Kev Muaj Zog Los ntawm Yexus Khetos txoj Kev Theej Txhoj

Tsis ntev tas los, kuv tau ntsib ib cov tub hluas ntxhais hluas uas los ntawm lub xeev Idaho. Ib tug ntxhais hluas uas siab zoo, nug kuv seb kuv xav hais tias qhov tseem ceeb tshaj plaws uas lawv yuav tsum ua hauv lawv lub neej tam sim no yog dab tsi. Kuv qhia tias lawv yuav tsum xyaum paub txog lub hwj chim uas los ntawm Yexus Khetos txoj Kev Theej Txhoj uas nyob hauv lawv lub neej. Hnub no, kuv yuav piav txog ib qhov los ntawm lub hwj chim ntawd uas peb txais los ntawm Yexus Khetos txoj Kev Theej Txhoj uas pab peb muaj zog tau.

Hauv Phau Ntawv Maumoos, peb nyeem txog Amoos thiab nws cov kwv tij thaum lawv mus tshaj tawm Yexus Khetos txoj moo zoo “rau ib cov neeg qus, thiab tawv thiab nyaum.”¹ Tib neeg coob tau hloov siab lees txim thiab tau txiav txim siab tso lawv cov cwj pwm phem mus. Lawv txoj kev hloov siab los ntseeg puv nkaus thiab khov khov heev, lawv tau muab lawv cov ntaj ua rog faus thiab tau khi lus rau tus Tswv tias lawv yuav tsis siv cov ntaj ua rog ntxiv li lawm.²

Tom qab, lawv ib co kwj tij uas tsis tau hloov siab lees txim los txog lawv thiab tau pib tua lawv. Cov neeg uas rau siab ntseeg no, lawv txiav txim siab tuag los ntawm cov ntaj ua ntej lawv yuav rov qab los siv lawv cov ntaj ua rog uas lawv tau faus. Lawv tus yam ntxwv ua ncaj ncees tau haj yam pab ntau tus neeg los hloov siab lees txim thiab muab lawv cov ntaj ua rog faus.³

Los ntawm Amoos, tus Tswv coj lawv tawm ntawm qhov chaw txaus ntshai mus nrog cov neeg Nifais nyob thiab lawv hloov mus hu ua cov neeg Amoos.⁴ Cov neeg Nifais tiv thaiv saib xyuas cov neeg Amoos mus tau ntau xyoos tiam sis cov tub rog ntawm cov neeg Nifais tau pib tsawg tsawg thiab lawv yuav tsum muaj neeg ntxiv.⁵

Ces cov neeg Amoos tau nyob hauv ib qhov chaw ua tseem ceeb hauv lawv lub neej. Lawv rau siab ntseeg rau lawv txoj kev khi lus hais tias lawv yuav tsis siv lawv cov ntaj ua rog. Tiam sis lawv to taub hais tias cov txiv neej yuav tsum saib xyuas thiab tiv thaiv lawv tsev neeg.⁶ Txoj kev xav li ntawd rov qab ua rau lawv xav seb puas tsim nyog tso lawv qhov kev khi lus tseg.⁷

Hilamas, lawv tus thawj coj pov thawj hwj uas muaj tswv yim paub hais tias thaum yus tsis ua raws li yus tej kev khi lus nrog tus Tswv ces yeej tsis zoo li. Ces Hilamas txais kev tshoov siab muab lwm txoj kev rau lawv. Nws hais tias, lawv cov tub tsis tau ua txhaum zoo ib yam li lawv. Thiab vim yog li no, lawv cov tub tsis tau khi lus nrog tus Tswv ib yam li lawv.⁸ Txawm tias cov tub tseem hluas los, lawv muaj zog thiab qhov tseem ceeb tshaj, lawv dawb huv. Cov tub hluas lub dag zog twb los ntawm lawv niam txoj kev ntseeg.⁹ Raws li lawv tus thawj coj uas yog lawv tus yaj saub txoj kev coj, cov tub hluas no tau pauv lawv txiv qhov chaw tiv thaiv thiab saib xyuas lawv tsev neeg thiab tsev.¹⁰

