“Mai Tumhe Shaanti Diye Jaata Hoon”

Mere priye bahano, aaj raat hamein Parmeshwar ki Aatma ka ashish mila hai. Yeh prerna bhare sandesh in prabhaaoshaali bahan netaaon se aur sangeet ne hamare vishwaas ko atal kiya aur hamare pyaare Swarg ke Pita se kiye pavitra vachanon ko nibhaane ki ichcha ko badhaya hai. Humne Prabhu Ishu Masih ke prati hamare prem aur Unke praeshchit ke balidaan ke badhiya uphaar ki ek prashansa ko badhte mehsoos kiya hai.

Aaj raat ka mera sandesh saral hai. Hum sab ne aaj raat shaanti mehsoos ki hai. Hum sab aksar aysi shaanti apne andar, apne parivaaron mein, aur aas paas ke logon mein bhi mehsoos karna chahate hai. Prabhu ne Apne chelon ko shaanti ka vaada diya tha jab Woh unhe chodne waala tha. Usne wohi vaada humse bhi kiya hai. Magar Usne kaha ki Woh Apne tarike se shaanti dega, is sansaar ke tarike se nahin. Usne Apna shaanti dene ka tarika bataya:

“Parantu Sahayak, arthaat Pavitra Aatma, jise Pita mere naam se bhejega,woh tumhe sab baate sikhaaega, aur jo kuch maine tum se kaha hai, woh sab tumhe yaad karaega.

“Mai tumhe shaanti diye jaata hoon, apni shaanti tumhe deta hoon: jaise sansaar deta hai, mai tumhe nahin deta. Tumhara mann na ghabraae aur na dare” (John 14:26–27).

Mosiah ke beton ko shaanti ke us uphaar ki zaroorat thi jab weh Lamanitiyon ke paas mission par gaye the. Weh thode zyaada betaabi se aashwaasan ke liye prarthna kiye jab unhonne apne kaam ki mahaanta ko jaana. Aur “Prabhu apni Pavitra Aatma ke saath unke paas aaya, aur unse bola: Shaant ho. Aur weh shaant huwe” (Alma 17:10; Alma 26:27 bhi dekhiye).

Kabhi kabhi, tum anishchitta ya barkaraar chunaotiyon ka saamna karte samay shaanti ki abhilaasha karte ho. Mosiah ke beton ne Moroni ko Prabhu dwara sikhlaya paath seekh liya tha. Yeh hum sab ke liye ek maargdarshak hai: “Agar log mere paas aayenge tab mai unki kamzoriyaan unhein dikhaunga. Mai logon ko nirbalta isliye deta hoon ki weh vineet bane; aur [jo] mere saamne deen bante hai un sab par meri kripa paryaapt hoti hai; kyunki agar weh mere saamne deen bante hai aur mujhmein vishwaas karte hai, tab unke liye mai nirbal baaton ko sabal kar deta hoon” (Ether 12:27).

Moroni ne kaha ki jab usne “in shabdon ko suna,” use “shaanti mili” (Ether 12:29). Yeh hum sab ki shaanti ho sakti hai. Jo log apne nirbaltaaon ko nahin dekhte aage nahin badhte. Apne nirbaltaaon ko pehchaanna ek ashirvaad hai kyunki woh tumhe deen banaye rakhta aur Uddhaarkarta ki or modta hai. Aatma sirf tumhe shaanti nahin deta, par Woh maadhyam bhi hai jiske zariye Praeshchit tumhare andar ek badlaao laata hai. Tab nirbaltaaen balwaan ho jaati hai.

Kabhi kabhi Shaetaan tumhare vishwaas ka virodh karega; yeh Ishu Masih ke sabhi chelon ko hota hai. In aakramanon ka bachaao hai Pavitra Aatma ko apne saath rakhna. Woh Aatma tumhare aatma ko shaanti dega. Woh tumhe vishwaas ki or le jaaega. Aur Woh un samay ke yaad ko waapas laaega jab tumne Ishu Masih ke jyoti aur prem ko mehsoos kiya tha.

Yaad karna shaayad Aatma ki or se sabse anmol uphaar hoga tumhare liye. Woh “jo kuch [Prabhu ne] tumse kaha hai, woh sab tumhe yaad karaega” (John 14:26). Woh yaad shaayad ek prarthna ka jawaab hoga, ek purohiti ke dharamvidhi paane ka, tumhari gawahi ki swikriti milna, ya ek pal jab tumne Parmeshwar ke maargdarshaane waale prabhaao ko apne jiwan mein dekha. Shaayad aage chal ke jab tumhe shakti ki zaroorat hogi, Aatma tumhe yaad dilaega woh ehsaas jo tum is sabha mein mehsoos kar rahi ho. Mai prarthna karta hoon ki aysa hi ho.

