Mormon Ka Ba?

Nalayo ko sa panimalay aron sa pagtambong og international conference sa akong trabaho. Gatusan ka mga tawo ang nanambong, apan ako lang usa gikan sa akong estado ug rehiyon.

Usa ka panihapon ang giandam para sa tanang nanambong. Sa among pagsulod sa lawak kan-anan, kada usa namo nakadawat og upat ka tiket nga magamit sa bar aron pag-order og libreng ilimnon nga makahubog. Nakahunahuna ko unsa kasayon para sa usa ka tawo nga layo sa panimalay nga matintal sa ingon nga oportunidad, naghunahuna nga walay tawo nga masayud. Milabay ra dayon kadto nga hunahuna, ug akong gibalik ang mga tiket sa tawo diha sa may pultahan.

Atol sa panihapon kauban nako ang pito ka tawo nga dili nako kaila. Miinom ko og tubig samtang nangaon, nag-istoryahanay, nagkinataw-anay, ug nagbinayloay kami og impormasyon nga makatabang namo sa among panarbaho.

Pagkabuntag atol sa pamahaw mitimbiya ko sa usa ka buotang lalaki kinsa naglingkod duol sa akong lamesa. Nalipay ko sa pagkamatikod sa iyang name tag nga gikan siya sa akong lungsod nga natawhan—lungsod nga wala na ko makapuyo sulod sa 35 ka tuig. Human og high school mibiya ko sa balay para mag-kolehiyo, nagminyo, ug mibalhin.

Samtang nag-istoryahanay mi sa mga dapit ug mga kalihokan sa komunidad nga among nasayran, iya kong gipangutana kon aduna pa ba koy pamilya didto. Mitubag ko nga wala na apan aduna koy maayong mga higala didto ug naa pa mi komunikasyon. Iya kong gipangutana kon si kinsa sila, ug akong ginganlan ang pipila kanila.

Human sa pipila ka ngalan iya kong gipahunong ug miingon, “Yuna pa, Mormon ka ba? Tanang tawo nga imong ginganlan mga Mormon.”

Sa dihang akong giangkon nga usa ko ka Santos sa Ulahing mga Adlaw, iyang kong giingnan kon unsa ka buotang lumulupyo kadtong mga higalaa ug sila nagserbisyo sa komunidad ug nagsilbi nga mga maayong ehemplo. Sulod sa pipila ka minuto iyang gipakigbahin iyang pagdayeg sa Simbahan ug sa akong mga higala, nagsulti nako nga sila mga tigpasiugda og mga kaayohan sa komunidad.

Sa among panagbulag, nakahunahuna ko dayon kon unsa kaha ang mahitabo kon miinom pa ko niadtong mga ilimnon nga makahubog. Gitudloan ko sa pagpili og husto niadtong mga tawo nga among gihisgutan. Dili unta ko komportable ug maulaw sa pag-angkon nga miyembro ko sa Simbahan kon ako pang gigamit ang mga tiket.

Dako akong pasalamat sa mga ehemplo niadtong takus, aktibo, nagserbisyo nga mga higala—35 ka tuig ang milabay ug 2,000 ka milya (3,220 km) ang gilay-on sa panimalay kon asa ko nagdako.