Loes liki Sie Sin Sie, tuh Ma Sefanna

Ke June 1994 nga tuh silahklahk kahsruhsr stosah okuhk fohlohk nuh lohm sihk tukun orekma in muh liye ke TV nahtuhsr u in soccer luhn acn sihk sritacl ke World Cup. Tiac paht tukun nga muhtwacwacack fohlohk nuh lohm sihk, nga liye sisken inkacnek ah mukul se silahklahk yucwot lun wheelchair soko nahtuhl ma nga liye nahweyucklac ke flag luhn Brazil lasr. Nga etuh el oacyacpac fohlohk nuh lohm sel in liye sritacl ah!

Ke nga ahluhkwelah, ac kuht angwetacni, ac ke kihtin pacl, nga puhla muh nga ac mukul sacn ma sefanna. Kuht fahsr ke siena inkacnek, tiacna etuh sie sin sie, ac kahlwem ohiyacn moul lasr ac ohiyacn mahnosr siena, tuh luhngse lasr ke soccer ac luhngse lasr nuh ke acn sesr oruh muh kuht puhla oacna ma sefanna ke pacl sacn! Nga soenna sulpac liye pacl sac me, tuh mihsenge, yac tohkoh, nga kuh in srwackna liye muhtahl ac puhla kuhpahsr kuh se nuh sin mukul sacn. Tuh pwacye kuht tuh itto ke sritacl sac ac World Cup ke yac sacn.

Ke Alu uh, finne oasr ma siena lasr, Leum el ke kuht in ma sefanna! El fahk ke Doctrine ac Covenants lah kuht in ma sefanna ac fin kuht tiacna ma sefanna na kuht tiacna ma Lal.¹

Ke kuht utyak nuh ke lohm alu se in tuhkweni alu ekihn u se, kuht enenuh in tohllah ma siena lasr, oacna lah kuht mwet fuhkah, luhpan mani lasr, ma kuht luhngse ke kafucrmacn, ac ma kuht oruh ke lutlut ac orekma, ac lohacng na nuh ke ma kuht tuhkweni suk in nguhn uh. Kuht tuhkweni onkihn on in alu, motko ke olwelah sefanna ke pacl in kuhfa luhn Leum, ac tuhkweni lihksreni fahk “amen” tukun sramsram, mwe luti, ac pruhe uh—kalmac lah kuht tuhkweni insese ke mwe akacsruhi nuh sesr ah.

Ma inge kuht tuhkweni oruh in oraclah puhla fokoko se luhn ma sefanna uh ke u in alu lasr.

Tuhsruhk, ma se ma kuh in oraclah, ahkfokokoye, kuh kuhnaoslah ma sefanna lasr wiwina ohiyac lasr ke kuht loes liki mwet ke Alu uh. Kuht nuh kwewa etuh, kwacna sikyak ac nuh pa na ngwe sahflah uh kuht ac sramsram ke sie sin sie.

In ukwe ma kuht sulwaclah in fahk ke sie sin sie, kahs lasr kuh in oruh insiyacsr “in maeni nuh se,”² oacna Alma el tuh lotwelos ma el tuh pacptaiselah ke Kof luhn Mormon ah, kuh kahs lasr kuh in kais kuhtuh kuhnaoslah luhngse, luhlahlfongi, ac puhla wo ma enenuh in oasr yohrohsr uh.

Oasr ma mwet fahk ma ahkkolukye insese uh, oacna “Ahok, el bishop wo se ingena; tuh kom enenuh in liyacl ke el sie mwet fuhsr ah!”

Kain in mwe fahk ma ac wo liki ac ohinge “bishop se arulacna wo, ac el kapwack ke ohiyacl ac lahlmwetmwet lal ke yac somlah inge.”

Kuhtuh pacl kuht muh mwet tiac kuh in eklac ac fahk ma se oacna “Prestuhn luhn Rilif Sosaiti lasr tiac kuh in wolac; el mwet na inse fuhlwact!” In ahkwoye, kuht kuh in fahk, “Prestuhn luhn Rilif Sosaiti tiacna arlac insese ke pacl inge; sahp oasr ma ke moul lal ma upac nuh sel. Lwelah kuht in kahsrwel ac tahpuhkuhl!”

Tamuhlwel ac tahmtahel, tiacna ma lasr in ahkuhtweyac kuhtwena mwet, yohkna ke Alu lasr uh, oacna sie ma na koluk! Sahyac na, kahs lasr ke mwet wiyacsr enenuh in ahkkahlwemye luhlahlfongi lasr ke Jisus Kraist ac Iwaclah Lal ac lah tuh Sel ac ke kuh Lal, kuht kuh in ahkwoye kuht sifacna!

