“Itok n̄an Ippa”

Eļap aō m̧ōņōņō in pād ippāmi ilo kweilo̧k in an Kabun̄ eo an Jisōs Kraist im Armej ro Rekwojarjar ilo Raan-ko Āliktata. En̄in ej Kabun̄ eo An jej bōke iood Etan ilo ad deļo̧n̄e aelōn̄ in An. E ej Anij, Rikōm̧anm̧an eo, im wāppen. Jej menin mour ko rej mej im jerawiwi. Aaet ilo An iakwe n̄an kōj im baam̧le ko ad, Ej karuwaineneik kōj n̄an pād epaake e. Erkein rej naan ko An: Eaar ba eo enaaj pād epaake E im Enaaj pād epaake e; jej aikuj pukōt E ilo tiljek im jenaaj loe; jej aikuj kōļļaļaļ im enaaj kōppeļļo̧k n̄an kōj ¹

Ilo season in Ijtō in jej kakeememej etke jej iakwe E im jen kalim̧m̧ur eo Eaar kōm̧m̧ane n̄an rijilōk ro an retiljek n̄an erom ro Jeran rejitōn bōro. Rilo̧mo̧o̧r eo eaar kōm̧m̧ane kalim̧m̧ur in im kar jiron̄ kōj ekōjkan, ilo jerbal eo ad n̄an E, Ej itok n̄an kōj. Juon waanjon̄ok ilo juon revelesōn n̄an Oliver Cowdery ilo an jerbal n̄an Irooj ippān Rikanaan Joseph Smith ilo ukōt Bok in Mormon. Irooj eaar jiron̄ Oliver bwe Eaar kōnono n̄an e kōnke ikdelel eo an Oliver; Oliver ar aikuj in likūt kapilōk an Irooj ilo buruwōn. Kwoj aikuj in tōmak im tiljek ilo kōjparok kien ko an Anij, innām Irooj enaaj kabooļe eok ilo pein kōn an iakwe²

Iaar en̄jake lan̄lōn̄ eo jān itok epaake Irooj im An epaake eō jen m̧akūtkūt in pokake ko relam waan n̄an kien ko.

Ewōr ami en̄jake rot in. Emaron̄ bōlen jen ami kālet n̄an pād ilo juon kweilo̧k in kwojkwoj. Eaar āindein n̄an n̄a ilo juon Jabōt ke iaar dik. Ilo raan ko kōm̧ij bōk kwojkwoj eo ilo juon kweilo̧k in jota. Ememļo̧kjeņ eo kōn juon raan eļap jen 65 iiō ko rem̧ootļo̧k, ke iaar kōjparok kien ko n̄an kobaik baam̧le eo aō im kobaļo̧k ippān Rikwojarjar ro, ej kepaakļo̧k eō n̄an Rilo̧mo̧o̧r eo.

Eaar marok im m̧ōļo namōj. Ij keememej aō en̄jake meram in māņāān ilo im̧ōn jar eo joten eo ippān jinō im jema. Kōm̧ ar bōk kwojkwoj eo, kar kōjeram̧m̧an jen rikabwijer ro an Aaronic Priesthood eo, kōm̧m̧an bujen ippān Jemedwōj Ilan̄ n̄an aolep iien keememej Nejin im kōjparok kien ko An.

Ilo Jem̧ļo̧kin kweilo̧k eo kōm̧ ar al al eo “Abide with Me; Tis Eventide,” kōn naan ko ie “O, Savior, stay this night with me.” ³

Iaar en̄jake iakwe im epaake eo an Rilo̧mo̧o̧r eo joten eo. Im iaar en̄jake aenōm̧m̧an an Jetōb Kwojarjar.

Iaar kōņaan kōkāāl bar juon alen en̄jake ko an iakwe eo an Rilo̧mo̧o̧r eo im epaake eo An eo iaar en̄jake ilo kweilo̧k in kwojkwoj eo ilo aō kar jodikdik. Innām iaar kōjparok bar juon kien. Iaar pukōte ilo jeje ko rekwojarjar. Ilo er, ijeļā imaron̄ in ro̧o̧l bar juon alen im bōk Jetōb Kwojarjar eo ej kōm̧m̧an bwe in en̄jake ta eo rikaļoor ro an Irooj eo ejerkakpeje raar en̄jake ke Eaar uwaake kajjitōk eo aer n̄an itok n̄an m̧ōko m̧weer im n̄an pād ippāer.

