Zion Nkyerɛbaa, Hom Nsoɛr Ahoɔdzen mu
Yɛbɛyɛ ahyɛmudzisiefo a yɛasakyer no, yehia dɛ yɛsũa asɛmpa ne nkyerɛkyerɛ tsitsir no na yenya no ho nokwar dasegye a onnhihim.
Ɔyɛ me enyigye kɛse dɛ menye mbasiamba young women, na Asɔr no mu mbaa aboa ano wɔ Conference Center yi mu Yɛsan so nyim dɛ nkyerɛbaa ekuw ekuw mpem mpem aboa ano wɔ wiadze nyina mu a wɔrohwɛ dza ɔrokɔ do yinom, na meda ase wɔ akwanya na kwan a yeenya dze abɔ mu aboa ano wɔ koryɛ na botae mu ewimbir yi.
Ɔbɛsɛ 2006 mu no, President Gordon B. Hinckley kãa kasa bi a ɔtoo ne dzin “Rise Up, O Men of God,” a wɔdze ne dzin too asɔr ndwom bi a wɔkyerɛɛw no afe 1911 mu.1 Nna ɔyɛ ɔfrɛ a wɔdze refrɛ Asɔr mu mbanyin dɛ wɔnsoɛr na wontu hɔnho mpon. Madwendwen dɛm kasa no ho ber a mobɔɔ mpaa dze hwehwɛɛ dza menye hom bɛkyɛ no.
Nkyerɛbaa, yɛtse “awerɛhow ber”2 mu. Onnyi dɛ hɛn mber yi mu gyinabew no yɛ hɛn hu. Wɔakã no dada mfe mpem pem dɛ kɔkɔbɔ na afotu ama yeetum ayɛ ahoboa. Moroni nwoma no tsir awɔtwe kã hɛn mber mu gyinabew a ɔyɛ akomatu ho asɛm pɛpɛɛpɛ. Tsir yi mu no, Moroni kã dɛ oehu hɛn nda, na akõkõekõ na ɔkõ ho nsɛm, ɔsɛɛ kɛse, ewudzi, epoobɔ kã ho, na nkorɔfo a wɔse hɛn dɛ Nyankopɔn enyim dze dza oye anaa dza omuo nnyi hɔ. Ɔkã nkorɔfo a ahantanyɛ ahyɛ hɔn mã, wɔhyehyɛ efuradze a no bo yɛ dzen, na wosi nyamesom ho atwetwe ho nsɛm. Wɔdze nkorɔfo kyerɛɛ no a wɔdze wiadze ndzɛmba akyekyer hɔnho a wɔma “ehiafo, na hɔn a wɔda adagyaw, nye ayarfo nye hɔn a woruhu amandze pa homho kɔ”3 a wobu hɔn enyi gu hɔn do.
Moroni bisa hɛn ɔkra mu nhwehwɛmu asɛmbisa—hɛn a yɛtse mber yinom mu no. Ɔse dɛ, “Ebɛnadze ntsi na ɔyɛ hom fɛr dɛ hom bɛfa Christ ne dzin ato hom do?”4 Afɔbu yi kã hɛn wiadze ne gyinabew a ɔrokɔ do wɔ ndzɛmba hun ho asɛm pɛpɛɛpɛ.
Joseph Smith—Matthew kyerɛ dɛ nda a odzi ekyir mu no “hɔn a wɔapamu eyi hɔn … dɛ mbrɛ ahyɛmudzi no tse no”5 mpo wɔbɛdaadaa hɔn. Mbasiamba, young women, na Asɔr no mu nkyerɛbaa a woenuma hɔn na wɔnye Ɔsor Egya edzi ahyɛmu no kã ahyɛmudzifo no ho. Hɛn mpo yɛannhwɛ yie a wɔdze ator nkyerɛkyerɛ bɛdaadaa hɛn.
