1 I teienei, i muri a’era, i te ono o te matahiti nō te fa’aterera’a a te mau ha’avā i ni’a i te mau ta’ata o Nephi ra, ’aita roa te mau mārōra’a ’e te mau tama’i i tupu i ni’a i te fenua nō Zarahemela.

2 ’Āre’a rā ’ua fāri’i te mau ta’ata i te ’oto rahi, ’oia ïa, i te ’oto rahi roa nō tō rātou mau taea’e i pohe, ’e ’oia ato’a nō tā rātou mau nana māmoe e mau nana pua’atoro i pau, ’e ’oia ato’a nō tā rātou mau fa’a’apu sītona i pau, i te ta’ata’ahihia ’e i te ha’amouhia e te mau ’āti Lamana.

3 ’E nō te rahi o tō rātou mau ’ati i ’oto ai te mau ta’ata ato’a ; ’e ’ua mana’o rātou e mau ha’avāra’a teie ’o tā te Atua i fa’atae mai i ni’a ia rātou nō tā rātou mau ’ohipa ’ī’ino ’e tā rātou mau ’ohipa vi’ivi’i ; nō reira i araara ai rātou i te ha’amana’ora’a i tā rātou ’ohipa.

4 ’E ’ua ha’amata ihora rātou i te ha’amau māite atu i te ’ēkālesia ; ’oia ïa, e rave rahi ho’i te mau ta’ata i bāpetizohia i roto i te mau pape nō Sidona, ’e ’ua ’āmuihia i roto i te ’ēkālesia a te Atua ; ’oia ïa, ’ua bāpetizohia rātou e te rima o Alama, ’oia tei fa’atōro’ahia ’ei tahu’a rahi i ni’a i te mau ta’ata o te ’ēkālesia e te rima o tōna ra metua tāne ’o Alama.

5 ’E i muri a’era, ’ia tae i te hitu o te matahiti nō te fa’aterera’a a te mau ha’avā, i ’āmui mai ai e toru tauatini e pae hānere ta’ata ia rātou iho i roto i te ’ēkālesia a te Atua ra, ’e ’ua bāpetizohia ho’i rātou. ’E ’o te hope’a te reira nō te hitu o te matahiti nō te fa’aterera’a a te mau ha’avā i ni’a i te mau ta’ata o Nephi ; ’e ’ua vai tāmau noa te hau ē hope noa atu taua tau ra.

6 ’E i muri a’era, ’ia tae i te va’u o te matahiti nō te fa’aterera’a o te mau ha’avā, ’ua ha’amata ihora te te’ote’o i te tupu i roto i te mau ta’ata o te ’ēkālesia, nō tā rātou mau tao’a rahi, ’e tā rātou mau tirita maita’i, ’e tā rātou mau ’ahu paruai maita’i roa, ’e nō tā rātou mau nana māmoe ’e mau nana pua’atoro huru rahi, ’e tā rātou ’auro ’e tā rātou ’ārio, ’e te mau huru tao’a faufa’a rahi ato’a i roa’a mai ia rātou nā roto i tā rātou ’ohipa itoito ; ’e nā roto i teie mau mea ato’a ’ua fa’ateiteihia rātou e te te’ote’o o tō rātou ’ā’au, ’e ’ua ha’amata rātou i te ’ō’omo i te mau ’ahu moni rahi roa.

7 I teienei ’o teie te tumu i ’oto roa ai Alama, ’oia ïa, ’e te tahi pae rahi o te mau ta’ata tā Alama i fa’atōro’a ’ei mau ’orometua, ’ei mau tahu’a, ’e ’ei mau peresibutero i ni’a i te ’ēkālesia ; ’oia ïa, e rave rahi tō rātou i ’oto rahi nō te mau ’ohipa ’ī’ino tā rātou i ’ite i te tupura’a i rotopū i tō rātou mau ta’ata.

8 ’E ’ua ’ite ’e ’ua hi’o ho’i rātou ma te ’oto rahi ’e ’ua ha’amata te mau ta’ata o te ’ēkālesia i te fa’ateiteihia i roto i te te’ote’o o tō rātou ’ā’au, ’e i te tu’u atu ho’i i tō rātou ’ā’au i ni’a i te mau tao’a rahi ’e i ni’a i te mau mea faufa’a ’ore o te ao nei, ’e ’ua ha’amata rātou i te tāhitohito rātou te tahi i te tahi, ’e ’ua ha’amata ho’i rātou i te hāmani ’ino i te mau ta’ata ’o tei ’ore i ti’aturi i tō rātou iho mana’o ’e tō rātou iho hina’aro.

9 ’E nō reira, i te va’u o te matahiti nō te fa’aterera’a a te mau ha’avā, ’ua tupu te mau tama’ira’a rahi i rotopū i te mau ta’ata o te ’ēkālesia ; ’oia ïa, tē vai ra te fe’i’i, ’e te mārōra’a, ’e te tāiroiro, ’e te mau hāmani-’ino-ra’a, ’e te te’ote’o ho’i ’o tei hau roa atu i te te’ote’o i tō te mau ta’ata i rāpae i te ’ēkālesia a te Atua.

10 ’E ’o te hope’a te reira nō te va’u o te matahiti nō te fa’aterera’a a te mau ha’avā ; ’e ’ua riro te mau ’ohipa ’ī’ino a te ’ēkālesia ’ei turorira’a nō te feiā i rāpae i te ’ēkālesia ; ’e ’ua paruparu a’era te ’ēkālesia i tōna haerera’a i mua.