Iaar riiti kōn raan eo kein kajilu ālkin Dōbwāāl eo im kallib eo an An. Kōrā ro retiljek im ro jet rej loe dōkā eo ej dābwilļo̧k jān lōb eo im kar loe bwe Ānbwinnin eaar jako. Raar itok kōn iakwe n̄an E n̄an kapit Ānbwinnin.

Ruo enjeļ raar jutak im kajjitōk etke raar mijak, ba:

“Etke kom̧ij pukot eo E mour, ippān ro re mej?

“E jab pād ijin, a em̧ōj an jerkakpeje: kom̧win keememej kōjkan An kōnono n̄an kom̧ ke Ear pād wōt i Galili,

“Im ba, Nejin armej, naaj ketak E ilo pein armej re nana, im naaj debwāāl E, ilo raan eo kein ka jilu Enaaj jerkakpeje.”⁴

Ilo Ko̧jpeļ Mark eaar kobaitok naan in tōl jān juon enjeļ: “A kom̧win ilo̧k, kōnnaanōk ro ru kaļoran im Piter, ej m̧ōkajļo̧k jān kom̧ n̄an Galili; ijo kom̧ naaj lo E, āinwōt Ear ba n̄an kom̧.”⁵

Rijilōk ro im rikaļoor ro raar kuk ippān doon ilo Jerusalem. Āinwōt ad bōlen kōm̧m̧ane, raar mijak im bwilōn̄ ke raar kōnono ippān doon kōn ta meļeļein ripo̧o̧t in mej im An kar jerkakpeje n̄an er.

Ruo iaan rikaļoor ro raar etetal joten eo jān Jerusalem ioon iaļ eo n̄an Emmaus. Kraist eo ejerkakpeje eaar waļo̧ktok jen ioon bwin̄al im etetal ippāer. Irooj eo ejerkakpeje eaar itok n̄an er.

Bok in Luk ej kōtļo̧k ad etetal ippāer joten eo:

“Im ke rej kōnono im bwebwenato n̄an doon, Jisōs ej make kepaak, im etal ippāer.

“A dāpij mejeir bwe ren jab kile e.

“Im E ba n̄an er, ta men ko kom̧ ro kōnono n̄an doon, ke kom̧ etal, im rej bōjrak im būrom̧ōj mejeir?

“Im juon iaer etan Kliopas, e uwaak im ba n̄an E, Kwe ruwamājet wōt ilo Jerusalem, im Kwaar jab jeļā men ko re waļo̧k ijo ilo raan kein ke?”⁶

Raar jiron̄ E kōn būrom̧ōj eo aer bwe Jisōs eaar mej ke raar lōke enaaj erom Ripinmuur eo an Israel.

Ewōr wāween eo ejelet ilo ainikien Irooj eo ejerkakpeje ke Eaar kōnono n̄an ribūrom̧ōj rein ruo im rikaļoor rein rebūrom̧ōj.

“Im E ba n̄an er, O armej ri aniabeab im e rum̧wij būremi kōn tōmak men ko otemjej ri kanaan ro raar kōnono kaki:

“E jab em̧m̧an bwe ri Kraist en en̄taan kōn men kein, im deļo̧n̄ ilo aiboojoj eo an ke?

“Im ej jino ippān Moses im ri kanaan otemjej, im kameļeļeik n̄an erro ilo Jeje ko otemjej men ko kōn E make.”⁷

Innām eaar itok iien eo eaar kōmāņāān būruwō jen ke iaar ļaddik jidikdik:

“Im rej kepaak jikin kweilo̧k eo, ijo rej iļok n̄an e: Im Ej kōm̧m̧an āinwōt E kōņaan ilo̧k im̧aan ļo̧k.

“A rej ro dāpij E im ba, Kwōn pād ippem: bwe e jota, im e nan̄in bon̄. Im eaar etal im pād ippāer.”⁸

Rilo̧mo̧o̧r eo eaar bōk kūr eo joten eo n̄an deļo̧n̄e m̧ōko im̧ōn rikaļoor ro an jikin eo epaake Emmaus.

