Dɛwdzi na Sunsum mu Asetsena

Mo nuambanyin na nkyerɛbaa, ndɛ mebɛpɛ dɛ yɛpɛnsapɛsam fapem a ɔyɛ adze tsitsir ma hɛn sunsum mu asetsena. Ɔyɛ fapem a obehia mbordo ber a esian horow na basabasayɛ a otwa hɛnho hyia no dɔɔ sõ.

Iyinom nye nda odzi ewiei no, ntsi onnyi dɛ ɔyɛ hɛn mu biara ahobow sɛ yehu dɛ nkɔnhyɛ ahyɛ mã a. Nkɔnhyɛfo dodow a, Isaiah, Paul, Nephi na Mormon nom kã ho no hun dɛ awerɛhow ber bi bɛba,¹ dɛ hɛn nda mu no wiadze nyina bɛyɛ begyabegya,² dɛ nyimpa “bɛyɛ ahopɛfo, … a wonnyi dɔ, … hɔn a wɔdɔ ahosɛpɛw sen Nyame,”³ na dodow bɛyɛ Satan no nkowaa a wosuo ɔsɛɛfo n’edwuma mu.⁴ Nokwar, menye ɔwo “nye …sum yi mu wiadze ahemfo, [nye] emumuyɛ esunsum a wɔwɔ sorsor na enya ntokwadzi.”⁵

Ber a amanhorow ntamu akõdzi rosɔr no, ber ehunahunafo tu hyɛ hɔn a wonnyim hwee do no, na mbrɛ prɔwee wɔ adzebiara mu fi edwumayɛ mbea dze kesi aban do bɛyɛ ntɔyɛe no, ebɛnadze na obotum aboa hɛn? Ebɛnadze na obotum aboa hɛn mu kor biara wɔ nankasa n’aperdzi nye nda a odzi ekyir yinom mu ɔhaw ketsee no ho?

Nkɔnhyɛnyi Lehi kyerɛkyerɛɛ sunsum mu asetsena fapem bi. Odzi kan, hwɛ ne gyinabew no: Nna ɔatseetsee no dɛ ɔakã nokwar asɛmpa no wɔ Jerusalem, na Ewuradze ahyɛ no dɛ ongya n’egyapadze hɔ na ɔnye n’ebusua nguan nkɔ sar no do. Ɔtsenaa asese mu na edziban a onya no wɔ kwan a ɔnam do dze rokɔ beebi a onnyim hɔ na odzii, na ɔhwɛɛ ne mba mbanyin mu beenu, Laman nye Lemuel a, wɔtsew Ewuradze ne nkyerɛkyerɛ do etua na wotu hyɛ hɔn nuanom Nephi na Sam do.

Ɔda edzi pefee dɛ, nna Lehi hyiaa otsiafo, dadwen, akomayaw, yaw, abawgura na awerɛhow. Naaso, ɔpaa mu kãa no akokodur mu na ɔanntwentweɔn ho nkyerɛkyerɛ a Ewuradze yii kyerɛɛ no: “Adasa tse ase, ama woeenya enyigye.”⁶ Susu ho! Nsɛmfua nyina mu dza nkyɛ obotum dze akyerɛ hɛn abrabɔ n’awosu na no botae wɔ ɔnnkyebo abrabɔ mu, ɔsaan mu yi kasafua enyigye!

Kwan akyew akyew na nsɔhwɛ na ɔhaw asorɔtow dodow ahyɛ abrabɔ yi mu mã. Hɛn mu kor biara enya atseetsee, ahohia na abɔwgura mber a ɔreyɛ amen hɛn. Naaso yɛwɔ ha dɛ yebenya enyigye?

Nyew! Nyiano yɛ nyew kɛsenara! Mbom obesi dɛn bɛyɛ? Ebɛnadze na yebotum ayɛ dze enya enyigye no a Ɔsor Egya wɔ ma hɛn no?

