1 ’E i teienei, i muri a’era, i te ha’amatara’a nō te piti ’ahuru ’e ma pae o te matahiti nō te fa’aterera’a a te mau ha’avā i ni’a a’e i te mau ta’ata o Nephi, ’ua fa’atupu rātou i te hau i rotopū i te mau ta’ata o Lehi ’e te mau ta’ata o Morianetona nō ni’a i tō rātou mau fenua, ’e ’ua ha’amata i te piti ’ahuru ’e ma pae o te matahiti ma te hau.

2 ’Āre’a rā, ’aita rātou i tāpe’a maoro i te hau i ni’a te fenua, ’ua tupu ihora te mārōra’a i rotopū i te mau ta’ata nō ni’a i te ha’avā rahi ra ’o Pahorana ; inaha ho’i, tē vai ra te tahi pae o te mau ta’ata ’o tei hina’aro ’ia fa’ahuru-’ē-hia te tahi mau vāhi iti ta’a ’ē nō te ture.

3 Inaha rā, e’ita ’o Pahorana e fa’ahuru ’ē ’e ’aore rā e fa’ati’a ’ia fa’ahuru-’ē-hia te ture ; nō reira, ’aita ’oia i fa’aro’o i te feiā ’o tei fa’atae i tō rātou mau hina’aro nā roto i tā rātou mau parau anira’a nō ni’a i te fa’ahuru-’ē-ra’a i te ture.

4 Nō reira, ’ua riri a’era te feiā ’o tei hina’aro ’ia fa’ahuru-’ē-hia te ture iāna, ’e ’ua hina’aro ihora rātou ’ia ’ore ’oia ’ia vai noa ’ei ha’avā rahi i ni’a i te fenua ; nō reira ’ua tupu ihora te mārōra’a rahi nō ni’a i te reira, ’aita rā te ha’amani’ira’a toto.

5 ’E i muri a’era, ’o rātou ’o tei hina’aro ’ia ’īritihia Pahorana mai ni’a mai i te pārahira’a ha’avā, ’ua parauhia ïa rātou e mau ta’ata-hina’aro-ari’i, nō te mea ’ua hina’aro rātou ’ia fa’ahuru-’ē-hia te ture, ’ia ti’a ia rātou ’ia ha’amou i te hau ti’amā ’e ’ia fa’ati’a i te ari’i i ni’a i te fenua.

6 ’E ’o rātou ’o tei hina’aro ’ia fa’aea noa ’o Pahorana ’ei ha’avā rahi i ni’a i te fenua, ’ua ma’iri rātou i tō rātou i’oa e feiā-ti’amā ; ’e mai te reira ho’i te fa’ata’a-’ē-ra’a i rotopū ia rātou ; ’e ’ua tapu te feiā-ti’amā ’e ’ua fafau ho’i ’ia tāpe’a noa i tō rātou ti’amāra’a ’e te mau mea e maita’i ai tā rātou ha’apa’ora’a nā roto i te hō’ē hau ti’amā.

7 ’E i muri a’era, ’ua fa’a’āfarohia tā rātou mārōra’a nā roto i te reo o te nūna’a. ’E i muri a’era, ’ua tae mai ra te reo o te nūna’a ’ia ravehia te hina’aro o te feiā-ti’amā, ’e ’ua fa’aea noa Pahorana i ni’a i te pārahira’a ha’avā, ’e ’ua fa’atupu te reira i te ’oa’oa i rotopū i te mau taea’e o Pahorana, ’e i te mau ta’ata nō te ti’amā ato’a ho’i, ’e ’ua ha’amāmū te reira i te mau ta’ata-hina’aro-ari’i, ’e ’aita atu ra rātou i pāto’i mai, ’ua tītauhia rā rātou ’ia tāpe’a noa i te tumu nō te ti’amāra’a.

8 I teienei, te feiā i hina’aro ’ia mā’itihia te mau ari’i, ’o te feiā ti’ara’a teitei ïa ; ’e ’ua tītau rātou ’ia fa’aari’ihia rātou ; ’e ’ua turuhia ho’i rātou e te mau ta’ata tei tītau i te mana ’e te ha’amanara’a i ni’a iho i te mau ta’ata.

