Puhsren Leum Se

Ke lwen se Alu uh akiyucklac, Leum El pahngon Joseph Smith nuh ke sie mwet pahluh, mwet liyactwen, ac mwet sap luhn Leum Jisus Kraist¹ ac fahkwack nuh ke Alu:

Elos enenuh eis kahs luhn mwet pahluh oacna fin tuhkuh ke inwaclin Leum sifacna, ke mong fihsrwacsr ac luhlahlfongi.

Ke elos oruh ma inge, motonwac luhn hell tiac kuh in kuhtanguhloslac, ac Leum God El fah kuhnaoslah kuh luhn ma lohsr luhkwelos ac oruh inkuhsrao in usrusr ke ma wo lalos.²

Tohkoh, mempucr nuhkwewa ke Prestuhnsi Se Met ac U luhn Mwet Sap Singucul Luo oacyacpac ahkkweyeyuck ac akmuhsra nuh ke mwet pahluh, mwet liyactwen, ac mwet fwackyak.³

Ingena, ke kuht tuhkweni ke kolyuck sel Prestuhn Thomas S. Monson, kuht lohngwack ma ahkfalye luhngse luhn Leum, nuhnak luhk Leum, puhsren Leum, ac kuh luhn God nuh ke molwelah.⁴ Kuht luhlahlfongi ke olwelah Lal lah finne tuhkuh ke Puhsrel sifacna kuh puhsren mwet kuhlwacnsap Lal, oacna sie.⁵

Ke mukwikwi ac mwe fohs luhn facluh lasr mihsenge, luhlahlfongi lasr nuh ke kahs luhn Prestuhnsi Se Met ac U luhn Singucul Luo arulacna yohk srihpac nuh ke kapwack ac muhtweng luhn nguhnasr.⁶

Kuht nuh kwewa oracni nuh ke toeni sacohk se inge. Million luhn Mwet Luhlahlfongi ke Lwen-sahflah ac mwet luhlahlfongi sahyac oasr ke yohk liki muhtuhnfacl 200, sramsram yohk liki kahs 93, wi toeni kuh riti pweng ke toeni se inge.

Kuht pruhe ac ahkolah met liki kuht tuhkuh. Inkaiyacn sesr, oasr elyah ac kisensiyuck yohk. Kuht nohfohn kena ahkkweye luhlahlfongi lasr ke Mwet Lahngo lasr, Jisus Kraist, ac ahkkweye kuh lasr in lain mwe sruhf ac tiac porongo nuh ke ma lusrohngtwen. Kuht tuhkuh in lutiyuck sin Ma Fuhlwact.

Nuh ke Prestuhnsi Se Met ac U luhn Singucul, suc sramsram ke kais sie toeni luhlahp, orekma yohk in ahkolah pweng lalos pa mwe upac ac luhlahlfongiyuck wolacna kwewana.

Yac tari ah, met liki nga kuhlwacnsap ke General Authority, nga siyuck sel Elder Dallin H. Oaks el fin ahkolah sramsram siena nuh ke kais sie toeni luhn stek. El topuk lah el tiacna tuhsruhktuh el fahk, “Tuhsruhktuh sramsram luhk ke toeni luhlahp siena. Sahp nga som ahluhkwelah sramsram 12 nuh ke 15 in etuh pwacye lah nga ac fahk ma Leum El kena nga in fahk.”⁷

Ngac ac fuhkah moklweyuck ke sramsram luhn toeni luhlahp fah tuhkuh?

Ke wacngihn sifac nuh ke sramsram uh, kuht liye mwe kol kahto luhn kuhsrao in oracni srihpac ac sifac luhn sramsram uh luhn ma pwacye ma pahtpaht kais sie toeni luhlahp.

Sie sin Tamuhlwel wiyuck fahk nuh sihk lah sifac ke toeni se inge tuhkuh nuh sel sa tukun sramsram lal ke Eprel tari ah. Sie sahyac fahk wik tolu tari ah lah el srackna pruhe ac sano nuh ke Leum. Sie sahyac, ke siyuckyuck ke lusen pacl an in ahkolah sie sramsram yohk srihpac tuh upac, topuk, “yac longoul-limekohsr.”

Kuhtuh pacl nuhnak fihsrwacsr sa in tuhkuh, tuhsruhktuh ip ac ma oasr kac srackna enenuh fan upac luhn nguhn. Lalo ac pruhe, lutlut ac luhlahlfongi, pacl nuh kwewa pa ip kac. Leum El sruhnga kuhtwena fahk stuh ahkkolukye Puhsrwacl nuh sin Mwet Luhlahlfongi Lal.