Ear jijet ilo iien m̧ōn̄ā ippāer. Eaar bōk pilawe, kōjeram̧m̧ani, ruji, im leļo̧k n̄an er. Mejāer raar peļļo̧k bwe raar jeļā wōn E. Innām Eaar jakoļo̧k jān im̧aan mejāer. Luk eaar ļo̧o̧ke n̄an kōj en̄jake ko an rijilōk ro rejeram̧m̧an: “Im rejro ba n̄an doon, Būruwed e jab bwil ilowad ke Ear kōnono n̄an kōj ilo iaļ eo, im ke E kameļeļe Jeje ko n̄an kōjro ke?”⁹

Ilo ejja awa eo wōt rikaļoor ro ruo raar em̧m̧ōkajļo̧k jān Jerusalem n̄an jiron̄ Rijilōk ro jon̄oul juon ta eo eaar waļo̧k n̄an er. Ilo iien in Rilo̧mo̧o̧r eo eaar bar waļo̧k.

Eaar etale kanaan ko an mijen eo An n̄an pinmuur n̄an jerawiwi ko an ajri ro nejin Jemān im n̄an rube tomede ko an mej.

“Im ba n̄an er, Āindein ar je, bwe ri Kraist enaaj en̄taan, im jerkakpeje jān re mej ilo raan kein ka jilu:

“Im bwe enaaj kwaļo̧k ukweļo̧k im jeorļo̧k jero̧wiwi ko ilo Etan n̄an ri aelōn̄ otemjej, jinoin jān Jerusalem.

“Im kom̧ ri kōnnaan kōn men kein.”¹⁰

Naan ko an Rilo̧mo̧o̧r eo rej m̧ool barāinwōt em̧m̧an n̄an kōj āinwōt rekar rikaļoor ro An. Jej ri kōnnaan ro an men kein. Im m̧uri eo em̧m̧an jar bōke ke jaar peptaij n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata eaar alikkar n̄an kōj jen rikanaan Alma bukwi iiō remootļo̧k ilo dān Mormon:

“Im ālkin men kein, eaar ba n̄an er: Lo, er kein rej dān ko iMormon (bwe āindein kar kūr er) im kiiō, āinwōt kom̧ij kōņaan itok ilo wōrwōr an Anij, im n̄an kūr kom̧ armej ro An, im n̄an kūr An, im kom̧ij m̧ōņōņō n̄an ineek eddo ko an ro jet, bwe ren maron̄ mera;

“Aaet, im kom̧ij m̧ōņōņō in jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an, im n̄an jutak āinwōt ri kam̧ool ro an Anij ilo aolep iien ko ilo aolep men otemjeļo̧k, im ilo aolep jikin ko kom̧ maron̄ pād ie, em̧ool m̧ae mej, bwe kom̧in maron̄ bōk lo̧mo̧r an Anij, im bōnbōn ippān ro ilo jerkakpeje eo m̧oktata, bwe kom̧in maron̄ bōk mour indeeo—

“Kiiō ij ba n̄an kom̧, eļan̄n̄e en̄in ej ikdelel eo an buruōmi, ta ippāmi ņae baptaise ilo etan Irooj, āinwōt juon ri kam̧ool im̧aan mejān ke em̧ōj ami kar deļo̧n̄e juon bujen Ippān, bwe kom̧ naaj jerbal n̄an E im kōjparok kien ko An, bwe E en maron̄ lutōkleplep eļapļo̧k Jetōb eo An ioomi?

“Im kiiō ke armej ro raar ron̄ naan kein, raar kabbokbok peier ilo m̧ōņōņō, im lam̧ōj: En̄in ej ikdelel eo an buruōm.”¹¹

Jej mour ium̧win bujen jim̧or n̄an kotak ro repād ilo aikuj im n̄an erom rikam̧ool ro an Rilo̧mo̧o̧r eo toon wōt ad mour.

Jenaaj maron̄ wōt kōm̧m̧ane menin ilo ejjeļo̧k likjab n̄e jej en̄jake iakwe n̄an Rilo̧mo̧o̧r eo im an iakwe n̄an kōj. Ilo ad tiljek n̄an kalim̧m̧ur ko jaar kōm̧m̧ani, jenaaj en̄jake ad iakwe n̄an E. Ej ļapļo̧k kōnke jej en̄jake An kajoor im kepaak tok kōj ilo An jerbal.