Kuhtuh mwet uh muhtwacwacack in lwesrihk ac fahsr liki mwet kol ac mempucr luhn Alu uh ke ma na srihsrihk.

Sikyak ohinge ke mukul se pahngpahng Simonds Ryder, suc welah Alu uh ke yac 1831. Tukun el riti sie fwackyuck kacl, el fohswack efuh inel tiacna sihmlac pwacye ke lwacta i ac tiac lwacta y. Mukwikwi lal nuh ke ma tiacna yohk srihpac se ingacn oruh lan tuh ahkyohkye siyuck pac ke mwet pahluh ac sahflahiyac kohlohllah in ahkkolukyacl Joseph ac forlah liki Alu ac.³

Kuht nuh kwewa oacyacpac fah kaiyuck sin mwet kol ke Alu uh ke sie pacl, ma ac srihke luhpan ma sefanna lasr yohrohlos.

Nga tuh yac na 11, tuhsruhk nga esam yac angaul ahkosr somlah ngwacn, ke lohm alu se ma sucu luhk wi alu kac tuh in ahksasucyeyucklac. Met liki orekma sacn muhtwacwacack ah, oasr toeni se luhn mwet kol srihsrihk ac luhlahp tuhkweni sramsram ke ohiyac fuhkah ma mempucr ac kahsruh ke orekma sacn. Pahpah tuhmuhk, suc tuh mwet kol ke acn sacn ke yac puhkantwen, akacsruhi nuhnak kuh lal muh orekma in ahksasucye lohm alu ah enenuh in oreklac sin mwet ma etuh orek lohm ac tiac ke mempucr suc nihkihn.

Tiac ma el nuhnkuh muhkwelah fwekihnyuck, ac kuht lohng muh kaiyuck el ke mwet nuh kwewa ke pacl sacn. Na, mukul se inge el oaru na pwacye ke Alu uh ac el tuh soles se ke World War II fin acn Europe, el tuh lain ac mweun ke ma el luhlahlfongi uh! Mwet se ac fah nuhnkuh ke ma el ac oruh tukun ma sikyak inge. Kuh el ac kampare ke ma el nuhnkuh uh ac lain ma wotlac tari uh?

Kuht liye sucu ke u in alu lasr ma eklac muhnahslah ke wosasuc uh ac tiacna wi alu ke srihpen elos tiac kuh in ma sefannalac yurin elos suc kol alu uh. Nga oacyacpac sifacna liye kawuck puhkantwen luhk ke Primary muhnahslah ke luhlahlfongi ke pacl in fuhsr lalos ke srihpen pahpah ninac kiyaclos kwacna tohrkahskahs lain mempucr ke Alu uh.

Pahpah tuhmuhk, ne fuhkah, sulwaclah in ma sefanna yurin Mwet Luhlahlfongi wiyacsr. Kuhtuh lwen tohkoh, ke mempucr ke u in alu lasr fahsrweni in muhtwacwacack ahksasucyeyucklac luhn lohm alu ac, el “suli” sucu lasr ah in fahsr tohkohl nuh ke lohm alu lasr ah in kahsruh ke kuhtwena ohiyac.

Nga tuh ahngyahng. Nga puhla in siyuck sel, “Pahpah, kuh efuh kuht som in kahsruh ke ahksasucyeyuck sac ke kom tiacna insese mempucr in oruh uh?” Tuh ngwetngwetal ahkmuhnahsyeyuc in tiac siyuck. Nga tuh kena in moul ac fokoko nuh ke sulpac kihsac lohm sac uh, na, nga sulwaclah in mihslac ac in kahsruh orekma na!

Pahpah el tiacna oraclah in liye lohm alu sasuc sac, ke srihpen el misac met liki sahflah orekma kac ah. Tuhsruhk kuht ke sucu ac, inge kolyuck sel ninac kampare in oruh ip kunacsr ne ke tari, ac ma ingacn kahsrwe kuht in ma sefanna yurin pahpah tuhmuhk, yurin mempucr ke Alu, mwet kol lasr, ac, yohk na yurin Leum!

Ke kihtin pacl met liki oruh ngal ac upac Lal fin acn Gethsemane ac, ke Jisus el pruhe nuh sin Pahpah ke Mwet Sap Lal ac kuht nuh kwewa, Mwet Luhlahlfongi , El fahk, “Papa, lela elos in muta in kut oana ke kom muta in nga ac nga in kom.”⁴

Tamuhlwel ac tahmtahel, nga etuh muh kuht fin sulwaclah in ma sefanna ke mempucr ac mwet kol luhn Alu uh—kwewana pacl kuht tuhkweni ac yohk na ke kuht loes liki sie sin sie—kuht fah puhla ma sefanna na pwacye yurin Pahpah tuhmasr Inkuhsrao ac Mwet Lahngo. Ke inen Jisus Kraist, amen.