9 Inaha rā, e taime fifi roa teie ’ia vai te reira huru mārōra’a i rotopū i te mau ta’ata o Nephi ; inaha ho’i, ’ua fa’ati’arepu fa’ahou ’Amalikia i te ’ā’au o te mau ta’ata o te mau ’āti Lamana e ’aro i te mau ta’ata o te mau ’āti Nephi, ’e tē ha’aputuputu mai ra ’oia i te mau fa’ehau nō te mau vāhi ato’a o tōna ra fenua, ’e tē tātua ra ia rātou i te mauha’a tama’i, ’e tē fa’aineine ra ia rātou nō te ’aro atu ma te itoito rahi ; i tapu na ho’i ’oia ’ia inu i te toto o Moroni.

10 Inaha rā, e ’ite tātou ē, ’ua parau rū noa ’oia ma te feruri ’ore ’a tapu ai ’oia ; ’āre’a rā, ’ua fa’aineine ’oia iāna iho ’e i tōna mau nu’u fa’ehau nō te haere mai e ’aro i te mau ’āti Nephi.

11 I teienei, ’aita tōna mau nu’u fa’ehau i rahi roa atu mai tō te mātāmua ra, nō te mea e rave rahi tauatini tei taparahihia e te rima o te mau ’āti Nephi ; noa atu ā tō rātou rahira’a i pohe, ’ua ha’aputuputu ’āmui mai ’o ’Amalikia i te hō’ē nu’u fa’ehau rahi roa, ’e nō reira ’aita atu ra ’oia i mata’u ’ia haere mai i raro i te fenua ra nō Zarahemela.

12 ’Oia ïa, ’ua haere mai ’Amalikia iho i raro ’ei upo’o fa’atere nō te mau ’āti Lamana. ’E tei te piti ’ahuru ’e ma pae o te matahiti nō te fa’aterera’a a te mau ha’avā ; ’e tei taua ihora ho’i taime i ha’amata ai rātou i te fa’ahau i te mau ’ohipa nō tā rātou ra mau mārōra’a nō ni’a i te ha’avā rahi ra ’o Pahorana.

13 ’E i muri a’era, ’ia ’ite a’era te mau ta’ata i parauhia e mau ta’ata-hina’aro-ari’i ē, tē haere mai ra te mau ’āti Lamana i raro nō te ’aro mai ia rātou, ’ua ’oa’oa a’era tō rātou ’ā’au ; ’e ’aita atu ra rātou i hina’aro ’ia rave i te mauha’a tama’i, ’e ’ua riri roa a’era ho’i rātou i te ha’avā rahi, ’e i te mau ta’ata nō te ti’amā, ’e ’aita atu ra ïa rātou i rave i te mau mauha’a tama’i nō te pāruru i tō rātou fenua.

14 ’E i muri a’era, ’ia ’ite a’era Moroni i te reira, ’e ’ia ’ite ato’a a’era ho’i ’oia ē, tē haere mai ra te mau ’āti Lamana i roto i te mau ’ōti’a o te fenua, ’ua riri rahi a’era ’oia nō te ’eta’eta o taua mau ta’ata ra ’o tāna i fa’aitoito ma te ’ana’anatae ’ia fa’aora ia rātou ; ’oia ïa, ’ua riri rahi a’era ’oia ; ’ua ’ī roa a’era tōna vārua i te riri ia rātou.

15 ’E i muri a’era, ’ua fa’atae atu ra ’oia i te anira’a i te tāvana rahi o te fenua, nā roto i te reo o te nūna’a, i te anira’a iāna ’ia tai’o ’oia i te reira, ’e ’ia hōro’a mai ’oia i te mana iāna (ia Moroni) nō te ha’avī atu i te feiā ’ōrurehau ’ia pāruru i tō rātou fenua, ’e ’aore rā ’ia taparahi atu ia rātou.

16 ’O tāna ho’i teie ’ōpuara’a mātāmua ’ia fa’a’ore i te mau mārōra’a ’e te mau tāivara’a i rotopū i te mau ta’ata ; inaha ho’i, nā te reira i fa’atupu a’enei i te mau ha’amoura’a ato’a i tupu i ni’a ia rātou. ’E i muri a’era, ’ua fa’ati’ahia mai te reira mai te au i te reo o te nūna’a.

17 ’E i muri a’era, ’ua fa’aue atu ra Moroni i tōna nu’u fa’ehau ’ia haere atu rātou e ’aro i taua mau ta’ata-hina’aro-ari’i ra, ’ia hutihia i raro tō rātou ra te’ote’o ’e tō rātou mana’o ari’i ’e ’ia fa’aha’aha’a-roa-hia rātou i raro i te repo, ’e ’aore rā ’ia rave rātou i te mau mauha’a tama’i ’e ’ia pāturu i te ’ohipa nō te ti’amāra’a e ti’a ai.

