Muaj Zog Nyiaj Dhau
Los ntawm Txwj Laug Richard J. Maynes
Ntawm Cov Xya Caum Pawg Thawj Tswj Hwm
Peb yuav muaj cuab kav nyiaj mus dhau ua neeg ncaj ncees nyob ntawm seb peb muaj ib zaj lus tim khawv zoo npaum li cas thiab peb hloov siab los ntseeg ntau npaum li cas.
Txhua tag kis thaum peb sawv, peb pib ib hnub tshiab uas muaj tej teeb meem hauv lub neej no. Tej teeb meem no muaj ntau hom: teeb meem ntawm sab cev nqaij daim tawv, xiam nyiaj txiag, muaj teeb meem nrog lwm tus neeg sib raug zoo, kev cov nyom ntawm lub siab, thiab tej thaum muaj teeb meem ntawm yus txoj kev ntseeg ntuj.
Ntau yam teeb meem uas peb muaj hauv lub neej no yeej kho tau thiab kov yeej tau; tiam sis, muaj dua lwm cov uas nyuaj to taub thiab kov yeej tsis tau thiab yuav nyob rau hauv peb lub neej txog rau thaum peb tso lub neej tseg. Thaum uas peb nyiaj dhau tej teeb meem uas peb muaj cuab kav kho thiab pheej nyiaj mus dhau tej teeb meem uas peb kho tsis tau, tseem ceeb heev kom peb nco qab tias qhov uas pab peb sab ntsuj plig haj yam muaj zog yuav pab tau peb nyiaj mus dhau tej teeb meem uas peb muaj hauv lub neej no.
Cov kwv tij thiab cov muam, peb muaj ib Leej Txiv Saum Ntuj Ceeb Tsheej uas hlub peb, nws tau npaj lub neej hauv ntiaj teb no kom peb thiaj kawm tau tej yam uas peb xav tau kom peb yuav tsim nyog tau txoj sia nyob mus ib txhis nyob rau ntawm Nws xub ntiag.
Ib zaj txog tus Yaj Saub Yauxej Xamiv lub neej piav txog txoj ntsiab cai no. Tus Yaj Saub thiab nws ob peb tug khub tau raug kaw hauv lub qhov taub hauv Liberty, Missouri, rau ntau lub hli. Thaum nws raug kev tsim txom hauv lub qhov taub, tus Yaj Saub Yauxej ua siab mos taij thov tus Tswv kom ib Tsoom Haiv Neeg Ntseeg yuav tau kev pab kom dim lawv ntawm tej kev raug txom nyem. Tus Tswv teb thaum nws qhia tus Yaj Saub Yauxej, thiab peb sawv daws, tias tej kev cov nyom uas peb muaj, yog tias ua tib zoo nyiaj dhau ces, peb thiaj yuav tau tej yam zoo. Tus Tswv tau teb Yauxej zaj thov hais tias:
Kev kaj siab yuav los rau nws; nws tej kev nyuaj siab thiab nws tej kev txom nyem yuav muaj nyob ib nyuag ntus xwb;
Thiab tom qab ntawd, yog nws ua tib zoo nyiaj, Vajtswv yuav tsa nws mus nto ntuj.1
Leej Txiv Saum Ntuj Ceeb Tsheej tau npaj peb txoj hau kev hauv lub neej no kom thiaj sim tau peb tus cwj pwm. Peb yeej raug tej yam zoo thiab tej yam phem thiab muaj kev ywj siab xaiv seb peb yuav taug txoj kev twg. Xws li tus yaj saub thaum ub Xamuyees hauv Phau Ntawv Maumoos qhia hais tias, “Nej yeej muaj kev ywj pheej; nej yeej raug cia coj rau nej tus kheej; vim saib seb, Vajtswv tau muab ib qho kev paub rau nej thiab nws tau cia nej nyob ywj pheej.”2
Leej Txiv Saum Ntuj Ceeb Tsheej to taub tias vim yog peb ua neeg ntiaj teb peb yuav tsis xaiv uas qhov yog los sis qhov ncaj ncees txhua txhua lub sij hawm. Vim hais tias peb tsis zoo tag nrho thiab vim peb ua yuam kev, peb xav tau kev pab kom rov qab los nrog Nws nyob dua. Peb tau kev pab ua li ntawd los ntawm Yexus Khetos tej kev qhia, tus yam ntxwv, thiab txoj kev txi uas theej peb txhoj. Tus Cawm Seej txoj kev txi uas theej peb txhoj ua rau peb txais tau kev cawm dim thiab kev tsa nto yav tom ntej yog tias peb ua raws li txoj ntsiab cai rau kev hloov siab lees txim. Yog peb ua tib zoo hloov siab lees txim tiag tiag li, ces txoj Kev Theej Txhoj yuav pab peb ua neeg huv, hloov peb tus cwj pwm, thiab nyiaj mus dhau peb tej teeb meem.
