1 I teienei, inaha, e fa’a’ite atu vau ia ’outou, ’aita rātou i fa’ati’a i te hō’ē ari’i i ni’a i te fenua ; ’āre’a rā i teie iho matahiti, ’oia ïa, i te toru ’ahuru o te matahiti, ’ua taparahi pohe roa rātou i te ha’avā rahi o te fenua a pārahi ai ’oia i ni’a i te pārahira’a ha’avāra’a.

2 ’E ’ua ’āmahamaha te mau ta’ata ; ’e ’ua fa’ata’a ’ē atu ra rātou te tahi i te tahi i roto i te tahi mau ’ōpū ; te ta’ata tāta’itahi ’e tōna ’utuāfare ’e tōna fēti’i ’e tōna mau hoa ; ’e ’ua nā reira rātou i te ha’amou i te fa’aterera’a hau fenua.

3 ’E nā te mau ’ōpū tāta’itahi i mā’iti i te ra’atira ’e ’aore rā i te ta’ata fa’atere i ni’a a’e ia rātou ; ’e ’ua nā reira rātou i te rirora’a ’ei mau ’ōpū ’e ’ei mau ta’ata fa’atere nō te mau ’ōpū.

4 I teienei, inaha, ’aore roa e ta’ata i rotopū ia rātou e ’ere tōna ’utuāfare i te mea rahi, e tōna fēti’i ’e tōna mau hoa ; nō reira ’ua riro tō rātou mau ’ōpū ’ei mea rahi roa.

5 I teienei, ’ua oti pā’āto’a teie i te ravehia, ’e ’aita atu ra e tama’i i rotopū ia rātou i reira ; ’e ’ua tae mai teie mau ’ohipa ’ī’ino ato’a i ni’a i te mau ta’ata nō te mea ’ua auraro rātou i te mana o Sātane.

6 ’E ’ua mou te mau arata’ira’a nō te hau fenua, te tumu nō te pupu ’ohipa huna ïa a te mau hoa ’e te mau fēti’i o te mau ta’ata i taparahi i te mau peropheta.

7 ’E ’ua fa’atupu rātou i te mārōra’a rahi i ni’a i te fenua, ’e nō reira ho’i ’ua riro te tufa’a rahi o te feiā parauti’a ’ei feiā parauti’a ’ore ; ’oia ïa, e mea iti roa te ta’ata parauti’a i rotopū ia rātou.

8 ’E nō reira ’aita nā matahiti e ono i hope i fāriu ’ē atu ai te pae rahi o te mau ta’ata i tō rātou huru parauti’a, mai te ’ūrī e ho’i atu i tōna ra rūa’i, ’e ’aore rā mai te maia’a pua’a e ho’i atu i tōna ra tāvirivirira’a i roto i te vari.

9 I teienei, ’ua ha’aputuputu ’āmui mai teie pupu ’ohipa huna ia rātou iho, ’e nā rātou ho’i i fa’atae mai i te mau ’ohipa ’ī’ino rahi i ni’a i te mau ta’ata, ’e ’ua mā’iti rātou i te hō’ē ta’ata i parauhia e rātou ’o Iakoba ’ei upo’o fa’atere nō rātou.

10 ’E ’ua pi’i rātou iāna ’ei ari’i nō rātou ; nō reira ’ua riro ’oia ’ei ari’i i ni’a i teie pupu parauti’a ’ore ; ’e ’o ’oia ho’i te hō’ē ta’ata rahi ’o tei fa’a’ite i tōna mana’o fa’ahapa i te mau peropheta ’o tē fa’a’ite pāpū ra i te parau nō Iesu.

11 ’E i muri a’era, e ’ere rātou i te mea rahi atu i tō te mau ’ōpū o te mau ta’ata, ’o tei ’āmui-tāhō’ē-hia, ’e nā tō rātou feiā fa’atere i fa’ati’a i tā rātou mau ture, ’ia au i tōna ihora ’ōpū ; ’āre’a rā e ’enemi rātou te tahi i te tahi, noa atu ā e ’ere rātou i te feiā parauti’a, ’e ’ua tāhō’ēhia ho’i rātou i roto i tō rātou ’ino’ino rahi i te feiā i fafau nō te ha’amou i te fa’aterera’a hau fenua.