18 ’E i muri a’era, ’ua haere ti’a atu ra te mau nu’u fa’ehau nō te ’aro atu ia rātou ; ’e ’ua huti i raro i tō rātou ra te’ote’o e tō rātou ra mana’o ari’i ; ’e nō reira ’a fa’ateitei mai ai rātou i tā rātou mau mauha’a tama’i nō te ’aro mai i te mau ta’ata o Moroni, ’ua tāpūhia rātou i raro ’e ’ua fa’aha’aha’a-roa-hia i raro i te repo.

19 ’E i muri a’era, ’ua noa’ahia e maha tauatini o taua feiā ’ōrurehau ra tei tāpūhia i raro i te ’o’e ; ’e tō rātou feiā fa’atere tei ’ore i taparahihia i roto i te ’arora’a, ’ua ravehia ïa rātou ’e ’ua tu’uhia i roto i te fare tāpe’ara’a, ’aita ho’i e taime nō te ha’avā ia rātou i taua taime ra.

20 ’E te toe’a o taua feiā ’ōrurehau ra, ’ua fāri’i ïa rātou i te reva nō te ti’amāra’a, ’ia ’ore rātou ’ia tā’irihia i raro i te repo i te ’o’e, ’e ’ua fa’auehia rātou ’ia huti i te reva nō te ti’amāra’a i ni’a iho i tō rātou mau pare, ’e i roto i tō rātou mau ’oire, ’e ’ia rave i te mauha’a tama’i nō te pāruru i tō rātou fenua.

21 ’E ’ua nā reira Moroni i te ha’amou i taua mau ta’ata-hina’aro-ari’i ra, ’e ’aita atu ra e ta’ata toe nō roto mai i taua pupu ta’ata-hina’aro-ari’i ra ; ’e ’ua nā reira ho’i ’oia i te fa’a’ore i te ’eta’eta ’e te te’ote’o o taua mau ta’ata ra, ’o tei poro na ē, e toto ari’i tō rātou ; ’āre’a rā ’ua tu’uhia rātou i raro ’ia fa’aha’eha’a ia rātou iho mai tō rātou mau taea’e, ’e ’ia tama’i pūai atu nō tō rātou ti’amāra’a i te fa’atītīra’a.

22 Inaha, i muri a’era, ’a rave noa ai Moroni i te rāve’a nō te fa’a’ore i te mau ’arora’a ’e te mau mārōra’a i rotopū i tōna ra mau ta’ata, ’e ’a ha’avī ai ia rātou i te hau ’e i te peu maitata’i, ’e ’a fa’aineine ai ’oia i te mau fa’aturera’a nō te fa’aineine ia rātou ’ia ’aro atu i te mau ’āti Lamana, inaha ho’i, ’ua tae a’ena mai te mau ’āti Lamana i te fenua ra nō Moroni, ’e tei te mau fenua te reira nā te pae miti.

23 ’E i muri a’era, ’aita atu ra i nava’i te pūai o te mau ’āti Nephi i te ’oire nō Moroni ; nō reira ’ua tīahi ’ē atu ra ’Amalikia ia rātou, ma te taparahi e rave rahi. ’E i muri a’era ’ua haru noa ihora ’Amalikia i te ’oire ; ’oia ïa, ’e tō rātou ra mau pā pa’ari ato’a.

24 ’E ’o rātou ho’i ’o tei horo ’ē atu i rāpae i te ’oire ra nō Moroni, ’ua tae atu ïa i te ’oire ra nō Nephiha ; e ’oia ato’a ’ua ha’aputuputu ’āmui mai ra te mau ta’ata o te ’oire ra nō Lehi ia rātou iho, ’e ’ua fa’aineine ihora ’ia ineine nō te fārerei i te mau ’āti Lamana i roto i te ’arora’a.

25 ’Āre’a rā, i muri a’era, ’aita ’Amalikia i fa’ati’a i te mau ’āti Lamana ’ia haere nō te ’aro atu i te ’oire ra nō Nephiha, ’ua tāpe’a rā ia rātou i raro ’ia pārahi noa i te pae miti, ma te vaiiho noa i te tahi mau ta’ata i roto i te mau ’oire nō te tāpe’a noa ’e nō te pāruru i te reira.

26 ’E ’ua nā reira ’oia i te haere atu ma te haru i te mau ’oire e rave rahi, te ’oire ra nō Nephiha, ’e te ’oire ra nō Lehi, te ’oire ra nō Morianetona, ’e te ’oire ra nō Omonera, ’e te ’oire ra nō Gida, ’e te ’oire ra nō Muleka, ’e tei te mau fenua nō te pae hiti’a o te rā taua mau ’oire ra i te pae miti.

