Usa ka Panalangin alang sa Akong Igsoong Lalaki
Ang tagsulat nagpuyo sa Chihuahua, Mexico.
Paghulagway pinaagi ni David Habben
Akong nakat-unan ang mahitungod sa gahum ug mga panalangin sa priesthood sa dili maayong panahon. Pipila ka tuig na ang milabay, sa dihang ang akong igsoong lalaki nag-edad og 14, naaksidente siya sa motorsiklo ug nabali ang iyang tiil. Ang akong papa mitawag ug misulti nako nga ilang gidala siya sa ospital. Naglain ang akong tiyan samtang nagdali kong mipaingon sa ospital. Sa pag-abut nako, nakita nako ang usa sa akong mga uyoan. Giingnan ko niya unsa ka grabe ang aksidente.
Nahadlok sa unsay akong makita, akong giablihan ang pultahan diin didto ang akong igsoon ug misulod sa kwarto. Milakang kog kausa, mipiyong sa akong mga mata, ug diha-diha gibati nako ang kalinaw. Sama nga dili nako makalimtan ang gibati nakong kalain sa tiyan, dili gyud nako malimtan ang pagbati sa kalinaw ug kahupayan nga miabut nako. Akong nailhan ang pagbati—ang Espiritu kadto.
Dayon akong nadunggan ang akong amahan nga misulti. Siya ug ang akong uyoan mihatag sa akong igsoon og panalangin sa priesthood. Mapaubsanon siya nga mipanalangin sa iyang anak pinaagi sa pangalan ni Jesukristo nga mahimong OK ra, nga mamaayo, nga matarung ra ang iyang tiil.
Human sa panalangin, ang tanan nahilom sa makadiyot. Nasayud ako nianang higayona nga kinahanglan kong magpuyo nga takus nga modawat sa Melchizedek Priesthood ug makahimo sa paghatag og mga panalangin alang sa akong umaabut nga mga anak.
Sa dihang nagpundok na kami sa gawas sa kwarto sa akong igsoon, ang akong mga ginikanan nagsugod sa paghisgot unsay ilang buhaton. Naghisgot sila kon mobiya ba sa Mexico aron dad-on siya ngadto sa usa ka doktor sa Estados Unidos o ipahigayon ang operasyon dinhi. Bisan unsa pa ang opsyon nga ilang gibati nga labing maayo alang sa akong igsoon, nasayud ko nga nakadawat na siya sa labing maayong atensyon nga iyang madawat. Iyang nadawat ang panalangin gikan sa duha ka mga lalaki nga naghupot sa priesthood, busa bisan unsa pay mahukman sa akong mga ginikanan, ang akong igsoon mamaayo ra.
Nakahukom sila nga magpabilin sa Mexico alang sa operasyon. Ang mga doktor mibutang og plaka ug napulo ka mga tornilyo sa tiil sa akong igsoon. Naayo ra kini, ug paglabay sa pipila ka bulan miapil na siya sa usa ka football team. Ang panalangin natuman sama sa gisulti sa akong papa.
Nasayud ko nga ang priesthood mao ang gahum ug awtoridad sa Dios nga gihatag ngadto sa mga lalaki. Pagkadako nga gasa nga Iyang gihatag kanato.
Mga Leksyon sa Dominggo
Hilisgutan Niining Bulana: Priesthood ug ang mga Yawe sa Priesthood