11 ’E i muri a’era, i te ha’amatara’a nō te iva o te matahiti, ’ua ’ite Alama i te ’ohipa ’ino rahi i roto i te ’ēkālesia, ’e ’ua ’ite ato’a ’oia ē, nō te hi’ora’a tano ’ore o te ’ēkālesia ’ua ha’amata te reira i te arata’i i te feiā ti’aturi ’ore i te rave i te hō’ē tufa’a nō te mau ’ohipa ’ī’ino i te tahi atu, ’e tē fa’atupu ra te reira i te pohe o te mau ta’ata.

12 ’Oia ïa, ’ua ’ite ’oia i te ’aifāito ’ore rahi i rotopū i te mau ta’ata, tē fa’ateitei ra te tahi pae i tō rātou te’ote’o, ma te vahavaha ia vetahi ’ē, ’e ma te huri atu i tō rātou tua i te feiā veve ’e te feiā taha’a noa, ’e te feiā po’ia, ’e te feiā po’ihā, ’e te feiā ma’i ’e tei fāri’i i te ’ati.

13 I teienei ’o teie te tumu rahi nō te ’oto rahi i rotopū i te mau ta’ata, ’e ’ua fa’aha’eha’a rā te tahi pae ia rātou iho, ma te tauturu atu i te mau ta’ata i tei au ’ia tauturuhia e rātou ; mai te hōro’ara’a atu i te tahi tufa’a nō tā rātou tao’a i te feiā veve ’e te feiā nava’i ’ore, te fa’a’amura’a i tei po’ia, ’e tei fa’a’oroma’i i te mau huru ’ati ato’a, nō te ’ōpuara’a a te Mesia, ’o tē tae mai mai te au i tā te vārua nō te tohu ra.

14 Ma te hi’o atu i mua i taua mahana ra, nō te fāri’i i te ha’amatarara’a i tā rātou ra mau hara ; ma te ’ī i te ’oa’oa rahi nō te ti’afa’ahoura’a o te feiā pohe i te mau tā’amu nō te pohe ra, mai te au i te hina’aro ’e te mana ’e te fa’aorara’a a Iesu Mesia.

15 ’E i teienei, i muri a’era, ’ua ’ite Alama i te mau ’ati o te mau ta’ata ha’eha’a i pe’e atu i te Atua, ’e te mau hāmani-’ino-ra’a i ha’apu’ehia i ni’a iho ia rātou ’e te toe’a o tōna ra mau ta’ata, ’e ’ua ’ite ho’i ’oia i tō rātou ’aifāito ’ore, nō reira ’ua ’oto roa ihora ’oia ; ’āre’a rā ’aita te Vārua o te Fatu i fa’aru’e iāna.

16 ’E ’ua mā’iti ihora ’oia i te hō’ē ta’ata ’aravihi nō rotopū mai i te mau peresibutero o te ’ēkālesia, ’e ’ua hōro’a atu ’oia i te mana iāna mai te au i te reo o te mau ta’ata, ’ia ti’a iāna ’ia ha’amana i te mau ture mai te au i te mau ture i hōro’ahia na, ’e ’ia fa’a’ohipa māite i te reira mai te au i te mau ’ohipa ’ī’ino ’e te mau hara a te mau ta’ata.

17 ’O Nephiha te i’oa o teie nei ta’ata, ’e ’ua mā’itihia ’oia ’ei ha’avā rahi ; ’e ’ua pārahi ’oia i ni’a iho i te pārahira’a ha’avā nō te ha’avā ’e nō te fa’atere i te mau ta’ata.

18 I teienei, ’aita Alama i hōro’a atu i te tōro’a tahu’a rahi iāna i ni’a i te ’ēkālesia, ’ua tāpe’a noa rā ’oia i te tōro’a tahu’a rahi nōna iho ; ’ua hōro’a atu rā ’oia i te pārahira’a ha’avā ia Nephiha.

19 ’E ’ua nā reira ’oia ’ia ti’a iāna iho ’ia haere atu i rotopū i tōna ra mau ta’ata, ’e i rotopū ho’i i te mau ta’ata o Nephi, ’ia ti’a iāna ia a’o atu i te parau a te Atua ia rātou, nō te fa’ati’arepu ia rātou ia ha’amana’o i tā rātou ’ohipa, ’ia ti’a iāna ’ia huti i raro i te mau huru te’ote’o ato’a, ’e te ’ohipa tāviri, ’e te mau huru mārōra’a ato’a i rotopū i tōna mau ta’ata, nā roto i te parau a te Atua, ’e ’aita ’oia i ’ite i te rāve’a e fa’afāriuhia ai rātou, maori rā nā roto i te fa’a’itera’a atu i te ’itera’a pāpū nō te fa’ahapara’a atu ia rātou.

20 ’E nō reira i te ha’amatara’a nō te iva o te matahiti nō te fa’aterera’a a te mau ha’avā i ni’a i te mau ta’ata o Nephi, ’ua hōro’a atu Alama i te pārahira’a ha’avā ia Nephiha, ’e ’ua ha’apa’o noa ihora ’oia i te autahu’ara’a rahi nō te fa’anahora’a mo’a a te Atua, ’ei fa’a’itera’a pāpū i te parau, mai te au i te vārua nō te heheura’a ’e te tohu.