Eliza R. Snow, Wiadze mfɛndzanan Relief Society President a otsĩa ebien no, maa nyiano a pefee bi. Osian Missouri ɔman ntu nhyew nhyehyɛɛ bɔn no, a wɔdze maa hɔn wɔ awɔwber yaayaw n’ahyɛase wɔ afe 1838 mu no,⁷ wɔhyɛɛ ɔno nye Ahotseweefo binom ma woguanee fi mantɔw no mu dɛm awɔwber noara. Ewimbir bi, anafua no too Eliza n’ebusua wɔ Ahotseweefo etukɔtsenafo ndua danba bi mu. Nna hɔn a wodzii hɔn kan no eyiyi ndua nketsenketse a wɔdze ahyehyɛ ndua no mu no efi hɔ na woekuwa no dɛ nyena, ntsi nna ntokura akɛse ara yie deda ndua no ntamu a egyinabowa botum awea edua mu. Nna awɔw no n’ano yɛ yaw, na hɔn edziban akyen dzendzen.

Dɛm anafua no nyimpa 80 binom moaa hɔnho wɔ ndua danba no a ɔyɛ anamɔn 20 mbɔho ebien pɛr no. Dodow tsena ase anaa wogyina hɔ anafua no nyina dze bɔɔ hyew. Abowano dze, mbanyin kuw bi boaa hɔn ano wɔ ogya a ɔredzɛw ho anafua no nyina, a binom rotow asɔr ndwom na binom so rototo aborɔfo santom a wɔakyen. Eliza kyerɛɛw dɛ: “Ɔanntse kasa tsĩa biara—nna obiara n’enyi agye, na sɛ ehwɛ hɛn ahokekã a, nkyɛ ahɔho bɛkã dɛ yɛyɛ akwantufo enyigyefo kyɛn dɛ ambrado no ɔmantufo kuw.”

Nna Eliza n’amandzɛɛbɔ a ɔfa dɛm ewimbir mu ɔberɛ, isuro kɛse no mbom nna ɔyɛ ahomka dodow. Ɔpaa mu kã dɛ: “Nna ɔyɛ anafua a ɔyɛɛ enyigye ankasa. Nnyɛ obiara gyedɛ ahotseweefo nko na hɔn enyi botum agye wɔ gyinabew biara mu.”⁸

Ɔno nye no! Ahotseweefo hɔn enyi botum agye wɔ gyinabew biara mu. Yebotum edzi dɛw mpo ber a da no annkɔ yie, dapɛn no nnkɔ yie, anaa mpo afe no nnkɔ yie!

Mo nuambanyin na nkyerɛbaa adɔfo, hɛn abrabɔ mu enyigye a yɛtse no mmfa gyinabew a yɛwɔ mu, mbom ɔfa adzebiara a hɛn abrabɔ tsim do.

Sɛ yɛdze hɛn abrabɔ tsim Nyankopɔn No nkwagye nhyehyɛɛ do, dza President Thomas S Monson akyerɛ hɛn sesei na Jesus Christ na N’asɛmpa no do a, yebotum enya enyigye a dza orisi—anaa dza orinnsi—wɔ hɛn abrabɔ mu mmfa ho. No mu na osian Ɔno ntsi enyigye ba. Ɔno nye enyigye nyina ne farbaa. Yɛtse no Bɔronyaber ber a yɛtow, “Joy to the world, the Lord is come.”⁹ Na yetum tse no afe mu no nyina. Nda a Odzi Ekyir Ahotseweefo dze, Jesus Christ nye enyigye!

Dɛm ntsi na hɛn asɛmpakafo gya hɔn efiefi na wɔkɔbɔ N’asɛmpa no ho dawur. Nnyɛ hɔn botae nye dɛ Asɔrmba hɔn dodow bɔdɔɔ sõ. Mbom, hɛn asɛmpasomafo kyerɛkyerɛ na wonuma ¹⁰ ma wɔdze enyigye abrɛ adasa!¹¹

Dɛmara dɛ Agyenkwa no ma “asomdwee a ɔtra nteasee nyina,”¹² no. Ɔsan so ma dɛwdzi a ɔyɛ dzen, no mu dɔ na ɔtserɛ na ɔbor nyimpa n’adwen anaa ɔnnkyebo ntseasee do. Mfatoho, ɔnnkotum ayɛ yie dɛ ibenya enyigye ber a w’abofra hu amandze wɔ yarba a wonnkotum asã, anaa ber a w’edwuma efi wo nsa, anaa wo kun anaa wo yer yi wo ma. Naaso ɔno nye enyigye pɔkyee no a Agyenkwa dze ma. N’enyigye tsim hɔ daa, a ɔma hɛn awerɛhyɛmu dɛ hɛn “akotorka na amandzehu no ɔnnkɛkyɛr”¹³ na obehyira ma eesi hɛn yie.¹⁴

