Pristut ac Kuh ma Tuhkuh ke Iwaclah luhn Mwet Lahngo

Wiyuc petsacelah soko raket ma ahknweyuck ke nien oan la in muh kuh in sohkwack. Na, petsaclah acn in ahkok kac an. Fiyul kac an, fin fihrihr ke luhpah fal se, ac eklac nuh ke eng suc ma lihksreni puhsruhkwack, kuh sang usrac kuh kuh sie in usack raket sacn nuh yen engyeng uh. Na sahflah, petsacelah toasriyacn, ma oan lun raket sacn. Koanon raket sacn ac oacwac ma oasr srihpac fin sun acn ma enenuh in som nuh we ac fin orekma oacna ke finsak nuh kac an. Kowos te enenuh in pihsrlac ke sains nuh ke raket, ma yohk molo, oacna sactuhlait yohk molo ma oan na ke warehouse tiac orekmakihnyuck. Orekma se luhn raket uh pa na in uslac kahko se fac an.

Ekuh se inge nga luhngse kapsra pristut ma kuht sruok nuh ke sie raket ac pacl wowo se in eis ma wo ma tuhkuh ke iwaclah luhn Mwet Lahngo nuh ke kahko se ma soko raket uslah in sis uh.

Ke srihpen kihsac in iwaclah Lal, oasr kuh ac mwenmwen lal Jisus Kraist in molwelah mwet nuh kwewa. In oruh iwaclah Lal in ikack nuh sin mwet nuh kwewa, el sang kuhtuh ipin kuh Lal ac mwenmwen Lal nuh sin mukul fin facluh uh. Kuh ac mwenmwen se ma tuhtahflah inge el pahngpahng pristut. Sang lwelah nuh sin mwet sruok pristut in kahsruh Pahpah Lucng ac Jisus Kraist ke orekma Lalos–in use molwelah ac moul kaul nuh sin tuhlihk nuhtin God. Ma inge sikyak ke srihpen el ikacslah nuh sin tuhlihk Nahtuhl in eis mwe insewowo ke kuh luhn iwaclah luhn Mwet Lahngo.

Kuh ke iwaclah luhn Jisus Kraist uh enenweyuck mweyen wacngihn sesr kuh in fohlohk nuh lohm sesr inkuhsrao fin wacngihn kahsruh. Ke moul se inge, kuht kwacna tahfonglac ac kuhnahoslah masap luhn God. Kuht fohkfohklah ke ma koluk ac tiac lwelah in fohlohk nuh yurin God. Kuht enenuh iwaclah kuh Lal kuht in muh kuh in sifil fohlohk muhta yurin Pahpah Lucng. Jisus Kraist el tuhlahlihk mwe kapihr luhn misac, sackuhnlah sifilpac moulyak luhn mwet nuh kwewa. El sang nuhnakmuhnahs nuh ke ma koluk, fin kuht ahkos masap ac akwuck ke wosasuc Lal. Kacl, moul kaul yurin God utuckuh nuh sin mwet uh. Pacl wowo in eis ma wo ke kuh luhn iwaclah luhn Mwet Lahngo pa ma se ma yohk srihpac emet ke ma oreklac ke kahko uh.

Tuh srihpac luhn Pahpah Lucng in ahkfahsryeyucklac, kuh nuh ke iwaclah luhn Kraist enenuh in oreklac nuh sin tuhlihk nuhtin God.¹Pristut uh ikacslah pacl wowo inge nuh sesr. Pa raket sac. Pristut uh enenweyuck mweyen akwuck ac olwelah ma enenweyuck fin facluh uh ahkfahsryeyuck ye kuh se inge muhkwena. Fin pristut tiac oraclah pacl se inge in eis woiyacn iwaclah kuh luhn Mwet Lahngo, na meac srihpen wal se inge? Meac ac mwena pwen muhtuhn mwet kuh mwena kahto? God el oraclah in oasr pristut in ma orekmakihnyuck yohk liki na lun Sacnri skul uh na kuh in sie pacl wo in kuhlwacnsap. El oraclah pristut uh in ahkfahsryelah ma enenweyuck uh

