Husto o Sayop?

Ni David A. Edwards

Mga Magasin sa Simbahan

Usahay ang pag-ila sa kamatuoran gikan sa sayop lisud, apan ang atong Langitnong Amahan mihatag nato og gamhanang mga gasa nga makatabang nato sa pag-ila tali sa kamatuoran sa Dios ug pamakak ni Satanas.

Kon kamo nakakuha og test sa husto o sayop nga mga pangutana, nasayud kamo nga usahay lisud ang pag-ila sa sayop. Sa samang paagi, sa dakong mga pangutana sa hugot nga pagtuo, tinuohan, ug matag adlaw nga pagpuyo, samtang importante kaayo nga makaila sa kalainan tali sa unsay tinuod ug unsay dili, dili kini kanunay sayon.

Hinoon, kita dili angay nga mahadlok sama sa dili andam nga mokuha og test. Ang atong Langitnong Amahan nagpanalangin nato og daghang mga gasa sa pagtabang nato sa pag-ila sa Iyang mga kamatuoran ug sa mga bakak sa kaaway.

Lain-laing mga Matang sa Bakak

Una, sa paghulagway sa usa ka punto, aniay mubo nga husto o sayop nga eksamin alang ninyo:

Ang buwan berde. husto sayop
Si Neil Armstrong, ang astronaut sa Apollo 12 kinsa mao ang unang tawo nga nakalakaw sa buwan, miingon nga ang panghitabo usa ka “dako nga kauswagan sa tawo.”husto sayop
Ang programa sa National Aeronautics and Space Administration (NASA) dili makaadto sa Mars niadtong 1969, mao nga sila kinahanglang moadto sa buwan. husto sayop
Ang solar nga hangin, radiation, cosmic rays, ug ubang mga babag nakapaimposible sa pagtunob sa tawo sa buwan, pun- an sa mga litrato nga mora og giusab ug ang asoy sa mga saksi wala magkauyon sa pipila ka detalye, mao nga hinimo-himo ra sa gobyerno sa US ang maong panghitabo.husto sayop

Ang tubag sa kada pangutana Sayop, ug kini nga mga pangutana nagrepresentar sa pipila ka nag-unang matang sa bakak nga tingali inyong masugatan.

Pangutana 1 usa ka yanong bakak, og klaro nga sayop. Pangutana 2 usa ka parsyal nga kamatuoran, nga lisud, tungod kay giubanan ang usa o daghang mga kamatuoran og usa ka bakak (ang Apollo 11, dili Apollo 12—nabitik ka!). Pangutana 3 dunay sayop nga pagbahin, o usa ka sitwasyon diin duha lamang ka opsyon ang gipresentar nga dili lamang mao ray mga opsyon (ang NASA mahimong mopili sa dili pag-adto bisan asa, pananglit). Pangutana 4 usa ka nga “makatarunganon” nga argumento, nga gikan sa resonable apan sa kasagaran sayop nga ebidensya aron mopadulong ngadto sa usa ka piho nga sayop nga paghukom.

Modernong mga Bakak

Kon kabahin sa mga butang nga makaimpluwensya sa inyong mga hunahuna, pagtuo, pagpili, ug kinaiya —sa mga butang nga dunay mahangturong mga sangputanan—maayo gyud nga magbantay sa lain-laing mga matang sa bakak, tungod kay si Satanas, “ang amahan sa mga bakak” (2 Nephi 9:9), mogamit sa bisan unsa nga pamaagi aron sa paglingla nato. Aniay pipila ka mga ehemplo kon unsaon niya pagbuhat niini karon, ingon man usab mga ehemplo kon sa unsang paagi kita makatubag gamit ang kamatuoran.

Yanong Walay Kamatuoran

Sayop nga Ideya:	Asa kini Paingon (Dakong Bakak):	Ang Kamatuoran:
Ang pornograpiya normal ug dili makapasakit ni bisan kinsa.	Busa padayon ug tan-aw sa pornograpiya.	Ang pornograpiya motuis sa atong paglantaw sa sekswalidad, makaadik, makadaut nato pag-ayo sa espirituhanong paagi, ug makaguba sa mga relasyon.

Parsyal nga Kamatuoran

Sayop nga Ideya:	Asa kini Paingon (Dakong Bakak):	Ang Kamatuoran:
Ang matag tawo talagsaon ug mahimong magpakabuhi sumala sa iyang pagpili, mao nga sa unsa nga paagi kamo mobati ug mopadayag sa kaugalingon mao ang labing importanting mga butang sa inyong kinabuhi.	Kinahanglang dili kamo motugot sa Dios o sa Simbahan nga mosulti ninyo unsaon sa pagpuyo, busa padayon ug buhata unsay inyong gusto kon kini makapanindot sa inyong pagbati.	Matag usa nato talagsaong anak sa Langitnong Amahan, kinsa gusto nga mahimo kitang labing maayo ug mahimong sama Kaniya. Ang pagkamasulundon sa Iyang mga sugo makatabang nato nga makabaton og hingpit nga kalipay.

