Pene 29
’Ua riro te taera’a mai o te Buka a Moromona ’ei tāpa’o ē ’ua ha’amata te Fatu i te ha’aputuputu ia ’Īserā’ela ’e ’ia fa’atupu i tāna mau fafaura’a—Te feiā ’o tē pāto’i i tāna mau heheura’a ’e tāna mau hōro’ara’a nō te mau mahana hope’a e ’anatemahia ïa. Fātata 34–35 M.M.
1 ’E i teienei, inaha, tē parau atu nei au ia ’outou ē, ’ia tae i te tau e au i tō te Fatu pa’ari, e tae teie mau parau i te mau ’Ētene, mai te au i tāna parau, ’ei reira ’outou e ’ite ai ē, ’ua ha’amata a’ena te fafaura’a tā te Metua i fafau i te mau tamari’i o ’Īserā’ela i te tupu, nō ni’a i tō rātou fa’aho’ira’ahia i tō rātou mau fenua ’āi’a.
2 ’E e ’ite ’outou ē, e tupu iho ā te mau parau a te Fatu ’o tei parauhia na e te mau peropheta mo’a ra ; ’e ’eiaha roa ho’i ’outou ’ia parau ē, tē fa’atāere ra te Fatu i te mahana nō tōna haerera’a mai i te mau tamari’i o ’Īserā’ela.
3 ’E ’eiaha ho’i ’outou ’ia mana’o i roto i tō ’outou ’ā’au ē, e mea faufa’a ’ore te mau parau i parauhia na, inaha ho’i, e ha’amana’o te Fatu i tāna fafaura’a ’o tāna i fafau atu i tōna ra mau ta’ata nō te ’utuāfare o ’Īserā’ela.
4 ’E ’ia ’ite ’outou i teie nei mau parau i te tupura’a i rotopū ia ’outou, ’eiaha ’outou e vahavaha i te mau ravera’a a te Fatu, ’e tei tōna rima ’atau ho’i tāna ’o’e nō tāna ha’avāra’a parauti’a ; ’e inaha, i taua mahana ra, ’ia vahavaha atu ’outou i tāna ra mau ravera’a, e ro’ohia ïa ’outou i te reira.
5 ’Auē ho’i ’oia ’o tē vahavaha atu i te mau ’ohipa a te Fatu ; ’oia ïa, ’auē ho’i ’oia ’o tē huna i te Mesia ’e i tāna mau ’ohipa !
6 ’Oia ïa, ’auē ho’i ’oia ’o tē huna i te mau heheura’a a te Fatu, ’e ’o tē parau ē, ’aita te Fatu e fa’atupu fa’ahou ra i tāna mau ’ohipa nā roto i te heheura’a, ’e ’aore rā nā roto i te tohu, ’e ’aore rā nā roto i te mau hōro’ara’a, ’e ’aore rā nā roto i te parau i te mau reo ’e’ē, ’e ’aore rā nā roto i te mau fa’aorara’a i te feiā ma’i, ’e ’aore rā nā roto i te mana o te Vārua Maita’i !
7 ’Oia ïa, ’auē ho’i ’oia ’o tē parau i taua mahana ra ē, nā roto i te hina’aro ’ia faufa’ahia ’oia, e’ita roa e ti’a ia Iesu Mesia ’ia rave i te hō’ē semeio ; ’e ’o ’oia ’o tē nā reira e riro ïa mai te tamaiti o te pohe, ’e nōna ra ’aita roa ïa e aroha e vai ra, ’ia au i te parau a te Mesia !
8 ’Oia ïa, ’eiaha roa ’outou e fa’a’ino fa’ahou ā, ’eiaha ato’a e vahavaha atu, ’eiaha ato’a e tāhitohito atu i te mau ’āti Iuda, ’eiaha ato’a i te tahi noa atu toe’a nō te ’utuāfare o ’Īserā’ela ; inaha ho’i, tē ha’amana’o ra te Fatu i tāna fafaura’a ia rātou, ’e e nā reira ’oia ia rātou ’ia au i tāna i tapu.
9 Nō reira, ’eiaha roa ’outou e mana’o ē, e ti’a ia ’outou ’ia huri i te rima ’atau o te Fatu i te pae ’aui, ’ia ’ore ’oia e fa’atae mai i te ha’avāra’a nō te fa’atupu i te fafaura’a ’o tāna i fafau i te ’utuāfare nō ’Īserā’ela.