Ek yaadaash jo Aatma aksar mere mann mein laati hai, woh kayi saal pehle hua tha Innsbruck, Austria, ke ek loha ke tambu mein jab hum ek saanjh ko prabhubojh sabha kar rahe the. Woh ek relgaadi ke patri ke niche tha. Wahan lagbhag ek darjan log the wahan, lakdi ke kursiyo mein baethe huwe. Un mein se kayi mahilaaen thi, kuch choti aur kuch badi. Maine abhaar ke aansu dekhe jab prabhubhoj is chote se sabha mein baata jaa raha tha. Magar jo chamatkaar mujhe achchi tarah yaad hai woh hai woh raushni jo us lohe ke tambu mein sama gaya tha aapne saath shaanti ka ehsaas laate huwe. Woh raatri ka samay tha aur wahan koi khidki nahin thi, aur to bhi kamre mein utni raushni thi jaise din ho.

Pavitra Aatma ki raushni us raat ujwal aur bahutaaish thi. Aur un Santon ke vineet dilon ke khidkiyaan ne raushni ko andar aane diya tha, jo Prabhu ke paas aaye the paapon se chama paane ke liye aur vaada karne ki Unhe hamesha yaad rakhenge. Kuch kathin nahin tha us samay Use yaad karna, aur us pavitra anubhav ki mere yaad ne aasaan kar diya uske baad ke saalon mein Unhe aur Unke Praeshchit ko yaad karna. Us din ke Prabhubhoj prarthna ka vaada ki Aatma hamare saath hoga aur is tarah raushni aur shaanti ke ehsaas laaya.

Tumhari tarah, mai abhaari raha hoon un kayi tariko ke liye jinse Prabhu ne mujhse bhent kiya Sahayak ke saath jab mujhe shaanti ki zaroorat thi. Phir bhi hamare Swarg ke Pita sirf hamare sahayta ko nahin jaanna chahate hai par hamare aage badhne ki pragati ko. “Sahayak” to sirf ek hi tarika hai jisse Pavitra Aatma ko dharamshaastra mein kaha jaata hai. Yeh ek aur hai: “Aur ab, suno, suno, mai tumse kehta hoon, apna bharosa us Aatma par rakho jo achchaai karwata hai (D&C 11:12) Zyaadatar, Woh tumse jo achchaai karwaaega mein shaamil hoga kisi aur ko Parmeshwar se shaanti paane mein madad karna.

Unke budhimaani mein, Prabhu ne tumhe Apne Girja mein sansthaaon aur kakshaaon se saath laaya hai. Usne aysa kiya taaki tum achchaai karne ki apni shakti ko badha sako. In sansthaaon mein, tumhe khaas kaarye diya jaata hai Unke liye auron ki sewa karne ko. Uddharan ke liye, agar tum ek jawaan mahila ho, tumse tumhare bishop ya tumhare Jawaan Mahilaaon ki neta ne kisi Laurel se sampark karne ko kaha hoga jo “less active” ho gayi hai. Tum use bishop ya Jawaan Mahilaaon ke neta ke milaan mein achchi tarah jaanti hogi. Shaayad tum jaanti hogi ki woh ghar ya school mein sankat mehsoos kar rahi hai and shaayad donon jagah. Tumhare neta yeh nahin jaante ki weh kyun tumse keh rahe hai usse milne ke liye, par Prabhu jaanta hai, aur Woh apne kaam Apne Aatma ke prerna ke dwara karta hai.

Tumhare koshishein safal hone mein chamatkaar ki zaroorat hai tumhare aur us jawaan mahila ke dil mein jisko tum bachane gaye the—aur iske liye Pavitra Aatma ke saath ki zaroorat hai. Aatma tumhe us less-active Laurel ko Prabhu ke nazar se dekhne ka mauka dega. Prabhu uske aur tumhare hridayon ko jaanta hai, aur Woh jaanta hai hriday ka badalna mumkin hai. Woh tum donon se Apne Aatma ke saath bhent kar sakta hai vinamrata, chama, aur prem prerit karne ke liye.

Yahi Aatma shabdon, karmon, aur dhaerye ko prerit karegi jo zaroori hai bhed ko waapas jhund mein le jaane ke liye. Aur woh Laurel kaksha ke jhund ke hridayon ko chuega taaki woh khoe huwe bhed ko prem aur swaagat karein jisse ki jab woh lautegi, use lagega woh ghar laut aayi hai.

Tumhari achchaai karne ki shakti Parmeshwar ki putriyon ke ek dal ki tarah, kaafi had tak, nirbhar hoga tumhare ekta aur prem par. Yeh ek aur shaanti ka uphaar hai jo Pavitra Aatma dwara milta hai.

Alma ne yeh samjha tha. Isliye usne logon se niwedan kiya “ki unmein aapas mein kisi bhi prakaar ka vivaad nahin hona chahiye, aur sabhi vishayon ko ek hi drishti se dekhna, ek hi vishwaas, aur ek hi baptisma hona chahiye aur sabhi ke hridayon ko ekta ke bandhan mein aur ek dusre ke prati prem ke bandhan se bandhaa hona chahiye” (Mosiah 18:21).