Tej yam tshwm sim los ntawm qhov kev txiav txim siab ntawd no qhia hais tias, Yexus Khetos txoj Kev Theej Txhoj pab Vajtswv cov me nyuam muaj zog. Xav txog seb cov txiv ntawd xav li cas vim lawv paub hais tias vim yog lawv txoj kev txhaum thaum ub, tam sim no lawv tsis muaj peev xwm tiv thaiv lawv cov poj niam thiab cov me nyuam thaum lub sij hawm txaus ntshai tuaj. Thaum lawv tau paub tias lawv cov tub yuav raug dab tsi thaum lawv mus ua tub rog, tej zaum cov txiv no tau quaj heev. Cov txiv yuav tsum tiv thaiv lawv tsev neeg. Txoj hauj lwm no tsis yog cov menyuam li.¹¹ Cov txiv no txoj kev tu siab tej zaum loj heev.

Ua li cas tus thawj coj ntawm lub pov thawj hwj ntshai thaum lawv rov qab xav nqa lawv raj ntaj ua rog “tsam … lawv yuav poob ntawm Vajtswv mus”?¹² Tus Tswv hais tias,” Saib seb, tus uas tau hloov siab lees txim rau nws tej kev txhaum lawm, ces twb zam txim rau tus ntawd lawm, thiab kuv, uas yog tus Tswv, yuav tsis nco ntsoov txog tej ntawd ntxiv lawm”¹³ Cov txiv rau siab ntseeg no tau hloov siab lees txim tau ntev lawm thiab lawv yog neeg dawb huv los ntawm Yexus Khetos txoj Kev Theej Txhoj, tiam sis ua li cas Hilamas qhia lawv tias lawv yuav tsum tsis txhob mus ua rog tiv thaiv lawv tsev neeg?

Yog ib qhov tseeb tseem ceeb hais tias Yexus Khetos txoj Kev Theej Txhoj muaj hwj chim ntxuav peb kom huv. Peb muaj peev xwm rais los ua neeg huv thiab tsim txiaj. Tiam sis, muaj tej lub sij hawm thaum peb txiav txim tsis zoo, ua rau peb ntsib teeb meem tom ntej. Ib qhov tseem ceeb uas yuav pab peb hloov siab lees txim tiav yog qhov uas peb yuav tsum lees tej lub txim uas kav tsis ntev thiab tej lub txim uas kav ntev. Vim lawv tau ua txhaum thaum ub, lawv lub siab xav rov qab ua txhaum dua, ces cov txiv ntawm cov neeg Amoos yuav tsum ceev faj tsam Dab Ntxwg Nyoog siv tau qhov ntawd los ntxias tau lawv.

Dab Ntxwg Nyoog yuav siv tej yam peb nco txog peb tej kev txhaum thaum ub los ntxias peb mus ua nws li. Peb yuav tsum rau siab saib xyuas kom nws ntxias tsis tau peb. Cov txiv ntawm cov neeg Amoos yog zoo li no. Txawm lawv coj ncaj ncees tau ntau xyoos lawm los, nws yog ib qhov tseem ceeb uas lawv yuav tsum tiv thaiv lawv cov ntsuj plig ntawm txoj kev xav rov qab ua txhaum li qub.

Thaum Thawj Tub Rog Maulaunais tsis ua rog, nws txib nws cov tub rog tiv thaiv tej nroog uas tsis muaj zog. “Thiab nws tau kom lawv yuav ua ib sab phab ntsa ntoo rau hauv tus kwj sab hauv; thiab lawv khawb av tawm hauv tus kwj los npog rau sab phab ntsa ntoo ntawd; … mus txog thaum lawv ua tau ib sab phab ntsa ntoo thiab av, uas siab heev ncig ib puag ncig lub nroog.”¹⁴ Thawj Tub Rog Maulaunais nkag siab hais tias txoj kev tiv thaiv tej qhov chaw uas tsis muaj zog yog ib qho tseem ceeb heev.¹⁵

Cov txiv ntawm cov neeg Amoos zoo ib yam li no thiab. Lawv yuav tsum muaj qhov chaw tiv thaiv uas siab thiab dav kom pab tau lawv tiv thaiv lawv tus kheej los ntawm lawv tej kev txhaum thaum ub. Lawv cov tub uas tau koob hmoov tau coj lub neej ncaj nceej, thiab vim li no tsis muaj lub siab uas xav ua tej kev txhaum uas lawv txiv tau ua thaum ub. Lawv tiv thaiv lawv tsev neeg tau thiab tsis ntshai tsam lawv cov sab ntsuj plig yuav raug Ntxwg Nyoog ntxias.

