1 Ket ita, kitaen, ay-ayatek a kakabsatko, mamatiak nga ut-utobenyo iti pusoyo ti maipapan iti rumbeng nga aramidenyo kalpasan ti iseserrekyo iti dayta a dalan. Ngem, kitaen, apay nga utobenyo dagitoy a banag iti pusoyo?

2 Saanyo kadi malagip a kinunak kadakayo a kalpasan ti ^apannakaawatyo ti Espiritu Santo makapagsaokayon iti ^bpagsasao dagiti anghel? Ket ita, kasano ti pannakapagsaoyo iti pagsasao dagiti anghel no saan a gapu iti Espiritu Santo?

3 Agsao dagiti ^aanghel babaen ti bileg ti Espiritu Santo; gapuna, isasaoda dagiti balikas ni Cristo. Gapuna, imbagak kadakayo, ^bagpennekkayo kadagiti balikas ni Cristo; agsipud ta kitaen, ibaganto kadakayo dagiti balikas ni Cristo ti amin a banag a rumbeng nga aramidenyo.

4 Gapuna, ita kalpasan a naisaok dagitoy a balikas, no saanyo maawatan ida gapu daytoy ta saankayo a ^anagsaludsod, wenno saankayo a nagtuktok; gapuna, saankayo a maipan iti lawag, ngem nasken a maungaw iti kasipngetan.

5 Gapu ta kitaen, kunak manen kadakayo a no sumrekkayo iti dayta a dalan, ket awatenyo ti Espiritu Santo, ipakitananto kadakayo amin a banag a rumbeng nga aramidenyo.

6 Kitaen, daytoy ti doktrina ni Cristo, ket awanton ti doktrina a maited kalpasan a ^amaipakitana kadakayo ti bagina iti lasag. Ket inton maipakitana kadakayo ti bagina iti lasag, aramidenyonto dagiti banag nga ibagana kadakayo.

7 Ket ita siak, ni Nephi, saannak a makapagsao iti adu; pinagsardengnak ti Espiritu nga agsao, ket nabatiak nga agladingit gapu iti saan a ^apanamati, ken kinadakes, ken ti kinakuneng, ken ti kinasukir dagiti tattao; gapu ta saanda nga agsapul iti pannakaammo, wenno makaawat iti naindaklan a pannakaammo, idinto a naited kadakuada a ^bsilalawag, a kas iti kalawagan a balikas.

8 Ket ita, ay-ayatek a kakabsatko, mariknak nga ut-utobenyo pay laeng kadagiti pusoyo; ket maladingitanak isu a masapul nga agsaoak maipanggep iti daytoy a banag. Gapu ta no dumngegkayo iti Espiritu a mangisuro iti tao nga ^aagkararag, maammuanyo a masapul nga agkararagkayo; gapu ta saan nga isuro ti ^bdakes nga espiritu ti tao nga agkararag, ngem isurona a saan nga agkararag.

9 Ngem kitaen, kunak kadakayo a masapul nga ^aagkararagkayo a kanayon, ken saankayo nga agsardeng; a saankayo nga agaramid iti uray ania a banag para iti Apo a di agkararag nga umuna iti ^bnagan ni Cristo, tapno isu ti mangted-pateg iti Ama iti nagan kadagiti aramidyo, tapno agpaay ti aramidyo iti ^cpagimbagan ti kararuayo.