Kev nyiaj mus dhau yog ib txoj ntsiab cai tseem ceeb hauv Yexus Khetos cov lus qhuab qhia. Nws tseem ceeb heev vim peb lub neej nyob mus ib txhis yuav zoo npaum li peb qhov peev xwm nyiaj mus dhau thaum tseem ua ncaj ncees.
Hauv 2 Nifais 31 tus yaj saub Nifais qhia peb tias tom qab peb txais tib txoj kab ke uas cawm neeg uas yog kev cai raus dej uas Yexus Khetos txais thiab ces txais yuav lub txiaj ntsim Vaj Ntsuj Plig Dawb Huv, peb yuav tsum “thawb mus lawm tom hauv ntej, nrog txoj kev ntseeg khov kho hauv Khetos, muaj ib txoj kev cia siab uas ci kawg nkaus, [thiab ces] saib seb, Leej Txiv hais li no tias: [Peb] yuav muaj txoj sia nyob mus ib txhis.”3
Yog li ntawd, yog peb yuav tsim nyog tau peb Leej Txiv Saum Ntuj Ceeb Tsheej txoj koob hmoov zoo tshaj plaws, uas yog txoj sia nyob mus ib txhis, peb yuav tsum ua tej kab ke tseem ceeb thiab pheej ua raws nraim li tej kev khi lus. Ua lwm yam lus hais, peb yuav tsum nyiaj mus dhau kom zoo.
Peb yuav muaj cuab kav nyiaj mus dhau ua neeg ncaj ncees nyob ntawm seb peb muaj ib zaj lus tim khawv zoo npaum li cas thiab peb hloov siab los ntseeg ntau npaum li cas. Thaum peb zaj lus tim khawv muaj zog thiab peb hloov siab los ntseeg rau Yexus Khetos txoj moo zoo lawm, tus Vaj Ntsuj Plig Dawb Huv yuav tshoov peb siab thaum xaiv ua li ub ua li no, yuav xav ntsoov txog Khetos, thiab yuav txhawb nqa peb txoj kev xav ua neeg ncaj ncees nyiaj mus dhau txhua yam. Yog peb zaj lus tim khawv qaug zog thiab peb tsis hloov siab los ntseeg tiag tiag ces, peb haj yam muaj feem yuav raug tej kev dag kev ntxias hauv ntiaj teb no ces thiaj yuav xaiv los ua tej yam tsis zoo.
Kuv xav piav ib zag dab neeg uas qhia tias txoj kev nyiaj mus dhau ntawm sab cev nqaij daim tawv thiab muab piv rau txoj kev nyiaj mus dhau ntawm sab ntsuj plig. Thaum kuv ua tub txib los tsev, kuv muaj cib fim ua si basketball rau ib tug nais uas nto moo thiab yog ib tug kws sau ntawv hauv ib lub tsev kawm ntawv qib siab hauv lub xeev California. Tus nais no yeej rau siab ntso pab kom cov neeg uas ua si rau nws yuav txawj txawj khiav tsis paub nkees thaum yuav pib lub caij ua si. Ib qho kev xyaum uas peb txhua tus yuav tau ua, ua ntej nws cia peb kov lub pob yog kom peb yuav khiav ntawm tej me nyuam toj ib ncig lub tsev kawm ntawd thiab yuav tsum khiav kom ceev kawg nkaus. Kuv nco qab thaum kuv xub sim mus khiav ib ncig ntawd thaum kuv nyuam qhuav ua tub txib los tsev: kuv xav tias kuv yuav tuag mus.
Kuv tau siv zog khiav ob peb lim piam kuv thiaj khiav tau ceev tshaj qhov uas tus nais teem tseg kom peb ncav cuag. Kuv zoo siab vim kuv tau khiav ib ncig ntawd thiab thaum kawg kuv tseem muaj zog txaus khiav kom ceev me ntsis thaum kuv yuav txog qhov kawg.
Yog tias yus xav ua si basketball zoo, yus yuav tsum xub txawj khiav tsis paub nkees. Yog tias yus yuav txawj khiav li ntawd yus yuav tau them ib tug nqi, thiab tus nqi ntawd yog kev mob siab ua, rau siab ntso ua, thiab tswj tau yus tus kheej. Txoj kev nyiaj mus dhau ntawm sab ntsuj plig kuj raug ib tug nqi thiab. Yeej yog tib tug nqi: kev mob siab ua, rau siab ntso ua, thiab tswj tau yus tus kheej.