Txhua tus ua tau txiav txim tsis zoo tas los thiab xav tshem tawm tej yam ua lawv tau ua txhawm yuav tsum zoo siab, vim hais tias tus Tswv saib txoj kev tsis muaj zog txawv txoj kev ntxeev siab. Tus Tswv ceeb toom tias peb yuav raug txim yog peb tsis hloov siab lees txim ntawm peb txoj kev ntxeev siab,¹⁶ tiam sis thaum nws hais txog txoj kev tsis muaj zog, nws yeej hais txog txoj kev hlub tshua.¹⁷

Muaj tseeb tias cov poj koob yawm txwv ntawm cov neeg Amoos tej txiv tau qhia lawv tej yam tsis yog, tiam sis peb Leej Txiv Saum Ntuj cov me nyuam, tau muaj qhov kaj ntawm Khetos thaum lawv los ua lub neej no. Txawm lawv ua txhaum vim li cas los, lawv txoj kev txhaum ua rau lawv tus ntsuj plig muaj qhov chaw tsis muaj zog. Ces Ntxwg Nyoog siv tau qhov chaw tsis muaj zog no los ntxias tau lawv.

Zoo kawg, lawv tau los kawm txog txoj moo zoo, hloov siab lees txim, thiab los ntawm Yexus Khetos txoj Kev Theej Txhoj, pib muaj zog tshaj li qub kom tsis mloog rau Dab Ntxwg Nyoog cov lus ntxias. Tej zaum lawv lub siab tsis tau xav rov qab mus ua txhaum dua, tiam sis thaum lawv mloog lawv tus Thawj Coj ntawm lub pov thawj hwj, lawv tsis kam cia Dab Ntxwg Nyoog “dag ntxias tau lawv tej ntsuj plig, thiab yuav maj mam coj lawv mus rau hauv ntuj txiag teb tsaus.”¹⁸ Yexus Khetos txoj Kev Theej Txhoj tau ua rau lawv dawb huv, thiab yog vim lawv mloog lawv tus thawj coj ntawm lub pov thawj hwj tej lus qhia, tus Cawm Seej muaj peev xwm saib xyuas lawv thiab txhawb nqa lawv kom lawv muaj zog. Lawv txoj kev rau siab tsis xav ua txhaum tau pab tsom kwm lawv tsev neeg tshaj dua lawv tau mus ua tub rog. Vim lawv txo hwj chim mloog lus, lawv tau koob hmoov thiab tau pab foom koob hmoov rau ntau tiam neeg tom ntej.

Dab neeg no qhia peb tias tus Tswv lub siab hlub ua tau rau “tej uas tsis muaj zog rais los mus muaj zog.”¹⁹ Cov txiv no tau xa lawv cov tub mus ua rog nrog Hilamas. Txawm cov tub no tau ua rog nyuaj heev thiab txhua tus ntawm cov tub no tau raug mob, tsis muaj ib tug uas tau xiam.²⁰ Cov tub no pab cov tub rog ntawm cov neeg Nifais muaj zog. Lawv tau mloog lus thiab thaum lawv rov qab los tsev, lawv sab ntsuj plig muaj zog dua li qub. Tus Tswv foom koob hmoov, saib xyuas thiab txhawb nqa lawv tej tsev neeg.²¹ Niaj hnub nim no cov tub hluas tus yam ntxwv tau txhawb nqa coob tus uas tau nyeem Phau Ntawv Maumoos.

Peb txhua tus tau muaj tej lub sij hawm thaum peb tau txiav txim tsis zoo. Peb txhua tus yuav tsum siv Yexus Khetos txoj Kev Theej Txhoj kom pab peb dim. Peb txhua tus yuav tsum hloov siab lees txim ntawm peb txoj kev ntxeev siab. “Vim kuv, uas yog, tus Tswv yeej ntsia tsis taus tej kev txhaum li txawm yuav yog qhov me dua ntais”²² Nws ntsia tsis tau vim Nws paub peb yuav tsum ua dab tsi kom peb los ua neej zoo li Nws.