Kolyuck nuh ke sramsram in toeni luhlahp tuhkuh ke pacl puhs ke fong kuh pacl sa luhn lututacng, ke pacl sramsram tiac oasr ke nuhnak luhn insifac. Na pacl se, moklweyuck ma tuhkuh ke pacl lut, ac kuhtuh pacl, kahs sefanna in orekmakihn tuhkuh ke fwackyuck pwacye.⁸

Ke kowos lohng, pweng kowos eis kuh in tuhkuh suwohs kuh el kuh in eklac in ahkfalye enenuh lowos.

Ke nga sramsram yac puhspuhs tari ah ke toeni luhlahp, nga akacsruhi pohloh kahs ma tuhkuh nuh ke nuhnak luhk ke nga motko fin ahkolah in kuhlwacnsap misin se. Pohloh kahs pa “Kom tiac etuh ma nuh kwewa, tuhsruhktuh kom etuh fal!”⁹ Muhtwacn fuhsr se suc muhta ke toeni luhlahp ke lwen se ingen fahk nuh sihk el pa pruhe ke siyuck in macruhtlac , motko el fin etuh fal mukul sacn. Ke nga fahk kahs, “Kom tiac etuh ma nuh kwewa, tuhsruhktuh kom etuh fal,” Nguhn ahkkweye nuh sel pwacye el etuh el fal. Elos macruht engan ke yac puhspuhs inge.

Nga olwelah nuh suwohs lah ke kowos ahkolah nguhnuwos, ac tuhkuh ke kena lah kom fah lohngwack puhsren Leum, nuhnak ac puhla an fah tuhkuh nuh ke nuhnak lowos ma eklac in ma enenweyuck suwos. Kowos puhla tari ke toeni se inge, kuh kowos fah ke kowos lutlut pweng an ke wik tohkoh.

Prestuhn Monson el fahk ah:

“Eis pacl in riti pweng ke toeni.”¹⁰

“Motko [elos]. … Nga konwacack … nga eis yohk likina met ke sramsram moklweyuck ke nga lutlut kwaclos.”¹¹

Pweng ke toeni luhlahp an pa ma Leum El kena kuht in motko kac ke mahlwem fahsruh.

Mwet Shepherd “el fahsr meet ac sheep [lal] uh fahsr tokol, mweyen elos etu pusracl.”¹²

Inkaiyacn pacl, Puhsrwacl kol kuht in eklac ma se ke moul lasr uh. El suli kuht in auliyak. El suli kuht in Ukwacl.

Nuhnkuh ke fahkwack inge ke toeni luhlahp se inge;

Prestuhn Henry B. Eyring ke olutu ah: “Nga fahkwelihk loh luhk lah God Pahpah El moul ac kena kuht in fohlohk nuh Yohrohl. Pa inge Alu pwacye luhn Leum Jisus Kraist. El etuh kom, El luhngse kom; ac El liyacacng yac motowos.”¹³

Prestuhn Dieter F. Uchtdorf ekweyah: “Nga fahkwack lah ke kuht muhtwacwack ke kampare fokoko ke fuhfahsryucsr ma kolyuck nuh ke God, moul lasr fah wolac … ac Leum El ac orekmakihn kuht ke atac wolacna in ahkinsewowoye mwet siskacsr ac orwaclah srihpac ma pahtpaht Lal.”¹⁴

Prestuhn Russell M. Nelson ke ekuhn ekweyah: “Nga olwelah ke kowos utyak nuh ke riti lwen nuh kwewa ke Puk luhn Mormon, kowos kuh in ahkkweye kowos liki ma koluk ke lwen uh, wi mas ke petsac koluk ac ma fokfok pahlah ke nuhnak.”¹⁵

Elder Dallin H. Oaks ekweyah: “Nga fahkwack luhlahlfongi lah mwe fahkwack ke sucu pa sie kahskahs luhn ma pwacye netok, luhngse luhn Leum nuh sin tuhlihk Nahtuhl suc sohkwack moul ma pahtpaht.”¹⁶

Ac Elder M. Russell Ballard ma tuhfahna fahk ah: “Kuht enenuh in sruokyac nuh ke tuhlihk nuhtin God ke kuhlwacng ac sislah puhla koluk, oacna racism, sexism, ac nationalism.”¹⁷

Mweyen oasr minute se, Nga kena sang mwe esam fototo kacl Elder Robert D. Hales. Prestuhnsi Se Met fahk nuh sel Elder Hales lah el kuh in oraclah sramsram fototo nuh ke Toeni ke Lututacng in Sacnri finne el fal fokoko. Tuh fokoko lal tiacna fal, el ahkolah sie pweng, ma el ahksahfye wik tari ah ac el akacsruhi nuh sik. Mweyen misac lal sahp ao tolu tari ah, nga usot line tolu ke sramsram lal.