Tahfonglac srihsrihk lun sie raket kuh in ahkkolukyelah misin kuh srihpac la an. Acn mahi kuh muhnahslah ke raket sacn kuh in oruh raket sacn in tiac orekma. In loangwelah pristut in tiac mahi kuh muhnahslah, God el karihngihn srihpac ac orekma lal an.²Srihpac luhn pristut uh karihngihnyuck ke ki luhn pristut, suc pa suwohs luhn prestuhnsi ma ituckyang nuh sin mukul uh.³ Orekmakihnyacn pristut uh oacyacpac loangweyucklac ke ki luhn pristut tuh oacyacpac ke olwelah ma mwet sruok pristut uh oraclah uh. Orekma luhn pristut pa sramtweyuckyak ke ki luhn pristut ac olwelah. Kunohkohn ke pristut luhn sie mukul ituckyang nuh sin kais sie ac sie tiac kuh in lihkihnsaci kunohkohn lal; pristut tiacna tuhkuh liki ma se ma nihkihn yohk ke kuh uh.⁴

Kwewana Aaronic ac Melchizedek Pristut uh eisyuck ke olwelah.⁵ God el oakiyac akwuck nuh kac an ac mukul uh eis. Yohkiyacn sramsram uh, mwet sruok pristut uh olwelah in kahsruh God ke orekma Lal. Emet ke we se inge, Jisus Kraist el ahkuhtweyac lah olwelah luhn pristut el utuckuh nuh sesr ke srihpacsr, ac tiac ke srihpac lowos muhkwena, tuhsruhk ke srihpacn facluh nohfohn … mweyen elos tiac fahsr nuh yuruk, elos: facluh nohfohn.⁶

Ma se inge luti lah srihpac luhn pristut pa in suli mwet sahyac in tuhkuh nuh yurin Kraist ke kahsrweyuck elos in eis wosasuc suc ma fohlohkyak. Oasr pristut yohrohsr kuht in muh kuh in kahsruh tuhlihk nahtuhl Pahpah Lucng sislah srenenuh toasr luhn ma koluk lalos ac in eklac oacna El. Ke kuh luhn pristut, kuh kuh ohiyac oa uh ahkkahlwemyeyuck ke moul luhn mwet nuh kwewa suc oruh ac liyacacng olwelah lalos ke wosasuc ac eis oakwuck suc ma srihpsrihpyang nuh kac uh.⁷ Pa inge ohiyac se ma kais sie sesr tuhkuh nuh yurin Kraist uh, ahknwacsnwacsyeyucklac, ac esaclosyang nuh sin God. Iwaclah kuh luhn Kraist el ikacklah nuh sesr ke pristut, suc ma ahkfahsryelah srihpac luhn orekma uh.

Olwelah nuh sin God uh arulacna pwacye ac oa. Sie mukul enenuh in ahkolah nuh kac, lutlut kac, ac ilyak nuh ke olwelah sacn ke kena lal in ahkfuhlwactye wal sacn. Olwelah sacn eklac oacpacna ke sie mukul el sifacna esaclwacng nuh ke sie olwelah muhtahl. In ahkfototoyelah sie fahk luhn sie mwet sihm pihsrlac suc pahngpahng Robert Bolt, mukul se el oraclah sie olwelah pacl na ma el ke esaclwacng sifacna nuh ke olwelah sacn. El oraclah kuhpahsr se inmahsrlon ma pwacye se nuh ke olwelah sacn ac suwohs lal sifacna. Ke mukul se oraclah sie olwelah uh, el sifacna sruokilyac, oacna kof uh, ke pahol uh. Fin el ikacslah pahol, el ac fah tiacna sifilpac konwacack moul lal. Sie mwet ma kuhnahoslah olwelah lal wacngihnlac moul lal sifacna elan kihsackuhnwacng kuh luhlahlfongi in sang.⁸

Aaronic Pristut se el olwelah in kahingkihn ma koluk, kahsruh mwet sahyac in esaclosyang nuh sin God, ac in ahkolah in eis Melchizedek Pristut.⁹ Kunohkohn muhtahl inge ahkpwacyeyuck ke pacl se el luti, pacptais, ac ahkkweye mempucr, ac suli mwet sahyac in eis wosasuc. Pa inge ohiyac ma ac sang ahkfahsryelah kunohkohn sacn. In fohlohkihn, God el olwelah finsrak, nuhnakmuhnahs, wi luhn lihpufacn, ac ki ke wosasuc nuh ke auliyak ac pacptais.¹⁰

