1 ’E i muri a’era, ’ua hope ato’a a’era te iva ’ahuru ’e ma pae o te matahiti, ’e ’ua ha’amata te mau ta’ata i te ha’amo’e i taua mau tāpa’o ra ’e te mau ’ohipa ’ūmerehia tā rātou i fa’aro’o na, ’e ’ua haere iti noa tō rātou māere i te tāpa’o ’e i te ’ohipa ’ūmerehia nō te ra’i mai, ’e nō reira ho’i ’ua ha’amata rātou i te fa’a’eta’eta i tō rātou ’ā’au, ’e i te ha’apōiri i tō rātou mau mana’o, ’e ’aita rātou i ti’aturi fa’ahou i te mau mea ato’a tā rātou i fa’aro’o e i ’ite—

2 ’E ’ua mana’o noa rātou i te tahi mau mea ma’ama’a i roto i tō rātou ’ā’au ē, nā te ta’ata e nā te mana o te diabolo i fa’atupu i te reira, nō te arata’i ’ē ’e nō te faahema i te ’ā’au o te mau ta’ata ; e mea nā reira ho’i Sātane i te haru fa’ahou i te ’ā’au o te mau ta’ata, ’e nō reira ho’i ’ua ha’amatapō ’oia i tō rātou mata ’e ’ua arata’i ’ē ia rātou ’ia ti’aturi ē, e mea ma’ama’a ’e e mea faufa’a ’ore te mau ha’api’ira’a tumu a te Mesia.

3 ’E i muri a’era, ’ua ha’amata ihora rātou i te tupu rahi i roto i te parauti’a ’ore e i roto i te mau ’ohipa vi’ivi’i ; ’e ’aita rātou i ti’aturi ē, e fa’a’itehia mai ā te tahi mau tāpa’o ’e te mau ’ohipa ’ūmerehia ; ’e ’ua hāhaere noa atu ra Sātane, ma te arata’i ’ē atu i te ’ā’au o te mau ta’ata, e ma te fa’ahema ia rātou ’ia rave i te mau ’ohipa parauti’a ’ore rahi i ni’a i te fenua.

4 ’E nō reira ’ua ma’iri te iva ’ahuru ’e ma ono matahiti ; e ’oia ato’a te iva ’ahuru ’e ma hitu matahiti ; e ’oia ato’a te iva ’ahuru ’e ma va’u matahiti ; e ’oia ato’a te iva ’ahuru ’e ma iva matahiti.

5 ’E ’oia ato’a ’ua ma’iri te hō’ē hānere matahiti mai te mau mahana mai o Mosia, ’oia te ari’i i ni’a i te mau ta’ata o te mau ’āti Nephi.

6 ’E ’ua ma’iri te ono hānere e ma iva matahiti mai tō Lehi fa’aru’era’a i Ierusalema.

7 ’E ’ua ma’iri e iva matahiti mai te taime i fa’a’itehia ai te tāpa’o, ’o tei tohuhia nā ’e te mau peropheta, nō ni’a i te taera’a mai o te Mesia i roto i te ao nei.

8 I teienei, ’ua ha’amata ihora te mau ’āti Nephi i te tai’o i tō rātou taime mai te tau i fa’a’itehia mai ai te tāpa’o ra, ’oia ho’i mai te taera’a mai o te Mesia ; nō reira, ’ua ma’iri e iva matahiti.

9 E aita roa o Nephi, te metua tāne o Nephi, ’o tei fāri’i i te mau pāpa’a parau, i ho’i mai i te fenua ra nō Zarahemela, ’e ’aita roa ho’i ’oia i ’iteahia i ni’a i te fenua ē ’ati noa a’e.

10 ’E i muri a’era, ’ua vai noa te mau ta’ata i roto i te parauti’a ’ore, noa atu ā te a’ora’a rahi ’e te parau tohu rahi i fa’ataehia atu i rotopū ia rātou ; ’e nō reira ’ua ma’iri ato’a ihora te ’ahuru o te matahiti ; ’e te ’ahuru ’e ma hō’ē ato’a o te matahiti nō tō rātou rave-noa-ra’a i te mau ’ohipa ’ī’ino.

