Paghimo og Musika didto sa Uganda

Dili daghang mga bata ang magserbisyo og calling sa Simbahan sa dili pa mogradwar gikan sa Primary. Apan si George N. gikan sa Uganda singko anyos lang ang edad sa dihang gitawag nga mahimong chorister sa iyang branch.

Ang chorister mao ang tawo nga mobarug sa atubangan sa tanan atol sa sakrament miting aron mogiya sa pagkanta. Importante kini nga trabaho!

“Kulbaan gyud ko sa dihang gamay pa ko,” miingon si George. Apan bisan pa kaniadto kanunay niyang gihimo ang iyang labing maayo. Nagkamaayo siya kada semana. Sa wala madugay naggiya na siya sa musika nga masaligon.

Malingaw si George nga moserbisyo sa iyang calling. “Mobati ko og nindot,” miingon siya. “Akong gibati ang Espiritu nga naa sa sulod sa kwarto.”

Ang musika usa ka dakong bahin sa kinabuhi ni George. Mopatukar usab siya sa piano ug gitara. Oo, nakatabang nga si George gikan sa pamilya nga hilig og musika. Ganahan silang tanan manganta—si George, ang iyang mga ginikanan, ang iyang unom ka igsoong mga babaye, ug ang iyang usa ka igsoong lalaki. Gikan sa kamagulangan hangtud sa kamanghuran ang ilang mga pangalan Rosillah, Mirriam, Nancy, Ashley, George, Chayene, Onidah, ug Gideon. Ang ilang paborito nga kanta nga kantahon isip pamilya mao ang “A Child’s Prayer” (Children’s Songbook, 12).

Karon nga si George nag-edad na og 12, busy siya sa kabahin sa sakrament miting kon motabang siya sa pagpaambit sa sakrament. Ang iyang manghud nga lalaki, si Gideon, nag-edad og 5, motabang usahay pinaagi sa pag-conduct sa musika. Si George mitudlo ni Gideon unsaon.

Silang duha nga managsuon malipayong mopahiyom kon mogiya sa musika. Nasayud sila nga sila nakatabang nga mabati ang Espiritu diha sa miting.