Melchizedek Pristut se el olwelah in ahkfahsrye kunohkohn ma srihpsrihpyang nuh ke Aaronic Pristut ac in ahkyohkye ma kunacl ke Melchizedek Pristut uh.¹¹ El oruh ohinge ke el liyacacng masap ma kuhpahsr nuhke olwelah ingacn. Masap inge pa oaru in porongo kahs luhn moul ke moulkihnyacn kahs nuh kwewa ma illac liki oalin God,¹² fahkwack luhlahlfongi ke Jisus Kraist ac orekma Lal ke lwen-sahflah,¹³ tiac sifacna kohnkihn,¹⁴ ac eklac sie kawuck luhn Mwet Lahngo, luhlahlfongwel oacna ke sie kawuck ac oruh uh.¹⁵

In fohlohkihn, God el olwelah lah mwet sruok Melchizedek Pristut se el ac eis kuh nuh ke kahlwem luhn ma lukmac luhn God. El ac eklac fas oruh el ac kuh in tu ye muhtuhn God. El ac kuh in ahksahfyelah kunohkohn lal ke orekma luhn molwelah. Jisus Kraist el ac sackuhnlah inkacnek luhn pristut se inge ac el ac fah weluhl. Nguhn Muhtahl ac fah oan insiyacn pristut se inge, ac lihpufacn fah tahpkuhl nuh lucng. Mahnol ac fah ahkkweyeyuck ac ahksasucyeyuck. El ac fah usrui mwe insewowo lal Abraham ac, wi muhtwacn kiyacl, tuhkweni mwet in usru yurin Jisus Kraist nuh ke tohkohsrahi lal Pahpah Lucng.¹⁶ Pa inge “olwelah yohk ac fuhlwact uh.”¹⁷ Wacngihn olwelah yohk kuh in mwemwekihnyuck.

Nuh sin kais sie mukul ma eis Melchizedek Pristut, God el ahkkweye olwelah Lal ke sie fuhlahk.¹⁸ Fuhlahk se inge kuhpahsr muhkwena nuh ke Melchizedek Pristut,¹⁹ ac God pa oraclah fuhlahk se inge, tiac pristut sacn.²⁰ Ke srihpen ohiyac utuftuf se inge enenuh kuh fuhlwact ac wal Lal, God el orekmakihn sie fuhlahk, orekmakihn kahs na fokoko ma El kuh uh, sang ahkkweye kuht ke kuhpahsr ac usrac kaul luhn olwelah lal.

Ma na upac ac sikyak ke kuhnanuclac olwelah ke pristut inge ac lihksreni wacngihnlac luhkwelos.²¹ Pihlesruh kuh mukwikwi in ahkfahl ke kunohkohn luhn pristut uh el oacna ke kom ac sang kuhfa mah kuh suhfal nuh lin raket soko. Ohiyac inge ac ikacslah inkacnek sensen nuh ke olwelah luhn pristut mweyen ac kuh in kol nuh ke tilokihnyacn orekma sacn. Seahkostwen nuh ke masap luhn God el kuhnahoslah olwelah uh. Nuh sin sie mwet ma kalweni na in tiac auliyak kuh kuhnahoslah olwelah sacn, mwe insewowo ma uliyucklac nuh kac an ac itucklac.

Muhtwacwacack in fohnlah kahlwem luhk ke kuhpahsr luhn “pristut” raket ac “pacl wowo se in eis woiyacn iwaclah kuh luhn Kraist” ac srihpac la an ke kuhtuh yac somlah ah. Ke sie wiken ah, oasr orekma luo kuneyucki nga nuh kac. Sie kunohkohn ah pa in tulohkohnwack stek se emet fin acn sac, kunohkohn se sahyac ah pa in interfiyui sie mukul fuhsr ac, fin ma nuh kwewa fahlac wo, in fohlohkohnwacng pristut lal ac mwe insewowo luhn tempuhl nuh sel. Mukul yac 30 se inge welah Alu uh ke el fuhsr ac. El ahksahfyelah misin lal. Tuhsruhk ke el fohlohk nuh lohm sel ah, el tuhlac, ac wacngihnlac mempucrsip lal ke Alu ah. Tukun kuhtuh yac, “el acsmaklac,”²² ac ke kahsruh luhn mwet kol luhn pristut ac kuhlwacng luhn mempucr, el auliyak ac sifil pacptaislac nuh ke alu uh.

Tohkohyang, el nwacna in sifilpac fohlohkyang pristut lal ac mwe insewowo luhn tempuhl. Kuht oraclah pacl in ohsun se lasr nuh ke Sactte ke ao 10:00 a.m. ke lohm alu ac. Ke nga sa som in oruh kuhtuh interfiyu ma ac orek met liki interfiyu lal, el oasr we tari. El arlac rahrahlac in sifil eis pristut lal, el koflah muhta sano pacl lal.