Nkyerɛbaa, yɛrokɔ kan no menngye nndzi dɛ gyinabew no bɛsesã. Sɛ dza ɔrokɔ do no kyerɛ a, ohia dɛ yɛyɛ ahoboa ma ehum a ɔda hɛn enyim no. Ɔbɛyɛ mberɛw dɛ hɛn abaw bogura, naaso dɛ yɛyɛ ahyɛmudzi nkorɔfo no, onnhia dɛ hɛn abaw gura dabiarada. Dɛ mbrɛ Elder Gary E. Stevenson akã no, “Ɔsor Egya n’ayamuyie nhyira dɛ yɛtse awerɛhow mber mu nye dɛ yɛsan so tse mber ne mãhyɛ mber mu.”6 Asɛm no n’awerɛkyekyer no yɛ me ahomka.
President Russell M. Nelson kãa kyerɛɛ hɛn afe kor a abasen kɔ no dɛ: “Ɔsatu a otsĩa Asɔr no, ne nkyerɛkyerɛ, na hɛn abrabɔ kwan no robɔdɔɔ sõ. Osian yi ntsi, yehia mbaa a wɔwɔ ntseasee dzendzen wɔ Christ ne nkyerɛkyerɛ ho na wɔdze dɛm ntseasee no bedzi dwuma dze akyerɛkyerɛ na wɔaboa atsetse mbasantsen a wobekyir bɔn. Yehia mbaa a wobotum ehu ndaadaa wɔ no su horow nyina mu. Yehia mbaa a wonyim mbrɛ nsa si kã tum no a Nyame dze ma ahyɛmudzi-siefo no, na wɔdze awerɛhyɛmu na ayamuyie kã hɔn gyedzi ho nsɛm no. Yehia mbaa a wɔwɔ hɛn Nã Eve n’akokodur na n’enyido-adzehu no.”7
Asɛm yi ma me awerɛhyɛmu dɛ mbrɛ hɛn mber yi gyinabew no tse biara no, yɛwɔ siantsir pii a ɔwɔ dɛ yedzi dɛw na yɛnya gyedzi. Medze m’akoma nyina gye dzi dɛ hɛn nkyerɛbaa no yɛwɔ ahoɔdzen na gyedzi a ɔwɔ hɛn mu a ɔma hɛn kwan ma yedzi nda a odzi ekyir a yɛtse mu no ɔhaw no do. Akyerɛbaa Sheri Dew akyerɛw dɛ, “Megye dzi dɛ ber a yesũa dɛ yɛdze mbaa ahyɛmudzi-siefo hɔn nsakyeree nhyɛdo mu bedzi dwuma no, Nyankopɔn n’ahenman no bɛsesã ntsɛmtsɛm.”8
Yebehia ahom a yɛwɔ nyina dze asakyer na yeesie hɛn ahyɛmudzi. Yɛbɛyɛ dɛm no, ohia dɛ yɛbɛyɛ mbasiamba na mbaa a yesũa asɛmpa ne nkyerɛkyerɛ a ohia tsitsir no na yenya no nokwar ho dase a onnhihim. Ngyinado ebiasa wɔhɔ a megye dzi dɛ wɔyɛ dase dzen ne fapem na mususu dɛ ohia tsitsir ma hɛn ntseasee.
Odzi kan, yehia dɛ yɛgye Nyankopɔn hɛn Onnyiewiei Egya na Ne Ba, Jesus Christ, to mu dɛ hɛn gyedzi na hɛn nkwagye ne fapem. Jesus Christ nye hɛn Agyenkwa na Pomfo. Yehia dɛ yesũa na yɛtse No Werdambɔ na mbrɛ yebesi dze abɔ bra daa daa ase; nnuhu yɛ nhyira akɛse no mu kor a hɛn mu kor biara wɔ a ɔbɛma oetsim wɔ tseneee kwan no do. Yehia dɛ yehu Jesus Christ dɛ hɛn nhwɛdo tsitsir na fasusu a yehia dɛ yɛba bɛyɛ. Yehia dɛ yɛkɔdo kyerɛkyerɛ hɛn ebusua ebusua na adzesũafo no hɛn Egya no nkwagye nhyehyɛɛ ho asɛm, a Christ ho nkyerɛkyerɛ kã ho.
