1 Kounyeya, Senyè Bondye a tèlman lakòz famin nan devlope rèd nan peyi Our la, ^aAran, frè m nan te mouri; men, ^bTerak, papa m, te toujou viv nan peyi Our la, ki nan kalde.

2 Epi se te konsa, mwen menm Abraram, m te marye avèk ^aSarayi, epi ^bNahor, frè m nan te marye avèk Milka, ki te pitit fi Aran.

3 Kounyeya, Senyè a te ^adi m: Abraram, wete kò ou nan peyi w la, ak nan pami fanmi w, ak lakay papa w, pou w ale nan peyi m pral montre w la.

4 Se poutèt sa, m te kite peyi ^aOur ki nan Kalde a, pou m ale nan peyi Kanaran an; Epi m te pran Lo, pitit gason frè m nan mennen avèk mwen, ak madanm li, ak Sarayi, madanm mwen; epi tou ^bpapa m te vini apre m nan peyi nou te rele Aran an.

5 Epi famin nan te bese; epi papa m te rete nan Aran epi l te abite la, kòm te gen anpil twoupo bèt nan Aran; epi papa m te retounen ankò nan ^aidolatri li a, se poutèt sa li te kontinye nan Aran.

6 Men, mwen menm, Abraram, ak ^aLo, pitit gason frè m nan, nou te priye Senyè a, epi Senyè a te ^bparèt devan m, epi l te di m konsa: Leve, epi pran Lo avèk ou; paske m gen entensyon wete w nan Aran, pou m fè w yon sèvitè pou pote ^cnon mwen nan yon ^dpeyi etranje m pral bay desandan ou yo apre w kòm yon eritaj etènèl, lè yo koute vwa m.

7 Paske m se Senyè Bondye w la; M rete nan syèl la; tè a se ^amachpye m; m lonje men m sou lanmè a, epi l obeyi vwa m; m fè van ak dife tounen ^bcharyo m; m di mòn yo—Soti la—epi gade, toubiyon an pote y ale, nan yon moman san rete.

8 Non mwen se ^aJewova, epi m ^bkonnen lafen depi nan kòmansman; se poutèt sa, men mwen pral sou ou.

9 Epi m pral fè w tounen yon gran nasyon, epi m pral ^abeni w san mezire, epi m pral fè non ou gran pami tout nasyon, epi w pral yon benediksyon pou desandan ou yo apre w, pou yo pote nan men yo ministè sa a ak la ^bPrètriz sa a bay tout nasyon yo;

10 Epi m pral beni yo pa mwayen non ou; paske tout moun ki resevwa ^aLevanjil sa a pral pote non ou, epi yo pral konte kòm ^bdesandan ou, epi yo pral leve pou yo beni w kòm ^cpapa yo;

11 Epi m ap beni moun ki ^abeni w, epi m ap modi moun ki modi w; epi nan ou menm (ki vle di nan la Prètriz ou a), epi nan ^bdesandan pa w paske m ba w yon pwomès pou ^cdwa sa a kontinye nan ou, ak nan desandand ou yo apre w (ki vle di, pa mwayen desandan literal ou yo oubyen desandan ki soti nan kò ou yo) tout fanmi sou tè a ap beni, avèk benediksyon Levanjil yo menm, ki se benediksyon sali, sa vle di benediksyon lavi etènèl la.

12 Kounyeya, apre Senyè a te fin pale avèk mwen, epi l te wete fas li bò kote m, mwen te di nan kè m: sèvitè w la te ^achèche ou avèk senserite; kounyeya, m jwenn ou;

13 Ou te voye zanj ou pou ^adelivre m anba bondye Èlkena yo, epi m ap fè byen pou m koute vwa w, se poutèt sa, se pou sèvitè w la leve pou l ale avèk lapè.

14 Konsa, mwen menm Abraram, m te pati jan Senyè a te di m nan, epi Lo te avèk mwen; epi mwen menm Abraram, m te gen ^aswasanndezan lè m te pati kite Aran.

15 Epi m te pran ^aSarayi m te marye avèk li lè m te nan ^bOur, nan Kalde a, ak Lo, pitit gason frè m nan, ak tout pwovizyon nou te rasanble yo, ak nanm nou te ^cgenyen nan Aran yo, epi nou te vini nan chemen pou ale nan peyi ^dKanaran an, epi nou te rete anba tonèl pandan nou te sou wout la;

16 Se poutèt sa, letènite te pwoteksyon nou, ak ^awòch nou ak sali nou, pandan nou t ap vwayaje soti Aran, sou wout Jèchon an pou ale nan peyi Kanaran.

17 Kounyeya, mwenmenm Abraram, m te bati yon ^alotèl nan peyi Jèchon an, epi m te fè yon ofrann bay Senyè a, epi m te priye pou ^bfamin nan te detounen soti sou kay papa m pou yo te kapab pa peri.

18 Epi nou te pase sòti nan Jèchon pa mwayen peyi Sechèm nan; li te tabli nan laplèn More yo, epi nou te deja rive sou fwontyè peyi ^aKananeyit yo, epi m te ofri ^bsakrifis kote sa a nan laplèn More yo, epi m te priye Senyè a avèk devosyon, paske nou te deja rive nan peyi nasyon idolat sa a.

19 Epi Senyè a te parèt devan m kòm repons pou priyè m, epi l te di m: m ap bay desandan ou yo ^apeyi sa a.

20 Epi mwen menm Abraram, m te leve sòti nan plas lotèl m te bati pou Senyè a, epi m te deplase ale sou yon mòn ki nan kote lès ^aBetèl, epi m te plante tant mwen nan kote sa a, Betèl te nan lwès, epi ^bAyi te nan lès; epi se la m te bati yon lotèl pou Senyè a, epi m te ^cpriye nan non Senyè a ankò.

21 Epi mwen menm Abraram, m te vwayaje, m te kontinye jouk nan sid; epi te kontinye gen grangou nan peyi a; epi mwen menm Abraram, m te pran desizyon pou m ale nan peyi Ejip, pou m rete kote sa a, paske grangou nan te vin grav anpil.

22 Epi se te konsa, lè m te rive tou pre pou m te antre nan peyi Ejip, Senyè a te di m: Gade, ^aSarayi, madanm ou se yon bèl fi;

23 Se poutèt sa, se pral konsa, lè Ejipsyen yo wè l, yo pral di—Se madanm li; epi y ap touye w, men, y ap sove lavi madanm ou; se poutèt sa, men sa pou ou fè:

24 Kite l di Ejipsyen yo li se sè w, epi nanm w ap viv.

25 Epi se te konsa, mwen menm Abraram, m te di Sarayi, madanm mwen, tout sa Senyè a te di m—Se poutèt sa, di yo konsa, tanpri, ou se sè m, pou sa kapab byen pou mwen, epi nanm mwen ap viv akoz ou.