Ekta zaroori hai taaki hamare kaksha aur hamare parivaar mein Aatma rahe. Magar tum jaante hoge anubhav se, jaise mai jaanta hoon, ki aysa prem bhara ekta kaayam rakhna kathin hai. Iske liye Pavitra Aatma ko saath rehna hoga hamare aankhon ko kholne aur dilon par khatkhataane ke liye.

Mujhe yaad hai ek baar saat-ya aath-saal ka hamara beta khaat par itni zor se kood raha tha ki maine socha woh tut jaaega. Mujhe turant gussa mehsoos hua, aur mai jald se apne ghar ko sudhaarne mein lag gaya. Maine apne bete ko uske kaandho se pakda aur use uthaaya taaki uske aankhon mein dekh sakun.

Aatma ne mere mann mein shabdon ko rakha. Woh ek shaant aawaaz jaisi thi, par mere dil tak pahunchi: “Tum ek mahaan insaan ko pakde ho.” Maine use dulaar se khaat par waapas bitha kar maafi maanga.

Ab woh wohi mahaan insaan ban gaya jo Pavitra Aatma ne mujhe 40 saal pehle dikhaya tha. Mai anant rup se abhaari hoon ki Prabhu ne mujhe mere kathor ehsaas se bachaya tha Pavitra Aatma ko bhej kar taaki mai Parmeshwar ke ek putra ko waise dekhun jaise Woh dekhta hai.

Jo ekta hum apne parivaaron aur Girja mein taalaashte hai woh rahega jab hum Pavitra Aatma ko mauka denge hamein unke nazariye se dekhne de jab ek dusre ko dekhte hai—aur jab ek dusre ke baare mein sochte hai. Aatma Masih ke sampurn prem se dekhta hai. Mormon ke shabdon ko suno jo uddarta ko samjhata hai. Un samay ke baare mein socho jab tumne ise mehsoos kiya hai:

“Aur uddaarta ka prabhaao lamba, aur dayalu hota, aur laalach nahin karta, aur ahankaar se fulta nahin, swaarth rahit hota, aasaani se krodhit nahin hota, bura nahin sochta, paapon mein anand nahin manata parantu sachchaai mein anandit hota, sabhi kashto ko sehta hua sabhi satya baaton par vishwaas, aasha karta hua sabhi baaton mein sahansheel bana rehta hai.

“Isliye, mere priye bhaaiyo [aur mai bahano bhi kehta hoon], agar tumhare paas uddaarta nahin, tum kuch bhi nahin ho, kyunki uddaarta kabhi asafal nahin hoti. Isliye, uddaarta ko apnaao jo ki sabse badhkar hai, kyunki anye baate asafal hogi—

“Parantu uddaarta Masih ka sachcha prem hai, aur ho sada ke liye hai; aur yeh antim din par jiske paas milega, uska bhala hoga.

“Isliye, mere priye bhaaiyon [aur bahano], apne hriday ke sampurn shakti ke dwara is prem se paripurn hone ke liye Pita se prarthna karo jise ki Usne un logon ko den mein diya hai jo ki Uske Putra Ishu Masih ke sachche chelein hai; ki hum Parmeshwar ke putra [aur putriyaan] bane; ki hum jab woh prakat hoga tab hum bhi usi ke samaan honge, kyunki hum Uska vaastavik rup dekh sakenge; jisse ki hamein yeh aasha praapt hogi aur hum usi prakaar nirmal kiye jaaenge jaisa ki woh nirmal hai” (Moroni 7:45–48).

Yeh hai tumhare Swarg ke Pita ka lakshye tumhare liye, Unke anmol putriyaan. Yeh tumhare liye bahut dinon mein haasil hone waala lakshye lagega, par Unke nazariye se, tum utne door nahin ho. Isliye Woh tumhe Apne Aatma se milakar shaanti dene, protsaahit karne, aur prerit karne aata hai taaki tum haar na maano.

Mai aapko apna atal gawahi deta hoon ki Pita tumhe jaanta hai—tumhare zarooraton aur tumhara naam jaanta hai—prem karta, aur tumhare prarthnaaon ko sunta hai. Unka Priye Putra tumhe Apne kareeb bulata hai. Aur Woh Pavitra Aatma bhejega tumhe madad karne ke liye auron ki sewa karne mein Unke liye.

Ishu Masih ke Praeshchit ke kaaran, Pavitra Aatma tumhare aatma par swach aur nirmal prabhaao daalega. Uddhaarkarta ne Apne chelon se jo shaanti vaada kya tha tab tum woh mehsoos karoge. Us shaanti ke saath ek ujwal aasha aur Pita aur Unke Priye Putra ke raushni aur prem ka ehsaas aaega, jo dharti par Apna raajye Apne bhavishyevakta ko praktikaran de kar chalata hai. Mai ye gawahi Prabhu Ishu Masih ke naam se deta hoon, amen.