Otsĩa ebien, yehia dɛ yɛbɛtse nsanananmu nkyerɛkyerɛ, nhyehyɛɛ, etumdzi ho nsaafee ho hia ohia wɔ nda a odzi ekyir yinom mu, no ase. Yehia dɛ yenya dase dɛ Ewuradze na Ɔsaan mu yii Nkɔnhyɛnyi Joseph Smith krɔnkrɔn muara dɛ ɔmfa nsananmu yi mbra na yenhu dɛ ɔbɛhyehyɛɛ Asɔr no mu mbaa dɛ tsetseberdo Christ n’Asɔr no ne nhyehyɛɛ a nna ɔwɔ hɔ no.9
Na otsĩa ebiasa, yehia dɛ yesũa na yɛtse temple ayɛdze na ahyɛmudzi horow no ase. Temple no kitsa hɛn gyedzi krɔnkrɔn mapã no ne fapem ankasa no, na Ewuradze serɛ dɛ yɛnkɔ hɔ, yɛndwendwen, yensũa na yenya hɛnankasa hɛn ntseasee na yɛmfa mbɔ bra ankorankor. Yɛbɛtse ase dɛ ɔnam temple ayɛdze horow do, na nyamesu mu tum no da edzi wɔ hɛn abrabɔ mu10 na osian temple ayɛdze horow ntsi wɔdze Nyankopɔn no tum botum ayɛ hɛn akõntar na Ne dzin bɛda hɛn do, N’enyimnyam etwa hɛn ho ehyia, na N’abɔfoe ahwɛ hɛn do.11 Modwen ho dɛ ana yɛrotwe anohoba no tum ne nyinara rogu hɛn do a.
Nkyerɛbaa, ketseaba koraa no mpo a ɔwɔ nhyiamu yi ase no botum asoɛr wɔ gyedzi mu na oedzi dwuma tsitsir wɔ Nyankopɔn n’ahenman ne nkyekyeree mu. Mbofra hyɛ ase dɛ worinya hɔnara hɔn dasee ber a wɔrekenkan na woritsie kyerɛwsɛm no, wɔrobɔ mpaa daa daa, na woridzi sacrament no wɔ kwan a ɔtsen do. Mbofra na young women nyina botum ayɛ ebusua ewimbir fie nhyiamu na wɔdze hɔn ho ahyɛ mu ara yie. Hom botum edzi kan ebu ntwɛr ber a hom ebusua boa ano yɛ ebusua mpaabɔ. Sɛ hom efifi nndzi mu mpo a, hom ankasa hom fasusu dɛ hom dze asɛmpa no robɔ bra nokwar mu no botum enya nhyɛdo wɔ hom ebusuafo na anyɛnkofo abrabɔ do.
Asɔr no mu young women hia dɛ wohu hɔn ho dɛ ahyɛmufo etsitsir wɔ asɔfodzi-kwankyerɛ nkwagye edwuma mu na nnyɛ dɛ wɔyɛ bɔhwɛadzefo na aboafo ara. Hom kitsa ɔfrɛ horow na hɔn a wokitsa asɔfodzi nsaafee dze hom esi hɔ dɛ wondzi dwuma dɛ baanodzifo a wokitsa tum na tumdzi wɔ edwuma yi mu Sɛ hom krɔn hom frɛ no wɔ adzesũa presidencyfo mu na wɔyɛ sunsum mu ahoboa, wɔbɔmu fa apam, wɔsom hom adzesũafo, na wɔdze asɛmpa no kyerɛkyerɛ hom ho nkorkor a, nna hom reyɛ hom afamudze wɔ edwuma yi mu na wobehyira hom nye hom mfɛfo nyina.