Afei, yebesi dɛn botum enya dɛm enyigye no? Yebotum ahyɛ ase ber a “yɛrohwɛ hɛn gyedzi ne dzikamfo nye no wiefo Jesus”¹⁵ “wɔ adwendwen biara mu.”¹⁶ Yebotum yɛdze ndaase ama No wɔ hɛn mpaabɔ mu na ber a yeresie ahyɛmudzi horow no a yɛnye Ɔno na hɛn Ɔsor Egya ayɛ no. Ber a yehu hɛn Agyenkwa yehu yie no na ber a yɛtotɔserɛ dɛ ɔmfa N’enyigye mma hɛn no, hɛn enyigye bɔdɔɔ sõ.

Tum wɔ dɛwdzi mu, na yeritsim wɔ enyigye mu no dze Nyankopɔn no tum ba hɛn abrabɔ mu. Dɛ wɔ adze nyina mu no, Jesus Christ nye hɛn fasusu kɛsenara no, “a osian dɛw a wɔdze sii n’enyim ntsi ɔsɔɔw mbeamudua no.”¹⁷ Dwen dɛm ho! Ama Ɔasɔw yaw dzendzenndzen dodow a wɔnnsɔw no wɔ asaase do da no, hɛn Agyenkwa dze n’enyim sii dewdzi do!

Na ebɛn enyigye na wɔdze sii N’enyim? Nokwar ahotsew, ayarsa, na ɔrehyɛ hɛn dzen ho enyigye kã ho, enyigye dɛ orutua hɔn a wobonu hɔnho nyina hɔn bɔn kaw, enyigye dɛ ɔreyɛ ma emi na ɔwo akɔ fie—a hɛnho atsew na yeedzi mu—dɛ yɛnye hɛn Ɔsor Awofo na ebusua ebusua bɛtsena kã ho.

Sɛ yetsim wɔ enyigye a ɔbɛba hɛn hɔ do, anaa hɔn a yɛdɔ hɔn no do a, ebɛnadze na yebotum asɔw no sesei a ɔbɛhyɛ hɛn do, ɔyɛ yaw a, ɔyɛ suro a, ɔyɛ nsisi a, anaa dza ɔnnkɛyɛ yie a?

Egya bi a nna ɔwɔ sunsum mu mbusu gyinabew bi mu no, tsiim wɔ enyigye a ewiei no noho bɛtsew na ɔafata Ewuradze ne nkyɛn—enyigye dɛ obenya fahodzi efi afɔdzi na enyimguase ho—na enyigye dɛ obenya asomdwee ho do. Dɛm ngyinado no maa no akokodur ma ɔkãa no bɔn kyerɛɛ ne yer na bishop no wɔ ne nsɛnhia wɔ ehuhuw mfonyin na n’edwambra a ɔbɔe no ekyir no. Sesei dze oridzi biribiara ne bishop etu no ho fo do dɛ ɔnyɛ no, na ɔdze n’akoma nyina reper dze asan enya ne yer dɔfo n’awerɛhyɛmu bio.

Akataasiaba bi tsiim wɔ enyigye a ɔwɔ ereyɛ krɔnngyenn wɔ ahosan ho ma ɔaboa no ma ɔsɔw n’anyɛnkofo hɔn atwetwesi, ber a ɔtwee noho fii gyinabew a ɔma atsenkã, na ndaadaa, naaso ɔyɛ sunsum mu mbusudze, ho.

Banyin bi a nna ɔtaa bu ne yer enyimtsia na ɔkekamu ebufuw mu gu ne mba do no, tsiim dɛ ɔbɛfata dɛ obenya Sunsum Krɔnkrɔn no dɛ ne daa daa nyɛnko ne enyigye no do. Dɛm ngyinae no hyɛɛ no nkuran ma ɔdze hunammunyi, ¹⁸ no a ɔataa dze noho ama no too nkyɛn, na ɔyɛɛ nsesa a ohia.

