Kon ang Inyong Katuyoan Usa ngadto sa Akong Himaya
Si Katherine Nelson nagpuyo sa Utah, USA. Si Heidi McConkie nagpuyo sa Delaware, USA.
Sa unsang paagi nga ang ligdong nga pagpakabuhi sumala sa pinulongan, pamatasan, ug panagway makatabang kanato nga makasabwag og kahayag ug makahimaya sa Dios?
Sa Konseho sa Langit sa kinabuhi sa wala pa dinhi sa yuta, sa dihang si Jesukristo miboluntaryo nga mahimo natong Manluluwas, Siya miingon ngadto sa Amahan, “Imong pagbuot mao ang matuman, ug ang himaya imo sa kahangturan” (Moises 4:2).
Kanunay ang Ginoo mao ang ehemplo sa paghimaya sa Amahan. Sa panahon sa Iyang mortal nga pangalagad, ang Manluluwas dili gayud magpatagad para sa Iyang Kaugalingon apan hinoon ipaduol ang Iyang mga sumusunod ngadto sa Amahan, nagtudlo, “Siya nga mosalig kanako, magasalig dili kanako kondili kaniya nga mao ang nagpadala kanako” (Juan 12:44). Sa kinaiya, panagway, pulong, ug buhat, ang Manluluwas mitudlo kanato mahitungod sa kaimportante sa kaligdong.
Sa ilang kamaunungon sa pagsunod sa Manluluwas, ang mga young adult nga gikutlo niini nga artikulo namalandong sa ilang sulod sa kaugalingon ug sa dayag nga pagpahayag sa kaligdong ug nagpakigbahin kon sa unsang paagi nga ang ilang pasalig sa paghimaya sa Dios nakahulma sa ilang kinaiya ug naggiya sa ilang mga binuhatan.
Himayaa ang Dios ug Isabwag ang Kahayag
Kita mas makaila kon sa unsang paagi ang kaligdong naghimaya sa Dios kon kita makasabut unsa ang kahulugan sa kaligdong. Ang Matinud-anon sa Tinuhoan nagpasabut: “Ang kaligdong usa ka kinaiya sa pagkamapainubsanon ug pagkadesente sa sininaan, pamustura, pinulongan, ug pamatasan. Kon ikaw maligdong, dili ka magpatagad nga dili angay nganha sa imong kaugalingon. Hinoon, magtinguha ka sa “paghimaya sa Dios diha sa inyong lawas, ug diha sa inyong espiritu’ (1 Mga Taga-Corinto 6:20).”1
Samtang kita nagkat-on sa pagpakita sa kaligdong sama sa gibuhat sa Manluluwas, atong mabati ang Espiritu sa atong kinabuhi, nagtuman sa saad nga “kon ang inyong katuyoan usa ngadto sa himaya sa [Dios], ang inyong tibuok [lawas] mapuno sa kahayag” (D&P 88:67). Samtang magbasa mo kon sa unsang paagi ang ubang mga young adult nakasabut sa kaligdong, mahimo ninyong ikonsiderar kon unsaon sa pagpalambo sa inyong kaugalingong espirituhanong kahayag pinaagi sa paghimo og mga kausaban aron mapalambo ang inyong pasalig sa sulod sa kaugalingon ug sa dayag nga pagpahayag sa kaligdong.
Magmaligdong sa Pinulongan ug Pamatasan
“Ang imong mga pulong ug mga binuhatan makahimo og talagsaong impluwensya diha kanimo ug ngadto sa uban. Ipadayag ang imong kaugalingon pinaagi sa limpyo, positibo, makabayaw nga pinulongan ug sa mga binuhatan nga magdala og kalipay niadtong naglibut kanimo. Ang imong mga paningkamot nga mahimong ligdong sa pulong ug sa buhat magdala ngadto sa napalambo nga giya ug kahupayan gikan sa Espiritu Santo.”2
Si Dar’ja Sergeevna Shvydko sa Volograd, Russia, nagpasabut nga kita ligdong sa atong pagsulti kon atong itratar ang uban nga adunay pagtahud ug mogamit og “hinay nga tingog ug kalma nga pagpahayag sa atong mga hunahuna nga dili mogamit og bastos o dili angay nga mga pulong.” Ang ligdong nga pinulongan dili manlibak, manginsulto, magbiay-biay, ug magbugalbugal. Dili gayud ipakaubos ang uban o ipataas ang garbo; yano niining ipakita ang pagkamabination ug moila sa kabalaan sa tanang anak sa Langitnong Amahan.