Būreejtōn Thomas S. Monson eaar emakijkij an kakeememej kōj kōn kalim̧m̧ur eo an Irooj n̄an rikaļoor ro an retiljek: Bwe jabdewōt ej bōk rikarejar ro an renaaj barāinwōt, bwe Enaaj etal im̧aan mejāer. Enaaj pād ilo tuanbwij maron̄in peim ilo tuanmiin̄, im Jetōb eo Aō enaaj pād ilo būruwōm, im enjeļ ro Aō renaaj jepool kom̧, n̄an jipan̄ kōj.”¹²

Ewōr bar juon wāween kwe im n̄a maron̄ en̄jake An epaake kōj. Ilo ad wujlepļo̧k jerbal in jipan̄ n̄an E, ej kepaak tok jabdewōt ro rej iakwe ilo baam̧le ko ad. Aolep iien iaar kūr ilo jerbal in an Irooj n̄an em̧m̧akūt ak etal jen baam̧le eo, ij loe bwe Irooj eaar kōjeram̧m̧an kōrā eo pāleeō im ajri ro nejū. Ej kōpooj rikarejar ro reakwe im iien em̧m̧an n̄an kepaak tok er epaake E.

Kom̧ ar en̄jake ejja kōjeram̧m̧an ilo mour ko am. Elōn̄ iami ewōr nejier jitōn bōro ro rej jōbābwe ilo iaļ eo n̄an mour indeeo. Kwoj ke ļōmņak ta eo eļapļo̧k komaron̄ kōm̧m̧ane n̄an ko̧o̧ltok er. Komaron̄ pedped ioon Irooj n̄an kepaak tok er ilo ami jerbal n̄an E ilo tōmak.

“Kom̧ij ke keememej kalim̧m̧ur eo n̄an Joseph Smith im Sidney Rigdon ke raar pād ettoļo̧k jān baam̧le ko aer ilo jerbal an Irooj: Irooj eaar jiron̄ļo̧k Sidney im Joseph, bwe baam̧le ko aer em̧m̧an aer pād; raar pād ilo Pein, im enaaj kōm̧m̧an n̄an er ta eo Ej peek ej em̧m̧an; epād aolep kajoor ippān.”¹³

Āinļo̧k wōt Alma im Kiin̄ Mosaia, jet iaami rikabwijer ro retiljek ro raar jerbal n̄an Irooj aitok im barāinwōt wōr ro nejier rej jōbābwe men̄e ro jineer im jemāer raar en̄taan n̄an Irooj. Āinwōt kom̧, raar aolep kōm̧m̧ane im remaron̄, aaet kōn jipan̄ jān armej ro jet reakwe im tiljek.

Alma im Rikwojarjar ro raar jar kōn ļaddik eo nejin im ļaddik ro nejin Kiin̄ Mosaia. Juon enjeļ eaar itok. Ami jar im jar ko an ro rej kōjerbal tōmak eo aer naaj bōktok rikarejar an Anij n̄an jipan̄ membōr in baam̧le eo ami. Renaaj jipan̄ kom̧ kālet iaļ eo n̄an kapijuknen n̄an Anij, aaet n̄e rej jodik er jen Satan im rikaļoor ro an, ro kōttōpar eo aer ej n̄an kakkure baam̧le ko ilo mour in im ilo indeeo.

Kom̧ij keememej naan ko kar kōnono jen enjeļ eo n̄an Alma eo Edik im ļaddik ro nejin Mosaia ilo nana eo aer: “Im bar juon alen, enjeļ eo eba: Lo, Irooj eaar ron̄ jar an armej ro an, im barāinwōt jar ko an eo karejaren, Alma, eo ej jem̧am̧; bwe eaar jar kōn eļap tōmak kōn kwe bwe kōn maron̄ itok n̄an jeļā kōn m̧ool eo; kōn menin, kōn un in Iaar itok n̄an kareel buruōm̧ kōn kajoor im maron̄ an Anij, bwe jar ko an eo karejeran ren maron̄ uwaak ekkar n̄an aer tōmak.”¹⁴

Aō kalim̧m̧ur n̄an kom̧ ro rej jar im jerbal bwe Irooj ejjab bwe kom̧ naaj bōl aolep kōjeram̧m̧an kom̧ kōņaan n̄an kom̧ make im baam̧le eo am. Ak imaron̄ kalim̧m̧uri kom̧ bwe Rilo̧mo̧o̧r enaaj kepaak tok kom̧ im kōjeram̧m̧an kom̧ im baam̧le eo ami kōn ta eo em̧m̧an tata. Kom̧ naaj bōk aenōm̧m̧an jen An iakwe im en̄jake uwaak eo an Epaake tok kom̧ ilo ami leļo̧k peim̧i ilo jerbal in jipan̄ n̄an ro jet. Ilo ami korak kinej ko an ro repād ilo aikuj im leļo̧k karreo in Pinmuur eo An n̄an ro rej burom̧ōj ilo jerawiwi, kajoor eo an irooj enaaj rejtake kom. Pein renaaj erļo̧kwaj n̄an peimi n̄an jipan̄ im kōjeram̧m̧an ajri ro nejin Jemedwōj Ilan̄, ekitbuuj ro ilo baam̧le am.

