Unsa Kaha Kon Dili Ko Mobati og Kainit sa Dughan?

Ni Rachel Nielsen

Kon kamo nahibalo unsay pangitaon, sayon ra ninyong mailhan ang Espiritu Santo.

Imahe

Composite of youth praying, reading the scriptures, serving

“Imbitara si Mr. Wood* sa seminary.” Miabut kini sa akong hunahuna sa dihang nakadungog ako sa pahibalo, ug nagtuo dayon ko nga binuang kini. Nganong akong imbitaron ang akong maestro sa musika nga moanha sa seminary sa 5:30 sa buntag?

Ang presidente sa seminary bag-o lang misulti sa among klase nga dunay himoong pagpasalamat sa magtutudlo. Gihagit mi sa pag-imbitar sa among mga magtutudlo sa eskwelahan sa pag-apil namo sa buntag sa seminary diin among pasalamatan sila sa ilang serbisyo. Sa tibuok semana human makadungog niini nga pahibalo, naghunahuna ko sa pag-imbitar ni Mr. Wood. Matag higayon nga moadto ko sa seminary o makakita niya sa klase sa musika, makahinumdom ko: “Imbitara si Mr. Wood sa seminary.” Human sa daghang mga adlaw niini, dili na nako mabaliwala ang hunahuna.

Usa ka buntag samtang ang tanang mga estudyante sa klase sa musika nagkuha sa ilang mga instrumento, akong gibutang ang akong trombone ug miduol ni Mr. Wood. Naglagubo ang akong kasingkasing ug ang akong mga kamot nagkurog, apan sa dihang giabli nako ang akong ba-ba aron sa pag-imbitar niya, gibati nako ang kahupayan.

Sa akong kasurprisa, miingon si Mr. Wood nga moadto siya! Nakuryuso siya nganong moadto ko sa seminary kada buntag sa dili pa moeskwela ug gusto nga makat-on pa og dugang. Human makahatag kaniya sa mga detalye, naglakaw ko nga puno sa kalipay.

Atol niini nga kasinatian, wala nako batia ang kainit sa dughan (tan-awa sa D&P 9:8). Apan akong gibati ang Espiritu Santo. Ang pagbalik-balik sa hunahuna sa pag-imbitar ni Mr. Wood (tan-awa sa D&P 128:1), ang kahupayan nga akong gibati sa dihang giimbitar nako siya (tan-awa sa Juan 14:26), ug ang kalipay nga akong gibati human nako siya maimbitar (tan-awa sa Mga Taga-Galatia 5:22) ang tanan gikan sa Espiritu. Apan kon nagpaabut lamang ako sa mainit nga dughan, tingali dili ko makabantay sa dihang ang Espiritu Santo miaghat nako.

Ang Espiritu Santo mamulong sa daghang mga paagi, ug kon kamo magtuon sa unsa nga paagi siya makigsulti, kamo masayud unsa ang pangitaon samtang kamo maningkamot sa pag-ila kon Siya anaa ba kaninyo ug kon Siya nagtudlo o naggiya kaninyo.

Pangitaa ang Gagmay ug Yano nga mga Butang

Sa dili pa mangita sa daghang mga paagi nga ang Espiritu Santo makigsulti nato, kinahanglan natong hinumduman nga kasagaran, ang pagpadayag hilom ug gamay. Kon kita nangita sa kasinatian ni Alma ang Batan-on nga dunay anghel ug linog, tingali atong mataligam-an ang mas kanunay ug mas hilom nga mga aghat sa Espiritu Santo. Si Elder David A. Bednar sa Korum sa Napulog Duha ka mga Apostoles nagpasidaan nga kon kita “mohatag og gibug-aton sa kahibulungan ug mahinuklugong pagpakita,” basin atong mataligam-an ang “gamay ug nagtubo nga espirituhanong panghunahuna” nga mas komon.¹ Samtang kamo maningkamot sa pag-ila sa Espiritu Santo, pangitaa ang gagmay ug yanong mga aghat.

Pangita sa mga Paagi nga ang Espiritu Santo Makigsulti

Kon kamo wala gayud mobati og kainit sa dughan, ayaw kabalaka. Adunay daghang mga tawo kinsa nakaila sa impluwensya sa Espiritu Santo niining paagiha, apan Siya nakigsulti usab sa daghang laing mga paagi, ug dili kinahanglang mobati kamo og kainit sa dughan aron mobati sa Iyang presensya. Gani, samtang kamo magkat-on sa mga paagi nga modasig ang Espiritu Santo kaninyo ug mangita niini sa inyong kinabuhi, tingali inyong makaplagan nga Siya nakigsulti na kaninyo labaw sa inyong nahibaloan.

Kini nga lista naglakip lamang sa diyutay nga mga paagi nga ang Espiritu Santo makigsulti. Pagtuon sa mga kasulatan ug sa mga pulong sa moderno nga mga propeta ingon man usab sa mga pahina 96–97 sa Isangyaw ang Akong Ebanghelyo: Usa ka Giya sa Misyonaryo nga Pangalagad (2004) sa pagdiskobre og dugang mga paagi nga Siya makasulti kaninyo.

