Ang Labing Mahinungdanon nga Gasa sa Pasko

“Sa namalik na ang mga anghel ngadto sa langit, ang mga magbalantay sa karnero nag-ingnanay, Mangadto kita sa Betlehem ug tan-awon nato kining nahitabo nga gipahibalo kanato sa Ginoo.

“Ug midali sila pag-adto ug nakit-an nila si Maria ug si Jose ug ang bata nga naghigda sa pasongan.”¹

Kining yano nga mga bersikulo sa kasulatan sa Bag-ong Tugon nga gisulat ni Lucas nagsangkap diha sa atong mga hunahuna sa imahe sa balaan nga panghitabo sa pagkatawo ni Jesukristo nga karon gisaulog sa tibuok kalibotan.

Sa among nasod nga natawhan sa Portugal, ang tradisyon sa pagpasundayag og usab niining panghitabo sa kasulatan pinaagi sa pagbutang sa talan-awon nga Natividad [Nativity] mao ang gimahal nga tradisyon. Inyong makit-an ang mga natividad sa tibuok nasod diha sa nagkadaiyang dapit atol sa panahon sa Pasko—usa ka tradisyon nga gipakita usab sa daghang panimalay. Ang pagbutang og usa ka talan-awon sa Natividad kasagaran naglakip og paningkamot sa pagkolekta og buhi nga lumot, dagami, mga bato, ug ubang natural nga materyales aron makagama og tinuod nga backdrop sa Natividad.

Kining tradisyon sa Pasko sa pagbutang sa talan-awon sa Natividad mao ang usa ka gipangga nga kalihokan atol sa among pagkabata ug pagkabatan-on uban sa among mga ginikanan ug sa kaulahian sa among mga anak. Ang pagbutang sa talan-awon sa Natividad mao ang usa sa akong paborito nga mga kalihokan niining panahon sa tuig.

Among gitipigan sa kahon nga kahoy ang tanan nga gagmayng figurine nga gigamit namo sa paghimo sa talan-awon sa Natividad ug sa mga palibot niini. Kasagaran, usa ka gamayng kopya sa among balangay gipakita usab. Matag tuig, matag Pasko, usa ka parisan sa bag-ong mga figurine o mga elemento ang madugang ngadto sa koleksiyon. Adunay mga figurine sa mga taga balangay, mga balay, mga mag-uuma ug kahayopan, mga wind ug water mill, ug uban pang natural nga mga elemento sa pagsundog sa mga bungtod, mga walog, mga kahoy, ug mga umahan. Mga piraso sa mga samin gigamit aron sa pagsunod sa mga suba ug gagmayng sapa. Dunay higayon, bisan ang mga taytayan i-feature. Ug, siyempre, diha sa sentro niining tanan mao ang labing importanteng mga figurine, nga gihulagway sa balaan nga kasulatan: usa ka panon sa karnero ug “may mga magbalantay sa karnero nga nagtukaw sa kagabhion aron pag-atiman sa ilang mga hayop didto sa kaumahan”;² ang anghel nga nag-ingon ngadto sa mga magbalantay nga dili mahadlok ug kinsa mipahibalo sa pagkatawo sa Manluluwas, nga nagdala og “maayong balita … nga makalipay kaayo sa tanang katawhan”;³ ang mga imahe ni Maria ug Jose dayag nga gibutang sa palibot sa pasongan.⁴ Dayon dihay bitoon, nga giingon sa kasulatan nga mihatag og dakong kalipay ngadto sa mago ug migiya kanila sa ilang panaw sa pag-adto kang Jesus.⁵

Anaa na kadto sa tanan nga mga sakop sa pamilya sa pagmontar sa talan-awon sa Natividad. Sa paglabay sa pipila ka adlaw o gani mga semana, sa anam-anam, ang hugpong nahimo ug naporma uban sa tanang piraso diha sa ilang tukma nga dapit.

Sa tibuok panahon, kami midayeg sa talan-awon sa Natividad ug mihinumdom sa mga panghitabo nga gihulagway diha sa mga asoy sa Mateo ug sa Lucas nga nakapahimo niining kasaulogan nga makahuluganon kaayo. Mga istorya nga gisugilon kabahin sa hugot nga pagtuo ni Maria ug ni Jose; kabahin sa panaw nga miadto “sa lungsod sa Nazaret sa Galilea, … sa Judea, ngadto sa Betlehem”⁶; ug kabahin sa ilang panlimbasog sa pagpangita og usa ka dapit nga kapuy-an didto.

Apan sa kataposan, miabot ang adlaw sa Pasko, ug ang figurine sa batang si Jesus gibutang na diha sa pasongan, ug ang panag-istorya mibaling ngadto sa kamahinungdanon ni Jesukristo sa atong kinabuhi ug unsa ang Iyang gihimo alang kanato⁷ ug Kaniya nga mao ang labing dakong gasa sa tanang gasa.

Kini nga daygon mosuma total sa pagbati sa diwa sa kasaulogan:

“O Anak sa malumong pag-amuma ni Maria!