Sramsramkihn Elder Hales: “Ke kuht sulwaclah in luhlahlfongi, kuht ahkolah in tu ke inmahsrlon God. … Tukun srihpsrihpyak luhn Mwet Lahngo ah, El sikyang nuh sin elos suc oruh fal nuh ke luhlahlfongi lalos ke El ke elos moul fin facluh.’ [D&C 138:12.] Elos suc lainyuck luhlahlfongi ke mwet pahluh tiac kuh in muhta inmahsrlon Mwet Lahngo, kuh ngwetngwet Muhtahl.’ [D&C 138:21.] … Luhlahlfongi lasr ahkolah kuht in muhta ke inmahsrlon Leum.”

Yac kuhlwacng luhn Leum in oruh Prestuhn Russell M. Nelson ke sahflahiyacn toeni luhlahp olutu ah in suhlahklahk som liki lohm uh, tiac mongo, ac kahsruhsr nuh ke on lal Elder Hales, yac el kuh in sun ac oasr we, prestuhn luhn u lal, yurin Mary Hales ke el Elder Hales ahksahfyelah moul lal fin facluh.

Nga fahkwelihk lah ke toeni se inge kuht lohngwack puhsrwen Leum.

Wacngihn srihpacsr in sensen ke kahs luhn mwet kuhlwacnsap luhn Leum ma lain nuhnak luhn facluh ac, ke kuhtuh pacl, nuhnak lasr sifacna. Ma inge sikyak ke pacl nuh kwewa. Nga sikuckmuhtuhnte fin acn tempuhl yurin tamuhlwel wiyuck. Nga kuh in fahk ke woiyacn nguhnalos. Kena yohk lalos pa in oruh wo nuh sin Leum ac kahsruh tuhlihk nuhtin God in fohlohk nuh yohrohl.

Mwet Itngucul, Pisaprik, Prestuhnsi ke U Luhlahp luhn Rilif Sosaiti, Muhtwacn Fuhsr, U luhn Tuhlihk Srihsrihk, ac mwet kol ke u sahyac luhn alu sang moklweyuck yohk nuh ke toeni se inge, we pac on kahto ac pruhe kuloh.

Oasr sie treasure chest luhn mwe kolyuck kuhsrao ma sano sokwack lasr ke pweng luhn toeni luhlahp uh. Srihke luhn kais sie sesr pa ohiyac kuht ukwe nuh ke ma kuht lohng, ma kuht riti, ac ma kuht puhla.

Lwelah nga in akacsruhi ma sikyak pwacye nuh ke topuk pweng luhn mwet pahluh sin moul lal Prestuhn Russell M. Nelson:

Ke yac 1979, yac limekohsr met liki pahng lal in wi General Authority, Tamuhlwel Nelson el wi toeni met liki toeni luhlahp. “Prestuhn Spencer W. Kimball el kai mwet nuh kwewa suc oasr in ahkyohkye kuh lalos in us wosasuc nuh ke facluh nohfohn. Ke muhtuhnfacl fahkwacl sel Prestuhn Kimball sie sruhmuhnyuck pa China, ke el fahk, ‘Kuht enenuh kuhlwacnsap mwet China. Kuh enenuh etwaclah kahs lal. Kuht enenuh pruhe selos ac kahsrwelos.’”¹⁸

Petsac

President RussellM. Nelson mwet ono se

Ke matwac yac 54, Tamuhlwel Nelson eis puhla se ke toeni lah el enenuh lutlut kahs Mandarin. Finne el kahfofo heart surgeon, el sa in sokwack kuhlwacnsap luhn mwet luti se.