27 ’E i nā reira ho’i te mau ’āti Lamana i te noa’ara’a te mau ’oire e rave rahi nā roto i te ha’avare a ’Amalikia, ’e nā roto ho’i i tō rātou mau nu’u fa’ehau e rave rahi, ’ua ’āua-pa’ari-hia taua mau ’oire ra mai te au i te mau pā pa’ari a Moroni ra ; ’e ’ua riro te reira ’ei mau ha’apūra’a pa’ari nō te mau ’āti Lamana.

28 ’E i muri a’era, ’ua haere ti’a atu ra rātou i te mau ’ōti’a o te fenua ra nō ’Auhune, ma te tīahi atu i te mau ’āti Nephi mai mua atu ia rātou ’e ma te taparahi e rave rahi o rātou.

29 ’Āre’a rā i muri a’era, ’ua ’arohia mai rātou e Teanekuma ’o tei taparahi na ia Morianetona, ’e tei haere ho’i i mua roa nō te tāpe’a i tō te reira mau ta’ata i tō rātou horora’a.

30 ’E i muri a’era, ’ua haere ti’a atu ra ’oia i mua ’e ’ua tāpe’a ato’a ihora ia ’Amalikia, ’a haere ti’a atu ai ’oia ’e tōna nu’u fa’ehau rahi ’ia roa’a iāna te fenua ra nō ’Auhune, ’e te fenua ato’a i te pae apato’erau.

31 Inaha rā, ’aita ’oia i manuia, nō te mea ’ua tūra’ihia ’oia i muri e Teanekuma ’e tōna ra mau ta’ata ; e mau ’aito rahi ho’i rātou ; ’e ’ua hau atu ho’i tō te mau ta’ata ato’a o Teanekuma pūai ’e te ’aravihi i te ’ohipa ’aro i tō te mau ta’ata o te mau ’āti Lamana, ’e nō reira ’ua upo’oti’a rātou i ni’a a’e i te mau ’āti Lamana.

32 ’E i muri a’era, ’ua ha’ape’ape’a noa rātou i te mau ’āti Lamana, ’e nō reira ’ua taparahi noa atu ra ia rātou ē tae noa atu i te pō. ’E i muri a’era, ’ua fa’ati’a ihora Teanekuma ’e tōna ra mau ta’ata i tō rātou mau ti’ahapa nā te mau fenua i te hiti nō te fenua nō ’Auhune ; ’e ’ua fa’ati’a ato’a ihora ’Amalikia i tōna ra mau ti’ahapa nā te mau fenua i te pae tahatai i te pae miti, ’e ’ua nā reira noa atu ra rātou i te tīahihia.

33 ’E i muri a’era, ’ia tae mai ra te pō, ’ua haere huna atu ra Teanekuma ’e tōna ra tāvini i rāpae mai i te pō, e haere ti’a atu ra i te pūhapa o ’Amalikia ; ’e inaha, ’ua vare’ahia rātou i te ta’oto, nō tō rātou rohirohi i te ’ohipa ’e te ve’ave’a rahi o te mahana.

34 ’E i muri a’era, ’ua haere huna atu ra Teanekuma i roto i te ti’ahapa o te ari’i, ’e ’ua pātia ihora i tōna māfatu i te tavero ; ’ua taparahi pohe ’oi’oi ’oia i te ari’i, ’e ’aita roa a’era ’oia i fa’aara i tōna ra mau tāvini.

35 ’E ’ua ho’i huna fa’ahou mai ra ’oia i tōna ihora pūhapara’a, ’e inaha, tē ta’oto noa ra tōna mau ta’ata, ’e ’ua fa’aara a’era ’oia ia rātou ’e ’ua fa’a’ite atu ra ia rātou i te mau mea ato’a ’o tāna i rave.

36 ’E ’ua parau atu ra ’oia i tōna mau nu’u fa’ehau ’ia vai ineine māite rātou, ’o te ara mai te mau ’āti Lamana ’e ’o te haere mai rātou e ’aro mai ia rātou.

37 ’E ’o te hope’a te reira nō te piti ’ahuru ’e ma pae o te matahiti nō te fa’aterera’a a te mau ha’avā i ni’a iho i te mau ta’ata o Nephi ; ’e ’o te hope’a ho’i te reira nō te mau mahana o ’Amalikia.