11 ’E i muri a’era, i te ’ahuru ’e ma toru o te matahiti, ’ua tupu ihora te mau tama’i ’e te mau mārōra’a i ni’a i te fenua tā’āto’a ; ’e ’ua rahi roa ho’i te feiā ’eiā haru o Gadianetona, ’e ’ua taparahi rātou i te mau ta’ata e rave rahi, ’e ’ua ha’amou i te mau ’oire e rave rahi, ’e ’ua taparahi rahi i te ta’ata ’e ’ua ha’amani’i rahi i te toto i ni’a i te fenua ē ’ati noa a’e, ’e nō reira ’ua ti’a roa i te mau ta’ata ato’a, i te mau ’āti Nephi ’e te mau ’āti Lamana ’ia rave i tā rātou mau mauha’a tama’i nō te ’aro atu ia rātou.

12 Nō reira, ’ua ’āmui atu te mau ’āti Lamana ato’a ’o tei fa’afāriuhia mai i te Fatu, i tō rātou mau taea’e, i te mau ’āti Nephi, ’e ’ua ti’a roa ia rātou ’ia rave i tā rātou mau mauha’a tama’i nō te ’aro atu i taua feiā ’eiā haru o Gadianetona, nō te pāruru i tō rātou ora e tā rātou mau vahine e tā rātou mau tamari’i, ’oia ïa, ’e nō te pāruru i tō rātou ti’ara’a, ’e te maita’i o tā rātou ’ēkālesia ’e tā rātou ha’amorira’a, ’e tō rātou ti’amāra’a ’e tō rātou ti’ara’a ha’avī-’ore-hia.

13 ’E i muri a’era, nā mua a’e i te hopera’a o teie matahiti hō’ē ’ahuru ’e ma toru, ’ua fātata roa te mau ’āti Nephi i te ha’amouhia nō teie nei ’arora’a, ’e ’ua riro ho’i ïa ’ei mea ’ati rahi roa.

14 ’E i muri a’era, taua mau ’āti Lamana ra ’o tei tāhō’ē atu i te mau ’āti Nephi ra, ’ua tai’ohia ïa rātou i rotopū i te mau ’āti Nephi.

15 ’E ’ua ’īriti-’ē-hia atu ra te ’anatemara’a i fa’ataehia mai i ni’a ia rātou, ’e ’ua riro ihora tō rātou iri ’ei mea ’uo’uo mai tō te mau ’āti Nephi ra.

16 E tō rātou feiā ’āpī tāne e tā rātou mau tamāhine ’āpī, ’ua riro ïa ’ei feiā mata nehenehe, ’e ’ua tai’ohia rātou i rotopū i te mau ’āti Nephi, ’e ’ua parauhia ho’i rātou e mau ’āti Nephi. ’E ’o te hope’a te reira nō te ’ahuru ’e ma toru o te matahiti.

17 ’E i muri a’era, i te ha’amatara’a nō te hō’ē ’ahuru ’e ma maha o te matahiti, te tupu noa ra te ’arora’a i rotopū i te feiā ’eiā haru ’e te mau ta’ata o Nephi, ’e ’ua riro ho’i ïa ’ei mea ’ati rahi roa ; ’āre’a rā, e mea manuia a’e te mau ’āti Nephi i te feiā ’eiā haru, ’e nō reira ho’i ’ua tīahi ’ē atu ra rātou ia rātou i rāpae i tō rātou mau fenua ē tae roa atu ra i roto i te mau mou’a e i tō rātou mau vāhi tāpunira’a.

18 ’E ’o te hope’a te reira nō te hō’ē ’ahuru ’e maha o te matahiti. E i te hō’ē ’ahuru ’e ma pae o te matahiti ’ua haere mai ra rātou nō te ’aro i te mau ta’ata o Nephi ; ’e nō te mau ’ohipa ’ī’ino a te mau ta’ata o Nephi, e tā rātou mau mārōra’a e rave rahi ’e te mau ’āmahamahara’a e rave rahi, ’ua rahi atu ra tō te feiā ’eiā haru o Gadianetona manuiara’a i ni’a ia rātou.

19 ’E ’o te hope’a te reira nō te hō’ē ’ahuru ’e ma pae o te matahiti, ’e nō reira ’ua vai noa te mau ta’ata i roto i te mau ’ati e rave rahi ; ’e ’ua tautau noa mai te ’o’e nō te ha’amoura’a i ni’a a’e ia rātou, ’e nō reira ho’i ’ua fātata rātou i te tā’irihia e te reira, ’e te tumu nō tā rātou ïa mau ’ohipa ’ī’ino.