Mbaa nyina hia dɛ wohu hɔn ho dɛ ahyɛmufo etsitsir wɔ asɔfodzi edwuma no mu. Asɔr yi mu mbaa yɛ presidentfo, apamfo, akyerɛkyerɛfo, abaguafo, nkyerɛbaa, na enãnom, na Nyankopɔn n’ahenman no nnkotum ayɛ edwuma gyedɛ yɛsoɛr na yɛdze gyedzi dzi hɛn ndwuma. Ɔtɔfabi a yehia ara dɛ yebenya ntseasee kɛsenara wɔ dza ɔbɛyɛ yie ho.
Ɔnnkyɛree na mihyiaa akyerɛbaa bi wɔ Mexico a nna ɔtse ɔdze gyedzi rokrɔn no ɔfrɛ n’asekyerɛ ase. Mfe ebiasa a ɔabasen kɔ no na wɔfrɛɛ Marffissa Maldonado no dɛ ɔnkyerɛkyerɛ Sunday School mbabun adze. Nna ɔwɔ adzesuafo 7 a nna wɔba ber a wɔfrɛɛ no no, naaso siesie ɔwɔ 20 a wɔtaa ba. Medze ahobow bisaa no dza ɔayɛ ma hɔn dodow adɔɔ sõ dɛm. Ahobrɛadze mu ara ɔkãa dɛ, “O, ɔnnyɛ mo nko ara. Adzesũafo no nyina boae.” Wɔbɔmu no, wohun akɔtrɔbɔdwefo hɔn edzin wɔ edzin krataa no mu na wɔhyɛɛ ase dɛ worobɔmu akɔ na wɔakɔ to nsa afrɛ hɔn dɛ wɔnsan mbra asɔr. Osian hɔn mbɔdzenmbɔ ntsi oenya enuma kor so.
Akyerɛbaa Maldonado buei social media bea maa n’adzesũafo no ara a wɔfrɛ no “Meyɛ Nyame ne Ba,” na ɔdze nkenyan nsɛm na kyerɛwsɛm too hɔ mpɛn pii wɔ dapɛn no mu. Ɔtaa dze edwuma na nkuranhyɛ text n’adzesũafo no Ohu dɛ ohia dɛ ɔnye hɔn dzi nkɔmbɔ wɔ akwan a wonyim papaapa no do, na ɔreyɛ edwuma. Ɔkãa no bɔkɔɔ kyerɛɛ me dɛ, “Modɔ m’adzesũafo no.” Mutum tse dɛm ɔdɔ no ber a ɔkãa hɔn mbɔdzembɔ ho asɛm kyerɛɛ me, na ne fasusu kaa me dza nyimpa kor a ɔdze Ewuradze ne mboa botum dze gyedzi na nyɛe ayɛ wɔ edwuma yi mu.
Hɛn mbabun hyia nsɛmbisa a ɔyɛ dzen daa daa, na hɛn mu pii wɔ adɔfo a wɔreper enya nyiano. Nsɛm dɛw no nye dɛ nsɛmbisa a woribisa no ne nyiano wɔ hɔ. Hom ntsie nsɛm a ɔnnkyɛree fi hɛn baanodzifo hɔ. Worutu hɛn fo dɛ yensũa na yɛntse hɛn Ɔsor Egya Ne enyigye nhyehyɛɛ no ase. Wɔkaa hɛn fapem no a ɔwɔ ebusua dawurbɔ mu no ho.12 Wɔhyɛ hɛn nkuran dɛ yɛnkyerɛkyerɛ na yɛmfa mboa yinom nyɛ esusudze mfa ntsim wɔ kwan tseabaa a no mu nkekãnkekã no do.