O Batang lunsay ug makiangayon!

Gibutang ka sulod sa pasongan sa dagami

Nianang unang balaang adlaw sa Pasko!

Ang paglaom sa matag panuigon ug kaliwatan

Nakasentro diha sa sanag nga panagway Mo!

O Bata kansang himaya milukop sa yuta!

O Bata sa mapaubsanong pagkahimugso!

Mga magbalantay, giniyahan gikan sa halayo,

Nanagsimba ubos sa bitoon,

Ug ang mga mago nanagpangluhod

Ug gihalaran Ka og mga gasa!

O Bata kansang mga anghel nanag-awit!

O Bata, among masuso nga Hari!

Unsa nga balsamo nga anaa sa matag kasubo

Sa sulod niadtong tin-aw, miamag nga mga mata!

O bililhong gasa nga gihatag sa mga mortal

Aron sa atong pagdaog sa kabilin sa Langit!”⁸

Ang Manluluwas Mismo mipamatuod sa Iyang gasa ngari kanato: “Gisulti ko kini kaninyo aron makabaton kamog kalinaw pinaagi sa inyong pagkahiusa kanako. Paantoson kamo sa kalibotan apan ayaw kahadlok kay nabuntog ko na ang kalibotan.”⁹

“Kay gihigugma pag-ayo sa Dios ang kalibotan, ug tungod niini gihatag niya ang iyang bugtong Anak, aron ang tanan nga mosalig kaniya dili malaglag, kondili makabaton hinuon sa kinabuhing dayon.”¹⁰

Pagkatalagsaong gasa; pagkanindot nga gasa!

“Ang panahon sa Pasko mao ang panahon sa pagpamalandong ug paglihok sa mga panalangin ug mga oportunidad nga anaa kanato tungod sa pagkatawo, kinabuhi, Pag-ula, ug Pagkabanhaw sa Atong Manluluwas, si Jesukristo.”¹¹

Ako maghunahuna bahin sa panalangin sa pagkaplag og kalinaw ug paglaom, bisan taliwala sa mga hagit ug mga pagsulay¹² ang panalangin sa balaan nga giya sa mga panahon sa kadaogan ug kapildihan¹³ ang panalangin sa usa ka mas dakong panglantaw ug katuyoan, nasayod ug nagtuo nga adunay labaw pa human niining kasinatian sa kinabuhi¹⁴ ang panalangin sa pagpasalamat bisan kon kita adunay menos sa pagsustento sa atong mga panalangin; ang panalangin nga mahupay sa dihang kita mobati og pag-inusara¹⁵ ug ang panalangin nga makahatag bisan kon kita wala makapanag-iya og daghan.

Kini ug daghan pang panalangin ang anaa kanato tungod ni Jesukristo! Oo, tungod sa batang si Jesus nga ako hilabihan ka matinguhaon nga nagpaabot nga ibutang diha sa pasongan sa adlaw sa Pasko diha sa among talan-awon sa Natividad! Siya, kinsa ang atong labing talagsaong gasa, mihatag kanato sa ingon ka bililhon nga mga panalangin tungod sa Iyang Kinabuhi, ehemplo, mga pagtulon-an, ug sakripisyo.

Dayon ako mangutana: Dili ba kita angay, agig pagbalos, mogamit niining mga panalangin sa pagbayaw sa palas-anon sa uban, motabang ug moawhag kanila sa pagkonektar sa diwa niining balaan nga panahon ug sa pagsaulog sa maayo nga balita nga gipahibalo ngadto sa mga magbalantay atol sa unang Pasko?

Si Kristo makapausab sa atong Pasko labaw pa sa mga laso sa kamabination ug pagbati ug lukpon ang atong mga pagsaulog sa gugmang putli, “nga mao ang gugma nga putli ni Kristo [nga] molahutay sa kahangtoran.”¹⁶ “Bisan og ang atong mga pagbati moabot ug mawala, ang Iyang gugma alang kanato dili.”¹⁷ Ang Iyang gugma magpadayon sa tibuok tuig ug sa tibuok natong kinabuhi.

Ang pagtutok og maayo diha ni Kristo atol sa Pasko mosangkap kanato og mas dakong kahulogan sa Iyang gugma sa atong mga kinabuhi ug usa ka mas dakong kapasidad sa paghigugma ug pagserbisyo sa uban.

Kon atong huptan ang diwa sa Pasko, kita motuman sa Espiritu ni Kristo. Hinaot nga kita, niining panahona, motutok diha ni Kristo, ang Kahayag sa Kalibotan, ug hinaot nga atong ipadan-ag ang atong kahayag niining panahona pinaagi sa pagpaambit sa uban sa atong gugma, kapuangod, ug serbisyo.

Tungod kay Siya mianhi, adunay kahulogan ang atong pagpakabuhi. Tungod kay Siya mianhi, adunay paglaom. Siya mao ang Manluluwas sa kalibotan, ug Siya mao ang atong labing dakong gasa, kabahin niana, ako mohalad sa akong pagpamatuod. Sa ngalan ni Jesukristo, amen.