Ewōr aiboojoj ilo jepļaakļo̧k in kar kōpooje n̄an kōj. Jenaaj loe kūrm̧ool in kalim̧m̧ur eo an Irooj eo jaar iakwe. Ej E eo eaar karuwaineneik kōj n̄an mour indeeo Ippān im Jemedwōj Ilan̄. Jisōs Kraist eaar kōmeļeļeiki wāween in:

Pukōt n̄an bōk m̧aantak im ejaake Aō Zaion. Kōjparok kien ko aō ilo men otemjej.

“Eļan̄n̄e jej kōjparok kien ko an im niknik n̄an jem̧ļo̧kin, jenaaj bōk mour indeeo, eo ej menin letok eo eļap tata an Anij.”¹⁵

“Bwe ro rej mour renaj deļo̧n̄e laļ in, im ro rej mej renaaj kakkije jān aolep jerbal ko aer, im jerbal ko aer renaaj ļoor er; im renaaj bōk kūrawin ilo mānjen ko an Jemān, eo Jisōs Kraist eaar kōpooje n̄an er.”¹⁶

Ij kam̧ool bwe jemaron̄ jen Jetōb eo ļoor kūr in an Jemedwōj Ilan̄: En̄in ej Nejū Jitōn Bōro. Ron̄jake E.”¹⁷

Jen naan ko im waanjon̄ok eo An, Kraist eaar kwaļo̧k n̄an kōj ekōjkan n̄an kepaakļo̧k E. Aolep ajri ro nejin Jemedwōj Ilan̄ ro raar kālet n̄an deļo̧n̄e jen aor in peptaij ilo Kabun̄ eo An naaj aer iien em̧m̧an n̄an katak ko̧jpeļ eo An im n̄an ron̄jake jān rikarejar ro An kūr eo An n̄an “Itok n̄an Ippa.”¹⁸

Aolep rikarejar raar bujen Ippān ilowaan aelōn̄ in An ioon laļ in, im ilo laļ eo an jetōb, naaj bōk An tōl ilo aer kōjeram̧m̧an im jerbal n̄an ro jet kōn E. Innām renaaj en̄jake An iakwe, im loe lan̄lōn̄ ilo epaake Irooj n̄an E.

Ij juon rikam̧ool an Jerkakpeje eo an Irooj āinwōt em̧ool eļan̄n̄e iaar pād ijeņ joten eo ippān rikaļoor ro ruo ilo m̧weo ilo iaļ eo n̄an Emmaus. Ijeļā bwe ej mour em̧ool āinwōt kar Joseph Smith ke eaar lo Jemān im Nejin ilo meram eo ilo juon jibbon̄ em̧m̧an ilo juon bukwin wōjke ko ilo Palmyra.

En̄in ej Kabun̄ eo em̧ool an Jisōs Kraist. Ilo wōt kii ko an Priesthood eo kabwijer jen Būreejtōn Thomas S. Monson ej kajoor eo n̄an liāp ilo baam̧le ko n̄an mour indeeo ippān Jemedwōj Ilan̄ im Irooj Jisōs Kraist. Jenaaj ilo Raan in Ekajet eo jutak im̧aan Rilo̧mo̧o̧r, jelm̧ae doon. Enaaj juon iien lan̄lōn̄ n̄an ro raar kepaak E ilo An jerbal ilo mour in. Enaaj juon menin lan̄lōn̄ n̄an ron̄jake naan ko: “Em̧m̧an am̧ kōm̧m̧an Kwō karijara em̧m̧an im tiljek.”¹⁹Ij kam̧ool āinwōt juon rikam̧ool an Rilo̧mo̧o̧r eo ejerkakpeje im ad Rilo̧mo̧o̧r ilo etan Jisōs Kraist, amen.