Jekjōn 100
Revelesōn leļo̧k n̄an Josep Smith Rikanaan eo im Sidney Rigdon, ilo Perrysburg, New York, Oktoba 12, 1833. Ļōm̧arein ruo, kōnke rekar jako jān baam̧le ko aer ium̧win jet raan ko, ekar wōr aer inepata kake er.
1–4, Josep im Sidney ren kwaļo̧k gospel eo n̄an lo̧mo̧o̧r an armej raņ; 5–8, Naaj leļo̧k n̄an erro ilo awa eo wōt ta reaikuj in ba; 9–12, Sidney enaaj rikōnono eo im Josep enaaj rikkwaļo̧k revelesōn eo im kajoor ilo kam̧ool; 13–17, Irooj enaaj kōjerkak juon armej rerreo, im ro repokake renaaj mour.
1 Em̧ool, āindein Irooj ej ba n̄an kom̧ro, ro jera Sidney im Josep, baam̧le ko amiro em̧m̧an aer pād; er rej pād ilo Peiū, im Inaaj kōm̧m̧an n̄an er āinwōt ej em̧m̧an n̄an Eō; bwe ilo N̄a ewōr aolep kajoor.
2 Kōn menin, ļoore Eō, im ron̄jake kapilōk eo me Inaaj lewōj n̄an kom̧ro.
3 Lo, im lo, ekanooj lōn̄ armej Ippa ilo ijin, ilo ijoko ipeļaakin ijin; im juon kōjām em̧m̧an enaaj peļļo̧k ilo ijoko ipeļaakin ijin ilo jikin ko iturear.
4 Kōn menin, N̄a, Irooj, Iaar kōtļo̧k bwe kom̧ro en itok n̄an jikin in; bwe āindein eaar mennin aikuj ilo N̄a kōn lo̧mo̧o̧r an armej raņ.
5 Kōn menin, em̧ool Ij ba n̄an kom̧ro, kotak ainikiōmiro n̄an armej rein; ekkōnono ļōmņak ko Inaaj likūt ilo būruōmiro, im kom̧ ro jamin naaj pok im̧aan armej raņ;
6 Bwe naaj lewōj e n̄an kom̧ro ilo ejja awa eo wōt, aaet, ilo iien eo wōt, ta kom̧ro naaj ba.
7 A juon kien Ij lewōj n̄an kom̧ro, bwe kom̧ro en kwaļo̧k jabdewōt men kom̧ro ej kwaļo̧k ilo Eta, ilo lukkuun m̧ool in bōro, ilo jitōbōn ettā, ilo aolep men ko otemjeļo̧k.
8 Im Ij lewōj n̄an kom̧ro kallim̧ur in, bwe toun wōt amiro kōm̧m̧ane men in Jetōb Kwōjarjar enaaj ererakļo̧k ilo kwaļo̧k kam̧ool eo n̄an aolep men ko otemjej kom̧ro naaj ba.
9 Im ej mennin aikuj ilo N̄a bwe kwe, rikarejera Sidney, en juon rikōnono n̄an armej rein; aaet, em̧ool, Inaaj kapit eok n̄an kūr in, em̧ool n̄an juon rikōnono n̄an rikarejera Josep.
10 Im Inaaj leļo̧k n̄an e kajoor bwe en kanooj kajoor ilo naan in kam̧ool.
11 Im Inaaj lewōj n̄an eok kajoor bwe kwōn kanooj kajoor ilo tepiiake aolep jeje ko rekwōjarjar, bwe kwōn maron̄ juon rikōnono n̄an e, im bwe enaaj juon rikkwaļo̧k revelesōn n̄an eok, bwe kwōn maron̄ jeļā m̧ool in aolep men ko rej ekkejelļo̧k n̄an men ko an aelōn̄ eo Aō ioon laļ.
12 Kōn menin, wōnm̧aanļo̧k ilo ito-itak eo amiro im būruōmiro ren m̧ōņōņō; bwe lo, im lo, Ij pād ippemiro em̧ool n̄an jem̧ļo̧kin.
13 Im kiiō Ij lewōj n̄an kom̧ ro juon ennaan kōn Zaion. Zaion naaj wiaiki, men̄e kauweiki ium̧win jidik tōrean.
14 Ļōm̧aro jeiūm̧iro im jātimiro, ro karejera Orson Hyde im Jon Gould, rej pād ilo Peiū; im toun wōt aer kōjparok kien ko Aō renaaj mour.
15 Kōn menin, būruōmiro ren ineem̧m̧an; bwe aolep men ko otemjeļo̧k renaaj jerbal ippān doon n̄an em̧m̧an eo n̄an ro rej etetal jim̧we, im n̄an kokwōjarjar eo an kabun̄ in.
16 Bwe Inaaj kōjerkaktok n̄an Eō juon armej rerreo, bwe ren jerbal n̄an Eō ilo wānōk;
17 Im aolep ro rej kūr ioon etan Irooj, im kōjparok kien ko An, renaaj mour. Em̧ool āindein. Amen.