Tiac paht tukun lutlut lal, Dr. Nelson, wi sie toeni, ac lut in konwaclwack sifacna sisken “sie surgeon Chinese etwacack, Dr. Wu Yingkai. … Ke srihpen [Tamuhlwel Nelson] lutlut Mandarin, el muhtwacwacack sramsram [nuh sel Dr. Wu].”¹⁹

Petsac

Dr. Russell M. Nelson yurin Dr. Wu Yingkai

Kena lal Dr. Nelson in ukwe mwet pahluh oruh Dr. Wu in som muhtwacta ke Salt Lake City ac Dr. Nelson in som nuh ke China in luti ke ac oruh surgical operations.

Luhngse lal nuh ke mwet China, ac luhngse ac suhnakuhnuhl lalos nuh sel, kapwack.

Ke Fepweri yac 1985, mahlwem singucul tukun pahng lal nuh ke U luhn Mwet Sap Singucul Luo, Elder Nelson ahklutye in eis pahng ke China ac siyuck yohk in Dr. Nelson in tuhkuh nuh ke Beijing in operate nuh ke heart muhnahs ke mwet on opera ma pwengpweng emet ke China. Ke ahkkweyeyuck luhn Prestuhn Gordon B. Hinckley, Elder Nelson el fohlohk nuh ke China. Surgical operation sahflah lal oasr ke People’s Republic of China.

Petsac

President RussellM. Nelson el ahkfuhlwactyeyuck

Yac luo tari ah, ke Ohktohpa 2015, Prestuhn Russell M. Nelson el sifilpac ahkfuhlwactyeyuck ke official declaration, ma pahngonohl sie “kawuck mahtuh ke China.”

Na ekweyah, kuht lohng sel Prestuhn Russell M. Nelson suc matwac yac 93 sramsram ke siyuck lal Prestuhn Thomas S. Monson in “kais sie sesr [ke toeni luhlahp ke Eprel tari ah] in lutlut ke pruhe ac motko ke Puk luhn Mormon kais sie lwen.”

Oacna el oruh ke heart surgeon kahfofo, ke el sokwack mwet luti Mandarin, Prestuhn Nelson el sa in eis kahs in kahsruh lal Prestuhn Monson wi ip yohk inge ke moul lal sifacna. Yohk likina riti, el fahk lah el “oraclah tahk ke ma oasr ke Puk luhn Mormon pa, ma el ahkpwacye, ma el lain, ma el ahkfalye, ma el ahksuwohsye, ma el palye.”²⁰

Ac ke lut, olutu ah, ac mwe loh ahkluo, Prestuhn Henry B. Eyring El oacyacpac sramsram ke top lal nuh ke suli lal Prestuhn Monson. Kuh kom esam kahs inge? “Oacna puhs suwos, nga lohngwack kahs luhn mwet pahluh ke puhsrwen Leum nuh sik. Ac, oacna pucs suwos, Nga sulwaclah in ahkos kahs sacn.”²¹

Lwelah kuht in liye ma inge ke srihkasrak nuh ke moul lasr sifacna.

Tuhsruhktuh nga olwelah lah ke kowos lohng puhsra se sel Leum nuh sum ke mwe luti luhn toeni luhlahp inge, na ukwi moklweyuck ingo, kowos ac puhla kahsruh inkuhsrao suwos, ac moul lowos ac moul luhn mwet sisken kowos fah ahkinsewowoyeyucklac.²²

Ke toeni an, kuht nuhnkuh kacl mwet pahluh sacohk lasr. Kuht luhngse kom, Prestuhn Monson. Nga kaliyac ke kahs lal sang ke pulpit se inge. Nga luhlahlfongi lah mwe insewowo se lah el kena in use se nuh kais sie sesr mihsenge, finne el kuh in oasr yohrohsr. El fahk: “Ke kuht som liki conference se inge, Nga siyuck ke mwe insewowo luhn inkuhsrao nuh kais sie suwos. … Nga pruhe lah Pahpah tuhmwacsr Inkuhsrao El ac fah ahkinsewowoye kowos ac sucu lowos. Nga finsrak lah pweng ke conference se inge kuh in wi kowos ke ma nuh kwewa kowos oruh—ke lohm suwos, ke orekma lowos, ke miting lowos, ac ke acn nuh kwewa kowos som.”

El kaliyac: “Nga luhngse kowos. Nga pruhe keiwos. Lwelah God ahkinsewowoye kowos. Lwelah olwelah mihslac Lal kuh in som yuruwos ingena ac pacl nuh kwewa.”²³

Ke inen Jisus Kraist, amen.