Naghulat sa Pagsubang sa Adlaw

Napuno ang kwarto sa kangitngit samtang naghigda ko nga nagmata pa, naminaw sa gininhawa sa akong bana, naningkamot sa pagtino kon natulog na ba siya. Duha pa lang ka adlaw ang milabay sa dihang namatay ang among 12 anyos nga anak nga babaye gumikan sa grabeng aksidente. Gipiyong na usab nako akong mata, apan dili gyud ko makatulog. Gimingaw kaayo ko sa akong anak. Ang tanang kahibalo sa plano sa kaluwasan dili makahupay sa akong kamingaw sa akong anak.

Sa nagkaduol na ang kaadlawon, mibati ko og kalit, grabing kamingaw. Sa dili madugay mosubang na ang adlaw, ug naghanduraw ko sa langit nga nalukop sa may pagka-pink nga kahayag. Ang among anak nga babaye ganahan og kolor nga pink. Ang pink nga sidlak sa adlaw mao gyud ang akong gikinahanglan aron mobati nga maduol kaniya pag-usab.

“Dali tan-awon nato ang pagsubang sa adlaw,” gihunghungnan nako ang akong katulgong bana.

Mibarug mi diha sa agianan sa sakyanan, nag-atubang sa silangan, ug nagpaabut … ug nagpaabut. Bisan tuod ang kalangitan mihayag na, ang kahayag sa adlaw wala makalusot sa ubos nga mga panganod.

Gisandig nako akong ulo sa abaga sa akong bana ug nanghupaw, naningkamot nga magpakaaron-ingnon nga maayo ra. Apan gusto pa ko og dugang. Nagkinahanglan ko og dugang. Sigurado itugot sa Langitnong Amahan kini nga tinguha human Iyang gikuha ang among buotang anak nga babaye balik Kaniya.

Sa dihang mosulod na unta sa balay ang akong bana, nagtan-aw sa among luyo ngadto sa kasadpan, siya miingon, “Tan-awa!”

Milingi ko. Sa among luyo ang mga panganod nga nakoloran sa nindot kaayo nga pagka-pink, gilibutan sa bulawanong kahayag. Mihingos ko, ug mga luha milugmaw sa akong mga mata. Mas matahum pa kini kaysa akong gihunahuna. Gibati nako nga daw gikagos ko sa among anak. Nasayud ko nga ang Langitnong Amahan nasayud sa kasubo sa akong kasingkasing ug nagpadala og saad sa paglaum para sa umaabut—usa ka malumong pahinumdom para sa mahangturong mga pamilya ug sa tanang nindot nga mga panghitabo nga moabut pa.

Naghunahuna ko kanunay niadtong maanindot nga panghitabo ug sa bag-ong panglantaw nga nahatag niini ngari kanako. Si kinsa man ang motan-aw sa pagsubang sa adlaw diha sa kasadpan? Apan didto nahitabo ang akong milagro. Pila na kaha ka mga panalangin ug milagro ang wala nako mamatikdi kay kini nahitabo sa mga dapit nga wala damha? Kapila ko nag-focus sa unsay akong gihunahuna nga angayan nga naa ug wala mamatikdi ang tumang kanindot sa unsay anaa na?

Kami walay hunong nga nag-ampo sa usa ka milagro nga gihikaw, apan sa dihang mitan-aw ko uban sa akong bag-ong panglantaw, akong nakita ang milagro nga mas namaayo ang kinabuhi sa upat ka tawo tungod sa donasyon sa organ sa among anak, ang milagro sa gugma sa pamilya ug sa panaghiusa sa ward, ug ang milagro sa pagserbisyo. Mibati ko og tumang kasubo, apan mibati usab ko og dakong paglaum nga mipuno sa akong kalag uban sa matag may pagka-pink nga pagsubang sa adlaw, matag may pagka-pink nga pagsalop sa adlaw, ug matag pink nga bulak nga akong maagian sa dalan.

Karon samtang nagsubang ang adlaw, motan-aw ko sa silangan ug dayon sa kasadpan. Mopahiyom ko sa pagkaamgo nga adunay milagro kanunay ug mga panalangin nga makita—ug kanunay ang adlaw mohupay sa atong mga kasub-anan kon tugutan nato kini.