Peb coob tus tau cia peb tej cwj pwm muaj tej kev qaug zog. Los ntawm Yexus Khetos txoj Kev Theej Txhoj, peb muaj peev xwm ua tau tej chaw tiv thaiv ntawm sab ntsuj plig los tiv thaiv peb ntawm peb tej yam yuam kev thaum ub uas Dab Ntxwg Nyoog xav siv los ntxias peb. Zoo ib yam li cov txiv ntawm cov neeg Amoos tau ua. Tej chaw tiv thaiv ntawm sab ntsuj plig tau pab cov txiv ntawm cov neeg Amoos foom koob hmoov thiab pab lawv, lawv tsev neeg, lawv lub teb chaws, thiab lawv cov xeeb ntxwv. Peb muaj peev xwm ua tau ib yam li ntawd.

Ces peb yuav tsum ua dab tsi kom ua tau tej chaw tiv thaiv nyob mus ib txhis? Qhov thib ib yog peb yuav tsum siv zog hloov siab lees txim tiag tiag. Los ntawm Yexus Khetos txoj Kev Theej Txhoj, peb txhua tus los ua neeg dawb huv tau thiab peb tej kev txhaum tau raug rho tawm mus. Nco ntsoov tias kev hloov siab lees txim tsis yog ib qho uas tsim txom peb. Kev hloov siab lees txim yog ib txoj kev uas muaj kev cia siab kom coj yus mus rau kev zoo siab.

Leej Txiv Saum Ntuj tau muab tej yam uas yuav pab peb ua tau tej chaw tiv thaiv thiab kov yeej peb tej kev qaug zog. Xav txog tej lus ntuas no:

• Sib khi lus thiab txais tej kab ke rau koj tus kheej. Ces rau siab mus rau lub tuam tsev thiab txais tej kab ke rau koj cov poj koob yawm txwv.

• Qhia txoj moo zoo rau ib tug uas tsis yog ib tug mej zeej los ib tug mej zeej uas tsis tshua muaj siab ntseeg. Txoj kev qhia tej yam no pab tau nej zoo siab ua neej nyob.

• Rau siab ua nej txoj hauj lwm hauv lub koom txoos, qhov tseem ceeb yog thaum nej mus qhia tom tsev thiab mus saib xyuas tom tsev. Tsis txhob mus saib cov tsev neeg no rau 15 feeb txhua lub hlis xwb. Tiam sis rau siab ntsib txhua tus ntawm cov tsev neeg uas nej mus qhia. Ua lawv tus phooj ywg tiag tiag. Qhia lawv tias nej hlub lawv npaum li cas los ntawm tej yam nej ua rau lawv.

• Qhov tseem ceeb tshaj plaws yog, pab nej tsev neeg. Rau siab pab lawv loj hlob hauv txoj moo zoo. Nco ntsoov ua tej yam uas pab tau lawv. Siv nej lub sij hawm nrog lawv.

Hauv tej lus ntuas no, muaj ib qho zoo ib yam: rau siab pab lwm tus neeg. Thaum koj rau siab pab peb Leej Txiv Saum Ntuj Ceeb Tsheej cov me nyuam,²³ Dab Ntxwg Nyoog yuav tsis muaj hwj chim kav nej lub neej.

Vim yog nej Leej Txiv Saum Ntuj Ceeb Tsheej hlub nej heev, Yexus Khetos txoj Kev Theej Txhoj pab tau nej muaj zog heev. Qhov no, zoo ua luaj li, yom? Coob tug ntawm nej tau paub txog kev tu siab vim nej txiav txim tsis zoo, thiab nej txhua tus muaj peev xwm paub txog tus Tswv txoj kev zam txim, hlub tshua, thiab nws lub zog. Kuv paub txog tej yam no, thiab kuv ua tim khawv tias nej txhua tus txais tau tej yam no. Los ntawm Yexus Khetos lub npe, amees.