiyac se ma ahkmuhlahlahyeyuck ke fucsrfucsr ac kahlwem luhn ma pwacye ahkkahlwemyeyuck. Mwet kol se inge kena in ekuhllah facsin key ac pucspucs, sulwaclah in eis mwe lain, ac tu kuh elos in muh kuh in eis mwe insewowo. Pa inge mwet kol se suc insiyacl porongo nuh ke ohiyacn engan luhn mwet lal ac tiac nuh ke facsin, pacl met, ac kuh sifacna. El sang ma ingacn nuh ke ma Prestuhn Thomas S. Monson el luti kuht kac: “Ke kuht ukwe srihkasrak luhn Mwet Lahngo, kuht kuh in eis pacl wo in sie kahlwem nuh ke moul luhn mwet sahyac.”³

Sahflahiyac, lwelah nga in akacsruhi ma se sahyac yuruwos ke Mwet Luhlahlfongi luhn acn Pacific tuh oan loal ac oasr ke nguhnihk. Kuhtuh yac tari ah, nga pa mwet kahsruh fuhsr nuh ke pisap se nuh ke ward sasuc fin acn American Samoa. Oasr mempucr 99 suc pa mwet imac, mwet orek mongo, mwet orekma ke kafucrmacn, ac sucu lalos. Ke Prestuhnsi Se Met fahkwack ke yac 1977 lah oasr tempuhl fah oreklac ke acn Samoa, oasr puhla engan ac tarilacna ahkkahlwemyeyuck sin mwet nuh kwewa sesr. In som nuh ke tempuhl ke pacl sacn enenuh mwet American Samoa in som nuh ke Hawaii kuh New Zealand. Fuhfahsryucsr se inge enenuh mani yohk ac mempucr luhlahlfongi puhspuhs tiac kuh in oruh.

Ke pacl se inge mempucr ah kwacfeyuck in sang mani nuh ke lohm tempuhl in kahsruh muhsaheack tempuhl. Ke nguhn se inge, pisap lasr siyuck mempucr ke ward sac in pruhe in motko ke ma elos kuh in sang. Lwen se oreklac nuh sin sucu in oracni mani lalos ac sang. Tohkohyang, ke mwe sang se inge ikacslah ke ohiyac lihsrlihsr, pisap lasr ahkinsepuhsisaclyeyucklac ke luhlahlfongi ac mwe sang luhn mempucr wolacna ke ward lasr uh.

In etuh kais sie sucu ac ma lalos, nga puhlakihn loaliyacn ac fokokoiyacn puhla ke lut, tarilacna, ac insepuhsisacl. Ma inge, ke ohiyac nuh kwewa, mani sangkihnyuck sin katinmas ke pacl sacn ac sukohsohklah ke “kena” lalos ac ke ohiyac engan ke olwelah luhn sie tempuhl luhn Leum fin acn Samoa. Sucu inge sang nohfohn ma elos kuh in sang nuh sin Leum, ke luhlahlfongi tuh elos tiac muhta ke wacngihn mwe insewowo se inge. Mwe sang lalos ahkkahlwemye insiyacn katinmas se. Mwet nuh kwewa suc sang oruh ke luhngse lalos ac ohiyac engan ke srihpen insiyacn katinmas se ma oasr lun elos kuh in liye ke muhtuhn luhlahlfongi mwe insewowo ma oasr nuh sin sucu lalos, ac mwet nuh kwewa fin can Samoa ac American Samoa, nuh ke fihl fahsruh. Nga etuh mwe sang muhtahl lalos, mani lalos luhn katinmas se, etweyuck ac ahkkweyeyuck sin Leum.

Insiyacn katinmas se suc sang mani srihsrihk luo lal pa insiyac se ma kihsackuhnlah ma nuh kwewa la in sangkihn; ke pacl upac, ahkkweok yohk, ac sruhngacyuck; ac ke us ma toasr ke kain ma pucspucs. Insiyacn katinmas se pa insiyac ma kuh in puhla ac etuh kahlwem luhn ma pwacye ac fah sang ma nuh kwewa in utyak nuh ke ma pwacye. Oacyacpac na in kahsruh mwet sahyac in liye kahlwem oacna sie ac in tuhkuh ke ohiyac engan ma pahtpaht. Sahflah, insiyacn katinmas sac pa kena se in sang ma nuh kwewa in muhsaheack tohkohsrahi luhn God fin facluh.

Lwelah kuht in tuhkweni wi ke Mwet Luhlahlfongi fin facluh in oruh ma enenweyuck in us insiyacn katinmas sac, in engankihn mwe insewowo ma ac fah nwacklah “kena” kac. Pruhe luhk nuh sin kais sie sesr pa siyuck se in oasr insiyac in muhtweng ke ma toasr lasr, oruh kihsac enenweyuck, ac oasr kena in sang ac oruh. Nga olwelah muh Leum El ac tiac lwelah kowos in muhta ke kena yohk. Insiyacn katinmas sac pa sesseslah ke kaksyak lah Mwet Lahngo El pa “mutangla keok ac waiok”⁴ kuh in muh kuh in tiac enenuh srihke “kuhp mohkohl se.”⁵ Finne ke srihpen mwe muhnahs lasr, ac ke srihpen ma inge, El kalweni sang Pahol, ma fakihsyac ke srihpac lasr. El ac sruhkkuhtyak kuht fin kena tuhkuh nuh ke kahlwem luhn wosasuc Lal, sruokyac El, ac lwelah El in nwacklah “kena” lasr.

Nga fahkwack luhlahlfongi luhk ke luhngse yohk kuht kuh in akacsruhi ke mwet tuhma lutlut ac mwet fahsr tohkohl Leum Jisus Kraist. Nga luhngse ac ahkkweye Prestuhn Thomas S. Monson ke mwet pahluh luhn God fin facluh. Puk luhn Mormon pa sie pac mwe loh luhn Jisus Kraist nuh fin facluh, ac nga suli nohfohn in riti ac konwacack pweng lom. Mwet nuh kwewa suc insese nuh ke mwe suli luhn Leum in tuhkuh nuh Sel fah konwacack mihslac, luhngse, ac kahlwem. Jisus Kraist pa Mwet Srihkasrak ac Mwet in Molwelah lasr. Ke Jisus Kraist muhkwena, ac usrnguck ke Iwaclah ma pahtpaht Lal, kuht kuh in eis moul ma pahtpaht. Ke ma inge nga ahklohye ke ine muhtahl Lal, finne Jisus Kraist, amen.