“Ang espiritu sa pagpadayag naglihok sa kasagaran isip mga hunahuna ug mga pagbati nga moabut sa atong mga hunahuna ug mga kasingkasing pinaagi sa gahum sa Espiritu Santo.(Tan-awa sa D&P 8:1–2; 100:5–8.)”² Ang Espiritu Santo makapamulong nganha ninyo pinaagi sa:

Mga pagbati sa gugma, kalipay, kalinaw, pagpailub, kamaayo, hugot nga pagtuo, kaaghup (tan-awa sa Mga Taga-Galacia 5:22–23).
Mga hunahuna nga mosulod sa utok o motandog sa inyong mga pagbati (tan-awa sa D&P 128:1).
Usa ka tinguha sa pagbuhat og maayo ug pagsunod sa mga sugo (tan-awa sa Mosiah 5:2).
Usa ka pagbati nga kini husto (tan-awa sa D&P 9:8).
Mga pagbati sa kahupayan (tan-awa sa Juan 14:26).
Mga pagbati nga “[mo]padako sa [inyong] kalag” (Alma 32:28).
Mga hunahuna nga “[mo]dan-ag sa [inyong] salabutan” (Alma 32:28).
Kagutom alang sa dugang nga kamatuoran (tan-awa sa Alma 32:28).
Pagbati nga nadasig (naawhag) sa paglihok o pagkontrol (pagpugong) sa pagbuhat og butang (tan-awa sa 1 Nephi 7:15; 2 Nephi 32:7).

Sa Unsa nga Paagi Kini nga mga Hunahuna ug mga Pagbati Moabut

Mga hunahuna ug mga pagbati gikan sa Espiritu Santo mahimong moabut:

“Diha-diha dayon ug may dakong kadasig.”
“Malantip ug sa hinay-hinay.”
“Malumo kaayo nga kamo dili gani makamatikod niini.”³

Mga hunahuna ug mga pagbati gikan sa Espiritu Santo moabut aron:

Magpahinumdom sa mga butang (tan-awa sa Juan 14:26).
Manalipod nato sa mga panglimbong (tan-awa sa D&P 45:57).
Magpamatuod sa Langitnong Amahan ug ni Jesukirsto (tan-awa sa 2 Nephi 31:18).
Motabang nato sa pagtudlo (tan-awa sa D&P 84:85).
Mohatag sa mga gasa sa Espiritu (tan-awa sa D&P 46:11).
Mohatag og kapasayloan sa mga sala (tan-awa sa 2 Nephi 31:17).

Pangitaa ang Maayo

Kon kamo naningkamot sa pag-ila sa Espiritu, hunahunaa ang gitumong nga sangputanan sa impresyon: ang hunahuna ba o ang pagbati mogiya ninyo sa pagbuhat og maayo? Moroni 7:16 nag-ingon, “Busa, ako mopakita nganha kaninyo sa paagi sa paghukom; kay ang matag butang nga modapit sa paghimo sa maayo, ug sa pagdani sa pagtuo diha kang Kristo, gipadala pinaagi sa gahum ug gasa ni Kristo; busa kamo mahimo nga masayud uban sa usa ka hingpit nga kasayuran nga kini gikan sa Dios.”

Si Presidente Gordon B. Hinckley (1910–2008) miingon, “Unsaon nato pag-ila sa mga aghat sa Espiritu? Sa akong pagtuo dili kaayo kana lisud, sa tinuod lang. … Nag-awhag ba kini sa usa ka tawo sa pagbuhat og maayo, sa pagtindog, sa pagbarug, sa pagbuhat sa matarung nga butang, sa pagmabination, sa pagmanggihatagon? Nan kini mao ang Espiritu sa Dios. Kon kini mangitngit, makahadlok, dili matahum, dili maayo, nan kamo masayud nga kini sa kaaway.”⁴

Kon naghunahuna mo kon mibati ba kamo o wala sa Espiritu, pangutan-a ang inyong kaugalingon kon ang hunahuna o ang pagbati nagdapit ba ninyo sa pagbuhat og maayo. Kon kini nagdapit, makasiguro kamo nga kini gikan sa Dios.

Pangita og Kahigayunan sa Paggamit sa Inyong Kabubut-on

Kon kamo takus ug kamo nagkalisud sa pag-ila sa Espiritu Santo, paningkamot. Ang Langitnong Amahan mipanalangin ninyo sa kabubut-on, ug usahay gusto Siya nga kamo molihok nga wala ang Iyang giya. Mosugo Siya ninyo sa paggamit sa inyong hugot nga pagtuo pinaagi sa paglihok bisan dili klaro ang resulta. Si Presidente Boyd K. Packer, Presidente sa Korum sa Napulog Duha ka mga Apostoles miingon, “Sa imong pagtinguha sa espirituhanong kahibalo anaa kanang “lukso sa hugot nga pagtuo.” … Mao kini ang higayon nga anaa ka sa daplin sa kahayag ug nakatikang ngadto sa kangitngit aron madiskobrehan nga ang agianan gipahayag sa unahan sa usa o duha lamang ka lakang.”⁵ Kon kamo matinud-anong mosunod sa kahibalo nga anaa na kaninyo, bisan dili makaila sa mga aghat sa Espiritu Santo, ang Langitnong Amahan mosiguro nga kamo dili mahisalaag.

Ang tagsulat nagpuyo sa Utah, USA.