Ako Ang Nanginahanglan

Pipila ka tuig ang milabay usa ka gubaon nga sakyanan miabut sa parkinganan sa among meetinghouse. Kini gipanag-iya sa usa ka single nga amahan nga adunay upat ka anak. Siya miadto aron sa pagpangayo og tabang. Gitabangan sila sa among ward nga adunay kapuy-an, ug ang amahan misugod sa pagsimba uban ang iyang pamilya.

Ang sinina sa mga anak usahay limpyo ug usahay hugaw, apan kanunay kalkag ang ilang buhok. Grabe kini kagubot ug kahugaw. Kada semana ang presidente sa Primary magdala og hair detangler ug mga sudlay. Siya ug ang usa ka magtutudlo motarung sa buhok sa mga bata sa dili pa mag-Primary.

Usa ko ka magtatambag sa kapangulohan sa Primary, ug nakadayeg ko sa abilidad niining duha ka sister sa pagdawat niining walay kaligo nga mga bata. Dili ko makaako sa paghikap sa ilang mga buhok, ug naghunahuna ko kon giunsa kini pagbuhat sa mga sister. Gipagaan nako akong konsensya pinaagi sa paghunahuna nga nakatabang ko pinaagi sa pagbantay sa ubang mga bata samtang nagtrabaho kini nga mga babaye.

Ang kinamanghuran niini nga pamilya tres anyos. Siya dili makalitok og tarung, apan siya kusog kaayo og tingog kon kami manganta. Kini makairita nako.

Tungod kay ang mga tres anyos nga mga bata mubo ra og atensyon, akong gisabak kining batang babaye aron matabangan siyang makapaminaw. Siya mipahiyom nako sa pagpasalamat, ug misugod ko sa pagbati sa hingpit nga kalipay ug gugma sa Langitnong Amahan alang niining walay kaligo nga bata—Iyang anak. Sa katapusan, akong nakaplagan akong kaugalingon nga wala na magtan-aw sa hugaw ug mikuha og brush aron sa pagsudlay sa nagkagubot nga buhok. Gani mihukom na ko nga ang iyang pagsulay sa pagkanta nindot kaayo.

Pipila ka bulan ang milabay ang amahan sa mga bata mibarug atol sa miting sa pagpamatuod ug mipasalamat kanamo sa pagtabang sa iyang mga anak. Pagkasunod semana nawala na ang pamilya.

Mapasalamaton ko sa kahigayunan nga nakaserbisyo ko niadtong mga bataa. Sa dihang miabut sila, gibati nako nga sila nanginahanglan kaayo, apan nakaamgo ko nga ako ang nanginahanglan sa ilang tabang aron mausab.