Giunsa Nila Pagkahibalo?

Si Presidente Dieter F. Uchtdorf, Ikaduhang Magtatambag sa Unang Kapangulohan, mihatag og mensahe ngadto sa mga sister sa Relief Society atol sa 2011 nga kinatibuk-ang miting sa Relief Society nga nakatandog sa akong kasingkasing ug nakahatag kanako og kalinaw. Namulong siya mahitungod sa gagmayng mga bulak nga forget-me-not ug sa unsang paagi nga ang lima ka gihay sa bulak [petals] nagrepresentar sa lima ka butang nga kinahanglan natong hinumduman kanunay.¹

Human sa miting ang akong anak nga babaye si Alyssa misulti kanako sa istorya mahitungod sa iyang higala nga si Jessie, kinsa adunay gamay nga negosyo sa catering. Si Jessie gihangyo sa iyang mga lider sa Relief Society sa stake sa paghimo og dessert nga ipakaon human sa kinatibuk-ang miting sa Relief Society. Si Jessie miingon ni Alyssa nga siya diha-diha dayon nasayud unsa ang andamon—250 ka cupcake. Si Alyssa miboluntaryo sa pagdala sa mga cupcake ngadto sa stake center.

Miabut ang adlaw sa miting, ug sa dihang si Alyssa miadto aron motabang, iyang nakita si Jessie nga hapit naghilak. Ang mga cupcake andam na, apan nagpadala si Jessie og litrato niini sa usa ka paryente kinsa miingon nga dili kaayo kini nindot para sa miting.

Si Jessie nagsugod sa pagduha-duha sa iyang kaugalingon. Naghunahuna siya nga ang mga lider sa Relief Society sa stake nagpaabut og usa ka butang nga mas nindot kay sa iyang yano nga mga cupcake. Nataranta na siya sa paghunahuna kon unsaon sa pagpanindot og maayo sa mga cupcake, apan wala nay panahon. Gidala niya ug ni Alyssa ang mga cupcake nga wala usaba, nga mibati si Jessie nga napakyas niya ang mga sister—hangtud namulong si Presidente Uchtdorf.

Samtang siya namulong sa gagmayng forget-me-not nga bulak, usa ka litrato sa gamay nga asul nga bulak gipakita sa screen. Yano kaayo kini nga bulak apan nindot kaayo uban sa maanyag nga mga gihay niini. Ang mensahe ni Presidente Uchtdorf nakatandog sa kasingkasing sa tanan samtang mihangyo siya kanato nga dili kaayo malinga sa dagkong dili kasagarang pagpamukhad sa atong palibut nga kita makalimot sa lima ka yano apan importanting kamatuoran nga iyang gitudlo kanato.

Human sa panapos nga pag-ampo, ang mga sister misulod na sa cultural hall. Sa dihang si Alyssa ug si Jessie misulod, ilang nakita ang tanan nga naglibut sa lamesa sa dessert ug nangutana, “Giunsa nila pagkahibalo?”

Ang kada cupcake gibutangan og yano nga puti nga icing ug giadornohan og yano, matahum, nindot, lima ka gihay sa bulak nga forget-me-not.