Bɛyɛ afe kor a abasen kɔ no, me kɛseraa enã bi a ɔwɔ mbofra nkakramba a ɔyɛɛ n’adwen dɛ ɔbɛyɛ nhyehyɛɛ dze abɔ ne mba no hɔn ho ban dze etsia nhyɛdo bɔn pii no a wohu no wɔ online na skuul ho. Dapɛn biara oyi asɛntsir, ɔtaa yɛ dza mpɛnsapɛnsamu pii aba ho wɔ online no, na ɔhyɛ mpɛnsapɛnsamu a mfaso wɔ ho ase wɔ dapɛn no mu ber a ne mbofra no botum ebisa nsɛmbisa na obotum ahwɛ no pefee dɛ wɔrenya adwenkyerɛ pɛpɛɛpɛr wɔ nsɛm a ɔtaa yɛ dzen no ho. Ɔrema ne fie ayɛ ahotɔ bea a wobisa nsɛmbisa na wonya asɛmpa nkyerɛkyerɛ a mfaso wɔ mu.
Me tseetsee dɛ yɛtse ehuu a ɔtse dɛm mu a yekwetsir mfom a ɔtɔfabi hɛn nyina yɛbɔmu kwetsir dɛ yɛbɛkyerɛkyerɛ fapem a ɔtsen. Yɛfom dɛ yɛbɛkyerɛkyerɛ hɛn young women dɛ iriyɛ ahoboa dze ayɛ enã no yɛ dza ohia kɛsenara osiandɛ yɛmmpɛ dɛ yɛfom hɔn a wɔnnwaree anaa wonntum nnwo, anaa wohu hɛn dɛ yɛbɛyɛ twann wɔ nyia yɛpɛ dɛ yɛwar no ho. Yɛhwɛ so a, yɛsan so fom dɛ yebetsĩ nwomasũa no ho hia mu osiandɛ yɛmpɛ dɛ yɛkã dɛ ɔno hia sen awar. Yekwetsir dɛ yɛpaa mu kã dɛ Ɔsor Egya kyerɛ awar mu dɛ ɔwɔ banyin na ɔbaa ntamu osiandɛ yɛmmpɛ dɛ yɛfom hɔn a wɔwɔ adapaadzeyɛ mu no. Na hɛn ho nnkɛbaa hɛn dɛ yɛbɛpensapɛnsa banyin na basia ho nsɛm anaa awardze a odzi mu nsɛm mu.
Nokwar, nkyerɛbaa, yehia dɛ yɛdze nkãtse a ɔyɛ har, naaso hom mma yɛmfa hɛn adwen da hɔ na hɛn ntseasee wɔ nkwagye nhyehyɛɛ no ho dɛ yɛdze enyimpi na tɔɔtsennyɛ sɛ ɔba no dɛ yɛrekyerɛkyerɛ hɛn mba na mbabun asɛmpa fapem etsitsir no a otwar dɛ wɔtse ase ma wɔdze eduadua wiadze a wɔtse mu no mu. Sɛ yɛannkyerɛkyerɛ hɛn mba na mbabun nokwar nkyerɛkyerɛ—na yɛannkyerɛkyerɛ no pefee a—wiadze no bɛkyerɛkyerɛ hɔn Satan n’ator.
Mepɛ Jesus Christ n’asɛmpa no, na meda ase daa daa wɔ akwankyerɛ, tum, na daa mboa a minya dɛ Nyankopɔn ne babaa ahyɛmudzinyi no. Megye dase dɛ Ewuradze dze tum nyina, akyɛdze horow na ahoɔdzen ehyira hɛn dɛ mbaa a yɛtse awerɛhow mber yinom mu ama yɛdze esiesie wiadze no ama Jesus Christ ne Mbae a Otsĩa Ebien no. Mobɔ mpaa dɛ hɛn nyina yebohu hɛn nokwar hyɛber na yɛasoɛr abɛyɛ mbaa agyedzifo na akokodurfo a hɛn Egya a ɔwɔ Sor hia hɛn dɛ yɛbɛyɛ no. Jesus Christ ne dzin mu, amen.