Ib zaj lus tim khawv, zoo li yus lub cev, yuav tsum txawj khiav yog tias yus xav nyiaj mus dhau. Ces peb yuav ua li cas peb zaj lus tim khawv thiaj txawj khiav li no? Peb yuav tsis txawj khiav kom mus ua si basketball yog tias peb lam saib lawv ua si basketball hauv TV xwb. Tib yam li ntawd, peb yuav tsis muaj cuab kav pab peb zaj lus tim khawv muaj zog yog tias peb lam saib lub tuam rooj sab laj hauv TV nkaus xwb. Peb yuav tsum kawm thiab xyaum tej ntsiab cai hauv Yexus Khetos txoj moo zoo, thiab ces peb yuav tsum rau siab ntso sim ua neej nyob raws nraim tej ntawd. Ua li ntawd peb thiaj rais los mus ua Yexus Khetos cov pab coj, thiab ua li ntawd peb zaj lus tim khawv yuav nyiaj mus dhau.
Thaum peb muaj kev cov nyom hauv lub neej no thiab peb muaj lub siab xav ua raws li Yexus Khetos ua, peb sab ntsuj plig yuav tsum tau npaj siab ua li ntawd. Txoj kev npaj ntawm sab ntsuj plig txhais tau hais tias peb sab ntsuj plig thev taus ntev los sis muaj zog—peb sab ntsuj plig yuav txawj nyiaj mus dhau. Peb sab ntsuj plig yuav txawj nyiaj mus dhau ces peb thiaj yuav txawj xaiv qhov yog tas mus li. Peb lub siab yuav ruaj khov thiab peb yuav muaj cuab kav ua raws li txoj moo zoo qhia. Muaj ib zaug ib tug kws sau paj huam sau hais tias, “Koj yuav tsum peem los ua lub pob zeb uas tus dej txav tsis tau.”
Vim peb niaj hnub muaj kev cov nyom, tseem ceeb heev kom peb niaj hnub siv zog ua hauj lwm kom peb sab ntsuj plig haj yam muaj zog thiab. Thaum peb sab ntsuj plig haj yam muaj zog, tej yam cuav hauv ntiaj teb, thiab peb tej kev cov nyom, yuav tsis ua li cas rau peb txoj kev txawj ua neeg ncaj ncees nyiaj mus dhau.
Tej tus yam ntxwv txog tib neeg sab ntsuj plig uas muaj zog yeej los ntawm peb tsev neeg zaj keeb kwm. Los ntawm tej zaj dab neeg txog peb cov poj koob yawm txwv, peb yeej nrhiav tau cov yam ntxwv txog tej tus uas txawj txawj nyiaj mus dhau.
Ib zaj dab neeg los ntawm kuv tsev neeg zaj keeb kwm piav txog txoj ntsiab cai no. Kuv tus yawg koob Joseph Watson Maynes yug los xyoo 1856 hauv lub zos Hull, Yorkshire, Akiv teb. Nws tsev neeg tuaj koom lub Koom Txoos hauv Akiv teb thiab lawv txawm taug kev tuaj rau lub nroog Salt Lake. Nws yuav Emily Keep ua poj niam thaum xyoo 1883, thiab nkawd muaj yim tus me nyuam. Joseph raug hu mus ua tub txib thaum lub Rau Hli Ntuj xyoo 1910, thaum ntawd nws muaj hnub nyoog 53 xyoos. Vim nws tus poj niam thiab yim tus me nyuam txhawb pab nws ces, nws tau rov qab mus tim Akiv teb ua ib tug tub txib.
Tom qab nws ua tub txib zoo tau ob xyoos, nws tab tom tuam lub luv thij nrog nws tus khub mus koom Hnub Caiv Kev Kawm Vaj Lug Kub hauv lub zos Gloucester, Akiv teb, es nws lub log txawm tawg. Nws xyuas lub luv thij seb nws puas li cas. Ces thaum nws pom hais tias nws puas loj heev es yuav siv sij hawm ntev tsawv thiaj kho tau, nws qhia nws tus khub kom kav tsij mus lawm tom ntej thiab pib Hnub Caiv Kev Kawm Vaj Lug Kub es nws mam li lawv qab tuaj. Thaum nws hais li ntawd kiag, nws txawm vau hlo rau pem teb. Nws cia li tuag ntawd vim nws mob plawv nres.