Sayop nga Pagbahin (Duha Lamang ka Kapilian)

Sayop nga Ideya:	Asa kini Paingon (Dakong Bakak):	Ang Kamatuoran:
Ang Simbahan nagsangyaw batok sa pamaagi sa pagpakabuhi; busa, kini dili matugtanon ug nasilag sa mga tawo—dili kini madawaton ug mahigugmaon.	Tungod kay ang Simbahan dili matugtanon ug masilagon, angayan kining sawayon, biay-biayon, ug panghimarauton, mao nga kinahanglan kamong mohunong sa pagpakig-uban niini.	Ang dili pagdawat sa pamaagi sa pagpakabuhi sa ubang tawo wala magpasabut og kasilag ug pagkadili matugtanon. Kita makapakita og kalooy, pagtahud, ug pagkamabination ngadto sa tanan—lakip sa mga tawo kansang pamaagi sa kinabuhi supak sa balaod sa Dios—samtang nagpabiling matinuoron ngadto sa Dios ug sa Iyang mga sugo.

“Makatarunganon” nga Argumento

Sayop nga Ideya:	Asa Kini Paingon (Dakong Bakak):	Ang Kamatuoran:
Pipila ka mga butang diha sa Basahon ni Mormon gisupak sa karon nga siyentipikanhong ebidensya, ug ang mga istorya kon giunsa kini sa paghubad wala magkapareha, mao nga tingali hinimohimo kini ni Joseph Smith o kinopya kini sa uban.	Ang Basahon ni Mormon dili tinuod ug si Joseph Smith dili usa ka propeta, busa hunong sa pagpakig-uban sa Simbahan.	Ang siyensya nagpamatuod sa daghang mga butang diha sa Basahon ni Mormon, ug ang “ebidensya” batok niini sayop. Apan ang labing importante nga ebidensya alang niini mao ang pagsaksi sa Espiritu nga nagsulti ninyo nga kini tinuod ug nga si Joseph Smith usa ka tinuod nga propeta.

Unsaon aron Masayud sa Kamatuoran

Busa asa gikan ang mas kompleto nga pagtan-aw sa kamatuoran? Sa unsa nga paagi nga kita dili mailad sa mga bakak? Ania ang pipila sa gamhanang mga gasa nga gihatag sa Langitnong Amahan nato sa pag-ila sa kamatuoran gikan sa sayop.

Ang Kahayag ni Kristo. “Ang Kahayag ni Kristo … nag-aghat sa tanang maayong mga indibidwal sa tibuok yuta sa pag-ila sa kamatuoran gikan sa sayop, sa tinuod gikan sa sayop. Kini makapalihok sa inyong konsensya.”¹
Ang Espiritu Santo. “Ang Espiritu sa kamatuoran … magatultol kaninyo ngadto sa tibuok nga kamatuoran” (Juan 16:13).
Mga Kasulatan. “Ang Dios naggamit sa kasulatan sa pagdiskobre sa sayop nga panghunahuna, sayop nga mga tradisyon ug sala uban sa grabeng mga epekto.”² Ang Basahon ni Mormon importante kaayo kabahin niini, kay kini “nagbutyag sa mga kaaway ni Kristo. Molibug kini sa sayop nga mga doktrina ug mopawala sa mga panagbingkil. (Tan-awa sa 2 Ne.3:12.)”³
Bag-ong mga propeta. “Ang responsibilidad sa [usa ka propeta] mao ang pagpaila sa kabubut-on sa Dios ug tinuod nga kinaiya ngadto sa katawhan. … Ang usa ka propeta misaway sa sala ug nanagna sa mga sangputanan niini.”⁴
Edukasyon. “Ang usa ka santos … nagtinguha sa pagkat-on pinaagi sa pagtuon, ug usab pinaagi sa hugot nga pagtuo. Ang edukasyon … makapahimo sa usa ka tawo sa pag-ila sa kamatuoran gikan sa sayop, ilabi na pinaagi sa pagtuon sa mga kasulatan. (Tan-awa sa D&P 88:118.)”⁵

Bisan og dili sayon kanunay ang pagtubag Husto o Sayop kon mag-atubang sa tanang lain-laing mga ideya, ang mga gasa nga gihatag sa Langitnong Amahan ninyo makatabang ninyo nga makalahutay sa pagsulay.