12 Nō reira, ’ia ’ite a’era Iakoba ē ’ua rahi atu tō rātou mau ’enemi ia rātou, ’e nō te mea ho’i ē ’o ’oia te ari’i nō taua pupu ra, nō reira ’ua fa’aue atu ra ’oia i tōna mau ta’ata ’ia horo atu rātou i te pae hope’a roa o te fenua i te pae apato’erau, ’e i reira ’a patu ai i te hō’ē bāsileia nō rātou iho, ē tae roa atu ’ua ’āmui mai te feiā ’ōrurehau ia rātou, (’e ’ua tāvaimanino atu ’oia ia rātou ’e tē vai ra e rave rahi feiā ’ōrurehau) ’e e riro rātou ’ei mea pūai roa nō te ’aro atu i te mau pupu o te mau ta’ata ; ’e ’ua nā reira atu ra rātou.

13 ’E nō tō rātou haere-’oi’oi-ra’a atu, ’aita atu ra rātou i roa’ahia atu, ’e ’ua reva atu ra rātou i te vāhi ’aita rātou e roa’ahia e te mau ta’ata. ’E ’o te hope’a te reira nō te toru ’ahuru o te matahiti ; ’e mai te reira te huru nō te mau ’ohipa a te mau ta’ata o Nephi.

14 ’E i muri a’era, i te toru ’ahuru ’e ma hō’ē o te matahiti, ’ua tātufa’ahia rātou i roto i te tahi mau ’ōpū, te ta’ata tāta’itahi mai te au i tōna ihora ’utuāfare, fēti’i ’e mau hoa ; ’āre’a rā ’ua tāhō’ē rātou i te parau ē ’aita rātou e haere atu e ’aro te tahi i te tahi ; ’aita rā rātou i tāhō’ēhia i roto i tā rātou mau ture ’e te huru nō te fa’aterera’a hau, nō te mea ’ua fa’ati’ahia te reira mai te au i te mau mana’o o tō rātou mau ra’atira ’e tō rātou feiā fa’atere. ’Ua fa’ati’a rā rātou i te mau ture pāpū ’ia ’ore te hō’ē ’ōpū ’ia ha’ape’ape’a atu i te tahi, ’e nō reira ho’i ’ua vai te hau i ni’a i te fenua ; ’āre’a rā ’ua fāriu ’ē tō rātou ’ā’au i te Fatu tō rātou Atua, ’e ’ua pēhi rātou i te mau peropheta ’e ’ua ti’avaru atu ia rātou mai rotopū atu ia rātou.

15 ’E i muri a’era, nō te mea ’ua fā mai te mau melahi ia Nephi—’e ’ua fa’aro’o ho’i ’oia i te reo o te Fatu, nō reira nō te mea ’ua ’ite mata ’e ’ua ’ite pāpū ’oia i te mau melahi, ’e nō te mea ho’i ’ua hōro’ahia mai te mana iāna ’ia ti’a iāna ’ia ’ite i te mau ’ohipa mo’a a te Mesia, ’e nō te mea ’ua ’ite mata ’oia i tō rātou haere-’oi’oi-ra’a, mai te parauti’a mai ē tae atu ai i tā rātou mau ’ohipa ’ī’ino ’e te mau ’ohipa vi’ivi’i ra.

16 Nō reira, nō tōna ’oto i te ’eta’eta o tō rātou ’ā’au ’e te matapō o tō rātou ’ā’au—’ua haere atu ra ’oia i rotopū ia rātou i taua iho matahiti ra, ’e ’ua ha’amata ihora i te fa’a’ite pāpū atu ma te mata’u ’ore i te parau nō te tātarahapara’a ’e te ha’amatarara’a i te mau hara nā roto i te fa’aro’o i te Fatu ra ia Iesu Mesia.