Joseph Watson Maynes tsis tau pom nws tus poj niam thiab yim tus me nyuam dua hauv lub neej no. Lawv tau xa nws lub cev rov qab mus rau lub nroog Salt Lake thiab tau ua nws lub ntees tuag hauv lub tsev Waterloo Assembly Hall. Muaj ib kab lus uas Txwj Laug Anthony W. Ivins ntawm Pawg Kaum Ob tug Thwj Tim hais hauv lub ntees tuag qhia peb ib zaj lus tseem ceeb txog lub neej no, kev tuag, thiab kev nyiaj mus dhau uas hais tias: “Txoj moo zoo muab qhov no rau peb—tsis yog hais tias peb yuav tsis txawj tuag, tiam sis peb yuav kov yeej kev tuag vim peb cia siab rau txoj kev sawv rov los. … Thiab yeej yuav muaj li ntawd rau [Joseph Maynes]. … Qhov no ua rau peb zoo siab, thiab peb txaus siab thiab muaj kev xyiv fab vim peb paub tias tib neeg tso lawv lub neej no tseg thaum ua tej yam ncaj ncees, muaj kev ntseeg, thiab mob siab ua raws li lawv txoj kev ntseeg.”4
Zaj dab neeg txog kuv tsev neeg no txhib kom kuv sim ua raws li tus yam ntxwv txog kev nyiaj mus dhau thiab qhov uas kuv tus yawg koob no sab ntsuj plig muaj zog heev. Kuv kuj tau kev tshoov siab los ntawm nws tus poj niam, Emily, vim nws tseem rau siab ntseeg tom qab nws tus txiv Joseph tuag rau qhov, qhov ntawd yeej yuav yog ib lub nra hnyav rau nws ev. Nws zaj lus tim khawv muaj zog thiab nws tau hloov siab los ntseeg tiag tiag es hauv tag nrho nws lub neej nws tau rau siab ntseeg thaum nws tseem txhawb pab nws yim tus me nyuam nws ib leeg xwb.
Tus Thwj Tim Pov Lauj hais tias, “Peb cia li muab txhua yam uas thaiv peb kev thiab tej kev txhaum uas khi peb tso pov tseg, thiab peb cia li sib tw khiav ncaj nraim mus kom txog tus ciam tom kawg.”5 Txoj kev sib tw khiav uas peb tab tom khiav hauv lub neej no yog kev sib tw khiav ntev kom nyiaj mus dhau, uas muaj ntau yam thaiv peb kev. Tej yam uas thaiv peb kev yog tej kev cov nyom uas peb ntsib txhua hnub thaum peb sawv los. Peb los nyob hauv ntiaj teb no kom sib tw khiav li no, kom ua raws li txoj kev ywj siab xaiv, thiab xaiv ntawm qhov zoo thiab qhov phem. Yog tias peb yuav ua zoo thiab khiav mus txog qhov kawg thiab rov qab mus nrog peb Leej Txiv Saum Ntuj Ceeb Tsheej nyob, peb yuav tsum them tus nqi uas yog kev mob siab ua, rau siab ntso ua, thiab tswj tau yus tus kheej. Peb yuav tsum xyaum kom peb sab ntsuj plig muaj zog heev. Peb yuav tsum kho peb sab ntsuj plig kom nws txawj nyiaj mus dhau. Peb yuav tsum muaj tej zaj lus tim khawv uas pab kom peb hloov siab los ntseeg tiag tiag, ces thaum ntawd peb yuav muaj kev thaj yeeb nyab xeeb thiab lub dag lub zog uas yuav pab peb nyiaj mus dhau txhua yam teeb meem uas peb muaj.
Ces txawm koj muaj tej yam teeb meem dab tsi txhua hnub thaum koj sawv los, cia li nco qab ntsoov tias—thaum koj sab ntsuj plig muaj zog, thiab nrog rau tus Tswv txoj kev pab, thaum koj twb khiav yuav txog qhov kawg koj yuav muaj cuab kav hais tib yam nkaus li tus Thwj Tim Pov Lauj hais thaum nws hais tias:
“Nim no kuv zoo ib yam li tej khoom uas luag twb muab tso rau saum lub rooj yuav muab hlawv fij rau Vajtswv lawm, twb txog lub sij hawm uas kuv yuav tso lub ntiaj teb tseg.
“Kuv twb siv zog khiav kawg kuv lub zog lawm, kuv twb khiav mus txog qhov kawg lawm, kuv muab siab npuab Vajtswv:
“Nim no kuv yuav tau nqi zog, tej nqi zog ntawd yog tej uas Vajtswv khaws tseg rau cov neeg ncaj ncees, thaum txog hnub ntawd tus Tswv uas txiav txim ncaj ncees, nws yuav muab pub rau kuv.”6
Kuv hais kuv zaj lus tim khawv thiab zaj lus pov thawj rau nej hais tias yeej muaj peb Leej Txiv Saum Ntuj Ceeb Tsheej uas hlub peb thiab Nws muaj ib txoj kev cawm seej rau peb, uas tau coj peb los rau lub ntiaj teb no. Thov kom tus Tswv tus Ntsuj Plig yuav tshoov peb sawv daws lub siab kom peb thiaj muaj zog nyiaj mus dhau. Los ntawm Yexus Khetos lub npe, amees.