Ayaw Palabya ang Tawag sa Telepono
Sa kada kinatibuk-ang komperensya, adunay usa ka mensahe alang lamang gayud kanimo. Ayaw kini palabya!
Hunahunaa nga ikaw nagpaabut og importante kaayo nga tawag sa telepono. Pagpakaaron-ingnon, sama pananglit, nga ikaw nangaplay ngadto sa usa na ka dosena nga mga kolehiyo ug ang imong pinakagusto nga pilion gustong motawag nimo sa Huwebes sa gabii aron pahibaloon ka kon ikaw nadawat ba. Apan dunay gamay nga problema: duna silay taas nga listahan sa mga tawo nga tawagon ug awtomatik nga mosalikway nimo kon dili ka ikaistorya bahin sa mga detalye.
Kon dugay pa ang kolehiyo aron imong mahunahuna, paghunahuna hinoon og laing butang nga ikaw walay pailub nga maghulat. Tingali dunay motawag nimo sa pagpahibalo kon ikaw nadawat ba sa usa ka sports team, klase sa sayaw, o sa eskwelahan sa musika—bisan unsa nga importante alang nimo.
Karon, kini ang pangutana: mag-atang ka ba duol sa telepono alang nianang gipaabut nga tawag?
Malagmit, kon kini importante kaayo ninyo, dili ka gustong malayo sa imong telepono! Dili ka gustong dili makadawat niini nga tawag.
Sa samang paagi, matag unom ka bulan dunay importante kaayo nga mensahe alang sa imong kaugalingong kinabuhi nga naghulat nimo sa personal nga paagi. Apan usab adunay usa ka gamay nga problema: kinahanglang magpakita ka aron makadawat sa mensahe.
Pagbu-bu sa Pagpadayag
Ang kinatibuk-ang komperensya panahon nga mabayaw, madasig, ug malig-on sa espirituhanong paagi. Usa usab kini ka bililhon nga oportunidad sa pagpangita og mga tubag sa personal nga mga pangutana.
Si Elder Jeffrey R. Holland sa Korum sa Napulog Duha ka mga Apostoles mitudlo, “Ang kinatibuk-ang komperensya niini nga Simbahan usa ka talagsaong okasyon gayud—kini mao ang usa ka organisadong programa nga pamahayag nga abli ang kalangitan, nga ang balaang giya tinuod karon sama sa karaan nga balay ni Israel, nga ang Dios ang atong Langitnong Amahan nahigugma kanato ug namulong sa Iyang kabubut-on pinaagi sa buhing propeta.”1
Kon ikaw adunay mga pangutana nga imong giampo, ang kinatibuk-ang komperensya mao ang panahon sa pagpangita og mga tubag niadto nga mga pangutana. Bisan kon ikaw walay piho nga mga pangutana sa imong kasingkasing, ikaw dili makahibalo unsa nga mensahe o mga mensahe nga gikan sa kinatibuk-ang komperensya ang eksakto nga gikinahanglan nimo nga madunggan. Sa kasagaran, ang labing importanting inspirasyon nga atong madawat makatabang nato nga masayud kon unsaon nga mas makaserbisyo sa uban.
Namulong sa kinatibuk-ang komperensya mahitungod sa kinatibuk-ang komperensya, si Presidente Thomas S. Monson miingon:
“Magkita kita matag unom ka bulan aron sa paglig-on sa usag usa, pagdasig, paghupay, paglig-on sa pagtuo. Ania kita dinhi aron makat-on. Pila kaninyo tingali nangita og mga tubag sa mga pangutana ug hagit nga inyong nasinati sa inyong kinabuhi. Ang uban nanlimbasug sa kasagmuyo o kapakyasan. Matag usa malamdagan ug madasig ug mahupay kon ang Espiritu sa Ginoo mabati.”2
Ang mga mensahe nga gihatag sa kinatibuk-ang komperensya sama sa mga kasulatan ngari nato sa atong panahon. Sama sa gisulti sa Ginoo, “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).
Kon kamo mag-andam sa inyong kaugalingon sa espirituhanong paagi alang sa komperensya ug ilabi na kon kamo maminaw pag-ayo sa mga mensahe, kamo makahimo ug makakita og mga instruksyon ug inspirasyon nga piho alang kaninyo—bisan unsa pay inyong kahimtang.
Pagpangandam nga Madasig
Kanunayng makatabang ang paggahin og panahon sa dili pa ang komperensya sa pagpangandam sa pagdawat og pagpadayag. Ang Ginoo mitambag nato sa pagpangita og pagpadayag: “Kon kamo mangayo, kamo makadawat og pagpadayag ug dugang nga pagpadayag, kahibalo ug dugang nga kahibalo, nga kamo masayud sa mga misteryo ug malinawon nga mga butang—nga nagdala og hingpit nga kalipay, niana nga nagdala og kinabuhi nga dayon” (D&P 42:61).
Samtang posible nga makadawat og personal nga pagpadayag sa bisan asa, bisan kanus-a, kinahanglan dili gayud nato himoon kana nga kamatuoran nga makapugong nato sa pagtuon og maayo sa kinatibuk-ang komperensya. Sa kinatibuk-ang komperensya lamang atong madungog gikan sa mga propeta, mga apostoles ug ubang mga lider sa Simbahan sa ingon nga kaabunda.
Sa Oktubre 2013 nga kinatibuk-ang komperensya, si Elder Robert D. Hales sa Korum sa Napulog Duha ka mga Apostoles mitudlo: “Sa batan-ong mga miyembro sa Simbahan, mosaad ko nga kon kamo maminaw, bation gayud ninyo ang Espiritu diha kaninyo. Sultihan kamo sa Ginoo unsay Iyang gusto nga inyong buhaton sa inyong kinabuhi.”3
Importante ang Tanang Sesyon
Balik ngadto nianang importante nga tawag sa telepono. Kon kamo nasayud nga ang ingon niana nga tawag umaabut, tingali kamo dili magpalayo sa inyong telepono gawas kon kini gikinahanglan gayud kaayo. Sa kinatibuk-ang komperensya, makatarunganon ba nga dili motambong og usa ka sesyon o duha tungod kay duna kay laing buhaton nga kabahin sa semana? Unsa kaha kon kamo nakahukom nga mag-hike sa Sabado sa buntag—wala “lamang” makatambong sa unang sesyon—apan nahitabo nga kini mao ang eksakto nga sesyon nga inyong labing gikinahanglan nga madunggan?
Kon kamo nagpuyo sa usa ka bahin sa kalibutan diin kamo makatan-aw sa buhi nga sibya sa kinatibuk-ang komperensya o kamo kinahanglan nga magpaabut sa dili pa kini moabut sa inyong dapit, bililhon ang panahon ug paningkamot sa pagpaminaw pag-ayo sa kada pakigpulong kon kini anaa na kaninyo.
Ikonsiderar ang pagdesisyon karon nga kamo magpakita nga andam nga modungog ug andam nga maminaw sa matag pakigpulong, magbantay sa inspirasyon nga inyong labing gikinahanglan nga madunggan.
Human sa tanan, dili gayud kamo masayud kon kanus-a mobagting ang telepono.