17 ’E ’ua ha’api’i atu ’oia i te mau mea e rave rahi ia rātou ; ’e ’aita e ti’a i te mau mea ato’a ’ia pāpa’ihia, ’e ’aita ho’i e au ’ia pāpa’ihia te tahi pae ana’e ; nō reira ’aita te reira i pāpa’ihia i roto i teie nei buka. ’E ’ua ha’api’i atu Nephi ma te mana ’e te ha’amanara’a rahi.

18 ’E i muri a’era, ’ua riri a’era rātou iāna, nō te mea ’ua hau atu tōna mana i tō rātou, ’e ’aita roa ho’i i ti’a ia rātou ’ia ti’aturi ’ore i tāna mau parau, ’e nō te rahi o tōna fa’aro’o i te Fatu ra ia Iesu Mesia ’ua tāvini te mau melahi iāna i te mau mahana ato’a.

19 ’E nā roto i te i’oa o Iesu, ’ua ti’avaru ’oia i te mau diabolo ’e te mau vārua ’ino i rāpae ; ’e ’ua fa’ati’a mai ’oia i tōna taea’e mai te pohe mai i muri a’e i tōna pēhira’ahia i te ’ōfa’i e te mau ta’ata ’e tōna pohera’a.

20 ’E ’ua ’ite mata ’e ’ua ’ite pāpū te mau ta’ata i te reira, ’e ’ua riri a’era rātou iāna nō tōna mana ; ’e ’ua rave ato’a ’oia i te tahi atu ā mau semeio e rave rahi i mua i te aro o te mau ta’ata, nā roto i te i’oa o Iesu.

21 ’E i muri a’era, ’ua hope ihora te toru ’ahuru ’e ma hō’ē o te matahiti, ’e ’ua iti roa te ta’ata i fa’afāriuhia mai i te Fatu ; ’āre’a rā te pae rahi ’o tei fa’afāriuhia mai, ’ua fa’a’ite pāpū rātou i te mau ta’ata ē ’ua tae mai te mana ’e te Vārua o te Atua i ni’a iho ia rātou, ’e i vai na ho’i te reira i roto ia Iesu Mesia, ’o tā rātou i ti’aturi na.

22 ’E ’o rātou e rave rahi ’o tei ti’avaruhia te mau diabolo i rāpae ia rātou, ’e ’o tei fa’aorahia i tō rātou mau ma’i ’e tō rātou mau ’ati, ’ua fa’a’ite pāpū atu ïa rātou i te mau ta’ata ē, ’ua tae mai te Vārua o te Atua i ni’a ia rātou ’e ’ua ora rātou ; ’e ’ua fa’a’ite ato’a atu rātou i te mau tāpa’o ’e ’ua rave ho’i i te mau semeio i rotopū i te mau ta’ata.

23 ’E ’o te hope’a ato’a te reira nō te toru ’ahuru ’e ma piti o te matahiti. ’E ’ua ti’aoro atu ra Nephi i te mau ta’ata i te ha’amatara’a nō te toru ’ahuru ’e ma toru o te matahiti ; ’e ’ua a’o atu ’oia ia rātou i te parau nō te tātarahapara’a ’e te ha’amatarara’a i te mau hara.

24 I teienei, tē hina’aro nei au ’ia ha’amana’o ato’a ’outou ē, ’o rātou pā’āto’a ’o tei tātarahapa ’ua bāpetizohia ïa i te pape.

25 Nō reira, tē vai ra te mau ta’ata i fa’atōro’ahia e Nephi nō teie nei ’ohipa mo’a, ’ia ti’a i te mau ta’ata ato’a ’o tē haere mai ia rātou ’ia bāpetizohia i te pape, ’ei ’ite ’e ’ei fa’a’itera’a pāpū i mua i te Atua, ’e i te mau ta’ata ato’a ho’i ē, ’ua tātarahapa rātou ’e ’ua fāri’i i te ha’amatarara’a nō tā rātou ra mau hara.

26 ’E tē vai ra e rave rahi i te ha’amatara’a nō teie matahiti ’o tei bāpetizohia nō te tātarahapara’a ; ’e nō reira ’ua hope te pae rahi o te matahiti.