Ang atong pinulongan mopakita usab og pagtahud sa Dios nga Kapangulohan: “Likayi ang mahugaw nga pinulongan ug ang kaswal, dili matinahuron nga paggamit sa pangalan sa Ginoo nga komon na kaayo sa kalibutan. … Ang dili matinahuron nga kinaiyahan sa maong pinulongan … mopugong sa [atong] abilidad nga makadawat sa hilum nga mga pag-aghat sa Espiritu Santo.”3
Sama nga ang dili ligdong nga sinultihan sama sa paglibak ug pagbiay-biay makadaut sa mga relasyon, ang ligdong nga sinultihan makapalambo og lawom nga pasalig ngadto sa Dios ug, sama sa gipasabut ni Kelly Prue sa Utah, USA, “makadugang sa atong kapasidad sa pagtukod og positibong relasyon ngadto sa uban. Ang atong ligdong nga sinultihan makatabang kanato nga mapalambo ang pinakamaayo sa uban.”
Ang kaligdong sa pinulongan ug kaligdong sa pamatasan mag-uban. “Importante nga magmaligdong sa pinulongan ug pamatasan tungod kay nagpakita kini kon si kinsa kamo ug unsay inyong gihatagan og bili,” miingon si Mike Olsen sa Utah. Ang mga tawo makamatikod kon ang mga pulong ug linihukan wala magtakdo. Ang atong pinulongan nga nagdasig sa uban ug naghimaya sa Dios pagaubanan og tarung nga mga linihukan. Pinaagi sa mga buhat sa pagserbisyo ug pagkamabination, atong gipakita nga ang atong pasalig sa pagbayaw sa uban ug pagtahud sa Dios mas lalum pa kay sa atong mga pulong. Ang atong mga ehemplo sa pagkadisipulo sa pulong ug buhat makaimpluwensya alang sa kaayohan.
“Makadayeg gyud ko sa kaligdong sa kinaiya ug sinultihan,” miingon si Carrie Carlson sa Colorado, USA. “Adunay usa ka maayo nga butang sa tawo nga mapainubsanon ug dili mobuhat sa mga butang aron lang makakuha og atensyon. Kadtong ligdong nga mosulti mahimong gamhanang mga sulugoon sa Ginoo.”
Magmaligdong sa Sininaan ug Panagway
“Ang kaligdong [sa sininaan] makatabang nga mogawas ang atong pinakamaayo pinaagi sa pagtabang nato nga maka-focus sa espiritwal imbis sa kinaiyanhon nga tawo,” miingon si Paul Cave sa Utah. Pinaagi sa ligdong nga sininaan, kita makaawhag sa uban nga makaila kinsa kita ug makadayeg nato sa atong personalidad ug karakter kay sa unsay atong hitsura.
Ang atong sininaan wala lang mopasabut kon unsaon kita pagtratar sa uban, apan kini makaapekto usab kon unsaon nato paglantaw ug pagtratar ang atong kaugalingon. “Atong nasayran sa ebanghelyo nga ang atong lawas gasa gikan sa Dios,” miingon si Luis Da Cruz Junior sa Brazil. “Ang atong lawas makatabang kanato sa paglambo ug mahimong sama sa atong Amahan. Tungod niini nga rason importante nga ligdong nga magsinina. Pinaagi sa pagbuhat niini, atong gipakita sa Dios ug sa uban nga kita nagtahud niining gasa ug sa uban.”4
Si Carrie mipasabut, “Ang dili tarung nga sininaan nagtinguha sa pagpakita sa lawas isip usa ka pisikal nga butang nga bulag sa espiritu nga adunay personalidad ug kinaiya. Ang pagkaligdong, bisan tuod mas mahal usahay ug siguradong mas dugay nga panahon, nakatabang nako sa pagkat-on nga ang akong lawas mao ang tabernakulo sa usa ka bililhong espiritu uban sa balaanong potensyal ug padulngan, anak ug giamumahan sa Langitnong mga Ginikanan. Kini angay nga mas ampingan ug tahuron kaysa mahatag sa kalibutan.”
Ang Matinud-anon sa Tinuhoan nagtudlo: “Agig dugang sa paglikay sa [dili ligdong nga sinina], kinahanglan ka nga molikay sa nanubrang pagsinina, panagway, ug uso sa buhok. Sa sininaan, panagway, ug mga pamatasan, kanunay nga magmahinlo ug magmalimpyo, maglikay gayud sa dili hapsay o dili angay nga kaswal nga sinina.”5 Sa paagi nga kita magsinina ug magpresentar sa atong kaugalingon, atong gipasabut ang atong pagtahud sa Dios, sa atong kaugalingon ug sa uban.
Pagpasalig nga Magmakanunayon
Samtang kita naningkamot sa pagsunod sa sumbanan sa ebanghelyo sa pagkaligdong, atong gipakita atong pasalig pinaagi sa pagkamakanunayon, magsunod sa mga sugo sa Ginoo sa tanang panahon dili lang kon komportable ta.
Ang tinuod nga pasalig kanunay nga nakagamot sa mga baruganan sa ebanghelyo. Si Anthony Roberts sa Utah mipasabut, “Ang kaligdong kabahin na kon si kinsa ka, usa ka tinguha nga sundon kada adlaw ang nasabtan sa ebanghelyo ug sa plano sa kaluwasan.” Samtang atong gisunod ang ebanghelyo sa tanang aspeto sa atong kinabuhi, ang atong pagkakabig mapalawom ug makadugang sa atong tinguha sa pagsunod sa mga baruganan sa ebanghelyo.