Ɔnnkyɛree na me fɛfo dɔfo bi kãa ne mfe eduonu mu nsɔhwɛ akɛse a wɔatoto no. Ɔkãa dɛ, “Mesua mbrɛ midzi dɛw wɔ amandzehu mu. Christ mu dɛwdzi amen m’amandzehu no.”¹⁹

Ebɛnadze na emi na ɔwo botum asɔw, ber a yetsim wɔ dɛwdzi a “wɔdze esi hɛn enyim no do?”²⁰ Ebɛn nnuhu na afei ɔbɛyɛ yie? Ebɛn mberɛwyɛ na ɔbɛyɛ ahoɔdzen?²¹ Ebɛn ntsea na ɔbɛyɛ nhyira?²² Ebɛn abawgura, esian mpo, na ɔbɛdan ayɛ hɛn mfaso?²³ Na ebɛn ɔsom dzen ma Ewuradze na yebotum dze ama?²⁴

Ber a yɛdze enyimia tsim Agyenkwa no do na afei yedzi no nhwɛdo do dɛ yebetsim wɔ enyigye mu no, yehia dɛ yebokwetsir ndzɛmba a obotum asɛɛ hɛn enyigye. Hom kaa Korihor, Christ otsiafo no? Orupuw atorsɛm wɔ Agyenkwa noho no, Korihor kyin mbeambea kɛpem dɛ wɔdze no baa ɔsɔfopanyin n’enyim a obisaa no dɛ: “Ebɛnadze ntsi na irikyima kontom Ewuradze n’akwan yi? Ebɛnadze ntsi na ekã kyerɛ nkorɔfo yi dɛ Christ biara remmba, dze resɛɛ hɔn adwen yi?²⁵

Biribiara a otsĩa Christ anaa Ne nkyerɛkyerɛ no bɛsɛɛ hɛn enyigye. Nyimpa ne nyansapɛ a ɔnnyɛ na wɔ abaefo nkitahodzi, mu kã ho a wɔreyɛ dza Korihor yɛɛ no pɛpɛɛpɛr.²⁶

Sɛ yɛdan wiadze ama yedze ne nhyehyɛɛ dze enya enyigye a,²⁷ yerunnhu dɛwdzi dabiarada. Ebia a wɔnnyɛ atseneneefo no benya nkãtse na ahomtsɛ dodow biara a wɔpɛ dze, naaso worinnya dɛwdzi dabiarada!²⁸ Dɛwdzi yɛ akyɛdze ma anokwafo ²⁹ Ɔyɛ akyɛdze a ofi agye enyim dɛ erobɔ mbɔdzen abɔ tsenenee bra, dɛ mbrɛ Jesus Christ kyerɛkyerɛɛ no mu.³⁰

Ɔkyerɛkyerɛɛ hɛn mbrɛ yebesi enya enyigye. Sɛ yesan mu yi Ɔsor Egya ma ɔyɛ hɛn Nyame³¹ na yetum tse nkã dɛ Agyenkwa no ne Werdambɔ no reyɛ edwuma wɔ hɛn abrabɔ mu a, dɛwdzi bɛhyɛ hɛn mã.³² Aber biara a yɛhwɛ hɛn kun anaa hɛn yer do yie na yɛkyerɛ hɛn mba kwan, aber biara a yɛdze obi ne bɔn kyɛ no anaa yɛserɛ hɔn bɔnfakyɛ no, yetum nya enyigye.

Da biara a emi na ɔwo yɛfa dɛ yɛdze celestial mbra bɔbɔ bra no, da biara a yesie hɛn ahyɛmudzi horow no na yɛboa binom ma wɔyɛ dɛmara no, dɛwdzi bɛyɛ hɛn dze.

Hom ntsie Ɔdwontofo ne nsɛm yinom no: “Medze Ewuradze esi m’enyimfa ntsi, osian dɛ ɔwɔ m’abayimfa ntsi, murunntutu. … Enyika a ɔmee wɔ [W’] enyim.”³³ Ber a yɛdze fapem yi sie wɔ hɛn akoma mu no, da biara na da kor biara botum ayɛ dɛwdzi na enyigye da.³⁴ Megye ho dase wɔ Jesus Christ ne dzin krɔnkrɔn no mu, amen.