Ke kuht oruh interfiyu lasr, nga sang elan liye lwacta se ma ahkuhtweyac lah Prestuhn Thomas S. Monson el sifacna liye uhlikesin lal ac ahkkweyelah in fahsr interfiyu lal. Mukul na kuh esac se inge el tuhng tiac kahkahsrihk. Na nga fahk nuh sel lah lwen se ma kuht interfiyu inge ac tiac oasr kalmac nuhke moul lal uh. El fohswack. Nga ahkuhtweyac nuh sel lah tukun nga ac fohlohkohnwacng mwe insewowo lal, ac mempersip rackert lal ac ahkkahlwemye lwen na pwacye el tuh pacptaislac ah, ahkkweyeyucklac, ahkmuhsraiyucklac nuh ke pristut, ac eis mwe sang muhtahl luhn tempuhl. El sifilpac emtuhngyak.

Nga siyuck sel in riti Doctrine and Covenants:

Leum el fahk lah el suc auliyak ke ma koluk lal, ac fah eis nuhnakmuhnahs, ac El, Leum, tiac sifil esam ma inge.

Ke ohiyac se inge kuht ac etuh fin sie mwet el auliyak ke ma koluk lal_ liye el ac fahkuhlwack ac fuhlweack ma koluk nuhkwewa.²³

Sifilpac luhluhyak ahtron muhtahl ke pacl ahktolu. Na, nga fihliyac pouk fin sifacl, ac ke inen Jisus Kraist, ac ke wal luhn Melchizedek Pristut, ac ke kuh ma utuckuh sin Prestuhn luhn Alu uh, nga fohlohkohnwacng pristut ac mwe insewowo luhn tempuhl nuh sel.

Engan suc ma puhtati nuh facsr arlac upac toasriyac. El etuh lah sifil oasr kuh lal in sruok ac orekmakihn pristut luhn God. El etuh lah mwe insewowo luhn tempuhl kuh in sifil orekma ke moul lal. Fusrwacl arlac sesseslah ke engan ac fin sroal sahrmwelihk ke pwacr. Nga arlac engan sel, ac nga puhla muh Pahpah Lucng el engan pac sel.

Tiac paht tohkoh, sie stek tulokyak fin acn sac. Miting ma ahkfahsryeyuck we ah arlac pwacr, ac elos mempucr pwacye fokoko, ac u na wowo se luhn prestuhnsi luhn stek ahkkweyeyucklac. Tuhsruhktuh, nuh sihk, sramtweyacn tulokyak luhn stek se emet inge we ah tiac apkuhran nuh ke puhla suc ma nga puhlakihn ke fohlohkyang mwe insewowo nuh sin mukul fuhsr se inge ah.

Nga muhtwacwacack in etwacack lah srihpac luhn sramtweyacn sie stek sasuc, kuh orekmakihnyacn pristut luhn God ke kuhtwena ohiyac, pa in kahsruh Pahpah Lucng ac Jisus Kraist ke orekma Lalos—in sang pacl wowo nuh ke molwelah ac moul kawihl yurin God nuh sin kais sie tuhlihk nuhtin God. Oacna nuh ke soko raket ma srihpac la pa in usack kahko nuh lucng, pristut uh fahkwelihk wosasuc luhn Jisus Kraist, suc ma ikacslah nuh sin kwewa ma oruh olwelah ac eis akwuck ma kuhpahsr nuh kac uh. “Srah in iwaclah luhn Kraist”²⁴ kuh in orekmakihnyuck nuh ke moul lasr ke kuht puhlakihn mokleyuck luhn Nguhn Muhtahl ac eis mwe insewowo ma God el olwelah kac.

In weacng in sifacna ahkostwen nuh ke masap ac akwuck ke wosasuc, nga suli kowos in liyacacng olwelah luhn pristut. Eis fuhlahk luhn God ac olwelah Lal. Ahkyohkye ma kunom ke pristut in kahsruh Pahpah Lucng ac Jisus Kraist. Orekmakihn pristut in kahsruh usaclihk pacl wowo in eis woiyacn iwaclah kuh luhn Mwet Lahngo nuh sin sie mwet sahyac? Ke kom ac oruh uh, mwe insewowo yohk ac fah tuhkuh nuh sum ac sucu lom an. Nga fahkwack lah Mwet Lahngo el moul ac kol orekma se inge, ke inen Jisus Kraist, amen.