Sabta ang Inyong Diosnong Kinaiya
Ang makanunayon nga pagtuman sa kaligdong makatabang nato nga makasabut ug makadayeg sa atong katungod sa pagkatawo, ug ang kahibalo sa atong balaanong kinaiya makapadasig kanato nga mahimong mas ligdong. Si Raffaella Ferrini sa Florence, Italy, mipasabut, “Ang kaligdong nakapanalangin sa akong kinabuhi tungod kay kini nakatabang kanako nga mobati nga espesyal nga anak nga babaye sa akong Langitnong Amahan, ug kana nga kahibalo, sa ingon, nakapahimo nakong ligdong.”
Ang pagtugot sa kalibutan nga modeterminar kon kinsa kita makadaut sa pagsalig sa atong kaugalingon. Si Julianna Auna sa Utah naghulagway sa iyang kasinatian: “Sa wala pa ko nakabaton og pagpamatuod sa baruganan sa kaligdong, dili ko malipayon ug dili luwas sa espirituhanon nga paagi. Ang pagtugot sa kalibutan nga modeterminar kon kinsa ko makapasubo ug makadaut sa espirituhanong paagi tungod kay ang pagkakalibutanon sa temporal, pisikal nga mga butang mapintas ug mapugsanon. Sa dihang mihukom ko nga dili na maminaw ngadto sa kalibutan ug hinoon mohimo sa akong relasyon sa Dios nga modeterminar kon si kinsa ko, ang kinabuhi nahimong mas sayon, mas gawasnon, ug mas malipayon.” Kon kita nagtinguha sa pagtugot sa Langitnong Amahan imbis sa kalibutan, kita mas malipay sa kinabuhi ug mas madasig nga magmaligdong.
Pagpuyo og Ligdong nga Kinabuhi
“Ang kaligdong mapahayag sa tanan natong gibuhat: atong sinultihan, atong gawas nga panagway, atong pamatasan, ug gani sa mga dapit nga atong bisitahan,” miingon si Galina Viktorovna Savchuk sa Novosibirsk, Russia. Ang ligdong nga pagpakabuhi may dakong kalabutan sa atong pasalig sa ebanghelyo ug sa atong relasyon ngadto sa Dios.
Ang tinuod nga kaligdong naglangkob sa batasan ug kinaiya. Ang pagpaningkamot sa pagpalambo sa atong kinaiya o sa atong gihunahuna makatabang sa pagpalambo sa usa. Ang pagmaligdong sa atong kinaiya ug panagway nga dili magmugma og tibuok kinabuhi nga pasalig makapugong nato sa pagdawat sa hingpit nga mga panalangin sa pagpuyo nga maligdong. Ug ang pagtuo sa atong kaugalingon nga ligdong kita nga mga tawo apan wala nato kini mapakita sa atong binuhatan usa ka paglingla sa kaugalingon.6
Sumala sa kahulugan sa kaligdong, ang pagsulti nga ang atong katuyoan usa ngadto sa himaya sa Dios nagpasabut nga kita sa gawas ug mismo sa sulod sa atong kaugalingon mipasalig nga magpakabuhi nga ligdong. Sama nga ang katuyoan kinahanglang nakadirekta ngadto sa Dios, ang atong gawas nga panagway ug mga lihok kinahanglang nahiuyon sa mga baruganan sa kaligdong. Apan ang pagdirekta lang sa katuyoan ngadto sa Dios wala makapa-usa niini sa Iyang himaya; kinahanglang i-focus kini ngadto Kaniya. Sa samang paagi, ang ligdong nga sininaan ug pamustura kinahanglan nga pagaubanan sa panglantaw sa mahangturong mga baruganan.
Samtang ang atong katuyoan idirekta ngadto sa Dios, mas sayon natong ma-focus atong panglantaw ngadto Kaniya. Sa samang paagi, kon atong i-focus atong panglantaw Kaniya, ang atong mga katuyoan natural lang magsunod sa Iyang direksyon.
Samtang kita naningkamot nga ligdong nga magpakabuhi, mas mabati nato ang impluwensya sa Espiritu sa atong kinabuhi. Si Elder Robert D. Hales sa Korum sa Napulog Duha ka mga Apostoles mitudlo: “Ang [kaligdong] mahinungdanon sa pagkatakus alang sa Espiritu. Ang [kaligdong] mao ang pagkamapainubsanon, ug ang pagkamapainubsanon nagdapit sa Espiritu nga atong makauban.”7 Uban sa Espiritu nga naggiya sa atong mga hunahuna ug mga lihok, ang atong katuyoan mahimong usa ngadto sa himaya sa Dios ug kita mapuno sa kahayag.